Kongregeson Organize for Preach Abaotem Kingdom Bilong God
Taem Jesus Kraest stap long earth, hem preach abaotem Kingdom bilong God from vilij tu vilij and from taon tu taon. Hem trainim and sendem aot olketa disaepol bilong hem tu for duim sem work. Bifor hem go ap long heven, hem talem olketa follower bilong hem for mekem disaepol long pipol from evri nation. From taem wea hem start, firstfala Kristian kongregeson organize for preachim gud nius. Long eni ples wea olketa disaepol kasem, olketa preach abaotem Kingdom bilong God.—Matthew 4:17, 23; 10:1-16; 28:19, 20; Luke 4:43, 44; 8:1; 10:1-9; Acts 1:8; 4:31; 5:42; 8:12; 19:8; 28:23, 30,31; Romans 10:9, 10, 14.
Long profesi bilong Jesus abaot taem bilong end bilong disfala system, hem say: “Disfala gud nius bilong kingdom olketa bae talemaot evriwea long earth for wanfala witness long evri nation; and then end bae kam.” Disfala preaching hem wanfala main work bilong Kristian kongregeson distaem.—Matthew 24:14; Mark 13:10.
Evriwea long world, evri kongregeson bilong Olketa Witness Bilong Jehovah organize for work long area bilong olketa seleva for preachim gud nius abaotem Kingdom bilong God. For mekem olketa duim diswan followim order, long each kantri branch office bilong Watch Tower Society markem for evri kongregeson area for witnessing. Kongregeson divaedem datfala territory long samfala part, and then hem responsibility bilong samfala wea kongregeson markem for mek sure olketa preach long pipol long olketa ples hia.—1 Corinthians 14:33, 40.
Olketa Witness savvy story withim pipol taem olketa go from haos tu haos. Long kongregeson meeting bilong olketa, Olketa Witness Bilong Jehovah kasem training for iusim Bible for talem shortfala story abaotem message bilong Kingdom long olketa pipol. Olketa Witness karem olketa Bible buk for offerim long olketa haosholder wea laek for savvy moa abaotem Word bilong God.
For givim chance long evriwan long territory for herem important message bilong Kingdom, olketa Witness keepim record taem olketa go from haos tu haos, raetem daon olketa haos wea pipol no stap or sapos from samfala reason olketa no garem chance for givim witness. Olketa bae kol back long narafala taem. Sapos eni man showim aot interest, olketa Witness raetem daon datwan and olketa go back for givim moa information from Bible. Sapos datfala man laekem, bae olketa conductim Bible study withim hem. Evri samting hia free nomoa.
Olketa Witness Bilong Jehovah offerim olketa magasin tu long pipol wea wakabaot long road. Long disfala way olketa meetim planti pipol wea maet olketa no faendem long haos. Olketa barava trae for kasem evriwan wea bae listen.—Acts 17:17; Revelation 14:6, 7; 22:17.
Why nao olketa Witness go ahed for go long haos bilong pipol nomata planti no showim aot interest? Olketa luksavvy hao planti taem living bilong pipol savvy change and olketa moa willing for listen next taem, or maet olketa meetim narafala man long famili wea interest.
Jesus talem olketa disaepol bilong hem: “Go ahed for lukaotem kingdom firstaem and raeteous fasin bilong hem.” Work for preach abaotem Kingdom bilong God hem wanfala important part long way for lukaotem Kingdom firstaem, and Olketa Witness Bilong Jehovah mekem diswan barava important goal long laef bilong olketa.—Matthew 6:33; 2 Timothy 4:2.
• Wanem work bilong Jesus and olketa firstfala Kristian nao Bible say bae hem kamap tu long taem bilong iumi?
• Hao nao preaching work bilong Olketa Witness Bilong Jehovah hem organize?
• Why nao olketa Witness go ahed for go long pipol nomata planti no show aot interest?
[Piksa long page 16, 17]
Olketa Witness Bilong Jehovah preach abaotem Kingdom bilong God long olketa different kantri
Thailand
Mexico
Netherlands
Korea
Curaçao
Ghana
Britain
Australia