Chapter 14

‘Mi Mekem Covenant Withim Yufela for wanfela Kingdom’

1. Long naet bifor Jesus dae, wanem hope nao hem givim long olketa aposol bilong hem?

LONG naet bifor they killim dae Jesus, hem talem olketa faithful aposol bilong hem: ‘Long haos bilong Father bilong mi, planti ples they stap. Mi go for prepare-im ples for yufela, mekem ples wea mi stap yufela tu bae stap.’ Hem say moa long them: “Mi mekem wanfela covenant withim yufela, olsem Father bilong mi hem mekem wanfela covenant withim mi, for wanfela kingdom.” (John 14:2, 3; Luke 22:29) Hem wanfela barava nambawan hope!

2. Haomas pipol nao bae share withim Kraest long Kingdom bilong hem long heven?

² But, Jesus no meanim only olketa aposol hia bae rul withim hem long Kingdom bilong hem long heven. Bihaen, they luksavvy hao 144,000 wea hem buyim from earth bae garem datfela nambawan privilege. (Rev. 5:9, 10; 14:1, 4) Waswe, samfela distaem trae hard for kasem diswan?

Hipim Ap Olketa Kingdom Ruler

3. Long pablik ministry bilong hem, Jesus tok abaot wanem chance long pipol?

³ Bihaen Herod Antipas putim John the Baptizer insaed long prison, Jesus startim bigfela preaching work long pablik abaotem “kingdom bilong heven.” (Matt. 4:12, 17) Hem talem long pipol hao they garem chance for go insaed long datfela Kingdom, and olketa disaepol bilong hem barava trae hard for kasem datfela prize.—Matt. 5:3, 10, 20; 7:21; 11:12.

4. (a) Wanem taem nao olketa firstfela disaepol bilong Jesus they kasem anointing withim holy spirit? (b) Wanem nao show aot way for hipim ap olketa Kingdom ruler hem important samting long datfela taem?

⁴ Long Pentecost 33 C.E. olketa first wan kasem anointing withim holy spirit. (Acts 2:1-4; 2 Cor. 1:21, 22) They talemaot samting wea God provide-im for kasem laef olawe long heven. Peter use-im “key bilong kingdom long heven” for openem disfela savvy—firstaem long olketa Jew, then long olketa Samaritan, and then long pipol bilong olketa Gentile nation. (Matt. 16:19) Long datfela taem hem important samting for readyim datfela gavman wea bae rulim olketa man for 1,000 year, and klosap every leta insaed long olketa Kristian Greek Scripture they for disfela grup bilong olketa Kingdom ruler​—⁠“olketa holy wan,” “olketa wea garem hope for go long heven.”a

5. Waswe, olketa bae go ap long heven from they servant bilong God wea moabeta winim olketa wea laef bifor?

⁵ Olketa bae go ap long heven no from they moabeta winim every servant bilong God wea dae bifor Pentecost 33 C.E. (Matt. 11:11) But, Jehovah hem start nao for choosim olketa wea bae rul tugeta withim Jesus Kraest. For 19-fela century bihaen long diswan, wanfela hope nomoa hem stap, hope for go long heven. Diswan hem kaenfela fashion wea God showim aot long wanfela smallfela sekson for mekem olketa wise and loving purpose bilong hem go ahed.​—⁠Eph. 2:8-10.

6. (a) Why nao taem mas kam wea God bae finis for choosim olketa wea bae go long heven? (b) Hu nao bae duim samting for mekem profesi abaot “great crowd” tu fulfill, and wanem nao happen finis?

⁶ Go-go, datfela smallfela namba wea hem markem bilong 144,000 bae fulap. Long datfela taem, way for markem olketa spiritual Israelite olsem olketa wea fit bae klosap for finis. (Rev. 7:1-8) Then Jehovah, thru long spirit bilong hem and way for meanim Word bilong hem thru long organization bilong hem long earth, bae fulfillim narafela part bilong purpose bilong hem, olsem Revelation 7:​9-17 hem talem. Wanfela “great crowd” from every nation bae hipap, withim nambawan hope for winim great tribulation and stap olawe long perfect laef insaed wanfela Paradaes earth. Taem yumi tingim samting wea happen finis, hem klia hao datfela way for hipim ap olketa for heven hem finis long samting olsem year 1935 C.E., taem they barava luksavvy long hope for stap long earth for olketa bilong “great crowd.” Start long datfela taem, planti million worshiper bilong Jehovah wea garem strongfela hope for stap olawe long disfela earth they hipap tugeta withim fewfela thousand bilong olketa wea bae go long heven wea still laef yet distaem.

7. Waswe, samfela distaem maet kasem hope for go long hev­en, and why nao yu answer olsem?

⁷ Waswe, diswan meanim God no choosim anywan distaem for laef long heven? Go kasem datfela taem for hem markem finis olketa hia, maet fewfela wea garem disfela hope they no faithful, so God bae choosim samfela other wan for change-im them. But diswan hem no samting wea savvy happen everytaem.

Olketa Spiritual Son—Hao Nao They Savvy?

8. Wanem nao Paul talem abaot hao olketa wea born long spirit they luksavvy long datwan?

⁸ Spirit bilong God mekem olketa Kristian wea baptaes finis wea garem hope for heven barava sure they bae kamap olketa spiritual son wea hem adoptim. Aposol Paul showim diswan taem hem raet long olketa “holy wan” long Rome, for talem samting wea fitim every tru Kristian long datfela taem. Hem say: “Everywan wea spirit bilong God leadim, olketa hia they son bilong God. From yufela no kasem wanfela spirit bilong slave wea mekem yufela fraet moa, but yufela kasem spirit wea adoptim yufela olsem son, and from disfela spirit yumi singaot olsem: ‘Abba, Father!’ Spirit seleva tu hem join withim spirit bilong yumi for prove-im yumi olketa pikinini bilong God. So sapos yumi olketa pikinini, yumi olketa wea bae rul tu: olketa bilong God wea bae rul, olketa wea bae rul withim Kraest, only sapos yumi suffer tugeta mekem yumi savvy kasem glory tugeta tu.”—Rom. 1:7; 8:14-17.

9. Hao nao ‘spirit seleva join withim’ spirit bilong olketa trufela son bilong God?

⁹ Yumi lukim tufela way for use-im disfela word “spirit”: “spirit seleva” and “spirit bilong yumi.” First wan hem active force bilong God wea man no savvy lukim. Hem mekem olketa spiritual pikinini bilong God barava sure hem adoptim them olsem olketa free pikinini bilong hem. Datfela spirit hem givim witness tu thru long Word bilong God, Bible, wea hem olsem wanfela leta from hem for olketa spiritual pikinini bilong hem. (1 Pet. 1:10-12) Taem olketa wea born long spirit they readim samting wea olketa Scripture talem abaot olketa spiritual son bilong God, they garem stretfela tingting olsem: ‘Datwan hem fitim mi.’ There nao, long samfela different way active force bilong God join withim spirit bilong them, hem nao power wea muvim mind and heart bilong them, for showim aot they olketa pikinini bilong God. So for fitim samting wea spirit bilong God showim aot, mind and heart bilong them barava ting strong long hope for rul withim Kraest, and they acceptim olketa responsibility bilong way for kamap olketa spiritual pikinini bilong God.​—⁠Phil. 3:13, 14.

10. (a) Wanem nao samfela samting wea no really markem man olsem wanfela anointed Kristian? (b) Wanem nao tingting bilong “other sheep” abaot position bilong them insaed purpose bilong God?

¹⁰ Waswe, yu garem datfela hope? Sapos olsem, yu garem wanfela nambawan privilege. But, hem no stret for say from man hem barava ting hae long olketa deep spiritual samting, or hem strong long field ministry or hem garem bigfela love for olketa brata bilong hem, hem wanfela Kristian wea spirit anointim. Planti bilong “other sheep” garem olketa fashion hia tu. Samting wea they readim insaed Scripture abaot olketa wea bae rul withim Kraest hem muvim heart bilong them tu, but they no say they bae kasem disfela samting wea God hem no markem for them. (Lukim Numbers 16:1-40.) They luksavvy long firstfela purpose bilong God for disfela earth and they barava work for share long datwan.

Share long Way Wea Fit

11. Hu nao attendim Memorial bilong dae bilong Jesus every year, and why nao olsem?

¹¹ Every year, long Nisan 14, bihaen taem sun hem go daon, olketa anointed follower bilong Jesus Kraest rememberim dae bilong hem, for fitim olketa instruction wea hem givim long olketa aposol bilong hem. (Luke 22:19, 20) Olketa bilong “other sheep” tu they attendim, no for kaikaim bred and drinkim wine, but for lukluk withim respect.

12. Hao nao samfela Kristian long Corinth bifor no showim aot proper way for ting hae long Evening Kaikai bilong Lord?

¹² Diswan hem no wanfela kastom bilong religion nomoa but hem garem strongfela meaning. Aposol Paul raetem strongfela kaonsel hia for olketa first-century Kristian long Corinth, from samfela long olketa no showim aot proper way for ting hae long diswan: “Anywan wea kaikaim disfela bred or drinkim disfela kap bilong Lord long way wea no fit bae guilty long saed bilong body and blood bilong Lord.” Wanem nao mekem them kamap pipol ‘wea no fit’ for tek part? They no readyim themseleva long proper way long heart and mind. Planti they divaed insaed long kongregeson. And tu, samfela long them ova tumas long kaikai and drink bifor datfela meeting. They nating ting hae long Evening Kaikai bilong Lord. They no fit for luksavvy long barava important meaning bilong bred and wine.​—⁠1 Cor. 11:17-34.

13. Wanem nao meaning bilong bred and wine wea they servim long Memorial?

¹³ Wanem nao datfela meaning? Hem no from way wea bred and wine they change olsem mirakol. And Kraest hem no kamap olsem sakrifaes moa long every Memorial. Olketa Scripture say “wanfela taem nomoa Kraest offerim hemseleva for sin bilong planti pipol.” (Heb. 9:28; 10:10; Rom. 6:9) Bred wea no garem yeast and red wine they piksa nomoa bilong really body bilong Jesus wea hem sakrifaesim and really blood wea hem kapsaetem. But olketa really samting hia they barava spesel! Jesus givim body bilong hem wea no garem sin mekem olketa man savvy garem chance for stap olawe. (John 6:51) And blood bilong hem wea hem kapsaetem garem tufela purpose—klinim sin from olketa man wea showim aot faith long hem, and tu, hem startim niufela covenant midlwan long God and kongregeson bilong spiritual Israel, wea olketa Kristian wea spirit anointim they insaed long diswan. (1 John 1:7; 1 Cor. 11:25; Gal. 6:14-16) Olketa nambawan samting hia nao mekem God fit for say olketa member bilong “little flock” they raeteous, hem olsem God letem them kaonem way for kamap olketa perfect man. (Luke 12:32) Hem duim diswan mekem they savvy born long holy spirit olsem olketa son bilong God, mekem they luk forward for share withim Kraest insaed Kingdom bilong hem long heven. Taem they kaikaim bred and drinkim wine ­bilong Memorial every year, for givim witness abaot hope bilong them for heven, way wea they ting hae long way for stap insaed datfela “niufela covenant” hem kamap niu moa and hem kamap strong.​—⁠Heb. 8:6-12.

“Mifela Bae Go Withim Yufela”

14. (a) Why nao “other sheep” no kaikaim bred and drinkim wine long Memorial, but wanem nao they barava hope long hem? (b) Hao nao they ting long way wea they hipap withim remnant bilong olketa Kingdom ruler?

¹⁴ Olketa “other sheep” luksavvy hao Jehovah hem deal withim olketa anointed wan bilong hem, and they join withim them taem they say: “Mifela bae go withim yufela, from mifela herem God hem stap withim yufela.” (Zech. 8:20-23) They hipap tugeta and share tugeta tu for talemaot gud nius bilong Kingdom long whole earth. But, olketa “other sheep” they no insaed long “niufela covenant” withim spiritual Israel and they no insaed tu long “covenant . . . for wanfela kingdom” wea Jesus mekem withim olketa wea bae laef long heven withim hem, dastawe hem stret for olketa no kaikaim bred and drinkim wine long Memorial. (Luke 22:20, 29) But taem “niufela covenant” kasem purpose bilong hem, for hipim ap olketa lastfela member bilong “little flock” for Kingdom long heven, olketa “other sheep” luksavvy olketa blessing wea they bae kasem long earth thru long datfela Kingdom hem klosap for kam. They tingim way for serve long wan mind withim olketa Kingdom ruler hia hem wanfela privilege, insaed long “olketa last day” distaem.

Samting for Review

● Why nao planti samting long olketa Kristian Greek Scripture they for olketa wea garem hope for laef long heven?

● Hao nao olketa wea born olsem son bilong God they savvy long diswan? Wanem nao meaning bilong bred and wine long Memorial wea they tekem?

● Hao nao “other sheep” show aot they barava wan mind withim “little flock”?