Fren Witim Pipol From Difren Ples

Why Nao Hem No Isi?

Taem iumi ting daonem pipol from nara ples and no laek fren witim olketa, bae hem hard for changem datkaen tingting. And sapos iumi fren nomoa witim pipol wea semsem olsem iumi, maet iumi tingse hao iumi ting lo samting and wanem iumi duim, hem nomoa stret.

Bible Principle

“Lovem evriwan.”—2 PETER 1:7.

Wanem nao verse hia minim? Bae iumi no garem staka fren sapos iumi lovem nomoa pipol wea semsem olsem iumi. So hem gud for fren witim olketa pipol wea difren from iumi.

Hem Gud for Fren Witim Pipol From Difren Ples

Taem iumi savve gud lo samwan, bae iumi start for minim why hem duim samting lo difren wei from iumi. And taem iumi tinghae lo wanfala fren, bae iumi no tingim olketa samting wea mekem hem difren from iumi. Bae iumi barava lovem hem and hard for ting daonem hem.

Tingim story blo Nazaré. Lo bifor hem savve ting daonem pipol wea muv kam lo kantri blo hem. Hem storyim wanem helpem hem for changem tingting blo hem. Hem sei: “Mi spendem taem witim olketa hia and waka witim olketa tu. Staka taem, pipol hia barava difren from wanem olketa narawan talem abaotem olketa. Taem iu fren witim pipol from difren ples, bae iu luksavve pipol lo evri culture garem samfala gudfala wei, and bae iu lovem and tinghae lo olketa.”

Wanem for Duim

Story witim pipol wea kam from nara kantri, tribe, or wea story lo nara languis. Iu savve

Askem olketa for story lelebet abaotem olketa.
Askem olketa for kam kaikai witim iu.
Herem story blo olketa and faendemaot wanem nao olketa interest lo hem.

Taem iumi savve samting abaotem laef blo olketa, datwan bae helpem iumi for minim olketa and tinghae lo olketa.

Wanfala Experience: Kandasamy and Sookammah (Canada)

“Mi and waef big kam lo South Africa taem gavman sei whiteman and blakman mas stap separate. Datwan mekem blakman and whiteman les lo each other. Mitufala blak, and mifala no laekem olketa white pipol bikos olketa treatim mifala nogud. Lo datfala taem, mifala no tingse datfala wei hem rong. Mifala tingse olketa whiteman nao rong.

“Mitufala disaed for duim samting for changem tingting blo mifala. Mitufala fren witim pipol wea garem difren kala skin. Mifala start for luksavve white pipol semsem olsem mifala. Mifala evriwan garem samfala problem for deal witim.

“Wantaem, wanfala whiteman and waef blo hem kam stap lo haos blo mifala for longtaem lelebet. Datwan givim mifala chance for savve gud lo olketa. Then mifala kamap gudfala fren. Bihaen datwan, mifala no fraet nao lo olketa whiteman.”