Chapter 10
Wanfela Kingdom Wea “Bae No Savvy Finis”
1, 2. (a) Olketa samting wea happen long world everyday prove-im wanem samting, and hao nao olsem? (b) Wanem nao only answer?
OLKETA samting wea happen long world everyday barava prove-im hao olketa man nating faendem hapi taem they rejectim rul bilong Jehovah, and, trae for rulim themseleva. No any gavman bilong man bringim gudfela samting for everywan. Nomata olketa man duim barava kleva samting long saed bilong science, they no fit for aotem sin, winim sik and finisim dae for any man. But, olketa nation go ahed for mekem niufela samting wea barava no gud for faet. Raf fashion hem kamap moa big. Technology, greedy fashion and way for no care hem spoelem land, wata and air. Way wea price bilong every samting go ap hae tumas and way for no garem work for shilling mekem hem hard tumas for kasem olketa samting wea man needim for stap laef. Pipol they trae hard for faendem answer bilong every samting hia.—Eccl. 8:9.
2 Wanem nao answer? Kingdom bilong God, wea Jesus teachim olketa follower bilong hem for pray for hem. (Matt. 6:9, 10) Yumi barava hapi tumas from answer wea hem bae bringim hem klosap nao for kam!
3. (a) Long saed bilong disfela Kingdom, wanem nao happen long heven long year 1914 C.E.? (b) Why nao datwan hem important long yumi?
3 Start kam long year 1914 C.E., Kingdom bilong God wea Jesus Kraest luk aftarem hem start for rul finis.a Long datfela year, olketa samting wea Daniel lukim long vision bilong profesi they happen long heven. “Man from Taem Bifor Kam,” Jehovah God, givim Son bilong man, Jesus Kraest, “power for rul and honor and kingdom, for mekem olketa pipol, nation and langwis mas servim hem. Taem hem story abaot datfela vision, Daniel hem raet olsem: “Rul bilong hem bae go ahed for olawe, and kingdom bilong hem bae no savvy finis.” (Dan. 7:13, 14) Thru long disfela Kingdom nao God bae givim long pipol wea love-im raeteous fashion staka gudfela samting for enjoyim, from diswan nao purpose bilong hem taem hem putim firstfela dadi and mami bilong yumi insaed Paradaes.
4. Wanem nao olketa samting abaot Kingdom wea yumi barava interest long them, and why nao olsem?
4 Olketa wea loyal for stap under long datfela Kingdom they barava interest long every part bilong disfela gavman and work bilong hem. They want for savvy wanem samting hem duim distaem, wanem hem bae duim long future and wanem they need for duim. They lukluk gud, and taem they duim olsem, way wea they ting hae long datwan hem grow and they readyim themseleva for talem other pipol abaotem.—Ps. 48:12, 13.
Way for Lukluk Gud wea Muvim Heart
5. (a) Hao nao olketa Scripture showim aot rul bilong hu nao Kingdom bilong Messiah hem kam aot from? (b) So hao nao samting wea yumi learnim abaotem datfela Kingdom hem affectim yumi?
5 Wanfela firstfela samting wea show aot taem man lukluk gud long diswan, hem hao disfela Kingdom bilong Messiah hem kam aot from rul bilong Jehovah seleva. Hem nao givim “rul and honor and kingdom” long Son bilong hem. Dastawe, bihaen disfela Kingdom start for rul, hem fitim olketa voice long heven for say: “Kingdom bilong world hem kamap kingdom bilong Lord bilong yumi [Jehovah God] and Kraest bilong hem, and hem [Jehovah] bae rul olsem king for olawe and olawe.” (Rev. 11:15) So every samting wea yumi lukim long disfela Kingdom and samting wea hem duim, mekem yumi kamap moa klos long Jehovah. Hem mekem yumi want for stap under long rul bilong hem for olawe.
6. Why nao yumi barava interest long way wea Jesus Kraest hem mek-tu ruler bilong Jehovah?
6 Hem gud tumas from Jehovah hem putim Jesus Kraest long throne olsem mek-tu ruler bilong Hem! Olsem Nambawan Workman wea God use-im for workim earth and man, Jesus savvy long olketa samting wea yumi needim winim anywan long yumi. And tu, hem showim aot from start bilong history bilong olketa man hao hem ‘laekem tumas olketa son bilong man.’ (Prov. 8:30, 31; Col. 1:15-17) Datfela love hem big tumas dastawe hem kam long earth and givim laef bilong hem olsem wanfela ransom wea savvy aotem sin for olketa man. So, hem mekem way for yumi kamap free from sin and dae, and chance for kasem laef olawe.—Matt. 20:28.
7. (a) Long way wea different from rul bilong any man, why nao disfela gavman bae stand strong? (b) Long wanem way nao “faithful and wise slave” they join withim datfela gavman long heven?
7 Disfela gavman hem wanfela strongfela gavman. Way wea hem savvy stand strong hem show aot long way wea Jehovah seleva kanduit for dae. (Hab. 1:12; Ps. 146:3-5, 10) Long way wea different from olketa man wea king, Jesus Kraest, dat wan wea God givim hem power for rul, hem no savvy dae tu. (Rom. 6:9; 1 Tim. 6:15, 16) Olketa 144,000 wea bae rul withim Kraest long olketa throne long heven, they olketa loyal servant bilong God wea kam aot from “every tribe and langwis and pipol and nation.” Olketa tu bae no savvy dae. (Rev. 5:9, 10; 1 Cor. 15:42-44, 53) Planti long olketa they stap long heven finis, and remnant bilong them wea stap long earth they nao “faithful and wise slave” class, wea loyal for mekem olketa samting bilong datfela Kingdom kamap moa big long hia.—Matt. 24:45-47.
8, 9. (a) Wanem nao olketa samting wea divaedem and spoelem pipol wea Kingdom bae finisim? (b) So, sapos yumi no want for kamap enemy bilong Kingdom bilong God, wanem nao olketa organization and work wea yumi mas stap klia long them?
8 Klosap nao, long taem wea Jehovah markem, olketa power bilong hem for finisim every samting bae klinim disfela earth. They bae finisim for olawe olketa man wea choose for no savvy long God, wea no want for luksavvy long rul bilong hem, and wea tok spoelem olketa loving samting wea hem provide-im thru long Jesus Kraest. (2 Thess. 1:6-9) Diswan hem day bilong Jehovah, taem for hem showim aot klia hem nao Sovereign bilong Universe.
9 Every giaman religion, and every gavman bilong man and olketa army bilong them tu, wea badfela ruler bilong disfela world bossim, bae finis for olawe. Everywan wea show aot they part long disfela world from they aftarem living wea ting long seleva, wea no honest, and wea garem dirty living bae dae. Satan and olketa demon bilong hem bae no affectim moa olketa man wea stap long earth, they bae kanduit for duim any samting for wan thousand year. Diswan bae mekem everywan wea love-im raeteous fashion they hapi tumas!—Rev. 18:21, 24; 19:11-16, 19-21; 20:1, 2.
Olketa Goal bilong Hem—Hao They Bae Fulfill
10. (a) Hao nao Kingdom bilong Messiah bae fulfillim purpose bilong Jehovah for disfela earth? (b) Wanem nao diswan bae meanim for pipol wea stap long earth long datfela taem?
10 Disfela Kingdom bilong Messiah bae fulfillim every bit firstfela purpose bilong God for disfela earth. (Gen. 2:8, 9, 15; 1:28) Kam kasem distaem, man hem fail for duim datfela purpose. But, “disfela earth wea bae kam for olketa man for stap insaed” hem stap under long Son bilong man, Jesus Kraest. Everywan wea winim judgment bilong Jehovah for disfela old system bae work withim wan mind under long Kraest olsem King, they bae hapi for duim any samting wea hem talem for mekem earth kamap wanfela Paradaes everywea. (Heb. 2:5-9) Every man bae enjoyim work bilong hand bilong them and kasem gudfela samting every bit from staka samting long disfela earth.—Ps. 72:1, 7, 8, 16-19; lukim Isaiah 65:21, 22.
11. (a) Hao nao way for perfect long mind and body bae kamap for pipol wea stap under long datfela Kingdom? (b) Wanem nao bae insaed long diswan?
11 God create-im Adam and Eve long perfect way, and purpose bilong God nao for earth fulap withim olketa pikinini bilong them and for they enjoyim perfect laef long mind and body. Under long rul bilong datfela Kingdom, datfela purpose bae kamap tru long nambawan way. Diswan needim way for aotem every samting wea kamap from sin, so for duim datwan Kraest bae serve olsem King and olsem Hae Priest tu. Long patient way hem bae helpem olketa wea obey and stap under long hem for kasem gudfela samting from sakrifaes bilong laef bilong hem olsem wanfela man. Eye bilong blind pipol bae open. Ear bilong deaf pipol bae open tu. Body wea olo or sik hem spoelem, bae kamap gud winim taem man hem pikinini. Man wea weak from hem sik for longfela taem, bae kamap strong moa. Day bae kam wea no anywan bae need for say, “Mi sik,” bikos pipol wea fraet long God bae free from hevi bilong sin and badfela samting bilong hem.—Lukim Isaiah 33:22, 24; 35:5, 6; Job 33:25; Luke 13:11-13.
12. (a) Wanem moa man needim for kamap perfect? (b) Hao nao hem bae kasem datwan, and wanem nao bae kam aot from datwan?
12 But, way for kamap perfect, hem meanim moa samting winim way for garem gudfela body and mind. And tu, hem for showim aot olketa fashion bilong Jehovah long proper way, bikos God create-im man ‘olsem God, followim fashion bilong hem.’ (Gen. 1:26) Dastawe, man needim planti education for kamap olsem. Diswan hem wanfela Niu World wea “raeteous fashion bae stap,” so, olsem profet Isaiah hem profesi, “raeteous fashion nao samting wea pipol long datfela gudfela land bae learnim.” (2 Pet. 3:13; Isa. 26:9) Disfela fashion lead go long peace—midlwan long pipol bilong every nation, midlwan long pipol wea fren gud tugeta, insaed long famili and, winim everywan, withim God. (Isa. 32:17; Ps. 85:10-13) Olketa wea learnim raeteous fashion bae go ahed for learnim will bilong God for them. Taem love for olketa way bilong Jehovah barava go insaed heart bilong them, they bae followim olketa samting hia long every part bilong laef bilong them. Perfect man Jesus hem say, ‘Everytaem, mi duim olketa samting wea mekem Father bilong mi hapi.’ (John 8:29) Taem every man they duim diswan, living bae gud tumas!
Olketa Samting wea Fulfill Finis
13. Use-im olketa question on top for mek hae long olketa samting wea Kingdom duim finis and samting wea yumi mas duim distaem.
13 Olketa nambawan samting wea Kingdom duim they show aot klia long pipol wea garem faith. Olketa question and Scripture long daon bae helpem yu for rememberim samfela samting hia, and olketa samting wea pipol wea stap under long datfela Kingdom savvy duim and mas duim distaem:
Hu nao first wan wea King hem go againstim, and wanem nao happen from datwan? (Rev. 12:7-10, 12)
Way for hipim ap olketa lastfela member bilong wanem grup nao go ahed kwiktaem bihaen Kraest kamap king? (Matt. 24:31; Rev. 7:1-4)
Long Matthew 25:31-33, wanem narafela work nao Jesus say hem bae duim bihaen hem kamap king and bifor hem finisim every bit badfela pipol?
Hao nao they duim disfela work? Hu nao share long diswan? (Matt. 24:14; Ps. 110:3; Rev. 14:6, 7)
Why nao olketa long politik and religion wea againstim, they no savvy stopem diswan? (Acts 5:38, 39; Zech. 4:6)
From work for teachim pipol hem go ahed, wanem nao olketa change wea happen insaed long laef bilong pipol wea stap under long rul bilong datfela Kingdom? (Isa. 2:4; 1 Cor. 6:9-11)
Way wea Kingdom Bae Stand Strong
14. (a) Hao long nao Kraest bae rul? (b) Wanem nao hem bae duim long datfela taem?
14 Bihaen Satan and olketa demon bilong hem go insaed hol wea deep tumas, Jesus Kraest withim 144,000 wea rul withim hem bae rul for wan thousand year. (Rev. 20:6) Insaed long datfela taem olketa man bae kamap perfect. Every gavman and power wea againstim Jehovah bae finis every bit. Bihaen hem duim datwan, Jesus bae givim back Kingdom long Father bilong hem, “mekem God mas kamap every samting long everywan.”—1 Cor. 15:24, 28.
15. Long wanem way nao disfela Kingdom bae ‘no savvy finis’?
15 There nao, position bilong Jesus ovarem earth bae change. Nomata olsem, rul bilong hem bae “go ahed for olawe” and Kingdom bilong hem “bae no savvy finis.” (Dan. 7:14) Long wanem way? Long way wea power for rul bae no go long hand bilong other pipol wea garem different goal. Olketa samting wea datfela Kingdom duim bae ‘no savvy finis.’ Samting wea Kingdom duim for vindicate-im nem bilong Jehovah and purpose bilong hem for disfela earth bae stap olawe.
[Footnote]
a Lukim buk “Let Your Kingdom Come,” page 127-139.
Samting for Review
● Why nao Kingdom bilong God hem only answer for olketa problem bilong olketa man? Wanem taem nao hem start for rul?
● Wanem samting nao yu barava laekem abaot Kingdom bilong God and samting wea hem bae duim? Why nao olsem?
● Wanem samting wea Kingdom duim nao yumi lukim finis? Hao nao yumi share long diswan?
[Piksa long page 84, 85]
Raeteous fashion nao samting wea pipol bae learnim