Sun Hem No Muv

LUKIM Joshua. Hem sei: ‘Sun, no muv!’ And sun hem no muv nao. Hem stap long there long midol long skae for wanfala full day. Jehovah nao mekem diswan happen! Bat bae iumi lukim why nao Joshua wantem sun for gohed for shaen.

Taem faevfala nogud king long land bilong Caʹnaan start for faet againstim olketa bilong Gibʹe·on, olketa bilong Gibʹe·on sendem wanfala man for askem Joshua for helpem olketa. Man hia hem sei: ‘Kam long mifala kwiktaem! Sevem mifala! Evri king from olketa ples long olketa hill olketa kam for faet againstim olketa servant bilong iufala.’

Joshua and olketa soldia bilong hem kwiktaem go. Olketa march for full naet. Taem olketa kasem Gibʹe·on, olketa soldia bilong faevfala king hia fraet and start for ranawe. Then Jehovah mekem olketa bigfala hail ston for foldaon from skae, and namba bilong olketa soldia wea dae from olketa hail ston hia hem winim namba wea olketa soldia bilong Joshua killim dae.

Joshua lukim hao klosap nao sun bae go daon. Hem bae dark, and plande soldia bilong faevfala nogud king bae ranawe. Dastawe Joshua prea long Jehovah and hem sei: ‘Sun, no muv!’ And taem sun hem gohed for shaen, olketa Israelite fit for winim disfala faet.

Plande moa nogud king stap long Caʹnaan wea heitim pipol bilong God. For samting olsem sixfala year nao Joshua and army bilong hem mas faet witim 31 king long datfala land. Taem olketa duim diswan finis, Joshua divaedem land bilong Caʹnaan for olketa tribe wea needim ples for stap.

Plande year go pas, and gogo Joshua dae taem hem 110 year. Taem hem and olketa fren bilong hem laef yet, olketa pipol obeyim Jehovah. Bat taem olketa gudfala man hia dae, olketa pipol start for duim olketa nogud samting and kasem trabol. Hem nao taem wea olketa really needim God for helpem olketa.