Chapter 1
Yu Savvy Garem Hapi Future!
1, 2. Wanem nao Creator bilong yu wantim yu for garem?
TAEM samwan wea yu love-im hem huggim yu. Laflaf wea kamap taem yu kaikaim nicefela kaikai withim olketa gudfela fren. Hapi wea yu kasem taem yu lukim olketa pikinini bilong yu they play. Olketa hia they hapi taem long laef. But, for planti pipol, laef hem olawe garem wanfela bigfela problem wea lead go long narawan. Sapos datwan nao kasem yu, hope hem stap.
2 Will bilong God hem for yu enjoyim hapi living olawe insaed long barava nicefela ples. Hapi future olsem hem no wanfela dream nomoa, from God hem offerim key long yu for kasem diswan. Datfela key hem savvy.
3. Wanem kaen savvy nao hem key for kasem hapi, and why nao yumi sure God bae givim datfela savvy?
3 Yumi tok abaotem wanfela spesel kaen savvy wea winim wisdom bilong olketa man. Diswan hem “barava savvy bilong God.” (Proverbs 2:5) Klosap 2,000 year bifor, wanfela man wea raetem Bible hem say: “Every haos garem samwan wea workim hem, but man wea workim every samting hem God.” (Hebrews 3:4) Tingim savvy wea Man Wea Workim every samting hem garem! Bible hem say God kaontem and givim nem long every star. Datwan mekem yumi sapraes for gud, from galaxy wea yumi stap insaed hem garem planti hundred billion star, and pipol wea studyim olketa star they say samting olsem wan hundred billion otherfela galaxy they stap! (Psalm 147:4) God savvy long every samting abaotem yumi, so hu moa savvy givim gudfela ansa for olketa important kwestin long laef?—Matthew 10:30.
4. Why nao yumi fit for ting God bae givim savvy for guide-im yumi, and wanem buk nao givim datwan?
4 Tingim tufela man wea trae for fixim truck bilong them. Wanfela hem feel kros from hem no savvy fixim, so hem les nao for go ahed. Narafela man hem easyeasy for fixim datfela problem, then hem startim truck, and hem smile taem engine hem gud nao. Hem easy for luksavvy hu long tufela man hia hem garem savvy buk from kampani wea workim datfela truck. Waswe, hem stret for ting God tu bae givim savvy for guide-im yumi long laef? Maet yu savvy finis, Bible nao datfela buk—savvy buk from Creator bilong yumi for guide-im yumi, for givim yumi savvy bilong God.—2 Timothy 3:16.
5. Hao important nao savvy wea stap insaed long Bible?
5 Sapos Bible nao hem datfela buk, tingim planti nambawan savvy wea stap insaed! Long Proverbs 2:1-5, hem encouragim yumi for lukaotem wisdom, for lukaotem olsem wanfela samting wea garem hae price—no from tingting bilong man, but insaed long Word bilong God. Sapos yumi luk long there, yumi bae “faendem barava savvy bilong God.” From God luksavvy long olketa samting wea yumi no fit for duim and olketa need bilong yumi, hem givim yumi instruction wea bae helpem yumi for garem laef wea garem peace and hapi. (Psalm 103:14; Isaiah 48:17) And tu, savvy bilong God givim yumi nambawan nius.
LAEF OLAWE!
6. Wanem hope nao Jesus Kraest givim abaotem savvy bilong God?
6 Datfela man long history wea planti pipol savvy long hem, Jesus Kraest, hem story klia abaotem disfela part long savvy bilong God. Hem say: “Diswan nao meanim laef olawe, for olketa mas kasem savvy long yu, only trufela God, and long dat wan wea yu sendem kam, Jesus Kraest.” (John 17:3) Tingim datwan—savvy wea lead go long laef olawe!
7. Wanem nao prove-im hao God no meanim for yumi dae?
7 No kwiktaem for say laef olawe hem wanfela dream nomoa. But, luk long hao body bilong yumi hem work. Hem savvy taste-im, herem, smelem, lukim, and feelim samting. Planti samting wea stap long earth they mekem yumi hapi—kaikai wea taste nice tumas, bird wea singim nicefela tune, olketa flaoa wea smel nice, ples wea luk nice tumas, way for fren gud withim samwan! Brain bilong yumi hem winim every computer, from hem mekem yumi fit for ting hae and enjoyim every samting hia. Waswe, yu ting Creator bilong yumi wantim yumi for dae and lusim every samting? Waswe, hem stret for ting hem wantim yumi for hapi and enjoyim laef olawe? Well, savvy bilong God bae givim datwan long yu.
LAEF INSAED PARADAES
8. Wanem nao Bible talem abaotem future bilong olketa man?
8 Samting wea Bible talem abaotem future bilong earth and olketa man hem insaed wanfela word nomoa—Paradaes! Jesus Kraest tok abaotem diswan taem hem talem wanfela man wea klosap for dae: “Yu bae stap withim mi long Paradaes.” (Luke 23:43) Taem hem herem Paradaes, datfela man tingim nicefela ples wea firstfela dadi and mami bilong yumi, Adam and Eve, they stap insaed. Taem God create-im them, they perfect and they stap insaed wanfela nicefela gaden wea Creator hem planim and workim. Dastawe they kolem datfela ples gaden bilong Eden, wea meanim hapi.
9. Hao nao living long firstfela Paradaes?
9 Datfela gaden hem nice for gud! Hem wanfela really paradaes. Hem garem samfela nicefela tree wea fruit bilong them barava taste gud. Taem Adam and Eve lukluk raon long hom bilong them, drinkim klinfela wata, and harvestim fruit from olketa tree, they no need for worry or fraet long any samting. Olketa animal tu no mekem them fraet, from God putim datfela man and waef bilong hem for bossim every animal long loving way. And tu, firstfela man and woman barava healthy. Sapos they go ahed for obeyim God, they bae garem wanfela hapi future for olawe. They garem work wea mekem them satisfy, for luk aftarem nambawan Paradaes hom bilong them. And tu, God komandim Adam and Eve for “fulimap earth and luk aftarem.” They and olketa pikinini bilong them bae mekem Paradaes kamap moa big go kasem taem wea whole earth hem kamap wanfela barava nicefela ples.—Genesis 1:28.
10. Taem Jesus tok abaotem Paradaes, wanem nao hem meanim?
10 But, taem Jesus tok abaotem Paradaes, hem no askim datfela man wea klosap for dae for ting abaotem samting wea happen longfela taem go finis. No moa, Jesus hem tok abaotem future! Hem savvy whole earth bilong yumi bae kamap wanfela paradaes. Long datfela taem God bae fulfillim firstfela purpose bilong hem for olketa man and earth bilong yumi. (Isaiah 55:10, 11) Yes, Paradaes bae kamap moa! And hao nao living long datfela taem? Letem Word bilong God, Holy Bible, ansarem datwan.
LAEF INSAED PARADAES WEA BAE KAMAP MOA
11. Long Paradaes wea bae kamap moa, wanem nao bae happen long sik, way for olo, and dae?
11 Sik, way for olo, and dae bae no stap moa. “Long datfela taem, eye bilong olketa wea blind bae open, and ear bilong olketa wea earpass bae no sat moa. Long datfela taem, man wea cripple bae klaem ap olsem wanfela deer, and tongue bilong olketa wea no savvy toktok bae singaot withim hapi.” (Isaiah 35:5, 6) “God seleva hem bae stap withim olketa [man]. And hem bae aotem every wata from eye bilong olketa, and dae bae no moa, sorry and fashion for krae and pain bae no moa tu. Every samting wea stap bifor hem finis nao.”—Revelation 21:3, 4.
12. Why nao yumi sure hao bad fashion, and raf fashion bae no stap insaed long Paradaes wea bae kamap long future?
12 Bad fashion, and raf fashion bae finis for olawe. “Olketa man wea duim no gud samting bae finis . . . Lelebet taem nomoa, and badfela man bae finis . . . Hem bae no stap moa. But olketa humble wan bae stap long disfela earth.” (Psalm 37:9-11) “But olketa badfela pipol, they bae finis every bit from earth; and olketa wea duim giaman fashion, they bae aotem from earth.”—Proverbs 2:22.
13. Hao nao God bae bringim peace?
13 Peace bae stap everywea long earth. “Hem [God] bae finisim war long every part bilong earth. Hem bae brekem bow and pisisim spear.” (Psalm 46:9) “Olketa raeteous wan bae kamap, and bigfela peace bae stap go kasem taem wea moon bae no moa.”—Psalm 72:7.
14, 15. Wanem nao Bible talem abaotem haos, work, and kaikai long Paradaes wea bae kamap moa?
14 Gudfela haos and work wea mekem man satisfy. “They bae buildim haos and stap insaed . . . They bae no build and narafela man nao stap insaed; they bae no plantim and narafela man nao kaikaim. From olketa day bilong pipol bilong mi bae olsem olketa day bilong wanfela tree; and work bilong hand bilong them, olketa chosen wan bilong mi bae use-im every bit. They bae no hard work nating, or bornim pikinini for kasem trabel.”—Isaiah 65:21-23.
15 Planti gudfela kaikai bae stap. “Planti kaikai bae stap long earth; on top long olketa maunten hem bae fulap.” (Psalm 72:16) “Graon bae mekem planti kaikai grow; God, God bilong yumi, bae blessim yumi.”—Psalm 67:6.
16. Why nao laef insaed Paradaes bae gud tumas?
16 Laef olawe insaed wanfela paradaes earth bae gud tumas. “Olketa wea raeteous bae stap long disfela earth, and olketa bae stap olawe long hem.” (Psalm 37:29) “Drae area and ples wea no garem wata bae singaot from they hapi, and olketa drae open ples bae hapi and kamap olsem olketa nicefela flaoa wea open.”—Isaiah 35:1.
SAVVY AND FUTURE BILONG YU
17. (a) Wanem nao yu mas duim sapos yu laekem laef insaed long Paradaes? (b) Hao nao yumi savvy God bae change-im planti samting long earth?
17 Sapos yu laekem laef insaed long Paradaes, no letem any samting stopem yu for kasem savvy bilong God. Hem love-im olketa man and hem bae change-im olketa samting long disfela earth for kamap wanfela paradaes. From tingim diswan, sapos yu garem paoa for finisim sorry and olketa samting wea no followim justice wea big tumas long world, waswe, bae yu duim? Waswe, fitim yumi for ting God bae no duim? Tru nao, Bible hem barava talem klia wanfela taem wea God bae aotem disfela system wea fulap withim olketa problem and change-im withim wanfela perfect, raeteous rul. (Daniel 2:44) But Bible hem duim moa samting winim way for talem yumi nomoa every samting abaotem diswan. Hem showim yumi hao yumi savvy go insaed niu world wea God promisim.—2 Peter 3:13; 1 John 2:17.
18. Wanem nao savvy bilong God bae duim for yu distaem?
18 Disfela savvy bilong God savvy helpem yu long planti way distaem. Bible hem garem olketa ansa for planti barava important kwestin long laef. Sapos yu letem Bible for guide-im yu, diswan bae helpem yu for mekem grow way for fren withim God. Datwan hem nambawan privilege! And diswan bae mekem yu fit for enjoyim peace wea God nomoa savvy givim. (Romans 15:13, 33) Taem yu start for kasem disfela important savvy, yu start nao long barava important samting long laef bilong yu wea bringim reward. Yu bae nating sorry from yu kasem savvy bilong God wea lead go long laef olawe.
19. Wanem kwestin nao yumi bae story abaotem long nextfela chapter?
19 Yumi story abaot Bible olsem buk wea garem savvy bilong God. But, hao nao yumi savvy diswan hem no wanfela buk bilong olketa man, but samting wea moa hae? Yumi bae story abaotem disfela kwestin long nextfela chapter.
TESTIM SAVVY BILONG YU
Why nao savvy bilong God bae leadim yu for kasem hapi olawe?
Wanem kaen laef nao bae kamap insaed Paradaes earth wea klosap for kam?
Why nao yu bae kasem gudfela samting sapos yu kasem savvy bilong God distaem?