Chapter 77

Kwestin Abaot Hu Bae Kasem Evri Samting Bilong Dadi

OLKETA pipol savvy Jesus hem kaikai long haos bilong wanfela Farisi. So planti thousand hipap aotsaed and waitim Jesus taem hem kam aotsaed. Long different way from olketa Farisi wea againstim Jesus and trae for mekem hem talem rong samting, olketa pipol willing tumas for listen and ting hae long hem.

Jesus say firstaem long olketa disaepol: “Lukaot long yeast bilong olketa Farisi, wea meanim hypocrite fasin.” Olsem hem talem taem they kaikai, whole system bilong religion bilong olketa Farisi hem fulap withim hypocrite fasin. But nomata olketa Farisi haedem badfela fasin bilong them taem they trae for show aot they followim law, go-go diswan bae show aot klia. “No any samting wea haed,” Jesus hem say, “bae no show aot klia, and no any secret bae stap haed.”

Jesus talem moa sem toktok wea hem givim taem hem sendem 12-fela for preach long Galilee. Hem say: “No fraet long olketa wea savvy killim dae body and bihaen they no savvy duim any samting moa.” From God no savvy forgetim any bird, Jesus talem olketa follower bilong hem hao God bae nating forgetim them. Hem say: “Taem they tekem iufela front long wanfela grup long pablik and olketa bigman bilong gavman, . . . holy spirit bae teachim iufela long datfela hour olketa samting wea iufela need for talem.”

Wanfela man askim hem. “Teacher,” hem say, “talem brata bilong mi for divaedem evri samting bilong dadi withim mi.” Law Bilong Moses say firstborn son nao bae kasem tufela haf long evri samting bilong dadi, so no fitim any raoa for kamap from diswan. But luk olsem datfela man wantim moa samting winim wanem law hem talem.

Jesus no laek for join insaed long disfela raoa. “Man, hu nao markem mi olsem judge or man for divaedem evri samting bilong iufela?” hem say. Then hem givim barava important kaonsel long olketa pipol: “Keepim eye bilong iufela open and guard againstim evri kaen fasin for kavet, bikos nomata sapos wanfela man garem planti samting, hem bae no kasem laef from olketa samting wea hem garem.” Yes, nomata haomas samting man garem, bae hem dae and lusim evri samting hia. For strongim disfela tru samting, and for showim aot mistek for no garem gudfela nem withim God, Jesus iusim wanfela tok piksa. Hem say:

“Graon bilong wanfela rich man hem garem planti kaikai. So hem start for tingting olsem, ‘Wanem nao bae mi duim, from mi no garem any ples moa for putim olketa kaikai bilong mi?’ So hem say, ‘Bae mi duim diswan: Bae mi aotem olketa stoahaos and buildim samfela wea moa big, and long there nao mi bae hipim ap evri kaikai and gudfela samting bilong mi; and mi bae say long soul bilong mi: “Soul, iu garem planti gudfela samting for staka year; garem easy living, kaikai, drink, enjoyim iuseleva.” ’ But God say long hem, ‘Kranky man, long disfela naet iu bae lusim soul bilong iu. So hu nao bae tekem evri samting wea iu hipim ap?’”

For finisim toktok, Jesus say: “So hem semsem tu withim man wea hipim ap olketa richfela samting for hemseleva but hem no rich long saed bilong God.” Nomata olketa disaepol maet no fall daon long trap for hipim ap olketa richfela samting, but from samting long saed bilong evriday living, hem easy for diswan pullim them from way for servim Jehovah withim whole soul. So Jesus iusim disfela chance for talem moa gudfela kaonsel wea hem givim long wan and haf year bifor long Sermon Long Maunten. Hem say long olketa disaepol:

“From disfela samting mi talem iufela, No worry abaotem soul bilong iufela long wanem iufela bae kaikaim or body bilong iufela long wanem iufela bae wearim. . . . Lukim hao olketa bird no savvy plantim seed or harvestim, and they no garem any stoahaos tu, nomata olsem God hem feedim them. . . . Lukim way wea olketa lily flaoa they grow; they nating work or mekem kaleko; but mi talem iufela, Nomata Solomon withim bigfela glory bilong hem, hem no luk nice olsem wanfela long olketa hia. . . .

“So no worry long samting wea iufela bae kaikaim and samting wea iufela bae drinkim, and finis for worry tumas; from evri samting hia they samting wea olketa nation bilong world they barava aftarem, but Father bilong iufela savvy iufela needim olketa samting hia. Nomata olsem, go ahed for lukaotem kingdom bilong hem evritaem, and iufela bae kasem olketa samting hia tu.”

Hem gud tumas for ting strong long toktok bilong Jesus taem hard samting kamap long saed bilong shilling. Man wea worry tumas long olketa material samting wea hem needim and start for slak long olketa spiritual samting hem show aot hem no garem faith long way wea God fit for provide-im samting for olketa servant bilong Hem. Luke 12:​1-31; Deuteronomy 21:⁠17.

▪ Why nao maet wanfela man hem ask abaotem way for kasem olketa samting bilong dadi bilong hem, and wanem kaonsel nao Jesus givim?

▪ Wanem tok piksa nao Jesus iusim, and wanem nao main point bilong hem?

▪ Wanem kaonsel nao Jesus talem moa, and why nao diswan fitim?