Waswe, Wei For Olketa Leader Story Tugeta Bae Mekem World Garem Peace?

HAO, iu laek for lukim olketa war finis? Masbi wei stap for olketa world leader savve story tugeta for finisim olketa war wea gohed lo kantri and lo world. Staka pipol tingse sapos olketa world leader waka tugeta, then olketa war savve finis. Bat maet iu feel nogud bikos no staka samting hem change. For staka handred year, olketa bigman bin mekem olketa agreement, planim olketa samting, and garem olketa meeting tugeta, bat olketa no savve stretem staka samting.

Bible storyim plande samting abaotem wei for story tugeta and for garem peace. Bible ansarem olketa kwestin hia: Nomata olketa leader story tugeta, wat nao stopem olketa for garem peace? Waswe, olketa Christian tu shud join witim olketa for help mekem peace kamap? Hao nao bae iumi garem trufala peace lo earth?

Wat Nao Stopem Olketa for Garem Peace?

Samfala story lo Bible showimaot pipol savve mek peace taem olketa story feis-tu-feis. Olsem example, Abigail story gud lo David and datwan stopem David and army blo hem for pei bak lo famili blo Abigail. (1 Samuel 25:18-35) Jesus storyim tokpiksa abaotem wanfala king wea luksavve hem no fit for winim faet, so hem sendem olketa bigman blo hem for mek peace witim olketa nara king. (Luke 14:31, 32) Tru tumas, Bible showimaot wei for pipol story tugeta savve stopem olketa faet for gohed. Bat why nao taem olketa leader hipap for story tugeta, plande taem datwan no mekem olketa for garem peace?

Bible profesi talem tru samting dat taem blo iumi bae hard tumas. From Satan rulim world, Bible sei olketa man bae “no willing for agree” and olketa bae “raf, and no laekem gud samting. Olketa bae spoelem fren bilong olketa, bighed, and praod tumas.” (2 Timothy 3:3, 4; Revelation 12:12) And Jesus talem profesi tu hao taem world hem gogo for finis, iumi bae garem “olketa war wea gohed klosap long ples wea [iumi] stap and herem nius abaotem war long olketa nara ples.” (Mark 13:7, 8) No eniwan savve denyim diswan gohed happen lo plande ples! Dastawe olketa world leader no savve mek peace nomata olketa trae for duim datwan!

Tingim disfala tru samting tu: Nomata olketa bigman maet trae hard for stopem war for kamap, each wan tingim own kantri blo olketa firstaem. Hem nao main samting wea olketa bigman lo politik tingim. So waswe, olketa Christian shud join insaed kaen samting olsem?

Waswe, Olketa Christian Shud Join Witim Politik for Help Mekem Peace Kamap?

Bible sei: “Yufala mas no trastem olketa lida blong wol ya. Ya, yufala mas no dipen long eni man, bikos olketa ya i no save sevem yufala.” (Sams 146:3, SIPB) Diswan showimaot nomata olketa leader laek mekem peace kamap, olketa no garem paoa or fit for mekem peace gohed for olowe.

Taem Pontius Pilate kotem Jesus, Jesus sei lo hem: “Kingdom bilong mi hem no bilong disfala world. Sapos hem bilong disfala world, hard for olketa wea followim mi letem olketa Jew kam tekem mi. Bat Kingdom bilong mi hem no bilong disfala world.” (John 18:36) Plande taem plan blo olketa leader for mek peace hem no savve gohed gud bikos olketa kantri heitim each other or olketa bigman lo politik selfish. Dastawe olketa tru Christian no join insaed olketa war wea gohed raonem world and wanem olketa duim for trae stretem datwan.

So waswe, datwan minim olketa Christian no interest lo olketa samting wea gohed lo world? Waswe, olketa no tingim pipol wea safa? Nomoa. Bible sei olketa tru Christian “gohed fo sore an krae” bikos lo olketa nogud samting wea happen raonem olketa. (Esikiel 9:4) Bat olketa Christian depend lo God nao for mekem peace kamap olsem hem promisim. Sapos olketa war finis, iu tingse datwan minim iumi garem peace nao? Kingdom blo God bae barava duim datwan. (Psalm 46:8, 9) Bat Kingdom blo God bae mekem evriwan wea stap lo earth feel sef and stap gud tu. (Micah 4:3, 4; Revelation 21:3, 4) No eni gavman or organization wea pipol iusim for “mek peace” savve mekem tru peace olsem for kamap.

Olketa profesi lo Bible and experience blo olketa man showimaot klia wei for trustim olketa man for mekem peace kamap bae no savve happen. Olketa wea trustim Jesus Christ and sapotim Kingdom blo God nao for mekem peace kamap bae lukim tru peace happen lo world. And olketa bae enjoyim datwan for olowe!​—Psalm 37:11, 29.