Chapter 12
Againstim Olketa Badfala Spirit
1. Wanem nao Jesus duim taem hem face-im olketa badfela spirit?
STRET AWE bihaen hem baptaes, Jesus Kraest go long wilderness long Judea for pray and ting raonem every samting. Long there Satan trae for mekem hem brekem law bilong God. But, Jesus rejectim bait bilong Devil and hem no fall daon long trap bilong hem. Jesus face-im otherfela badfela spirit tu taem hem duim ministry bilong hem long earth. But, everytaem, hem tok strong long them and againstim them.—Luke 4:1-13; 8:26-34; 9:37-43.
2. Wanem nao olketa kwestin wea yumi bae tingting raonem?
2 Olketa story insaed long Bible abaotem olketa samting hia mas mekem yumi believim hao olketa badfela spirit they really stap. They trae for giamanim pipol. But yumi savvy againstim olketa badfela spirit hia. But, wea nao olketa badfela spirit they kam from? Why nao they trae for giamanim olketa man? And wanem nao olketa duim for trae for kasem olketa goal bilong them? Way for faendem olketa ansa for olketa kwestin olsem bae helpem yu for againstim olketa badfela spirit.
OLKETA BADFELA SPIRIT—START AND GOAL BILONG THEM
3. Hao nao Satan the Devil kamap?
3 Longfela taem bifor Jehovah God create-im olketa man, hem workim planti spirit person. (Job 38:4, 7) Olsem yumi story finis insaed long Chapter 6, wanfela long olketa angel hia hem start for wantim olketa man for worshipim hem winim way for worshipim Jehovah. Taem hem duim samting for kasem datfela goal, disfela badfela angel hem againstim and tok spoelem nem bilong Creator, and hem olsem hem talem long firstfela woman hao God hem wanfela liar. Dastawe, hem fitim for kamap Satan (man for againstim man) the Devil (man for spoelem nem bilong man).—Genesis 3:1-5; Job 1:6.
4. Hao nao samfela angel long taem bilong Noah they sin?
4 Bihaen, otherfela angel tu tek saed withim Satan. Long taem bilong Noah, samfela long olketa hia they lusim service bilong them long heven and tekem body bilong man mekem they savvy havem sex withim olketa woman long earth. Satan nao hem bihaenem way wea olketa angel hia they duim datfela samting. Diswan lead go long way for garem olketa pikinini wea haf spirit and haf man wea they kolem them Nephilim, and they barava raf for gud. Taem Jehovah bringim bigfela Flood, hem finisim badfela pipol and olketa pikinini bilong olketa angel wea no obey. Olketa badfela angel hia they no dae from they lusim body bilong them olsem man and go back long world bilong olketa spirit. But God no letem them go ahed long sem way from hem aotem them for stap long spiritual darkness. (Genesis 6:1-7, 17; Jude 6) But Satan, “datfela ruler bilong olketa demon,” and olketa badfela angel bilong hem they go ahed withim no gud way bilong them. (Luke 11:15) Wanem nao goal bilong them?
5. Satan and olketa demon bilong hem garem wanem goal, and wanem nao they use-im for trikim pipol?
5 No gud goal bilong Satan and olketa demon, hem for tanem pipol for againstim Jehovah God. So, insaed long history bilong olketa man, olketa badfela man hia they giamanim, mekem fraet, and spoelem pipol. (Revelation 12:9) Olketa example distaem show aot hao attack bilong olketa demon hem kamap moa raf winim anytaem bifor. For trikim pipol, planti taem olketa demon use-im olketa different kaen way bilong spiritism. Hao nao olketa demon use-im spiritism for trikim pipol, and hao nao yu savvy protectim yuseleva?
HAO OLKETA BADFELA SPIRIT TRAE FOR GIAMANIM YU
6. Wanem nao spiritism, and wanem nao samfela different kaen way bilong hem?
6 Wanem nao spiritism? Hem way for story and work tugeta withim olketa demon, or badfela spirit, maet they duim diswan seleva or thru long wanfela man or woman. Olketa demon use-im spiritism olsem man for hunting hem use-im bait for kasem animal: Hem pullim kam samting wea man laek for kasem. And olsem wanfela man for hunting hem use-im olketa different kaen bait for sweetim animal for go insaed long trap bilong hem, olketa badfela spirit tu they use-im olketa different kaen way bilong spiritism for mekem olketa man stap under long paoa bilong them. (Lukim Psalm 119:110.) Samfela different kaen way hia they divination, magic, lukluk for olketa saen, mekem kastom long man, putim curse, go long pipol wea toktok withim olketa spirit, and story withim olketa wea dae finis.
7. Spiritism hem kamap hao big, and why nao hem stap tu long olketa kantri wea say they Kristian?
7 Disfela bait hem win, from spiritism hem pullim pipol everywea long world. Olketa wea stap long bush vilij they go long olketa kastom man, and pipol wea work insaed olketa office long olketa bigfela taon they go long olketa wea studyim star for savvy long future. Spiritism hem kamap big tu insaed long olketa kantri wea say they Kristian. Olketa wea duim research they say long United States nomoa, samting olsem 30-fela magasin wea they printim winim 10,000,000 copy they story abaotem olketa different kaen way bilong spiritism. Pipol long Brazil they spendem winim 500 million dollar every year for buyim olketa samting wea join withim spiritism. But, 80 percent bilong olketa wea go everytaem long ples for duim olketa samting bilong spiritism long datfela kantri, they olketa wea baptaes long Catholic Church and wea attendim Mass tu. From samfela bigman bilong religion they join insaed long spiritism, planti pipol bilong religion they ting say way for duim diswan hem samting wea God acceptim. But waswe, datwan hem tru?
WHY BIBLE HEM AGAINSTIM SPIRITISM
8. Wanem nao olketa Scripture talem abaotem spiritism?
8 Sapos they learnim yu hao samfela different kaen way bilong spiritism hem way for story withim olketa gudfela spirit, yu maet sapraes for savvy wanem Bible hem talem abaotem spiritism. Pipol bilong Jehovah they kasem disfela warning: “No go long pipol wea tok withim olketa spirit, and man wea talem samting wea bae happen long future, mekem yufela no kamap dirty from them.” (Leviticus 19:31; 20:6, 27) Bible buk bilong Revelation givim warning abaotem way wea “olketa wea duim spiritism” bae go long “lake wea hem burn withim fire and sulphur. Hem meanim mek-tu dae [olawe].” (Revelation 21:8; 22:15) Jehovah God hem no approve-im any part bilong spiritism. (Deuteronomy 18:10-12) Why nao olsem?
9. Why nao yumi savvy say olketa message from spirit world distaem they no kam from Jehovah?
9 Jehovah sendem olketa gudfela spirit, or raeteous angel, for story withim olketa man, bifor they finis for raetem Bible. Start kam from taem wea they finis for raetem, Word bilong God nao guide-im olketa man for servim Jehovah long way wea hem acceptim. (2 Timothy 3:16, 17; Hebrews 1:1, 2) Hem no use-im narafela way for givim message long pipol wea story withim olketa spirit. Olketa message olsem from spirit world they kam from olketa badfela spirit. Way for duim spiritism savvy lead go for olketa demon for spoelem man or go insaed long man tu. Dastawe, long loving way God hem warnim yumi for no join long any samting wea part long spiritism. (Deuteronomy 18:14; Galatians 5:19-21) And tu, sapos yumi savvy long tingting bilong Jehovah abaotem spiritism, but yumi go ahed for duim, yumi saed nao withim olketa badfela spirit and yumi kamap enemy bilong God.—1 Samuel 15:23; 1 Chronicles 10:13, 14; Psalm 5:4.
10. Wanem nao divination, and why nao yumi mas stap klia long hem?
10 Wanfela part bilong spiritism wea planti they duim nao hem divination—way for trae for savvy long future withim help bilong olketa spirit. Samfela part bilong divination hem way for studyim olketa star, lukluk insaed long crystal-ball, meanim olketa dream, lukluk long hand bilong man, and use-im olketa tarot card for talem samting wea bae happen long man. Planti pipol ting long divination olsem hapitaem nomoa, but Bible show aot hao olketa wea talem samting wea bae happen and olketa badfela spirit they join tugeta. For example, Acts 16:16-19 tok abaotem “wanfela demon bilong divination” wea mekem wanfela girl for “savvy tumas for talem samting wea bae happen long future.” But, taem demon hia go aot from hem, hem no savvy duim diswan moa. Tru nao, divination hem wanfela bait wea olketa demon use-im for sweetim pipol for fall daon insaed long trap bilong them.
11. Hao nao way for trae for story withim olketa wea dae finis hem lead go long wanfela trap?
11 Sapos yu feel sorry from wanfela famili member or gudfela fren hem dae, hem easy for narafela bait for pullim yu. Wanfela man wea savvy story withim olketa spirit maet talem yu information or maet hem story long wanfela voice olsem datfela man wea dae. Lukaot! Way for trae for story withim olketa wea dae finis hem lead go long wanfela trap. Why nao olsem? Bikos olketa wea dae finis kanduit for toktok. Olsem yu maet remember, Word bilong God hem talem klia hao taem man hem dae, “hem go back long graon; long datfela day tingting bilong hem finis every bit.” Olketa wea dae finis “they nating savvy long any samting.” (Psalm 146:4; Ecclesiastes 9:5, 10) And tu, olketa demon they savvy hao for copyim voice bilong man wea dae finis, and they savvy talem information long man wea savvy story withim them abaotem datfela man wea dae finis. (1 Samuel 28:3-19) So “anywan wea tok long olketa wea dae finis,” hem fall daon insaed trap bilong olketa badfela spirit and hem againstim will bilong God.—Deuteronomy 18:11, 12; Isaiah 8:19.
WAY FOR PULLIM MAN AND ATTACKIM MAN
12, 13. Wanem proof nao show aot olketa demon they no givap for testim and spoelem pipol?
12 Taem yu followim kaonsel from Word bilong God long saed bilong spiritism, yu rejectim bait bilong olketa demon. (Lukim Psalm 141:9, 10; Romans 12:9.) Waswe, diswan meanim olketa badfela spirit bae no trae nao for kasholem yu? No moa nao! Bihaen hem testim Jesus threefela taem, Satan “go from hem for waitim narafela taem moa.” (Luke 4:13) Long sem way tu, olketa bighed spirit they no sweetim pipol nomoa but they attackim them tu.
13 Tingim chapter wea yumi story abaotem attack bilong Satan long servant bilong God, Job. Devil killim dae olketa animal bilong hem, and planti servant bilong hem. Satan killim dae olketa pikinini bilong Job tu. Nextfela samting, hem mekem Job seleva kasem wanfela no gud sik wea mekem hem kasem bigfela pain. But Job stap faithful long God and kasem bigfela blessing bihaen. (Job 1:7-19; 2:7, 8; 42:12) Start kam long datfela taem, olketa demon they mekem samfela pipol no savvy toktok or blind and they go ahed for enjoyim way for mekem olketa man suffer. (Matthew 9:32, 33; 12:22; Mark 5:2-5) Distaem, samfela report show aot hao olketa demon spoelem samfela pipol long saed bilong sex and mekem otherfela pipol kamap kranky. And tu, they muvim otherfela pipol for killim dae narafela man and killim dae seleva, wea they olketa sin wea againstim God. (Deuteronomy 5:17; 1 John 3:15) Nomata olsem, planti thousand pipol wea fall daon long trap bilong olketa badfela spirit they kamap free. Hao nao they duim datwan? They kamap free from they duim threefela important samting.
HAO FOR AGAINSTIM OLKETA BADFELA SPIRIT
14. Olsem example bilong olketa Kristian long Ephesus long first century, hao nao yu savvy againstim olketa badfela spirit?
14 Wanem nao wanfela way wea yu savvy againstim olketa badfela spirit and protectim yuseleva and famili bilong yu from trap bilong olketa badfela spirit? Olketa Kristian bilong first century long Ephesus wea they duim spiritism bifor they believe, they kwiktaem for duim samting. Yumi readim hao “planti long olketa wea duim magic they hipim ap olketa buk bilong them and burnim them front long everywan.” (Acts 19:19) Nomata yu no duim spiritism, throwim awe any samting wea join lelebet withim spiritism. Maet hem olketa buk, magasin, video, piksa, music kaset, and otherfela samting wea they use-im long spiritism. And tu olketa idol, necklace and samting wea pipol wearim for protectim them, and olketa present wea pipol wea duim spiritism they givim. (Deuteronomy 7:25, 26; 1 Corinthians 10:21) For example: For longfela taem nao olketa demon they spoelem wanfela hasband and waef long Thailand. Then tufela throwim awe olketa samting wea they garem wea join withim spiritism. Wanem nao kamaot from diswan? Olketa demon no attackim them moa and bihaen they muv ahed gud long spiritual way.
15. Taem yumi go ahed for againstim olketa badfela spirit, wanem nao narafela samting wea yumi mas duim?
15 For againstim olketa badfela spirit, narafela samting wea yumi mas duim hem for followim kaonsel bilong aposol Paul for wearim full spiritual kaleko for faet wea God hem givim. (Ephesians 6:11-17) Olketa Kristian mas strongim way for againstim olketa badfela spirit. Wanem nao insaed long diswan? “Winim every samting,” Paul hem say, “garem bigfela shield bilong faith, wea yufela savvy stopem olketa spear bilong fire bilong badfela man.” Tru nao, taem yumi garem strongfela faith, yumi bae fit for againstim olketa badfela spirit.—Matthew 17:14-20.
16. Hao nao yu savvy strongim faith bilong yu?
16 Hao nao yu savvy strongim faith bilong yu? Taem yu go ahed for studyim Bible and followim kaonsel bilong hem insaed long laef bilong yu. Strong bilong faith bilong man, hem depend long hao strong nao faondeson bilong hem—datfela savvy bilong God. Waswe, yu agree hao stretfela savvy wea yu kasem and way wea yu tingting strong abaotem wanem yu studyim long Bible hem strongim faith bilong yu? (Romans 10:10, 17) Tru nao, taem yu go ahed long disfela study and attendim olketa meeting bilong olketa Jehovah’s Witness everytaem, faith bilong yu bae kamap moa strong. (Romans 1:11, 12; Colossians 2:6, 7) Hem bae wanfela barava strongfela protection againstim attack bilong olketa demon.—1 John 5:5.
17. Wanem moa samfela samting wea yumi need for duim for againstim olketa badfela spirit?
17 Wanem moa man savvy duim for againstim olketa badfela spirit? Olketa Kristian wea stap long Ephesus needim protection bikos they stap insaed bigfela taon wea fulap withim way for worshipim olketa demon. Dastawe, Paul say long them: “Go ahed for pray everytaem withim spirit.” (Ephesians 6:18) From yumi stap insaed world wea fulap withim olketa demon, way for pray strong for protection bilong God hem important for againstim olketa badfela spirit. (Matthew 6:13) Samting wea savvy help long diswan hem spiritual help and prayer bilong olketa elder insaed long Kristian kongregeson.—James 5:13-15.
GO AHED LONG FAET BILONG YU AGAINSTIM OLKETA BADFELA SPIRIT
18, 19. Wanem nao man savvy duim sapos olketa demon they givim hem trabel moa?
18 Nomata samfela duim finis olketa samting wea yumi just story abaot, olketa badfela spirit they still givim trabel long them. For example, wanfela man long Côte d’Ivoire hem studyim Bible withim olketa Jehovah’s Witness and throwim awe every kastom samting bilong hem. Bihaen, hem muv ahed gud, dedicate-im laef bilong hem long Jehovah, and baptaes. But wanfela week bihaen hem baptaes, olketa demon start for givim hem trabel moa, and samfela voice talem hem for lusim niufela belief bilong hem. Sapos diswan happen long yu, waswe, hem meanim Jehovah no protectim yu nao? Maet no olsem.
19 Nomata perfect man Jesus Kraest hem garem protection from God, hem herem voice bilong badfela spirit, Satan. Jesus hem showim aot wanem for duim long taem olsem. Hem say long Devil: “Yu klia, Satan!” (Matthew 4:3-10) Long sem way tu, yu mas no listen long olketa voice from spirit world. Againstim olketa badfela spirit long way for askim Jehovah for help. Yes, pray big and use-im nem bilong God. Proverbs 18:10 hem say: “Nem bilong Jehovah hem wanfela strongfela taoa. Olketa wea raeteous they ran go long hem and kasem protection.” Datfela Kristian man long Côte d’Ivoire hem duim datwan, and olketa badfela spirit they stop nao for givim trabel long hem.—Psalm 124:8; 145:18.
20. Wanem nao yu savvy duim for againstim olketa badfela spirit?
20 Jehovah hem letem olketa badfela spirit for stap laef, but hem showim aot paoa bilong hem, main wan nao for pipol bilong hem, and they talemaot nem bilong hem everywea long earth. (Exodus 9:16) Sapos yu stap klosap long God, yu no need for fraet long olketa badfela spirit. (Numbers 23:21, 23; James 4:7, 8; 2 Peter 2:9) They no garem full paoa. They kasem panis long taem bilong Noah, and they throwim them aot from heven no long taem go nomoa, and distaem they waitim lastfela judgment. (Jude 6; Revelation 12:9; 20:1-3, 7-10, 14) Yes, they barava fraetem tumas way wea they ready for finis every bit. (James 2:19) So nomata olketa badfela spirit trae for sweetim yu withim wan kaen bait or attackim yu long any way, yu savvy againstim them. (2 Corinthians 2:11) Stap klia every bit long every part bilong spiritism, followim kaonsel long Word bilong God, and duim samting wea Jehovah approve-im. No delay for duim diswan, from laef bilong yu hem depend long way wea yu againstim olketa badfela spirit!
TESTIM SAVVY BILONG YU
Hao nao olketa badfela spirit trae for giamanim pipol?
Why nao Bible againstim spiritism?
Hao nao man savvy kamap free from olketa badfela spirit?
Why nao yu mas go ahed for againstim olketa badfela spirit?
[Piksa long page 110]
Wanem nao tingting bilong yu long olketa different kaen way bilong spiritism?