Chapter 20
Laef and Blood—Waswe, Yu Ting They Holy Samting?
1. (a) Wanem nao tingting bilong God abaotem laef? (b) Hao nao yumi savvy show aot yumi ting hae long present bilong laef from God?
YUMI mas no sapraes for savvy hao tingting bilong God abaotem laef hem barava different from tingting bilong world. Laef bilong man hem holy samting long God. Waswe, yu tu ting olsem? Yumi depend every bit long God, wea “givim laef and breath and every samting long every pipol.” (Acts 17:25-28; Ps. 36:9) Sapos yumi garem sem tingting olsem God, yumi bae protectim laef bilong yumi. But yumi bae no brekem law bilong God for trae for sevem laef bilong yumi distaem. Yumi ting hae long promis bilong God bilong laef olawe for olketa wea barava showim aot faith long Son bilong hem.—Matt. 16:25, 26; John 6:40; Jude 21.
2. World hem showim aot tingting bilong hu nao abaot laef, and wanem kaen tingting nao savvy kamap samfela taem abaotem diswan?
2 Long narafela saed, Jesus say Satan the Devil, ruler bilong disfela world, “hem nao man for killim man dae from taem wea hem just start.” (John 8:44; 12:31) Start from taem wea hem no obey, hem bringim dae long olketa man. History bilong world wea fulap withim raf fashion showim aot spirit bilong hem. But Satan savvy mekem hemseleva luk different tu. Dastawe olketa man wea stap under long power bilong hem they say, nomata hem gud for ting strong long religion, taem laef bilong yu stap long danger yu bae kasem gudfela samting sapos yu followim “savvy” bilong them winim way for followim Bible. (Lukim 2 Corinthians 11:14, 15.) Taem yu face-im samting wea meanim laef or dae for yu, wanem nao heart bilong yu bae decide-im? Tru nao, yumi mas want for mekem Jehovah hapi.
3. (a) Why nao yumi mas barava interest long samting wea Bible talem abaotem blood? (b) Readim Genesis 9:3-6 and Acts 15:28, 29, and then answerim olketa question on top abaotem olketa scripture hia.
3 Word bilong God showim aot barava klos way wea laef and blood they join tugeta, taem hem say: “Soul [or laef] bilong body hem insaed long blood.” Long sem way wea laef hem holy, God mekem blood tu hem holy. Hem samting bilong hem, for use-im long way wea hem agree withim. (Lev. 17:3, 4, 11; Deut. 12:23) So hem gud sapos yumi lukluk gud long wanem hem wantim yumi for duim long saed bilong blood.
Readim Genesis 9:3-6
Wanem samting nao pipol duim long ples bilong yu wea mekem yu need for lukaot for no kaikaim blood bilong animal?
For fitim samting wea Ge 9 verse 4 talem abaotem blood bilong animal, wanem nao tingting bilong yu abaotem way for drinkim blood bilong man (wea they duim long samfela sport long Rome bifor)?
Olsem Ge 9 verse 5 and 6 showim aot, hu nao man mas givim answer long hem sapos hem spillim blood bilong wanfela man?
Readim Acts 15:28, 29
Waswe, diswan say olketa rul hia they for lelebet taem nomoa? Waswe, they fitim yumi?
Waswe, toktok wea they use-im long hia show aot blood bilong man hem no insaed long diswan?
Waswe, scripture hia show aot yumi fit for change-im diswan long taem bilong danger?
4. Wanem samting nao olketa Scripture show aot wea man maet need for duim mekem hem no guilty long blood?
4 Long saed long blood bilong man, yumi kanduit for say way for no killim dae narafela man hem mekem yumi no guilty. Olketa Scripture show aot sapos yumi insaed any organization wea guilty long blood front long God, yumi mas lusim every bit sapos yumi no want for share long olketa sin bilong hem. (Rev. 18:4, 24; Mic. 4:3) Yumi need for duim diswan kwiktaem.
5. Hao nao way for strong long field ministry join withim way for free from way for guilty long blood?
5 For olketa servant bilong God wea hem komandim them for givim warning abaot way for finisim every samting long great tribulation, way wea they bae no guilty long blood meanim, they mas faithful for talemaot datfela message. (Lukim Ezekiel 3:17-21.) Aposol Paul ting long hemseleva olsem man wea garem kaon withim any kaen different pipol from ministry wea hem garem. Hem feel free from responsibility wea hem garem long blood bilong them only bihaen hem witness every bit long them abaot samting wea God provide-im for salvation. (Rom. 1:14, 15; Acts 18:5, 6; 20:26, 27) Waswe, way wea yu strong long field ministry show aot yu luksavvy long responsibility wea every Witness bilong Jehovah garem?
6. Hao nao way for no letem accident happen and respect for way wea laef hem holy they join tugeta?
6 Yumi mas ting strong tu long olketa accident wea savvy killim man dae. Under long Law bilong Moses, man wea mekem accident olsem happen, hem guilty nao. Hem mas kasem panis. (Ex. 21:29, 30; Deut. 22:8; Num. 35:22-25) Sapos yumi ting strong long principle hia, yumi bae lukaot for no mekem accident happen long way wea yumi draevem truck, way for duim danger samting or way for letem samting wea no safe stap long haos bilong yumi or long ples bilong bisnis bilong yumi. Waswe, tingting bilong yu abaot olketa samting hia show aot yu barava ting hae long way wea laef hem holy?
Waswe long Way for Use-im Blood Taem Man Sik?
7. (a) Waswe, way for givim blood long narafela man hem fitim way wea blood hem holy? (b) Why nao hem no stret for say komand for ‘stap klia from blood’ hem fitim olketa samting wea they duim long first century nomoa?
7 Nomata way for use-im blood olsem hem no niu samting, long disfela mek-20 century nao they use-im blood planti taem for transfusion, withim goal for mekem man laef. Olketa use-im blood and olketa main part bilong blood tu long disfela way. But hem tru, way for use-im blood long way olsem no meanim man bae no dae nao. Tru nao, samfela taem, man hem dae from they use-im blood long way olsem. But samting wea yumi ting moa strong long hem nao—Waswe, rul bilong Bible for ‘stap klia from blood’ hem fitim disfela samting wea olketa doctor duim? Yes! Way for tekem any kaen blood insaed long body bilong yumi, from man or animal, hem againstim law bilong God. Hem show aot man nating ting hae long way wea blood hem holy. (Acts 15:19, 20) No any reason stap for mekem yumi ting disfela komand for ‘stap klia from blood’ hem fitim olketa samting wea they duim long first century nomoa, and no distaem. Tingim diswan: Hu nao bae say komand bilong Bible againstim way for killim dae narafela man hem no meanim way for sutim man withim gun, from yumi savvy they no workim gun long datfela taem? And waswe, hem stret for say way for tambu for drunk hem fitim nomoa olketa drink long first century, and no olketa strongfela drink wea stap distaem? For olketa wea really want for mekem God hapi, meaning bilong disfela komand for ‘stap klia from blood’ hem klia.
8. (a) Hao nao yu savvy decide sapos wanfela way for treatim sik bilong man hem fitim Kristian or no moa? (b) Sapos wanfela doctor want for aotem samfela blood bilong yu, keepim and then putim back insaed body bilong yu taem hem operate-im yu, wanem Bible principle nao savvy helpem yu for decide gud long diswan? (c) Hao nao man savvy ting long treatment wea needim blood bilong hem for go thru long wanfela machine wea aotsaed long body?
8 Nomata olsem, samfela samting wea olketa doctor duim they hard for meanim, so yumi maet garem question. Hao nao yumi savvy kasem answer long olketa samting hia? Firstfela samting, askim doctor bilong yu for meanim gud long yu samting wea hem want for duim. Then tingting gud raonem diswan withim way for pray and long way wea followim olketa Bible principle. Doctor maet givim idea for tek-aotem samfela blood bilong yu and keepim, and sapos need kamap, they savvy use-im taem they operate-im yu bihaen. Waswe, yu bae agree long diswan? Tingim hao long Law wea God givim long Moses, they mas pourim long graon blood wea they tek-aotem from wanfela animal. (Deut. 12:24) Yumi distaem no stap under long Law, but meaning bilong diswan hem hao blood hem holy and, taem yumi tek-aotem blood from body bilong man or animal, yumi mas givim go back long God long way for pourim long earth, ples wea hem putim leg bilong hem. (Lukim Matthew 5:34, 35.) So hao nao hem stret for keepim blood bilong yu (nomata for shortfela taem nomoa) and then putim back insaed long body bilong yu? But waswe sapos doctor say, taem they operate-im yu or helpem yu long otherfela way, blood bilong yu bae go thru long wanfela machine wea aotsaed long body bilong yu, and then, hem bae kam back insaed moa? Waswe, yu bae agree withim diswan? Samfela they ting conscience bilong them savvy letem them for duim diswan sapos they no use-im blood for startim datfela machine. They ting long datfela machine olsem part bilong body bilong them wea karem blood. Hem tru, every sik and problem they no semsem, so yu nao mas decide. But samting yu decide-im mas mekem yu garem klinfela conscience front long God.—1 Pet. 3:16; 1 Tim. 1:19.
9. (a) For mek sure they respectim way wea yu decide for ‘stap klia from blood,’ wanem samting nao yu mas duim firstaem? (b) Nomata sek nomoa problem happen, hao nao yu savvy stopem no gud way for rowa for kamap? (c) Sapos wanfela doctor or kot trae for force-im yu for tekem blood transfusion, wanem nao yu bae duim?
9 For mek sure doctor bilong yu bae respectim way wea yu decide for ‘stap klia from blood,’ story withim hem bifor any bigfela problem kamap. Sapos yu need for stap long hospital for treatment, raetem leta for askim them for no use-im blood long yu, and tu yuseleva tok abaotem withim doctor wea bae deal withim yu. But waswe sapos sek nomoa wanfela problem kamap? Planti taem sapos yu story gud long way bilong respect withim doctor, and askim hem for use-im savvy bilong hem for helpem yu, but long sem taem respectim Kristian conscience bilong yu, diswan savvy stopem no gud way for rowa kamap. (Prov. 15:1; 16:21, 23) But, sapos samfela doctor wea trae for helpem yumi they say way for no tekem blood bae mekem laef bilong yumi stap long danger and so they trae for force-im yumi for acceptim, bae yumi hao? Faith long olketa way bilong Jehovah wea stret mas mekem yumi strong. Loyal fashion long Jehovah mas mekem yumi strong for no acceptim, bikos yumi choose for obeyim God winim olketa man.—Acts 5:29; lukim Job 2:4; Proverbs 27:11.
Hao Important Nao Disfela Samting?
10. Why nao nomata they say yu needim transfusion for sevem laef bilong yu, diswan no change-im tingting bilong yumi?
10 For pipol wea no savvy yet long Jehovah, olketa reason for tekem blood transfusion maet luk olsem way for ting hae long way wea laef hem holy. But yumi mas no forgetim hao planti wea givim reason olsem they say hem olraet nomoa for killim dae baby insaed bele bilong mami. Jehovah nao savvy abaot laef and blood winim any doctor wea “savvy” tumas. Every komandment bilong Hem they for gudfela samting for yumi, they protectim laef bilong yumi distaem and olketa future hope bilong yumi. (Isa. 48:17; 1 Tim. 4:8) Waswe, komand for ‘stap klia from blood’ hem different from diswan?
11. (a) Wanem nao only way wea Jehovah letem olketa Israelite for use-im blood? (b) Why nao diswan important tumas long yumi olketa Kristian?
11 Way wea hem barava important for respectim hao blood hem holy, hem show aot klia from samting wea Jehovah talem abaot only way for use-im blood. “Soul bilong body hem insaed long blood, and miseleva nao putim on top long altar for mekem compensation for olketa soul bilong yufela, bikos blood nao mekem compensation from soul wea stap long hem. Dastawe mi say long olketa son bilong Israel: ‘No any soul bilong yufela mas kaikaim blood.’” (Lev. 17:11, 12) Every blood bilong animal wea they pourim long altar bilong Jehovah for fitim datfela law wea piksarem nambawan blood bilong Jesus Kraest. (Heb. 9:11, 12; 1 Pet. 1:18, 19) So law bilong God, wea putim tambu long way for use-im blood long any other way, hem strongim way wea blood bilong Jesus hem holy. Yumi savvy lukim from diswan hao way for use-im blood long rongfela way show aot fashion for barava no respectim samting wea Jehovah provide-im for salvation thru long Son bilong hem.
12. Sapos hem face-im dae, why nao wanfela tru Kristian bae no use-im blood for trae for stap laef?
12 Taem yumi face-im samting wea meanim laef or dae for yumi, hem kranky samting for lusim God! Nomata yumi ting hae long work wea olketa gudfela doctor duim, yumi no trae hard tumas for sevem laef bilong yumi seleva or olketa wea yumi love-im for fewfela day or year nomoa long way for againstim law bilong God, olsem yumi ting disfela laef nomoa stap. Yumi garem faith long blood bilong Jesus wea hem spillim and laef olawe wea hem givim. Withim whole heart bilong yumi, yumi believe hao olketa faithful servant bilong God—nomata olketa wea dae—bae kasem reward bilong laef olawe.—John 11:25; 1 Tim. 4:10.
Samting for Review
● Wanem nao mekem laef and blood they holy? Why nao world garem different tingting abaotem diswan?
● Long saed bilong olketa animal, hao nao yumi show aot respect for way wea blood bilong them holy?
● Wanem nao olketa different way wea yumi savvy deal withim laef bilong man olsem samting wea holy? Hao nao hem important for duim olsem?