Chapter 60
Vision Bilong Kingdom Glory Bilong Kraest
JESUS kam long Caesarea Philippi, and go ahed for teachim pipol and aposol bilong hem tu. Hem talem toktok wea mekem planti sapraes: “Tru nao, mi talem iufela, samfela wea stand ap long hia bae no dae go kasem taem they lukim Son bilong man kam insaed long kingdom bilong hem.”
Olketa disaepol maet ting, ‘Wanem nao Jesus meanim?’ Samting olsem wan week bihaen, Jesus tekem Peter, James, and John withim hem, and they klaemap long wanfela hae maunten. Maet diswan long naet, bikos olketa disaepol laek for sleep. Taem Jesus go ahed for prea, hem change and kasem glory front long them. Face bilong hem shine olsem sun, and kaleko bilong hem kamap white olsem laet.
Then, tufela man, wea they luksavvy olsem “Moses and Elijah,” stand ap withim hem and start for story long Jesus abaotem way wea hem ‘bae lusim olketa long Jerusalem.’ Datfela way wea hem bae lusim olketa, hem meanim dae and resurrection bilong Jesus. So, disfela story bilong them prove-im hao datfela no gud dae bilong hem, hem no samting wea hem savvy misstim, olsem Peter hem tingim.
Olketa disaepol barava wekap and sapraes tumas so they lukluk and listen gud. Nomata diswan hem wanfela vision, hem luk olsem really samting so Peter join insaed story taem hem say: “Lord, hem gud for iumi stap long hia. Sapos iu laek, mi bae mekem threefela tent long hia, wanfela for iu and wanfela for Moses and wanfela for Elijah.”
Taem Peter toktok yet, wanfela braet cloud hem kam ovarem them, and wanfela voice from datfela cloud hem say: “Dis wan hem Son bilong mi, wea mi love-im, and mi hapi long hem; listen long hem.” Taem they herem datfela voice, olketa disaepol fall daon long graon and haedem face bilong them. But Jesus say: “Stand ap and no fraet.” Taem they stand ap, olketa lukim Jesus seleva nomoa.
Taem they go daon long datfela maunten long next day, Jesus komandim them: “No talem datfela vision long anywan go kasem taem wea Son bilong man hem laef back from dae.” From they lukim Elijah insaed long datfela vision, olketa disaepol ask olsem: “Why nao olketa scribe say Elijah mas kam firstaem?”
“Elijah hem kam finis,” Jesus say, “and olketa no luksavvy long hem.” Long hia Jesus hem story abaotem John the Baptizer, wea duim work wea semsem olsem Elijah. John readyim way for Kraest, olsem Elijah duim for Elisha.
Disfela vision hem barava strongim Jesus and olketa disaepol tu! Vision hia showim aot long smallfela way Kingdom glory bilong Kraest. Olketa disaepol lukim “Son bilong man kam insaed long kingdom bilong hem,” olsem Jesus promisim wan week go finis. Bihaen Jesus dae, Peter raet abaotem way wea they ‘lukim glory bilong Kraest taem they stap withim hem long datfela holy maunten.’
Olketa Farisi talem Jesus for givim wanfela saen for prove-im hem nao dat wan wea olketa Scripture say hem King wea God choosim. Hem no givim them any saen. Long other saed, olketa klos disaepol bilong Jesus lukim Jesus change and kasem glory for prove-im olketa profesi abaotem Kingdom they tru. Dastawe, Peter say bihaen: “Dastawe toktok bilong profesi kamap moa strong.” Matthew 16:13, 28–17:13; Mark 9:1-13; Luke 9:27-37; 2 Peter 1:16-19.
▪ Bifor they dae, hao nao samfela lukim Kraest hem kam long Kingdom bilong hem?
▪ Insaed long vision, wanem nao Moses and Elijah story abaotem withim Jesus?
▪ Why nao disfela vision hem barava strongim olketa disaepol?