Hao Nao Bae Iu Luksavve Which Wan Nao Tru?
“Universe hem kamap seleva nomoa and bae hem gohed olsem.” —Stephen Hawking and Leonard Mlodinow, tufala scientist blo physics, 2010.
“God creatim skae and earth.”—Bible, Genesis 1:1, NWT.
Waswe, God nao creatim universe and evri samting wea laef or hem just kamap seleva nomoa? Olsem iumi lukim, wanem tufala scientist blo physics talem and firstfala toktok lo Bible hem tufala barava difren ansa for datfala kwestin. Tufala saed evriwan garem staka wea sapotim. Bat staka pipol no sure tu. Olketa debatem disfala topic lo staka buk and lo olketa pablik debate.
Olketa skul teacher blo iu maet sei universe and evri samting wea laef hem kamap seleva nomoa and no eniwan creatim. Bat waswe, olketa pruvim lo iu dat no eni Creator hem stap? Or iu maet herem olketa bigman lo religion teachim dat wanfala Creator hem stap. Bat waswe, olketa pruvim lo iu wanem olketa teachim? Or olketa askem iu for “bilivim nomoa” just bikos hem wanfala doctrine?
For sure, iu tu ting raonem datfala kwestin and maet iu feel dat hem hard for pruvim sapos wanfala Creator hem stap. And maet iu garem tu disfala kwestin, waswe hem really important for savve lo ansa?
Disfala Wekap! magasin bae storyim olketa fact wea helpem staka for pipol bilivim dat wanfala Creator hem stap. And then, bae hem storyim olketa reason why hem important for savve lo ansa abaotem hao laef lo earth hem start.