Jezebel—Wanfala Nogud Queen

BIHAEN King Jer·o·boʹam hem dae, evri king wea rulim 10-tribe kingdom bilong Israel long north olketa nogud. King Aʹhab nao hem king wea worse winim evri nara king. Waswe, iu savve why? Bigfala reason nao hem waef bilong hem, datfala nogud Queen Jezʹe·bel.

Jezʹe·bel hem no Israelite woman. Hem dota bilong king bilong Siʹdon. Hem worshipim giaman god Baʹal, and hem mekem Aʹhab and plande Israelite tu for worshipim Baʹal. Jezʹe·bel heitim Jehovah and killim dae plande profet bilong hem. Olketa narawan mas haed insaed long olketa cave mekem hem no savve killim olketa dae. Sapos Jezʹe·bel laekem eni samting, hem bae killim man dae for kasem datwan.

Wanday King Aʹhab hem sorre fogud. So Jezʹe·bel askem hem: ‘Why nao iu sorre tuday?’

Aʹhab hem sei: ‘Bikos long samting wea Naʹboth hem talem mi. Mi want for baem grape plantation bilong hem. Bat hem sei mi no savve baem.’

Jezʹe·bel hem sei: ‘No wari, mi bae kasem for iu.’

So Jezʹe·bel hem raetem samfala leta long olketa chief long taon wea Naʹboth hem stap. Hem talem olketa: ‘Mekem samfala iusles man for sei Naʹboth cursim God and king. Then tekem Naʹboth go aot from taon and sutim hem witim ston go kasem taem hem dae.’

Taem Jezʹe·bel hem savve Naʹboth hem dae, hem sei long Aʹhab: ‘Go and tekem datfala grape plantation bilong hem.’ Waswe, iu tingse Jezʹe·bel hem fit for kasem panis for barava nogud samting wea hem duim?

So, gogo, Jehovah sendem Jeʹhu for panisim hem. Taem Jezʹe·bel herem Jeʹhu hem kam, hem putim mek-ap long eye bilong hem and trae for mekem hemseleva luk naes. Bat taem Jeʹhu kam and lukim Jezʹe·bel long window, hem singaot go long olketa man insaed long haos bilong king: ‘Torowem hem go daon!’ Olketa man duim nao, olsem iu savve lukim long piksa. Olketa torowem hem go daon, and hem dae. Hem nao end bilong datfala nogud Queen Jezʹe·bel.