Jehovah Hipimap and Readyim Pipol Bilong Hem for Work
Insaed long planti hundred year, way for apostate kasem planti ples long earth. Planti church garem samfala teaching wea kam from Bible but staka teaching bilong olketa followim kastom bilong man and staka heathen kastom. Olketa no ting strong abaotem taem wea Kraest bae kam back.—Markem Matthew 13:24-30, 37-43.
Nomata olsem, Jesus talem finis for go ahed for lukaot for taem hem kam back! Wanfala grup wea duim diswan stap long Allegheny (Pittsburgh), Pennsylvania, U.S.A. Bihaen long 1870, Charles Taze Russell and samfala fren bilong hem start for duim careful study long Bible, wea no join withim eni church, abaotem kam back bilong Kraest. Olketa start tu for lukaotem Bible truth long saed bilong planti otherfala main teaching. Diswan nao start bilong work bilong Olketa Witness Bilong Jehovah long taem bilong iumi.—Matthew 24:42.
Disfala grup start for luksavvy hao teaching bilong Trinity hem no kam from Bible but Jehovah nomoa hem olmaeti God and Creator; Jesus Kraest hem firstfala creation and only-born Son bilong Hem; and holy spirit hem no wanfala man but hem active force bilong God wea man no savvy lukim. Disfala grup luksavvy hao soul hem no samting wea kanduit dae but hem savvy dae, hao hope for olketa wea dae finis hem resurrection, and panis for pipol wea duim bad samting wea no repent hem nao for finis evribit and no way for kasem pain for olowe.
Olketa luksavvy hao wanfala main teaching bilong Bible hem way wea Jesus givim laef bilong hem olsem ransom for olketa man. Firstaem, 144,000 man and woman, olketa wea God choosim long first century kam kasem taem bilong iumi, bae Hem baem back from disfala earth for rul tugeta withim Kraest long Kingdom long heven. Then thru long ransom bilong Jesus planti billion man, wea bigfala haf long olketa bae resurrect from dae, bae kamap perfect pipol withim hope for stap olowe long earth under long rul bilong datfala Kingdom.
Russell and olketa fren bilong hem luksavvy tu hao Kraest bae stap moa long way wea man no savvy lukim, olsem spirit. Taem Bilong Olketa Gentile, taem wea rul bilong God no show aot thru long eni gavman long earth, hem finis long 1914. Then Kingdom bilong God hem start long heven. Olketa teaching hia nao Olketa Witness Bilong Jehovah believim distaem.
Russell and olketa fren bilong hem talemaot olketa truth hia long evri ples thru long olketa tok and buk. Long July 1879 Russell start for pablisim Zion’s Watch Tower (distaem olketa kolem Wastaoa). Hem decide strong hao preaching work bilong Olketa Bible Student should depend evribit long contribution wea pipol willing for givim and olketa bae no collectim eni selen. And tu, pipol wea believe and willing nao bae talemaot disfala message free. Russell givim contribution from selen bilong hemseleva wea hem kasem from bisnis bilong hem bifor.
Olketa Bible Student hipap tugeta long olketa class, wea hem nem bilong olketa kongregeson long datfala taem. Olketa hipap threefala taem evri week, for olketa tok, studyim Bible, and testimony meeting. Evritaem olketa choosim samfala man wea fit olsem elder for luk aftarem spiritual work bilong each class.
Long 1884 Zion’s Watch Tower Tract Society hem kamap wanfala nonprofit corporation long Pennsylvania. Evri year olketa choosim wanfala president bilong disfala corporation. Diswan provide-im arrangement wea fitim law bilong kantri, and wea no depend long laef bilong eni man, for mekem disfala work for teach abaotem Bible go ahed. Olketa choosim Charles T. Russell olsem president, and olketa iusim office bilong hem olsem hedquarter.
Olketa work hard for mekem disfala work kasem olketa narafala kantri. Hem kasem Canada and England bihaen long 1880. Long 1891 Russell go-go raon long Europe and Middle East for faend aot wanem nao olketa savvy duim for mekem truth kasem long there. Bihaen long 1900, samfala branch office bilong Society kamap long Britain, Germany, and Australia.
Long 1909 hedquarter bilong Watch Tower Society muv go long Brooklyn, New York, for mekem preaching work kasem evri different kantri long world. Need hem kamap for mekem wanfala corporation under long law bilong New York State, wea distaem olketa kolem Watchtower Bible and Tract Society of New York, Inc. Long 1914 olketa startim International Bible Students Association long London, England, for mekem work bilong olketa Bible Student muv ahed long olketa kantri bilong British Commonwealth. Kasem distaem, olketa garem samting olsem 70 corporation and association wea fit long saed long law long planti kantri long world wea work tugeta withim Watch Tower Society. Olketa hia for helpem man, wea kasem support from contribution wea pipol willing for givim and olketa workman wea volunteer.
Long 1916 Charles Taze Russell hem dae, and Joseph Franklin Rutherford kamap nextfala president bilong Watch Tower Society. Klosap long end bilong World War I, olketa Bible Student kasem bigfala test thru long persecution, go-go eitfala brata wea duim important work long hedquarter bilong Society long America go long prison from giaman report. Luk olsem work bilong olketa Bible Student stap long danger nao. But, long 1919 olketa brata hia kamaot from prison and free evribit from blame, and from datfala taem preaching work start for kamap moa big.
Thru long hedquarter bilong Society, sekson bilong olketa anointed Kristian Bible Student wea work tugeta go ahed for provide-im spiritual kaikai long proper taem for evriwan wea kampani withim disfala organization. Olsem way wea kongregeson bilong olketa anointed Kristian long first century hem “faithful and wise slave” wea Jesus storyim, so anointed sekson bilong olketa Bible Student wea dedicate, wea duim Kingdom work, hem nao “faithful and wise slave” class long taem bilong iumi. Taem Jesus kam for lukluk gud long kongregeson, hem lukim disfala sekson provide-im kaikai for olketa workman bilong disfala famili; then hem markem sekson hia for keepim evri samting bilong hem.—Matthew 24:45-47; Luke 12:42.
Bihaen long World War I, hem show aot klia hao Kingdom bilong God thru long Kraest Jesus hem start finis long heven long 1914. So from datfala taem toktok bilong Jesus savvy fulfill evribit: “Disfala gud nius bilong kingdom olketa bae talemaot evriwea long earth for wanfala witness long evri nation; and then end bae kam.” Joseph F. Rutherford go ahed for mekem disfala message bilong Kingdom kasem planti moa pipol.—Matthew 24:14.
Dastawe, Society decide for printim seleva olketa buk bilong hem and iusim olketa volunteer workman wea dedicate finis, for workim olketa Bible buk wea no kost tumas. Evri Bible Student kasem encouragement for share evritaem for preachim gud nius abaotem Kingdom. Olketa iusim radio for talemaot Bible tok long samfala kantri.
Bifor 1918, olketa Bible Student luksavvy purpose bilong olketa for preach hem for hipimap olketa wea stap yet bilong sekson wea God choosim for stap withim Kraest Jesus long heven and for warnim world abaotem judgment bilong God wea bae kam. Olketa no tingting tumas for hipimap sekson wea bae winim end bilong disfala system for stap long earth. Then start long 1918 disfala tok “Planti Million wea Stap Distaem Bae Nating Dae!” hem kamap long planti ples.
Long 1923 olketa studyim tok piksa bilong Jesus abaot olketa sheepsheep and olketa goat long Matthew 25:31-46 wea showim aot hao bifor Armageddon hem kam, pipol wea garem honest heart wea bae no kasem Kingdom bilong heven bae God approve-im olketa tu and olketa bae winim Armageddon. Long 1935 way wea olketa studyim gud moa diswan showim aot pipol hia wea olsem sheepsheep olketa nao great crowd, wea man no savvy nambarem, wea Revelation 7:9-17 storyim. Bae they hipimap olketa hia from evri nation and olketa garem hope for winim Great Tribulation and kasem laef olowe long earth. Disfala savvy hem givim bigfala reason for duim preaching work.—John 10:16.
Long 1931 olketa Bible Student tekem disfala nem, Olketa Witness Bilong Jehovah. Bifor datwan, pipol kolem them olketa Bible Student, Olketa International Bible Student, Millennial Dawn pipol, and Watch Tower pipol. Pipol kolem them tu Olketa Russellite and Olketa Rutherfordite. No eni nem hia showim aot hu nao olketa long stretfala way. Nomata disfala nem Kristian, wea God givim long olketa disaepol bilong Jesus long first century, hem barava fitim, planti sekson wea followim giaman teaching iusim tu. For mekem olketa different from planti million giaman Kristian, olketa mas iusim wanfala nem wea bae markem klia olketa trufala follower bilong Kraest long distaem.
Way wea olketa lukluk gud moa long Bible showim aot klia hao olsem Jehovah kolem pipol bilong hem Israel olketa witness bilong hem, so pipol bilong hem tu wea stap long taem bilong end bilong disfala system, wea dedicate for talemaot nem and purpose bilong hem, should garem nem Olketa Witness Bilong Jehovah. Disfala nem mekem olketa trufala Kristian worshiper bilong Jehovah different from evri otherfala pipol wea say olketa Kristian long distaem.—Psalm 83:18; Isaiah 43:10-12.
Long 1942, taem World War II go ahed, Joseph F. Rutherford hem dae, and Nathan H. Knorr kamap nextfala president bilong Watch Tower Society. Long datfala taem olketa profesi showim aot klia hao bihaen long war, shortfala taem bilong peace and freedom bae kamap wea letem preaching work kamap moa big bifor end bilong disfala system. Long February 1943 olketa startim Watchtower Bible School Bilong Gilead for trainim olketa full-taem minister for missionary work long olketa narafala kantri. Long datfala year tu, olketa startim wanfala spesel training program for ministry long olketa meeting bilong Olketa Witness Bilong Jehovah evri week.
Long 1950 Society start for release-im samfala part bilong New World Translation of the Holy Scriptures Bible, wea olketa transletem from olketa firstfala langwis go long English langwis bilong distaem. Disfala Bible wea olketa transletem long stretfala way, wea easy for meanim, and wea no kost tumas from Society printim, barava helpem preaching work. Kasem distaem, olketa pablisim finis winim 91 million copy long 27 langwis.
Long end bilong 1996, winim faev million Witness Bilong Jehovah share long preaching work long 233 kantri and island long sea. Long Memorial bilong dae bilong Kraest, meeting wea garem hae namba winim otherfala meeting long 81,908 kongregeson long 1996, total bilong 12,921,933 pipol nao attendim.
Way wea God hem barava iusim Olketa Witness Bilong Jehovah distaem hem show aot klia taem olketa go ahed for busy long service bilong hem, olketa garem wan mind evriwea long world, olketa strong for mekhae long nem bilong Jehovah and preach abaotem Kingdom bilong hem, olketa garem klinfala fasin, olketa acceptim full Bible olsem trufala Word bilong God, and olketa free from kastom belief and spiritism.
Olketa nextfala sekson showim way wea iu savvy kasem gudfala samting from disfala tru worship bilong God wea kamap moa.
• Wanem nao olketa main teaching bilong Bible wea mekem olketa Bible Student different from otherfala church?
• Kam kasem 1918, hao nao organization bilong olketa Bible Student go ahed?
• Hao nao iumi fit for say sekson bilong olketa anointed Bible Student nao disfala “faithful and wise slave” wea Matthew 24:45-47 storyim?
• Wanem savvy abaotem purpose bilong God nao givim moa reason for mekem preaching work kamap moa big?
• Wanem nao purpose bilong disfala nem, Olketa Witness Bilong Jehovah?
• Wanem nao samfala samting wea prove-im God barava iusim Olketa Witness Bilong Jehovah distaem?
[Piksa long page 8]
C. T. Russell long 1879
July 1879 magasin
Grup Bilong Olketa Bible Student, Pittsburgh, Pa.
[Piksa long page 9]
Hedquarter, 1889-1909, Pittsburgh, Pa.
Olketa main office, 1909-1918, Brooklyn, N.Y.
Hedquarter accommodation, 1909-1926, Brooklyn, N.Y.
[Piksa long page 10]
World hedquarter bilong Olketa Witness Bilong Jehovah, Brooklyn, New York, U.S.A.
Left saed on top: Office building
Raet saed on top: Accommodation building
Left saed long daon: Factory building
Raet saed long daon: Shipping building
[Piksa long page 11]
J. F. Rutherford toktok long radio
Firstfala rotary press bilong Watchtower Society, wea olketa volunteer nao iusim
New World Translation bilong Bible, wea distaem olketa pablisim long 27 langwis