Chapter 5
God Acceptim Worship Bilong Hu?
1. Wanem nao wanfela Samaritan woman wantim for savvy abaotem worship?
WASWE anytaem yu tingim disfela kwestin, ‘God acceptim worship bilong hu?’ Wanfela woman maet tingim kwestin olsem taem hem story withim Jesus Kraest klosap long Maunt Gerizim long Samaria. Taem hem tok abaotem way wea worship bilong olketa Samaritan and Jew hem different, woman hia hem say: “Olketa laen dadi bilong mifela they worship long disfela maunten; but yufela say Jerusalem nao ples wea pipol mas worship.” (John 4:20) Waswe, Jesus talem datfela Samaritan woman hao God acceptim every kaen way for worship? Or waswe, hem say samfela samting nomoa man mas duim for mekem God hapi?
2. Taem hem ansarem datfela Samaritan woman, wanem nao Jesus talem?
2 Ansa wea Jesus givim mekem yumi sapraes: “Taem bae kam wea pipol bae no worshipim Father long disfela maunten or long Jerusalem.” (John 4:21) For longfela taem nao olketa Samaritan they fraet long Jehovah and worshipim otherfela god long Maunt Gerizim. (2 Kings 17:33) Distaem Jesus Kraest hem say datfela ples and Jerusalem bae they no important long trufela worship.
WORSHIP WITHIM SPIRIT AND TRUTH
3. (a) Why nao olketa Samaritan no really savvy long God? (b) Hao nao olketa Jew wea faithful and other pipol fit for savvy long God?
3 Jesus go ahed for say olsem long datfela Samaritan woman: “Yufela worshipim samting wea yufela no savvy long hem; mifela worshipim samting wea mifela savvy, bikos salvation hem start withim olketa Jew.” (John 4:22) Olketa Samaritan garem idea bilong olketa giaman religion and they only acceptim first faevfela buk bilong Bible olsem samting wea kam from God—and diswan they acceptim only taem they change-im and kolem them Samaritan Pentateuch. So, they no really savvy long God. But, God givim savvy from olketa Scripture long olketa Jew. (Romans 3:1, 2) Olketa Scripture talem olketa Jew wea faithful and any other pipol wea want for listen, samting wea they need for duim for savvy long God.
4. Olsem Jesus talem, wanem nao olketa Jew and Samaritan need for duim for mekem God acceptim worship bilong them?
4 Tru nao, Jesus hem showim aot hao olketa Jew and Samaritan mas change-im way bilong them for worship for mekem God hapi. Hem say: “Hour bae kam, and hem kam finis, wea olketa trufela worshiper bae worshipim Father withim spirit and truth, from Father hem lukaotem pipol olsem for worshipim hem. God hem wanfela Spirit, and olketa wea worshipim hem mas worship withim spirit and truth.” (John 4:23, 24) Yumi need for worshipim God “withim spirit,” and heart wea fulap withim faith and love nao muvim yumi for duim diswan. Yumi fit for worshipim God ‘withim truth’ sapos yumi studyim Word bilong hem, Bible, and worshipim hem followim truth wea hem showim. Waswe, yu barava want for duim diswan?
5. (a) Wanem nao “worship” hem meanim? (b) Wanem nao yumi mas duim sapos yumi wantim God for acceptim worship bilong yumi?
5 Jesus strongim way wea God wantim trufela worship. Diswan show aot Jehovah hem no acceptim samfela way for worship. For worshipim God hem meanim for givim hem honor wea join withim worship and duim holy service long hem. Sapos yu want for showim aot honor long wanfela bigfela ruler, yu willing tumas for servim hem and duim samting wea mekem hem hapi. Olsem tu, yumi want for mekem God hapi. Winim way for say, ‘Religion bilong mi fitim mi,’ yumi need for mek sure worship bilong yumi fitim wanem nao God hem wantim.
DUIM WILL BILONG FATHER
6, 7. Why nao Jesus no luksavvy long samfela wea say they disaepol bilong hem?
6 Yumi readim Matthew 7:21-23 and trae for barava luksavvy long wanfela important samting wea show aot sapos God hem hapi long every different kaen way for worship. Jesus hem say: “No everywan wea kolem mi, ‘Lord, Lord,’ bae go insaed long kingdom bilong heven, but only man wea hem duim will bilong Father bilong mi wea stap long heven. Planti pipol bae tok olsem long mi long datfela day, ‘Lord, Lord, waswe mifela no talem profesi long nem bilong yu, and aotem olketa demon [olketa badfela spirit] long nem bilong yu, and duim planti mirakol long nem bilong yu?’ And long datfela taem mi bae tok olsem long olketa: Mi nating savvy long yufela! Yufela klia from mi, yufela man for brekem law.”
7 Way for luksavvy long Jesus Kraest olsem Lord hem important long trufela worship. But disfela scripture show aot wanfela samting bae miss long worship bilong planti pipol wea say they disaepol bilong Jesus. Hem say samfela bae duim “planti mirakol,” olsem way for healim man. But, they bae fail for duim samting wea Jesus say hem important. They no “duim will bilong Father [bilong hem].” Sapos yumi want for mekem God hapi, yumi mas learnim wanem nao will bilong Father and then duim datwan.
STRETFELA SAVVY—PROTECTIM YUMI
8. Sapos yumi want for duim will bilong God, wanem nao yumi mas duim, and wanem kaen rong tingting nao yumi mas stap klia long them?
8 For duim will bilong God man need for garem stretfela savvy abaotem Jehovah God and Jesus Kraest tu. Diskaen savvy hem lead go long laef olawe. Tru nao, yumi everywan want for ting strong long way for kasem stretfela savvy from Word bilong God, Bible. Samfela say yumi no need for worry, but sapos yumi believe and strong long worship bilong yumi datwan hem inaf nao. Otherfela say, ‘Sapos yu no savvy long planti samting, yu no need for duim planti samting tu.’ But, Bible hem encouragim yumi for mekem grow savvy bilong yumi abaotem God and olketa purpose bilong hem.—Ephesians 4:13; Philippians 1:9; Colossians 1:9.
9. Hao nao stretfela savvy hem protectim yumi, and why nao yumi needim disfela way for protectim yumi?
9 Savvy olsem hem protectim worship bilong yumi for no kamap dirty. Aposol Paul hem tok abaotem wanfela spirit angel wea giaman for kamap “wanfela angel bilong laet.” (2 Corinthians 11:14) Long giaman way olsem, disfela spirit—Satan—trae for giamanim yumi for duim olketa samting wea againstim will bilong God. Olketa otherfela spirit wea join withim Satan they mekem worship bilong pipol kamap dirty, from Paul hem say: “Olketa samting wea olketa nation they sakrifaesim, they sakrifaesim long olketa demon, and no long God.” (1 Corinthians 10:20) Planti pipol ting say they worship long stretfela way, but they no duim samting wea God hem wantim. Samwan hem giamanim them for duim giaman worship wea dirty. Yumi bae learnim moa samting abaotem Satan and olketa demon bilong hem bihaen, but olketa enemy bilong God hia they barava mekem worship bilong olketa man kamap dirty.
10. Wanem nao yu bae duim sapos samwan hem meanim for poisonim wata supply bilong yu, and wanem nao stretfela savvy abaotem Word bilong God helpem yumi for duim?
10 Sapos yu savvy samwan hem meanim for poisonim wata supply bilong yu, waswe, bae yu go ahed nomoa for drinkim? Tru nao, yu bae duim samting kwiktaem for faendem narafela ples wea yu savvy kasem klin and gudfela wata. Well, stretfela savvy long Word bilong God hem helpem yumi for luksavvy long trufela religion and for rejectim olketa dirty samting wea mekem God no acceptim worship.
KOMAND BILONG OLKETA MAN OLSEM TEACHING
11. Wanem nao rong withim worship bilong planti Jew bifor?
11 Taem Jesus stap long earth, planti Jew no duim samting followim stretfela savvy bilong God. So olketa misstim chance for stap klin front long Jehovah. Paul hem raet olsem abaotem them: “Mi savvy givim witness abaotem them hao they garem strong for God; but diswan no followim stretfela savvy.” (Romans 10:2) They seleva nao decide hao for worshipim God and they no listen long samting wea hem talem.
12. Wanem nao mekem worship bilong Israel kamap no klin, and wanem nao kamaot from diswan?
12 Long firstaem, olketa Israelite they followim klinfela religion wea kam from God, but hem kamap dirty from olketa teaching and idea bilong olketa man. (Jeremiah 8:8, 9; Malachi 2:8, 9; Luke 11:52) Nomata olketa bigman bilong religion bilong Jew wea they kolem them olketa Farisi they ting say God hem acceptim worship bilong them, Jesus say long them: “Isaiah hem profesi stret abaotem yufela olketa hypocrite, olsem they raetem finis, ‘Pipol hia they givim honor long mi withim mouth bilong them, but heart bilong them stap farawe from mi. Way wea they worshipim mi hem useless nomoa, bikos they teachim komand bilong olketa man olsem teaching.’ ”—Mark 7:6, 7.
13. Hao nao yumi tu maet duim sem samting olsem olketa Farisi?
13 Waswe, yumi tu maet duim samting olsem olketa Farisi? Diswan savvy happen sapos yumi followim olketa kastom bilong religion wea yumi learnim from dadi and mami winim way for lukluk long samting wea God talem abaotem worship. Taem hem talem warning abaotem disfela barava danger samting, Paul hem raet: “Spirit hem talem stret hao long olketa taem wea bae kam bihaen samfela bae lusim faith, and listen long olketa giaman toktok from on top and teaching bilong olketa demon.” (1 Timothy 4:1) So hem no inaf for ting say God hem hapi long worship bilong yumi. Olsem datfela Samaritan woman wea meetim Jesus, yumi maet duim worship followim dadi and mami bilong yumi. But yumi need for mek sure God hem hapi long samting yumi duim.
GUARD AGAINSTIM WAY FOR MEKEM GOD FEEL NO GUD
14, 15. Nomata yumi garem samfela savvy abaotem will bilong God, why nao yumi need for careful?
14 Sapos yumi no careful, yumi maet duim samting wea God no acceptim. For example, aposol John hem bow daon long wanfela angel “for worshipim hem.” But datfela angel givim disfela warning: “Yu careful! Yu no duim olsem! Mi wanfela slave olsem yu and olketa brata bilong yu nomoa wea garem work for witness long Jesus. Worshipim God.” (Revelation 19:10) So waswe, yu lukim need for mek sure worship bilong yu hem no dirty long way for worshipim idol?—1 Corinthians 10:14.
15 Taem samfela Kristian start for followim olketa kastom bilong religion wea no mekem God hapi, Paul hem ask olsem: “Hao nao yufela tan go back long olketa weak samting bilong firstaem and want for slave moa for them? Yufela barava work hard for keepim olketa day and month and season and year. Mi fraet nao long samting wea bae kasem yufela, maet mi hard work nating nomoa for yufela.” (Galatians 4:8-11) Olketa hia they kasem savvy bilong God but bihaen, they duim rong samting taem they keepim olketa kastom bilong religion and olketa holy day wea Jehovah no acceptim. Olsem Paul hem talem, yumi need for “go ahed for mek sure long samting wea Lord hem acceptim.”—Ephesians 5:10.
16. Hao nao John 17:16 and 1 Peter 4:3 helpem yumi for decide sapos olketa holiday and kastom they mekem God hapi?
16 Yumi mas mek sure yumi stap klia long olketa holiday bilong religion and otherfela kastom wea go againstim olketa principle bilong God. (1 Thessalonians 5:21) For example, Jesus say olsem abaot olketa follower bilong hem: “Olketa no part bilong world, olsem mi tu no part bilong world.” (John 17:16) Waswe, religion bilong yu hem join insaed olketa ceremony and holiday wea go againstim principle for no saed withim any samting bilong disfela world? Or waswe, pipol long religion bilong yu they share samfela taem insaed olketa kastom and festival wea olsem olketa samting wea aposol Peter hem story abaot? Hem raet olsem: “Taem wea go past finis hem fitim yufela for savvy long will bilong olketa nation taem yufela go ahed for duim badfela fashion, dirty fashion, way for drinkim tumas wine, olketa wild party, fashion for drink tumas, and no gud way for worshipim olketa idol.”—1 Peter 4:3.
17. Why nao yumi mas want for stap klia long any samting wea showim aot spirit bilong world?
17 Aposol John hem strongim need for stap klia long any samting wea showim aot spirit bilong disfela world wea stap raonem yumi wea no followim God. John raet olsem: “No love-im disfela world or olketa samting insaed long world. Sapos anywan love-im disfela world, love bilong Father no stap long hem; from every samting insaed long world—samting wea body wantim and samting wea eye wantim and way for show aot flash samting bilong living—hem no kam from Father, but hem kam from world. And tu, world hem ready for finis and every samting wea hem wantim tu, but man wea duim will bilong God bae stap olawe.” (1 John 2:15-17) Waswe, yu lukim long verse hia hao olketa wea “duim will bilong God” bae stap olawe? Yes, sapos yumi duim will bilong God and stap klia long olketa samting wea showim aot spirit bilong world, yumi savvy garem hope for laef olawe!
FOLLOWIM OLKETA HAE MARK BILONG GOD
18. Hao nao samfela long Corinth they garem rong tingting abaotem fashion, and wanem nao yumi mas learnim from diswan?
18 God wantim yumi olketa worshiper bilong hem for followim olketa hae mark bilong hem long saed bilong fashion. Samfela pipol long Corinth bifor they mistek for ting say God bae letem diskaen dirty fashion go ahed. Yumi savvy lukim hao tingting bilong them hem rong taem yumi readim 1 Corinthians 6:9, 10. Sapos yumi want for worshipim God long way wea hem acceptim, yumi mas mekem hem hapi long toktok and samting wea yumi duim. Waswe, worship bilong yu hem mekem yu fit for duim datwan?—Matthew 15:8; 23:1-3.
19. Hao nao trufela worship affectim way wea yumi deal withim otherfela pipol?
19 Way wea yumi deal withim otherfela pipol mas showim aot tu olketa mark bilong God. Jesus Kraest encouragim yumi for deal withim otherfela pipol long sem way wea yumi wantim them for deal withim yumi, from diswan hem part bilong trufela worship. (Matthew 7:12) Lukim samting wea hem talem tu abaotem way for showim aot love for olketa brata: “From disfela samting everywan bae savvy yufela nao olketa disaepol bilong mi, sapos yufela garem love midlwan long yufela seleva.” (John 13:35) Olketa disaepol bilong Jesus mas love-im each other and duim gudfela samting long olketa wea worship withim them and otherfela pipol tu.—Galatians 6:10.
WORSHIP WITHIM WHOLE SOUL
20, 21. (a) Wanem kaen worship nao God askim? (b) Why nao Jehovah rejectim worship bilong Israel long taem bilong Malachi?
20 Insaed long heart bilong yu, yu maet want for worshipim God long way wea hem acceptim. Sapos olsem, yu mas garem tingting bilong Jehovah long saed bilong worship. Disaepol James hem strongim way wea tingting bilong God nao important, no tingting bilong yumi. James hem say: “Disfela way for worship wea klin front long God and Father bilong yumi hem olsem: for luk aftarem olketa pikinini wea no garem dadi and mami and olketa widow woman wea kasem hardfela taem, and for stap klin from world.” (James 1:27) From yumi want for mekem God hapi, each wan long yumi need for lukluk gud long worship bilong yumi for mek sure hem no kamap dirty from olketa teaching wea no followim God, or yumi no misstim samting wea barava important long eye bilong hem.—James 1:26.
21 Worship wea klin and withim whole soul nao hem mekem Jehovah hapi. (Matthew 22:37; Colossians 3:23) Taem nation bilong Israel no givim datfela worship long God, hem say long them: “Wanfela son, for saed bilong hem, hem honorim wanfela father; and wanfela servant, bigfela master bilong hem. So sapos mi wanfela father, wea nao honor wea mi fit for kasem? And sapos mi wanfela bigfela master, wea nao way for fraet long mi wea mi fit for kasem?” They mekem God feel no gud taem they sakrifaesim olketa blind, cripple, and sik animal long hem, and hem rejectim worship olsem. (Malachi 1:6-8) Jehovah hem fit for kasem barava klinfela worship and hem only acceptim diswan sapos yumi givim hem nomoa worship bilong yumi.—Exodus 20:5; Proverbs 3:9; Revelation 4:11.
22. Sapos yumi wantim God for acceptim worship bilong yumi, wanem nao yumi bae stap klia long hem, and wanem nao yumi bae duim?
22 Luk olsem Samaritan woman wea story withim Jesus hem interest for worshipim God long way wea God hem approve-im. Sapos datwan nao samting wea yumi wantim, yumi mas stap klia long every kaen teaching wea no klin. (2 Corinthians 6:14-18) But, yumi bae work hard for kasem stretfela savvy bilong God and duim will bilong hem. Yumi bae barava followim olketa mark bilong hem long saed bilong worship. (1 Timothy 2:3, 4) Olketa Jehovah’s Witness they trae hard for barava duim datwan, and they really encouragim yu for share withim them for worshipim God “withim spirit and truth.” (John 4:24) Jesus say: “Father hem lukaotem pipol olsem for worshipim hem.” (John 4:23) Mifela hope yu wanfela man olsem. Olsem datfela Samaritan woman, yu laekem tumas for kasem laef olawe. (John 4:13-15) But yu lukim pipol kamap olo and dae. Nextfela chapter bae talem yumi why nao diswan happen.
TESTIM SAVVY BILONG YU
Olsem John 4:23, 24 showim aot, wanem worship nao God acceptim?
Hao nao yumi bae savvy sapos God hem hapi withim samfela kastom and festival?
Wanem nao samfela mark bilong worship wea God acceptim?
[Full piksa long page 44]