Contribution wea Pipol Givim Supportim Work
Olketa volunteer workman nao duim evri work wea brochure hia storyim finis, and diswan daonem olketa kost. Olketa Witness Bilong Jehovah willing for duim haos tu haos ministry and givim aot olketa buk. Olketa peim kost for olketa samting bilong olketa seleva. Olketa elder wea luk aftarem olketa kongregeson, wea kasem help from olketa ministerial servant, no kasem pei for work wea olketa duim. Olketa peim kost for olketa samting bilong olketa seleva.
Olketa member bilong Governing Body and evri other wan wea work full taem for readyim and workim olketa Bible and Bible buk kasem nomoa ples for stap and kaikai and lelebet selen for peim samting for olketa seleva. Diswan hem semsem tu for olketa traveling ovaseer wea work full taem.
Olketa buk bilong mifala hem for helpem pipol wea showim aot trufala interest long Bible. Samting wea peim olketa main kost for olketa material, for printim, and sendem go aot hem contribution wea kam from pipol wea interest and olketa contribution, legal will, and samfala samting olsem, wea kam from samfala Witness Bilong Jehovah.
Long evri meeting bilong Olketa Witness Bilong Jehovah, nomata long kongregeson bilong olketa or long olketa assembly, samfala contribution box stap for eniwan wea laek givim contribution. Olketa no collectim selen. Olketa no askim selen or markem haomas selen man mas givim. Olsem Bible hem talem, man wanwan savvy givim contribution olsem hem decide-im insaed heart bilong hem.—2 Corinthians 8:12; 9:7.
• Hao nao Olketa Witness Bilong Jehovah kasem selen for supportim work bilong olketa?