Chapter 11
‘Go Ahed for Lukaotem Kingdom Firstaem’
1. (a) Why nao, long 1,900 year wea go past finis, Jesus say for lukaotem Kingdom firstaem? (b) Wanem question nao yumi mas askim yumi seleva?
WINIM 1,900 year wea go past finis, long wanfela tok wea hem givim long Galilee, Jesus encouragim olketa wea listen for: “Go ahed for lukaotem kingdom firstaem and raeteous fashion bilong hem.” But why nao olsem? Waswe, taem wea Kraest bae kamap king hem planti hundred year long future yet? Yes. But datfela Kingdom bilong Messiah nao bae vindicate-im holy nem bilong Jehovah and fulfillim nambawan purpose bilong hem for earth. Anywan wea really luksavvy long way wea diswan hem important bae mekem Kingdom first samting long laef bilong hem. Datwan hem tru for olketa long first century, and for distaem tu, from Kingdom hem go ahed for rul finis. Waswe, living bilong yu show aot yu lukaotem Kingdom bilong God firstaem?—Matt. 6:33.
2. Wanem nao olketa samting wea planti pipol trae hard for aftarem?
2 Planti pipol they moa interest long otherfela samting. They trae hard for aftarem olketa richfela samting and kaleko, kaikai and otherfela material samting and hapitaem. (Matt. 6:31, 32) Living bilong them show aot they busy tumas withim samting bilong seleva and hapitaem. Long living bilong them, they putim God olsem mek-tu—sapos they believe long hem.
3. (a) Wanem richfela samting nao Jesus encouragim olketa disaepol bilong hem for lukaotem, and why nao olsem? (b) Why nao they no need for worry tumas long material samting?
3 But Jesus givim disfela kaonsel long olketa disaepol bilong hem: “Yufela no hipim ap richfela samting long earth,” bikos no any samting olsem savvy stap olawe. “But,” hem say, “hipim ap richfela samting long heven,” long way for servim Jehovah. Hem encouragim olketa follower bilong hem for keepim eye bilong them “simple,” tingting strong long wanfela samting nomoa, hem nao for duim will bilong God. Hem say olsem long them, “Yufela no savvy slave for God and for Rich samting.” But waswe long olketa material need—kaikai, kaleko and ples for stap? “Yufela no worry,” Jesus kaonselem them. Hem talem them for ting long olketa bird—God feedim them. Hem encouragim olketa follower bilong hem for learn from olketa flower—God givim them kaleko wea luk nice tumas. Waswe, olketa servant bilong Jehovah wea garem savvy they winim olketa samting hia? “Go ahed for lukaotem kingdom firstaem and raeteous fashion bilong hem,” Jesus hem say, “and yufela bae kasem olketa otherfela samting tu.” (Matt. 6:19-34) Waswe, yu believim datwan? Waswe, samting yu duim showim aot datwan?
No Letem Any Samting Killim Dae Kingdom Truth
4. Sapos man ting hae tumas long olketa material samting, wanem nao maet kam aot from diswan? Givim example.
4 Sapos wanfela man hem worry tumas long olketa material samting, diswan savvy spoelem hem. Nomata hem say hem interest long Kingdom, sapos insaed long heart bilong hem, hem putim otherfela samting firstaem, diswan bae killim dae Kingdom truth. (Matt. 13:18, 19, 22) For example, wan taem wanfela young ruler wea rich hem askim Jesus, “Wanem nao mi mas duim for kasem laef olawe?” Samting wea hem talem taem Jesus answerim hem show aot hem garem klinfela living and deal withim other pipol long gudfela way. But hem ting hae tumas long olketa material samting bilong hem. Hem no willing for let go long olketa samting hia for kamap wanfela follower bilong Kraest. So hem misstim chance wea fit for mekem hem kamap wanfela ruler withim Kraest long Kingdom long heven. Olsem Jesus say long datfela taem: “Hem bae hard tumas for olketa wea garem shilling for go insaed long kingdom bilong God!”—Mark 10:17-23.
5. (a) Wanem kaen samting nao Paul encouragim Timothy for satisfy long hem, and why nao olsem? (b) Hao nao Satan use-im “way for love-im shilling” olsem wanfela trap wea savvy spoelem man?
5 Planti year bihaen, aposol Paul raet long Timothy, wea stap long Ephesus, wanfela richfela taon bilong bisnis. Hem tok moa long hem: “Yumi no bringim any samting insaed long world, and yumi no savvy tekem aot any samting tu. So, sapos yumi garem kaikai and kaleko, yumi mas satisfy long olketa samting hia.” Way for work for provide-im “kaikai and kaleko” for yumi and famili bilong yumi hem stretfela samting. But Paul givim warning olsem: “Olketa wea wantim tumas for kamap rich they fall daon long test and trap and planti kranky and no gud tingting, wea go-go hem spoelem them every bit.” Satan hem kleva tumas. Firstaem maet hem sweetim man long olketa smallfela samting. Bihaen hem putim moa hevi—maet chance for garem bigfela work wea hem savvy kasem moa shilling, but wea meanim hem mas use-im taem wea hem markem finis for olketa spiritual samting. Sapos yumi no lukaot, “way for love-im shilling” savvy spoelem olketa barava important samting bilong Kingdom. Olsem Paul talem, “From they barava love-im tumas [shilling] samfela they lusim faith and from diswan they kasem staka pain.”—1 Tim. 6:7-10.
6. (a) For mekem yumi no fall daon long trap, wanem nao yumi mas duim? (b) Waswe, yumi fit for duim, taem yumi tingim saed bilong shilling long world distaem?
6 Withim trufela love for Kristian brata bilong hem, Paul encouragim Timothy: “Ranawe from olketa samting hia,” and, “Faetem nambawan faet bilong faith.” (1 Tim. 6:11, 12) Yumi need for work hard sapos yumi want for stap klia long way for followim living bilong world raonem yumi wea ting hae long material samting. But sapos yumi really work hard for followim faith bilong yumi, Jehovah bae nating savvy lusim yumi. Nomata kost bilong every samting kamap hae tumas and way for no garem work for shilling kamap big, hem bae mek sure yumi garem samting wea yumi really needim.—Heb. 13:5, 6.
Olketa First Disaepol Showim Aot Example
7. Taem Jesus sendem olketa aposol for preach long Israel, wanem instruction nao hem givim long them? Why nao diswan hem fitim?
7 Bihaen Jesus trainim gud olketa disaepol bilong hem, hem sendem them long Israel for preachim gud nius. “Kingdom bilong heven hem kam klosap.” Datwan hem nambawan message! Jesus Kraest, datfela Messiah King, hem stap midlwan long them. From olketa aposol they givim themseleva for duim service bilong God, Jesus encouragim them for trustim way wea God bae luk aftarem them. So hem say: “No karem any samting for go-go bilong yufela, no tekem any stick or basket kaikai, or bred or silver shilling; or no tekem tufela kaleko. But taem yufela go insaed long wanfela haos, stap long there and go from there.” (Matt. 10:5-10; Luke 9:1-6; 10:4-7) Jehovah bae mek sure they kasem samting wea they needim thru long olketa otherfela Israelite brata bilong them, wea garem kastom for welkamim olketa stranger.
8. (a) Why nao Jesus talem them different instruction taem hem klosap for dae? (b) Nomata olsem, wanem nao mas first samting long laef bilong them?
8 Bihaen, taem hem klosap for dae, Jesus talem olketa aposol bilong hem hao taem they go ahed for duim work, olketa samting bae change. From gavman bae againstim them, pipol long Israel bae no barava welkamim them. And tu, klosap nao they bae tekem message bilong Kingdom long olketa Gentile kantri. So distaem they mas tekem wanfela “paos” and wanfela “basket kaikai.” Nomata olsem, they mas go ahed for lukaotem Kingdom bilong Jehovah firstaem and raeteous fashion bilong hem, from they sure God bae blessim hard work bilong them for kasem kaikai and kaleko.—Luke 22:35-37.
9. (a) Hao nao Paul keepim Kingdom olsem first samting long laef bilong hem? (b) Hao nao hem kasem olketa material samting wea hem needim? (c) Wanem kaonsel nao hem givim long other pipol abaot olketa samting hia?
9 Aposol Paul givim gudfela example long way for followim kaonsel bilong Jesus. Paul putim ministry olsem main samting long laef bilong hem. (Acts 20:24, 25) Taem hem go long wanfela ples for preach, hem luk aftarem olketa material need bilong hem long way for mekem tent. Hem no ting other pipol nao bae luk aftarem hem. (Acts 18:1-4; 1 Thess. 2:9; 1 Cor. 9:18) But hem acceptim way wea pipol show aot kaenfela fashion long hem and givim olketa present for show aot love and way wea they ting hae long work bilong hem. (Acts 16:15, 34; Phil. 4:15-17) Hem no encouragim olketa Kristian man and woman for lusim olketa famili responsibility bilong them mekem they savvy go preach, but hem encouragim them for deal withim olketa different responsibility bilong them long balance way. Hem kaonselem them for work withim hand bilong them, for love-im famili bilong them and share long bigfela way withim other pipol. (Eph. 4:28; 2 Thess. 3:7-12; Titus 2:3-5) Hem encouragim them tu for putim trust, no long olketa material samting, but long God and for use-im laef bilong them long way wea show aot they barava meanim wanem nao olketa important samting long laef. For fitim olketa teaching bilong Jesus, datwan meanim way for lukaotem Kingdom bilong God firstaem and raeteous fashion bilong hem.—Phil. 1:9-11.
Keepim Kingdom Olsem First Samting long Laef bilong Yu
10. (a) Wanem nao hem meanim for ‘lukaotem Kingdom firstaem’? (b) But wanem nao yumi mas no lusim?
10 Haomas taem nao yumi seleva share-im gud nius bilong Kingdom withim other pipol? Long smallfela way, datwan depend long living bilong yumi and, long bigfela way, hem depend long hao big nao yumi ting hae long hem. Yumi mas remember hao Jesus no say, ‘Lukaotem Kingdom taem yu no garem any otherfela samting for duim.’ And hem no say tu, ‘Sapos yu story abaot Kingdom samfela taem, hem nao samting wea yu need for duim.’ Or hem no say, ‘Strong for lukaotem olketa samting bilong Kingdom firstaem; but sapos niu world no kam kwiktaem, go ahed for duim lelebet samting long service bilong God but garem living olsem other pipol.’ From hem savvy hao Kingdom hem barava important, hem talemaot will bilong Father bilong hem long diswan, taem hem say: “Go ahed for lukaotem kingdom bilong hem.” Or olsem aposol Matthew hem raetem: “Go ahed for lukaotem kingdom firstaem and raeteous fashion bilong hem.” (Luke 12:31; Matt. 6:33) Nomata planti long yumi need for duim work for luk aftarem need bilong yumi seleva and famili bilong yumi, sapos yumi barava garem faith, main samting long laef bilong yumi hem work wea God givim long yumi for saed long Kingdom bilong hem. Long sem taem yumi bae no lusim olketa famili responsibility bilong yumi.—1 Tim. 5:8; Prov. 29:15.
11. (a) Hao nao Jesus showim aot way wea no everywan bae fit for duim sem samting long work for talemaot Kingdom message? (b) Wanem nao samfela samting wea insaed long diswan?
11 Samfela long yumi fit for spendem moa taem long ministry winim other pipol. But long tok piksa bilong hem abaot olketa different kaen graon, Jesus showim aot hao everywan wea heart bilong them olsem gudfela graon bae garem fruit. Long wanem way? Living bilong each wan hem different. Age, health and olketa famili responsibility they insaed long diswan. But taem they really ting hae long diswan, they savvy duim planti samting.—Matt. 13:19, 23.
12. Wanem nao samfela gudfela spiritual goal wea olketa young wan savvy ting raonem?
12 Hem gud for garem olketa goal for helpem yumi mekem share bilong yumi insaed long Kingdom ministry kamap moa big. Olketa young wan mas ting strong long nambawan example bilong youngfela Kristian Timothy wea show aot strong. (Phil. 2:19-22) Waswe, any samting winim way for go insaed long full-taem ministry taem they finisim skul bilong them? Olketa olo tu savvy kasem gudfela samting sapos they markem olketa gudfela spiritual goal.
13. (a) Hu nao mas decide-im samting wea yumi seleva fit for duim insaed long Kingdom service? (b) Sapos yumi barava lukaotem Kingdom firstaem, wanem nao diswan prove-im?
13 Winim way for tok againstim olketa wea yumi ting they fit for duim moa samting, faith bilong yumi mas muvim yumi for work for kamap moabeta, mekem yumi savvy servim God every bit long way wea fitim living bilong yumi seleva. (Rom. 14:10-12; Gal. 6:4) Olsem samting wea happen long Job hem show aot, Satan say yumi interest nomoa long material samting bilong yumi, gudfela living bilong yumi seleva, and selfish samting nao muvim yumi for servim Jehovah. But sapos yumi really lukaotem Kingdom, yumi share for prove-im hao Devil hem man for talem bigfela liar. Yumi prove-im way wea service bilong God nao first samting long laef bilong yumi and no material samting or gudfela samting for seleva. There nao, long toktok and samting wea yumi duim, yumi prove-im bigfela love bilong yumi for Jehovah, way wea yumi loyal for supportim rul bilong hem and love bilong yumi for other pipol.—Prov. 27:11; Job 1:9-11; 2:4, 5.
14. (a) Why nao hem gud for garem wanfela schedule for field service? (b) Long wanem way nao planti Witness they share insaed long field ministry, and why nao olsem?
14 Wanfela schedule savvy helpem yumi for duim moa samting. Jehovah seleva hem ‘markem taem’ for fulfillim purpose bilong hem, and hem gud tumas sapos yumi followim hem long diswan. (Ex. 9:5; Mark 1:15; Gal. 4:4) Sapos yumi fit for duim, hem gud for share insaed long field ministry long wanfela or moa taem every week. Staka thousand Jehovah’s Witness raonem world they auxiliary pioneer and they enjoyim way for spendem tufela or moa hour everyday, for preachim gud nius. Samfela duim diswan everytaem; otherfela duim fewfela taem every year. Planti thousand moa they serve olsem regular pioneer, they use-im threefela or moa hour everyday, for preachim Kingdom message. Otherfela wea they spesel pioneer and missionary, they spendem moa taem insaed long Kingdom service. And nomata yumi insaed long field ministry or no moa, yumi savvy lukaotem every chance for share-im Kingdom hope long anywan wea fit for listen. (Lukim John 4:7-15.) Yumi mas ting strong long profesi bilong Jesus abaot way wea “disfela gud nius bilong kingdom olketa bae talemaot everywea long world for witness long every nation; and then end bae kam.” Yumi mas want for share every bit long disfela work long way wea fitim living bilong yumi.—Matt. 24:14; Eph. 5:15-17.
15. Long saed bilong ministry bilong yumi, why nao kaonsel long 1 Corinthians 15:58 hem fitim?
15 Withim wan mind, long every part long earth, nomata wanem nation they stap insaed, olketa Jehovah’s Witness they strong for share insaed long disfela nambawan privilege bilong service. They followim Bible kaonsel wea kam from God: “Stand strong, no seksek, ready for duim planti work bilong Lord, from yufela savvy yufela no hard work nating insaed long Lord.”—1 Cor. 15:58.
Samting for Review
● Taem Jesus say for lukaotem Kingdom firstaem, wanem nao hem show aot yumi mas putim olsem mek-tu samting?
● Hao nao yumi mas ting long way for luk aftarem need bilong yumi seleva, and famili bilong yumi long saed bilong body? Wanem help nao God bae givim long yumi?
● Sapos yumi duim Kingdom service, waswe, hem important haomas yumi duim? Why nao olsem?