Chapter 9
Power bilong Resurrection Hope
1. Wanem nao olketa nambawan hope wea kamap from resurrection?
SAPOS no moa any resurrection, olketa man wea dae finis no garem any hope for stap laef moa long future. But Jehovah, from kaenfela fashion bilong hem wea yumi no fit for kasem, hem openem way for planti billion pipol wea dae finis for garem nambawan chance for enjoyim laef olawe. From diswan, yumi tu garem hapi hope for lukim moa olketa wea yumi love-im wea dae finis.—Lukim Mark 5:35, 41, 42; Acts 9:36-41.
2. (a) Wanem nao olketa way wea resurrection hem important for fulfillim purpose bilong Jehovah? (b) Long wanem taem nao resurrection hope hem wanfela important samting wea savvy strongim yumi?
2 From disfela resurrection hope, Jehovah savvy letem Satan go ahed for duim samting long olketa faithful servant bilong hem for prove-im disfela no gud toktok bilong hem, “Every samting wea man garem hem bae givim for sevem soul bilong hem.” But bae diswan no spoelem them for olawe. (Job 2:4) From Jesus hem raise ap from dae, hem fit for givim laef bilong hem olsem wanfela man front long throne bilong Father bilong hem long heven, and diswan mekem yumi kasem laef. Thru long resurrection olketa wea rul withim Kraest they join withim hem long Kingdom long heven. And for yumi everywan wea garem faith, resurrection hem samting wea strongim yumi for garem power wea winim power bilong man taem yumi kasem olketa test wea fit for killim yumi dae.
Why Hem Important long Kristian Faith
3. (a) Long wanem way nao resurrection hem wanfela “main teaching”? (b) Hao nao planti pipol ting long resurrection?
3 Hebrews 6:1, 2 hem say resurrection hem wanfela “main teaching,” hem part bilong faondeson bilong faith wea yumi needim for kamap mature Kristian. But planti pipol long world no savvy long diswan. From they no ting hae long spiritual samting, planti pipol garem living wea lukaotem hapitaem. They ting disfela laef nomoa hem only tru wan. (1 Cor. 15:32) Olketa wea followim kastom bilong religion, insaed or wea no insaed Kristendom, ting they garem soul wea no savvy dae, wea mekem them no needim resurrection. Anywan wea trae for acceptim tufela teaching olsem barava konfius and no garem any hope. Hao nao yumi savvy helpem olketa wea willing for listen?—Acts 17:32.
4. (a) Bifor man savvy ting hae long resurrection, wanem nao yu maet need for story abaot withim hem? (b) Wanem scripture nao yu bae use-im for meanim wanem nao soul? Wanem samting kasem olketa wea dae finis? (c) But waswe sapos samwan use-im wanfela Bible transleson wea maet haedem olketa truth wea stap long olketa scripture hia?
4 Bifor olketa olsem savvy ting hae long way wea resurrection hem nambawan samting, they need for meanim wanem nao soul and wanem samting kasem olketa wea dae finis. Planti taem, way for showim samfela scripture nomoa hem inaf for mekem olketa samting hia klia long man wea hangre for truth. (Gen. 2:7; Ezek. 18:4; Ps. 146:3, 4) But samfela Bible transleson distaem they haedem olketa truth hia. So maet yu need for story abaotem olketa toktok wea they use-im long olketa firstfela langwis wea they raetem Bible long hem.
5. Hao nao yu bae helpem man olsem for meanim wanem nao soul?
5 New World Translation hem really helpem yumi for duim diswan, bikos everytaem hem transletim Hebrew word neʹphesh and Greek word psy·kheʹ olsem “soul,” and appendix bilong hem garem list bilong planti scripture wea olketa word hia they stap. Otherfela Bible transleson distaem maet transletim olketa sem word hia olsem “soul” and tu olsem “animal,” “person” and “laef”; “neʹphesh bilong mi” they transletim “mi,” and “neʹphesh bilong yu” they transletim “yu.” Way for markem olketa Bible hia withim samfela old Bible transleson or withim New World Translation bae helpem student wea garem honest heart for luksavvy hao olketa word wea they use-im long olketa first langwis and wea they transletim olsem “soul” they meanim (1) olketa person, (2) olketa animal and (3) laef bilong them. But no anytaem they showim aot hao soul hem samting wea man no savvy lukim, wea savvy lusim body taem man dae and go ahed for stap laef long narafela ples.
6. (a) Why nao samfela Bible transleson distaem mekem man konfius long meaning bilong Sheol, Hades and Gehenna? (b) Hao nao yu bae use-im Bible for meanim wanem samting happen long pipol wea stap long Sheol, or Hades? Long Gehenna?
6 Long sem way, New World Translation hem everytaem transletim Hebrew word sheōlʹ olsem Sheol and Greek word haʹdes olsem Hades and geʹen·na olsem Gehenna. But samfela otherfela Bible transleson distaem they mekem man konfius taem they transletim haʹdes and geʹen·na olsem “hell,” and they use-im “grave” and “ples bilong olketa pipol wea dae finis” olsem otherfela transleson for sheōlʹ and haʹdes. Taem yumi markem samfela different Bible transleson tugeta, yumi savvy lukim hao Sheol hem semsem withim Hades. (Ps. 16:10; Acts 2:27) Taem Bible tok abaot Sheol, or Hades, grave bilong olketa man, hem story abaot way for dae, no laef. (Ps. 89:48; Rev. 20:13) Hem story tu abaot way for kam back from there thru long resurrection. (Job 14:13; Acts 2:31) But, no any hope for laef long future hem stap for olketa wea go long Gehenna, and tu Bible nating talem any samting abaot soul wea stap laef long there.—Matt. 18:9; 10:28.
7. Sapos man hem meanim gud, hao nao resurrection savvy affectim tingting and samting wea hem duim?
7 From olketa samting hia kamap klia, dae and resurrection bilong Kraest barava garem meaning. Yumi savvy helpem man for lukim wanem resurrection savvy meanim for hem and for ting hae long love wea Jehovah showim aot taem hem provide-im nambawan samting olsem. Bigfela sorry wea pipol kasem taem olketa wea they love-im they dae savvy change for kamap hapi for lukim them moa long niu world bilong God. Olketa first-century Kristian luksavvy hao datfela resurrection bilong Jesus Kraest hem wanfela faondeson stone bilong Kristian faith. They strong for witness abaot datwan and hope wea hem givim. Long sem way tu, olketa wea ting hae long hem distaem they willing for share-im disfela nambawan truth withim other pipol.—Acts 5:30-32; 10:40-43; 13:32-39; 17:31.
Use-im ‘Key bilong Hades’
8. Way wea Jesus use-im “olketa key bilong dae and bilong Hades” hem meanim wanem for olketa follower bilong hem wea spirit anointim?
8 Everywan wea bae share withim Kraest long Kingdom bilong hem long heven mas dae. But they savvy gud long toktok wea hem talem for encouragim aposol John: “Mi dae finis, but, lukim! mi stap laef olawe and olawe, and mi garem olketa key bilong dae and bilong Hades.” (Rev. 1:18) Wanem nao hem meanim? Hem story abaot samting wea kasem hem. Hem tu dae bifor. But God no leavim hem long Hades. Long mek-three day Jehovah seleva raisim hem ap for laef olsem spirit and givim hem way for no savvy dae. And tu, God givim hem “key bilong dae and bilong Hades” for hem use-im for mekem free other pipol from grave bilong olketa man and from samting wea sin bilong Adam bringim. From hem garem olketa key hia, Jesus hem fit for raisim ap olketa faithful follower bilong hem from dae. Taem hem duim diswan, hem givim olketa member bilong kongregeson bilong hem wea spirit anointim datfela nambawan present bilong laef olawe long heven, olsem Father tu givim long hem.—Rom. 6:5; Phil. 3:20, 21.
9. Wanem taem nao resurrection bilong olketa anointed Kristian wea faithful hem happen?
9 Wanem taem nao olketa faithful anointed Kristian bae kasem datfela resurrection? Datwan hem start finis. Aposol Paul say they bae raise ap ‘insaed long presence bilong Kraest,’ presence bilong hem wea start long year 1914 C.E. (1 Cor. 15:23) Taem olketa hia finisim laef bilong them long earth, they no need for wait long dae for kam back bilong Lord bilong them. Long sem taem wea they dae they raise ap long spirit, they “change, kwiktaem, olsem long taem wea eye hem kwiktaem for open and shut.” They kasem bigfela hapi, from “every samting wea they duim go followim them”!—1 Cor. 15:51, 52; Rev. 14:13.
10. Wanem nao narafela resurrection wea bae kamap, and wanem taem nao hem bae start?
10 But resurrection bilong them hem no only wan wea bae happen. From they kolem diswan “first resurrection” hem show aot narawan mas kamap bihaen. (Rev. 20:6) Olketa wea bae kasem gudfela samting from resurrection wea kamap bihaen, bae garem hapi hope bilong laef olawe long wanfela Paradaes earth. Wanem taem nao datwan bae happen? Buk bilong Revelation show aot diswan bae happen bihaen “earth and heven” bilong disfela badfela system hem finis. Datfela end bilong disfela old system hem klosap nao. Bihaen, long taem wea God markem, resurrection for laef long earth bae start.—Rev. 20:11, 12.
11. Hu nao bae insaed long sekson bilong olketa faithful wan wea raise ap for laef long earth? Why nao datwan mekem yumi hapi tumas?
11 Hu nao bae insaed long diswan? Olketa faithful servant bilong Jehovah from taem bifor kam. Midlwan long olketa hia they olketa man wea, from strongfela faith bilong them long resurrection, “they nating want for brekem faith bilong them”—for brekem faithful fashion bilong them long God for misstim no gud way for dae. (Heb. 11:35) Yumi bae hapi tumas for savvy gud long them and for herem stret from them, olketa samting wea Bible hem story lelebet abaot! Wanfela nao hem Abel, datfela firstfela faithful witness bilong Jehovah. Enoch and Noah, olketa man wea no fraet for talemaot warning message bilong God bifor Flood. Abraham, wea luk aftarem olketa angel. Moses, wea God givim hem Law long Maunt Sinai. Olketa profet wea nating fraet olsem Jeremiah, wea lukim taem Jerusalem finis every bit long year 607 B.C.E. And John the Baptizer, wea herem God seleva talemaot Jesus hem Son bilong Hem. And olketa loyal wan wea dae insaed long olketa last day bilong disfela system tu they midlwan long olketa hia.—Heb. 11:4-38; Matt. 11:11.
12. (a) Haomas pipol long Hades nao bae raise ap? (b) So hu nao insaed long olketa hia, and why nao olsem?
12 Go-go, otherfela pipol tu bae raise ap. Way wea Jesus bae use-im ‘key bilong Hades’ for olketa man hem show aot long vision wea aposol John lukim, wea they throwim Hades “go insaed long lake bilong fire.” Wanem nao datwan meanim? Datwan meanim hem bae finis every bit; hem bae finis from hem bae empty every bit. So, withim way for raisim ap olketa faithful worshiper bilong Jehovah, Jesus bae show aot mercy for bringim back from Hades or Sheol, olketa pipol wea no raeteous tu. Olketa hia bae no raise ap nomoa for kasem judgment for dae moa. Long raeteous living under long Kingdom bilong God, they bae kasem help for stretem laef bilong them for fitim olketa way bilong Jehovah. Datfela vision showim aot “scroll bilong laef” hem open, they bae garem chance for nem bilong them stap insaed long hem. Hem bae “judge-im olketa wanwan for fitim samting wea they duim” bihaen long resurrection bilong them. (Rev. 20:12-14; Acts 24:15) Dastawe, taem yumi lukluk gud long samting wea bae happen, olketa hia garem “wanfela resurrection bilong laef” and no “wanfela resurrection bilong judgment.”—John 5:28, 29.
13. (a) Hu nao bae no kasem resurrection? (b) Hao nao way for savvy long truth abaot resurrection mas affectim laef bilong yumi?
13 Tru nao, no everywan wea laef bifor bae kasem resurrection. Samfela they duim sin wea God no fit for forgivim. Olketa wea bae dae long “great tribulation,” wea klosap for kam, bae finis for olawe. (Matt. 12:31, 32; 23:33; 24:21, 22; 25:41, 46; 2 Thess. 1:6-9) Tru nao, nomata hem show aot bigfela mercy for bringim back everywan insaed Hades, resurrection no meanim yumi no need for worry abaot living bilong yumi distaem. But, hem mas muvim yumi for show aot hao yumi barava ting hae long kaenfela fashion bilong God wea yumi no fit for kasem.
Hope bilong Resurrection Hem Strongim Yumi
14. Hao nao resurrection savvy barava strongim man wea klosap long end bilong laef bilong hem?
14 Olketa wea mekem resurrection hope samting bilong themseleva savvy kasem strong from hem. Taem they klosap for dae, they savvy hao they kanduit for misstim dae, nomata wanem kaen medicine they use-im. (Eccl. 8:8) Sapos they busy long work bilong Lord and serve long loyal way withim organization bilong hem, they savvy luk long future withim strongfela hope. They savvy hao thru long resurrection and long taem wea God markem, they bae enjoyim laef moa. And datwan hem barava nambawan laef! Aposol Paul hem kolem datwan “really laef.”—1 Tim. 6:19; 1 Cor. 15:58; Heb. 6:10-12.
15. Sapos pipol wea persecutim yumi long raf way say they bae killim yumi dae, wanem nao savvy helpem yumi for keepim faithful fashion long Jehovah?
15 No just way for savvy long wanfela resurrection, but way for savvy long dat Wan wea Givim diswan hem mekem yumi fit for strong. Diswan strongim yumi for loyal long God nomata pipol wea persecutim yumi long raf way say they bae killim yumi dae. For longfela taem nao Satan hem use-im way for fraetem dae olsem samting wea mekem pipol kamap slave. But Jesus no letem way for fraet mekem hem weak daon; hem faithful long Jehovah go kasem dae. Dae bilong hem provide-im samting for mekem other pipol kamap free from way for fraet olsem. (Heb. 2:14, 15) From they garem faith long datfela samting wea hem provide-im, olketa trufela follower bilong hem they garem gudfela example olsem pipol wea keepim faithful fashion. Taem they kasem hevi, they prove-im hao ‘olketa no love-im soul bilong them’ winim way wea they love-im Jehovah. (Rev. 12:11) They wise for no trae for sevem laef bilong them distaem long way for lusim olketa Kristian principle, and bihaen they lusim hope for laef olawe. (Luke 9:24, 25) Waswe, yu garem dat kaen faith? Yu savvy garem sapos yu barava love-im Jehovah and really ting hae long resurrection hope.
Samting for Review
● Why nao man need for meanim wanem nao soul and wanem samting kasem olketa wea dae finis bifor hem savvy ting hae long resurrection?
● Hu nao wea dae finis bae kam back? Hao nao diswan mas affectim yumi?
● Hao nao resurrection hope strongim yumi?