Chapter 16
Listen long Kaonsel, Acceptim Discipline
1. (a) Waswe, anywan long yumi no needim kaonsel and discipline? (b) But wanem nao olketa question wea yumi fit for tingting long them?
KLOSAP yumi everywan agree withim scripture wea say: “Yumi everywan fall daon staka taem.” (Jas. 3:2) Hem no hard for tingim olketa taem wea yumi no kasem olketa mark wea Word bilong God encouragim yumi for kasem and wea yumi want for kasem. So yumi luksavvy hao Bible hem tru taem hem say: “Listen long kaonsel and acceptim discipline, mekem yu savvy kamap wise long future bilong yu.” (Prov. 19:20) Yumi savvy yumi needim help olsem. Maet yumi change-im samfela samting long laef bilong yumi for fitim wanem yumi learnim from Bible. But wanem nao yumi duim sapos wanfela Kristian brata kaonselem yumi long wanfela samting wea yumi duim wea no stret tumas? Or waswe sapos hem talem wanfela idea abaot hao yumi savvy kamap moabeta long samfela work wea yumi duim?
2. (a) Why nao yumi mas say thankyu for kaonsel wea yumi kasem? (b) Wanem nao yumi mas no duim?
2 Nomata wanem kaen feeling yumi garem long taem olsem from yumi no perfect, yumi mas barava say thankyu for datfela kaonsel and work hard for followim. Gudfela samting nao bae kam aot from diswan sapos yumi duim olsem. (Heb. 12:11) But, maet, taem yumi kasem kaonsel, yumi trae for prove-im yumi nao stret, or mekem samting wea happen luk small nomoa, or blame-im narafela man. Waswe, diswan happen long yu anytaem? Taem yumi ting back long datfela taem, waswe, yumi feel kros long dat wan wea givim kaonsel? Waswe, yumi garem fashion for pointim olketa weak point bilong dat wan wea kaonselem yumi or way wea hem kaonselem yumi, mekem diswan kamap olsem wanfela excuse for weak point bilong yumi? Waswe, Bible savvy helpem man for winim olketa tingting olsem?
Olketa Example Wea Kaonselem Yumi
3. (a) Wanem nao stap insaed long Bible wea savvy helpem yumi for garem stretfela tingting abaot kaonsel and discipline? (b) Use-im olketa question wea stap on top for lukluk long olketa samting wea Saul and Uzziah duim taem they kasem kaonsel.
3 Word bilong God provide-im planti stretfela kaonsel long disfela point and tu, olketa experience wea really happen long pipol wea kasem kaonsel. Planti taem kaonsel hia hem discipline tu, from man wea kasem hem need for change-im tingting and fashion bilong hem. Taem yu use-im olketa question wea stap long daon for lukluk long samfela example hia, yu bae lukim hao yumi everywan savvy kasem planti gudfela samting from them:
SAUL, SON BILONG KISH: Hem fail for obeyim Jehovah every bit, taem hem faet againstim Amalek, hem no killim dae king and olketa gudfela animal bilong them. (1 Sam. 15:1-11)
From samting wea Saul talem taem hem kasem kaonsel and discipline from Samuel, wanem nao show aot hem trae for mekem rong hia luk small nomoa? (1Sa 15 vs. 20) Hem trae for pushim blame go long hu? (1Sa 15 vs. 21) Go-go taem hem say hem rong nao, wanem excuse nao hem talem? (1Sa 15 vs. 24) So hem luk olsem hem worry long wanem samting? (1Sa 15 vss. 25, 30)
UZZIAH: Hem go insaed temple bilong Jehovah for burnim samting wea smel nice, nomata olketa priest nomoa they garem power for duim diswan. (2 Chron. 26:16-20)
Taem chief priest trae for stopem King Uzziah, why nao king hem kros? (Lukim 2Ch 26 verse 16.) Wanem samting nao happen? (2Ch 26 vss. 19-21)
4. (a) Why nao Saul and Uzziah faendem hard for acceptim kaonsel? (b) Why nao diswan hem wanfela bigfela problem tu distaem?
4 Why nao tufela hia faendem hem hard tumas for luksavvy long need bilong them for kasem kaonsel? Main problem hem proud fashion, way for ting hae tumas long seleva. Planti pipol distaem bringim bigfela trabel long themseleva from they garem disfela fashion. From they kasem bigfela nem, maet from age or position bilong them, they no willing for kasem kaonsel. They ting diswan show aot they garem weak point or hem spoelem nem bilong them. But samting wea barava showim aot man garem weak point hem proud fashion. Man no savvy excuse for say from yumi everywan savvy garem disfela problem, hem olraet nomoa. Diswan hem wanfela trap wea Satan use-im for blokim tingting bilong man mekem hem no wantim loving help wea Jehovah provide-im thru long Word bilong hem and organization bilong hem long earth. Jehovah givim warning olsem: “Proud fashion hem kam bifor man fall daon, and proudfela spirit bifor hem stumble.”—Prov. 16:18; lukim tu Romans 12:3; Proverbs 16:5.
5. Use-im olketa question bilong disfela paragraf for lukim wanem samting yumi savvy learnim from story bilong Moses and David.
5 Long otherfela saed, olketa Scripture garem planti nambawan example bilong pipol wea acceptim kaonsel. Yumi savvy learnim gudfela samting from olketa hia. Tingim:
MOSES: Dadi-in-law bilong hem givim hem samfela gudfela kaonsel long hao for luk aftarem bigfela work bilong hem mekem hem no spoelem health bilong hem. Moses listen and kwiktaem for followim. (Ex. 18:13-24)
Nomata Moses garem bigfela power, why nao hem barava willing for listen long stretfela kaonsel? (Lukim Numbers 12:3.) Hao nao datfela fashion hem barava important for yumi? (Zeph. 2:3)
DAVID: Hem guilty from hem duim adultery, then hem mekem plan for killim dae hasband bilong datfela woman, mekem David savvy maritim hem and coverim datfela adultery. Samfela month go past bifor Jehovah sendem Nathan for disciplinim David. (2 Sam. 11:2–12:12)
Waswe, David kros long datfela discipline, mekem rong bilong hem luk small or trae for pushim blame long narafela man? (2 Sam. 12:13; Ps. 51:superscription and Ps. 51 vss. 1-3) From God acceptim way wea hem repent, waswe, diswan meanim David and famili bilong hem they free nao from badfela samting wea kam aot from rong fashion wea hem duim? (2 Sam. 12:10, 11, 14; Ex. 34:6, 7)
6. (a) Hao nao David ting long olketa wea givim hem gudfela kaonsel? (b) Hao nao yumi savvy kasem gudfela samting sapos yumi willing for acceptim kaonsel olsem? (c) Wanem nao yumi mas no forgetim taem yumi kasem strongfela discipline?
6 King David barava savvy long gudfela samting wea kam aot from way for listen long stretfela kaonsel, and long wanfela taem hem say thankyu long God for dat wan wea givim long hem. (1 Sam. 25:32-35; lukim tu Proverbs 9:8.) Waswe, yumi olsem tu? Sapos olsem, diswan bae protectim yumi for talem and duim planti samting wea savvy mekem yumi sorry bihaen. But sapos yumi duim samting wea mekem yumi need for kasem strongfela discipline, olsem David taem hem sin withim Bath-sheba, yumi mas nating forgetim hao discipline hia hem prove-im love bilong Jehovah, for givim yumi gudfela samting for olawe.—Prov. 3:11, 12; 4:13.
Mekem Grow Olketa Barava Nambawan Fashion
7. Wanem fashion nao Jesus show aot wea man mas garem mekem hem savvy go insaed long Kingdom?
7 For fren gud withim Jehovah and olketa Kristian brata bilong yumi, yumi need for mekem grow samfela different kaen fashion. Jesus mek hae long wanfela long olketa hia, taem hem putim wanfela youngfela pikinini midlwan long olketa disaepol bilong hem and say: “Sapos yufela no change every bit and kamap olsem olketa young pikinini, bae yufela nating savvy go insaed kingdom bilong heven. There nao, man wea bae kamap humble olsem disfela young pikinini, hem nao nambawan long kingdom bilong heven.” (Matt. 18:3, 4) Olketa disaepol hia need for mekem samfela change. They mas aotem proud fashion and mekem grow humble fashion.
8. (a) Yumi need for humble front long hu, and why nao olsem? (b) Sapos yumi humble, hao nao yumi bae ting long kaonsel?
8 Bihaen, aposol Peter hem raet long olketa otherfela Kristian olsem: “Yufela everywan mas garem humble tingting long each other, bikos God hem againstim proud pipol, but hem show aot kaenfela fashion long olketa wea humble.” (1 Pet. 5:5) Yumi savvy yumi need for humble front long God, but disfela scripture show aot yumi need for humble, or garem humble tingting tu, taem yumi stap withim olketa brata bilong yumi. Sapos yumi garem disfela fashion, yumi bae no kranky for les long olketa idea wea they maet talem long yumi. Yumi bae willing for learn from each other. (Prov. 12:15) And sapos olketa brata bilong yumi lukim need for stretem yumi withim kaonsel, then, yumi bae no les long diswan from yumi luksavvy Jehovah use-im them long loving way for stretem yumi.—Ps. 141:5.
9. (a) Wanem important fashion nao hem klosap semsem withim humble fashion? (b) Why nao yumi mas ting strong long way wea fashion bilong yumi affectim other pipol?
9 Narafela fashion wea klosap semsem withim humble fashion, hem way for really care for otherfela pipol. Yumi savvy hao olketa samting wea yumi duim they affectim other pipol. Aposol Paul givim kaonsel long olketa firstfela Kristian long Corinth and Rome for tingim conscience bilong other pipol. Hem no say they no savvy duim olketa samting wea they laekem, but hem encouragim them for no duim any samting wea maet encouragim narafela man for duim samting wea conscience bilong hem say hem rong, wea savvy lead go for spoelem spiritual living bilong hem. Paul talem klia main principle taem hem raet olsem: “Letem each wan go ahed for lukaotem, no gudfela samting bilong hemseleva nomoa, but bilong narafela man tu. . . . Dastawe, nomata yufela kaikai or drink or duim any samting, duim every samting for glory bilong God. No kamap samting wea mekem olketa Jew and Greek and kongregeson bilong God they stumble.”—1 Cor. 10:24-33; 8:4-13; Rom. 14:13-23.
10. Wanem nao savvy show aot sapos yumi garem fashion for followim kaonsel from Scripture?
10 Waswe, yu man wea garem fashion for tingim gudfela samting bilong other pipol firstaem bifor samting wea yuseleva laekem? Yumi savvy duim diswan long planti way, but tingim wanfela example: Toktok, kaleko and lukluk bilong yumi they samting wea yumi each wan choosim, but yumi mas balance and klin. But sapos go-go yumi herem, from kastom bilong pipol long area wea yumi stap, hao kaleko and lukluk bilong yumi hem stopem other pipol for listen long message bilong Kingdom, waswe, yumi bae change-im? Waswe, laef bilong narafela man hem moa important long yu winim way for duim samting wea yuseleva wantim?
11. Wanem nao show aot hem important for mekem grow olketa fashion hia sapos yumi really want for olsem olketa Kristian?
11 Taem olketa fashion wea yumi just story abaot they kamap part bilong fashion bilong yumi, diswan prove-im yumi start for garem mind bilong Kraest. Jesus showim aot perfect example bilong humble fashion. (John 13:12-15; Phil. 2:5-8) Long way wea hem show aot care long other pipol, winim way for duim samting wea hemseleva wantim, hem showim aot example for yumi followim.—Rom. 15:2, 3.
No Rejectim Discipline bilong Jehovah
12. (a) Wanem change nao yumi everywan need for duim mekem yumi garem fashion wea mekem God hapi? (b) Wanem nao bae helpem yumi?
12 From yumi everywan sin, yumi need for change-im tingting, toktok and fashion bilong yumi mekem yumi savvy showim aot fashion bilong God bilong yumi. Yumi need for havem “niu fashion.” (Col. 3:5-14; Titus 2:11-14) Kaonsel and discipline helpem yumi for luksavvy long olketa samting wea yumi need for change-im and then lukim hao for duim followim.
13. (a) Wanem nao Jehovah use-im for provide-im kaonsel and discipline for yumi everywan? (b) Wanem nao yumi mas duim withim diswan?
13 Main samting for teachim yumi hem Bible. (2 Tim. 3:16, 17) Then thru long olketa Bible literature and olketa meeting wea organization bilong Jehovah long earth provide-im, hem helpem yumi for followim diswan. Waswe, yumi bae humble for luksavvy long way wea yumi needim diswan—nomata sapos yumi herem bifor—and trae hard everytaem for kamap moabeta?
14. Wanem help moa Jehovah provide-im for yumi wanwan?
14 Jehovah no leavim yumi for faet seleva withim olketa problem bilong yumi. Withim loving care, hem provide-im samting for helpem yumi wanwan. Planti million pipol they kasem gudfela samting from help olsem thru long olketa hom Bible study. Olketa dadi and mami garem spesel responsibility for disciplinim pikinini bilong them for protectim them from fashion wea savvy mekem them sorry long living bihaen. (Prov. 6:20-35; 15:5) Insaed long kongregeson tu, olketa wea garem spiritual mark garem responsibility for use-im olketa Scripture for stretem other pipol taem they lukim need for duim olsem, but they duim diswan withim quiet fashion. (Gal. 6:1, 2) Long olketa way olsem, Jehovah kaonselem and disciplinim yumi mekem yumi savvy worshipim hem olsem pipol wea garem wan mind.
Samting for Review
● Hao nao Jehovah helpem yumi long loving way for luksavvy long olketa change wea yumi need for duim?
● Why nao planti pipol faendem hard for acceptim kaonsel? Why nao diswan hem important?
● Wanem nao olketa nambawan fashion wea bae helpem yumi for acceptim kaonsel? Hao nao Jesus showim aot example long diswan?