Chapter 92
Jesus Healim Tenfela Leprosy Man Long Last Go-go for Jerusalem
JESUS spoelem plan bilong Sanhedrin for killim hem dae taem hem lusim Jerusalem and go for taon bilong Ephraim, wea maet stap 15 mile long northeast saed bilong Jerusalem. Hem stap long there withim olketa disaepol, farawe from olketa enemy bilong hem.
But taem for Passova bilong 33 C.E. hem kam klosap, and Jesus startim moa narafela wakabaot. Hem go thru long Samaria for Galilee. Diswan hem lastfela visit bilong hem bifor hem dae. Taem hem long Galilee, luk olsem hem and olketa disaepol go withim olketa pipol wea go long Jerusalem for celebrate-im Passova. They followim road wea go thru long distrik bilong Perea, long east saed bilong Jordan River.
Long datfela go-go, taem Jesus go insaed wanfela vilij maet long Samaria or Galilee, hem meetim tenfela leprosy man. No gud sik hia hem easyeasy kaikaim different part long body bilong man—olketa finger, toe, ear, nose, and mouth bilong hem. For protectim other pipol for no kasem, Law bilong God say olsem abaotem leprosy man: “Hem mas kavarem beard bilong hem and singaot, ‘No klin, no klin!’ Long taem wea datfela sik stap long hem, hem bae no klin. . . . Hem mas stap seleva.”
From tenfela leprosy man hia obeyim datfela Law, they stap farawe from Jesus. But they singaot withim loudfela voice: “Jesus, Teacher, showim aot mercy long mifela!”
Taem hem lukim them farawe, Jesus komandim them: “Go and showim iufela seleva long olketa priest.” Jesus talem diswan bikos Law bilong God say olketa priest nomoa fit for say olketa leprosy man they gud moa long sik bilong them. Then they fit for stap moa withim olketa pipol wea healthy.
Tenfela leprosy man hia trustim paoa wea Jesus garem for healim them. So they kwiktaem go for lukim olketa priest, nomata they no gud yet. Taem they go-go, they kasem reward for faith wea they garem long Jesus. They start for lukim and feelim body bilong them kamap healthy nao!
Naenfela leprosy man wea kamap klin finis they go olawe nao, but narafela leprosy man, wea hem wanfela Samaritan man, hem kam back for lukaotem Jesus. Why? Bikos hem ting hae tumas long samting wea happen long hem. Hem praisim God withim bigfela voice, and taem hem faendem Jesus, hem fall daon front long hem and say thankiu long hem.
So Jesus say olsem long hem: “Tenfela leprosy man nao kamap klin, hem tru? So wea nao nara naenfela? Waswe, no anywan long olketa tan back for givim glory long God but disfela man bilong narafela nation nomoa?”
Then hem say long datfela Samaritan man: “Stand ap and go; faith bilong iu hem mekem iu kamap gud.”
Taem iumi readim story abaotem way wea Jesus healim tenfela leprosy man, iumi mas ting strong long samting wea hem meanim taem hem askim datfela kwestin: “Wea nao nara naenfela?” Way for no ting hae long samting, olsem naenfela hia showim aot hem wanfela bigfela weak point. Waswe, iumi bae olsem datfela Samaritan taem iumi say thankiu long olketa samting wea iumi kasem from God, insaed diswan hem promis bilong laef olawe insaed raeteous niu world bilong God? John 11:54, 55; Luke 17:11-19; Leviticus 13:16, 17, 45, 46; Revelation 21:3, 4.
▪ Hao nao Jesus spoelem plan for killim hem dae?
▪ Wea nao nextfela ples wea Jesus go, and hem laek for go long wea?
▪ Why nao olketa leprosy man stand ap farawe, and why nao Jesus talem them for go long olketa priest?
▪ Wanem nao iumi mas learnim from disfela story?