Famili and Olketa Fren
Hem no isi for staka pipol stap gud witim olketa lo famili or for garem olketa gudfala fren. Tingim samfala Bible principle wea savve helpem iumi lo diswan.
TINGIM NARAWAN
BIBLE PRINCIPLE: “Evritaem tingim olketa narawan and no tingim iufala seleva nomoa.”—Philippi 2:4.
WANEM HEM MINIM: Iumi savve stap gud witim olketa narawan sapos iumi tingim wanem iumi savve duim for olketa winim wanem olketa savve duim for iumi. Sapos iu tingim iuseleva nomoa, bae iu no gohed fren gud witim olketa narawan. Olsem example, hasband or waef wea tingim hemseleva maet gogo no faithful lo marit partner blo hem. And tu, no eniwan laek fren witim samwan wea evritaem tok praod abaotem savve blo hem or olketa samting wea hem garem. Wanfala buk sei “pipol wea tingim olketa seleva nomoa savve kasem staka problem.”
SAMTING IU SAVVE DUIM:
Helpem olketa narawan. Olketa gudfala fren trustim and evritaem redi for helpem each other. Samfala report sei staka taem pipol wea helpem narawan savve hapi.
Tingim feeling blo narawan. Iu bae tingim feeling blo samwan sapos iu minim hem. Bae iu no laek for talem toktok wea maet here olsem iu mekfani, bat hem mekem narawan feel nogud.
Taem iu minim samwan, hem isi for tingim feeling blo hem, bae iu no ting daonem hem, and tu, bae iu laek fren witim olketa wea garem difren culture or difren wei.
Spendem taem witim narawan. Wei for spendem taem witim narawan, bae mekem iu savve gud lo hem. Sapos iu laek fren gud witim samwan, storyim olketa samting wea important lo hem and wea hem warim tu. Lisin gud taem hem story. Showim iu interest taem hem storyim samting hem wari abaotem. Wanfala report sei “taem tufala fren story gud tugeta datwan savve mekem tufala evriwan hapi.”
CHUSIM OLKETA GUDFALA FREN
BIBLE PRINCIPLE: “Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.” —1 Corinth 15:33.
WANEM HEM MINIM: Pipol wea iu spendem taem witim savve affectim iu lo gudfala wei or nogud wei. Pipol wea studyim wei blo olketa man sei olketa wea iumi fren witim savve barava affectim iumi. Olsem example, sapos olketa fren blo iu smoke or olketa bae divorce, maet datwan mekem iu laek tu for duim olketa samting hia.
SAMTING IU SAVVE DUIM: Fren witim pipol wea iu tinghae and laek followim gudfala wei blo olketa. Olsem example, garem olketa fren wea kaen, showimaot respect, tingim narawan, and laek duim samting for narawan.
SAMFALA NARA BIBLE PRINCIPLE
Lukim olketa video wea storyim advaes from Bible wea helpem olketa wea marit, olketa teenager, and olketa pikinini
NO TALEM TOKTOK WEA MEKEM NARAWAN FEEL NOGUD.
“Nogud toktok kat olsem sap naef, waes toktok mekem man helti.”—PROVEBS 12:18.
KAEN LO NARAWAN.
“Man givim plande samting, bae hem garem plande moa.”—PROVEBS 11:25.
TREATIM NARAWAN LO SEM WEI WEA IU LAEKEM HEM FOR TREATIM IU.
“Samting wea iufala laekem pipol for duim long iufala, sem samting nao iufala mas duim long olketa.”—MATTHEW 7:12.