Chapter 8
Why Nao God Letem Yumi for Suffer?
1, 2. Hao nao tingting bilong pipol planti taem abaotem way wea olketa man they suffer?
TAEM olketa disaster kam, and spoelem planti samting and killim dae pipol, planti they no meanim why nao olketa no gud samting olsem happen. Otherfela pipol they feel no gud long way wea fashion for brekem law and raf fashion kamap big tumas distaem. Yu tu maet ting olsem, ‘Why nao God letem yumi for suffer?’
2 From they no faendem any ansa for disfela kwestin for mekem them satisfy, planti they lusim faith long God. They say hem no interest long olketa man. Otherfela pipol wea acceptim way for suffer olsem part bilong laef they feel kros and blame-im God for every badfela samting wea happen long olketa man. Sapos yu garem olketa feeling olsem, bae yu interest tumas long samting wea Bible talem abaotem olketa samting hia.
GOD NO MEKEM WAY FOR SUFFER KAMAP
3, 4. Why nao yumi sure badfela samting and way for suffer they no kam from Jehovah?
3 Bible talem yumi hao Jehovah God no mekem way for suffer wea stap raonem yumi hem kamap. For example, Kristian disaepol James hem raet olsem: “Taem yumi kasem test, no anywan fit for say: ‘God nao hem testim mi.’ From no anywan savvy testim God withim olketa badfela samting or hemseleva no savvy testim anywan.” (James 1:13) For fitim diswan, God kanduit for mekem planti hardfela samting wea spoelem olketa man distaem for kamap. Hem no testim pipol for mekem they fit for laef long heven, or hem no mekem them suffer from badfela samting wea they duim long laef wea they say they garem bifor.—Romans 6:7.
4 And tu, nomata pipol duim planti no gud samting insaed long nem bilong God or Kraest bifor, no any samting stap insaed long Bible for show aot tufela approve-im olketa samting hia. God and Kraest nating join withim pipol wea say they servim them but they liar and raverave, killim dae pipol, and duim planti otherfela samting wea mekem olketa man suffer. Tru nao, “way bilong badfela man hem samting wea Jehovah barava hate-im.” God hem “stap farawe from olketa badfela pipol.”—Proverbs 15:9, 29.
5. Wanem nao samfela fashion bilong Jehovah, wanem nao feeling bilong hem for olketa wea hem create-im?
5 Bible hem story abaotem Jehovah olsem “hem care tumas and garem bigfela mercy.” (James 5:11) Hem say “Jehovah hem man wea love-im justice.” (Psalm 37:28; Isaiah 61:8) Hem no want for pay back. Hem garem fashion for feel sorry long olketa wea hem create-im and givim everywan gudfela samting wea they needim. (Acts 14:16, 17) Jehovah hem duim datwan start kam from taem wea laef hem start long earth.
START LONG PERFECT WAY
6. Wanem nao samfela kastom story talem abaotem start long history bilong olketa man?
6 Yumi everywan get use for lukim and feelim pain and way for suffer. So maet hem hard for tingim wanfela taem wea no any way for suffer hem stap, but hem nao living wea pipol garem long start long history bilong olketa man. Olketa kastom story bilong samfela nation tu they story abaotem wanfela hapi start olsem. Long kastom story from pipol long Greece, first wan bilong olketa “Faevfela Sekson bilong Taem bilong Man” they kolem “Taem bilong Hapi.” Long datfela taem olketa man they garem hapi living, free from trabel, pain, and no gud samting wea kamap from olo. Wanfela kastom story from pipol long China say long rul bilong Yellow King (Huang-Ti), pipol stap long peace, garem gudfela weather and stap gud withim olketa wild animal. Olketa long Persia, Egypt, Tibet, Peru, and Mexico they garem olketa kastom story abaotem wanfela taem bilong hapi and way for perfect long start long history bilong olketa man.
7. Why nao God create-im earth and olketa man?
7 Olketa kastom story bilong olketa nation they talem samting wea Bible raetem finis abaotem history bilong olketa man. Hem talem yumi hao God putim firstfela man and woman, Adam and Eve, insaed wanfela paradaes wea garem nem gaden bilong Eden and hem komandim them: “Garem pikinini and kamap planti and fulimap earth and luk aftarem.” (Genesis 1:28) Firstfela dadi and mami bilong yumi they perfect and garem hope for lukim whole earth kamap wanfela paradaes, wea wanfela perfect famili bilong olketa man stap insaed withim peace and hapi for olawe. Datwan nao purpose bilong God for create-im earth and olketa man.—Isaiah 45:18.
FASHION FOR HATE BRINGIM WANFELA CHALLENGE
8. Adam and Eve mas obeyim wanem komand, but wanem nao happen?
8 For mekem God go ahed for hapi long them, Adam and Eve mas no kaikai from “tree bilong savvy long gud samting and bad samting.” (Genesis 2:16, 17) Sapos they obeyim olketa law bilong Jehovah, no any way for suffer bae spoelem laef bilong olketa man. Taem they obeyim komand bilong God, they showim aot love bilong them for Jehovah and faithful fashion wea they garem for hem. (1 John 5:3) But olsem yumi learnim finis long Chapter 6, different samting nao they duim. From Satan encouragim hem, Eve kaikaim fruit from datfela tree. Bihaen, Adam tu kaikaim datfela tambu fruit.
9. Wanem kwestin abaotem Jehovah nao Satan mekem kamap?
9 Waswe, yu lukim hao diswan hem bigfela samting? Satan hem attackim position bilong Jehovah olsem Most Hae. Taem hem say, “Bae yu nating dae,” Devil hem tok againstim disfela toktok bilong God, “Yu mas dae.” Samfela toktok moa wea Satan talem, hem olsem hem say Jehovah no wantim Adam and Eve for kamap olsem God, so they no needim Hem for decide-im samting wea gud and bad. So, challenge bilong Satan mekem kwestin kamap abaotem way wea Jehovah hem fit for Sovereign bilong Universe or no moa.—Genesis 2:17; 3:1-6.
10. Wanem nao Satan say abaotem olketa man?
10 Satan say tu hao pipol savvy obeyim Jehovah only sapos they kasem samting from diswan. Or, hem challenge-im faithful fashion bilong olketa man. Satan say no anywan bae want for stap faithful long God. Disfela no gud tingting bilong Satan hem show aot klia long story bilong Bible abaotem Job, wanfela faithful servant bilong Jehovah wea kasem bigfela test long samting olsem 1600 B.C.E. Taem yu readim first tufela chapter long buk bilong Job, yu bae fit for kasem savvy abaotem why olketa man they suffer and why God hem letem diswan for go ahed.
11. Job hem wanem kaen man, but wanem no gud toktok nao Satan say abaotem hem?
11 Satan hem attackim Job, “wanfela man wea no garem blame and garem stretfela fashion.” First samting, Satan hem giaman for say olketa badfela samting nao muvim Job, taem hem askim disfela kwestin, “Waswe, Job no garem reason for fraetem God?” Then, Devil tok no gud abaotem God and Job taem hem say Jehovah sweetim Job for loyal long hem taem hem protectim and blessim Job. “But,” Satan challenge-im Jehovah olsem, “putim hand bilong yu, please, and touchim every samting wea hem garem and lukim sapos hem bae no curse-im barava face bilong yu.”—Job 1:8-11.
12. (a) Wanem nao olketa kwestin wea bae kasem ansa sapos God letem Satan for testim Job? (b) Test bilong Job hem showim aot wanem samting?
12 Waswe, Job hem servim Jehovah nomoa from every gudfela samting wea hem kasem from God? Waswe, Job savvy stap faithful taem hem kasem test? And waswe, Jehovah hem barava trustim servant bilong hem for letem hem kasem test? Olketa kwestin hia savvy kasem ansa sapos Jehovah letem Satan for mekem Job kasem olketa barava bigfela test. Faithful fashion bilong Job under long test wea God letem hem for kasem, wea buk bilong Job story abaot, hem barava mek hae every bit long raeteous fashion bilong Jehovah and faithful fashion bilong man.—Job 42:1, 2, 12.
13. Hao nao yumi insaed long samting wea happen long gaden bilong Eden and long Job?
13 But, samting wea happen long gaden bilong Eden and long Job hem garem bigfela meaning moa. Every man nao insaed long olketa kwestin wea Satan mekem, and yumi distaem tu. Hem tok spoelem nem bilong God and challenge-im sovereign rul bilong hem. Hem daotem tu raeteous fashion bilong olketa man wea God hem create-im. Olketa kwestin hia mas kasem ansa.
HAO FOR ANSAREM OLKETA KWESTIN
14. Taem samwan hem challenge-im man long no gud way, wanem nao datfela man maet duim?
14 For olsem wanfela tok piksa, letem yumi say yu wanfela loving dadi or mami wea garem samfela pikinini and yu garem hapi famili living. Sapos wanfela neibor bilong yu hem talem liar samting, hem say yu wanfela badfela dadi or mami. Sapos datfela neibor hem say olketa pikinini bilong yu they no love-im yu, and they stap withim yu only bikos they no savvy wanem for duim, and sapos samwan givim them chance for lusim hom, they bae go nao. Yu maet say, ‘Rabis toktok!’ Hem tru, but hao nao yu bae prove-im diswan? Samfela dadi and mami maet duim samting bikos they kros for gud. Sapos yu duim datwan, bae hem givim samfela proof long olketa liar toktok hia. Wanfela gudfela way for deal withim problem olsem hem for letem man wea tok abaotem yu for prove-im samting wea hem talem and for olketa pikinini bilong yu tu for givim proof for show aot they barava love-im yu.
15. Wanem nao Jehovah choose for duim for deal withim challenge bilong Satan?
15 Jehovah hem olsem datfela loving dadi or mami. Adam and Eve they olsem olketa pikinini, and Satan hem datfela neibor wea talem liar toktok. From hem wise, God no killim dae Satan, Adam, and Eve long sem taem but hem letem them for go ahed for laef for lelebet taem. Diswan mekem firstfela dadi and mami bilong yumi fit for bornim pikinini and startim famili bilong olketa man, and diswan givim chance long Devil for prove-im sapos samting wea hem talem hem tru or no moa, mekem olketa kwestin wea kamap they kasem ansa. But, from bifor kam God hem savvy samfela man bae loyal long hem and diswan bae prove-im Satan hem wanfela man for liar. Yumi hapi tumas long way wea Jehovah hem go ahed for blessim and helpem olketa wea love-im hem!—2 Chronicles 16:9; Proverbs 15:3.
WANEM NAO DISWAN PROVE-IM?
16. Hao nao world stap under long paoa bilong Satan?
16 For klosap full history bilong olketa man, Satan hem free every bit for duim samting followim olketa plan bilong hem for rul ovarem olketa man. Hem bossim olketa paoa bilong politik and hem encouragim olketa religion wea really givim worship long hem and no long Jehovah. Dastawe Devil hem kamap “god bilong disfela system,” and they kolem hem “ruler bilong disfela world.” (2 Corinthians 4:4; John 12:31) Tru nao, “whole world hem stap long paoa bilong badfela man.” (1 John 5:19) So waswe, diswan prove-im Satan hem tok tru taem hem say hem savvy pullim every man from Jehovah God? Barava no moa nao! Taem hem letem Satan for go ahed for laef, Jehovah hem go ahed for fulfillim purpose bilong hemseleva tu. So, wanem nao Bible showim aot abaotem way wea God letem badfela fashion for stap?
17. Wanem nao yumi mas rememberim abaotem hao badfela fashion and way for suffer kamap?
17 Jehovah no mekem badfela fashion and way for suffer kamap. From Satan hem ruler bilong disfela world and god bilong disfela system, hem and olketa wea supportim hem nao they bihaenem living bilong olketa man and every trabel wea olketa man they suffer long hem distaem. No anywan fit for say God nao mekem olketa hardfela samting kamap.—Romans 9:14.
18. Way wea Jehovah letem badfela fashion and way for suffer go ahed hem prove-im wanem samting abaotem way for independent from God?
18 Way wea Jehovah letem badfela fashion and way for suffer go ahed hem prove-im hao way for independent from God hem no mekem world kamap moabeta. Tru tumas, history hem fulap withim olketa trabel. Diswan hem happen bikos olketa man they choose for independent and they no really tingim olketa toktok bilong God and will bilong hem. Taem pipol bilong Jehovah bifor and olketa leader bilong them they no faithful and followim “samting wea planti otherfela pipol duim” and rejectim toktok bilong hem, no gud samting nao kamaot from diswan. Thru long profet bilong hem Jeremiah, God talem them: “Olketa wise wan they feel shame. They feel fraet for gud and hem bae kasholem them. Lukim! They rejectim finis toktok bilong Jehovah, and wanem kaen wisdom nao they garem?” (Jeremiah 8:5, 6, 9) From they fail for followim olketa mark bilong Jehovah, planti man they olsem wanfela ship wea no garem any steer, wea raf sea hem throwim olabaot.
19. Wanem proof nao stap for show aot hao Satan kanduit for tanem every man againstim God?
19 Way wea God letem badfela fashion and way for suffer go ahed hem prove-im tu hao Satan hem no fit for mekem every man tan awe from Jehovah. History showim aot samfela man they stap faithful long God nomata wanem kaen test or hardfela samting nao kasem them. Insaed planti hundred year wea go past, paoa bilong Jehovah hem show aot long saed bilong olketa servant bilong hem, and they talemaot nem bilong hem everywea long earth. (Exodus 9:16; 1 Samuel 12:22) Hebrews chapter 11 story abaotem planti wea faithful, olsem Abel, Enoch, Noah, Abraham, and Moses. Hebrews 12:1 kolem them wanfela “bigfela cloud bilong olketa witness.” They showim aot example for garem barava strongfela faith long Jehovah. Long distaem tu, planti they givim laef bilong them for barava faithful long God. Thru long faith and love bilong them, olketa hia barava prove-im hao Satan kanduit for tanem every man againstim God.
20. Way wea Jehovah letem badfela fashion and way for suffer go ahed prove-im wanem samting long saed bilong God and olketa man?
20 Lastfela samting abaotem way wea Jehovah letem badfela fashion and way for suffer go ahed hem prove-im Jehovah nomoa, datfela Creator, hem garem savvy and fit for rul ovarem olketa man for they kasem blessing and hapi for olawe. For planti hundred year, olketa man traem any kaen different gavman. But wanem nao happen? Olketa bigfela problem and trabel wea face-im olketa nation distaem barava prove-im, olsem Bible talem finis, “man hem bossim narafela man and spoelem hem.” (Ecclesiastes 8:9) Jehovah nomoa savvy sevem yumi and fulfillim firstfela purpose bilong hem. Hao nao hem bae duim diswan, and long wanem taem?
21. Wanem nao bae kasem Satan, and hu nao bae duim diswan?
21 Bihaen Adam and Eve they fall daon long trap bilong Satan, God hem stret awe talemaot purpose bilong hem abaotem wanfela way for kasem laef. Diswan nao samting wea Jehovah talem abaotem Satan: “Mi bae putim fashion for enemy midlwan long yu and datfela woman and midlwan long seed bilong yu and seed bilong hem. Hem bae killim yu long hed and yu bae killim hem long leg.” (Genesis 3:15) Datfela toktok hem show aot Devil bae no duim olketa badfela samting bilong hem for olawe. Olsem Messiah King bilong Kingdom, datfela promis Seed, Jesus Kraest bae ‘killim Satan long hed.’ Yes, “klosap nao,” Jesus bae pisisim badfela Satan!—Romans 16:20.
WANEM NAO YU BAE DUIM?
22. (a) Wanem kwestin nao yu mas face-im? (b) Nomata Satan aotem kros bilong hem long olketa servant bilong God, they savvy sure long wanem samting?
22 From yu savvy nao long olketa kwestin wea kamap, yu stap long saed bilong hu nao? Waswe, olketa samting wea yu duim bae prove-im yu wanfela wea faithful for supportim Jehovah? From Satan savvy taem bilong hem short, hem duim best bilong hem for mekem kros bilong hem barava kasem olketa wea want for stap faithful long God. (Revelation 12:12) But yu savvy luk long God for help bikos “Jehovah savvy hao for sevem pipol wea garem fashion for love-im God from test.” (2 Peter 2:9) Hem bae no letem yu for kasem test wea yu no fit for winim, and hem bae showim yu way for followim for winim olketa test.—1 Corinthians 10:13.
23. Wanem nao yumi savvy luk forward long hem?
23 Withim strongfela hope, letem yumi luk forward long taem wea King, Jesus Kraest bae duim samting againstim Satan and everywan wea followim hem. (Revelation 20:1-3) Then Jesus bae finisim every bit everywan wea share for mekem olketa trabel and hardfela samting kamap wea mekem olketa man they suffer. But go kasem datfela taem, wanfela way for barava suffer hem taem wanfela wea yumi love-im hem dae. Readim nextfela chapter for faend aot wanem nao happen long them.
TESTIM SAVVY BILONG YU
Hao nao yumi savvy Jehovah hem no bringim kam way for suffer long olketa man?
Wanem kwestin nao Satan mekem kamap long Eden wea show aot klia long taem bilong Job?
Way wea God letem way for suffer go ahed hem prove-im wanem samting?