Chapter 16
Hao Yu Savvy Kam Klosap Long God
1. Wanem kaen samting wea klosap semsem nao hem stap long planti religion?
WANFELA tourist wea visitim wanfela kantri long Asia hem sapraes for lukim olketa samting wea they duim long worship bilong them insaed long wanfela Buddhist temple. Nomata they no use-im olketa image bilong Mary or Kraest, planti samting wea they duim hem semsem withim wanem church bilong hem duim long hom bilong hem. For example, hem lukim hao they use-im olketa rosary and talem olketa prayer. Otherfela pipol tu talem sem samting. Long East or West, olketa way wea pipol trae for kam klosap long God or long olketa samting wea they worshipim hem klosap semsem.
2. Prayer hem wanem samting, and why nao planti pipol they pray?
2 Planti pipol they trae for kam klosap long God long way wea they pray long hem. Prayer hem “samting wea olketa man duim for story tugeta withim samting wea holy—God, olketa god, olketa ples on top, or olketa spirit paoa.” (The New Encyclopædia Britannica) But, taem they story withim God long prayer, samfela ting nomoa long samting wea they savvy kasem from diswan. For example, wantaem wanfela man askim wanfela Jehovah’s Witness: “Sapos yu pray for mi, waswe, bae olketa problem wea mi garem insaed famili, long work, and long saed bilong health bae finis?” Luk olsem datfela man hem ting olsem, but planti pipol wea pray they still garem olketa problem bilong them. So yumi maet ask olsem, ‘Why nao yumi mas kam klosap long God?’
WHY YUMI MAS KAM KLOSAP LONG GOD
3. Hu nao yumi mas pray long hem, and why nao olsem?
3 Prayer hem no samting wea man duim everytaem wea no garem meaning, and hem no wanfela way for kasem samting. Wanfela bigfela reason for story withim God hem for fren gud withim hem. So olketa prayer bilong yumi mas go for Jehovah God. “Jehovah hem stap klosap long olketa wea kolem hem,” man wea raetem psalm David hem talem. (Psalm 145:18) Jehovah invite-im yumi for fren withim hem long peace. (Isaiah 1:18) Olketa wea duim diswan they agree withim disfela toktok bilong man wea raetem psalm: “For saed bilong mi, way for kam klosap long God hem gudfela samting for mi.” Why nao olsem? Bikos olketa wea kam klosap long Jehovah God bae enjoyim trufela hapi and peace long mind.—Psalm 73:28.
4, 5. (a) Why nao hem important for pray long God? (b) Wanem kaen way for fren nao yumi savvy garem withim God thru long prayer?
4 Why nao yumi mas pray long God for helpem yumi sapos hem ‘savvy finis samting wea yumi needim bifor yumi askim’? (Matthew 6:8; Psalm 139:4) Prayer hem showim aot yumi garem faith long God and luk long hem olsem Dat Wan Wea Givim “every gudfela present and every perfect present.” (James 1:17; Hebrews 11:6) Jehovah hapi long olketa prayer bilong yumi. (Proverbs 15:8) Hem hapi for herem toktok bilong yumi for say thankyu and praisim hem, olsem wanfela dadi hem hapi taem smallfela pikinini bilong hem say thankyu long hem. (Psalm 119:108) Taem dadi and pikinini fren gud tugeta, datwan meanim they garem gudfela way for story tugeta. Pikinini wea dadi bilong hem love-im hem bae want for story withim dadi bilong hem. Sem samting tu hem long way for fren withim God. Sapos yumi barava ting hae long samting wea yumi learnim abaotem Jehovah and love wea hem showim for yumi, yumi bae really want for talemaot feeling bilong yumi long hem insaed long prayer.—1 John 4:16-18.
5 Taem yumi story withim Most Hae God, yumi mas showim aot respect, but no worry tumas long barava word wea yumi mas use-im. (Hebrews 4:16) Yumi savvy story withim Jehovah long anytaem. And hem wanfela bigfela privilege for yumi savvy ‘pourim aot heart bilong yumi’ long God insaed long prayer! (Psalm 62:8) Way for ting hae long Jehovah mekem yumi fren gud withim hem, olsem datfela faithful man Abraham hem enjoyim olsem fren bilong God. (James 2:23) But taem yumi pray long Sovereign Lord bilong universe, yumi mas followim way wea hem talem for story withim hem.
SAMTING WEA MAN NEEDIM FOR KAM KLOSAP LONG GOD
6, 7. Nomata God no askim shilling for herem olketa prayer bilong yumi, wanem nao hem wantim taem yumi pray?
6 Waswe, man need for givim shilling for story withim God? Planti pipol payim olketa bigman long church for pray for them. Samfela they believe God bae listen long prayer bilong them fitim haomas shilling nao they givim. But, Word bilong God no say man need for givim shilling for story withim Jehovah long prayer. Olketa spiritual samting wea hem provide-im and olketa blessing bilong way for fren withim hem insaed long prayer they samting wea man no need for payim.—Isaiah 55:1, 2.
7 So, wanem nao man needim? Stretfela feeling long heart hem wanfela samting wea man needim. (2 Chronicles 6:29, 30; Proverbs 15:11) Insaed long heart, yumi mas showim aot faith long Jehovah God olsem “Man Wea Herem prayer” and “givim reward long anywan wea barava lukaotem hem.” (Psalm 65:2; Hebrews 11:6) Yumi mas garem humble heart tu. (2 Kings 22:19; Psalm 51:17) Long wanfela tok piksa bilong hem, Jesus Kraest showim aot hao taem hem story withim God, wanfela man for tekem tax wea humble long heart, hem moa raeteous winim wanfela proudfela Farisi. (Luke 18:10-14) Taem yumi pray long God, yumi mas remember “Jehovah barava hate-im everywan wea garem proudfela heart.”—Proverbs 16:5.
8. Sapos yumi wantim God for ansarem olketa prayer bilong yumi, yumi mas kamap klin from wanem samting?
8 Sapos yumi wantim God for ansarem olketa prayer bilong yumi, yumi need for kamap klin from fashion wea no gud. Taem disaepol James hem encouragim otherfela pipol for kam klosap long God, hem say moa: “Klinim hand bilong yufela, yufela sinner, and mekem heart bilong yufela kamap klin, yufela wea no savvy decide-im samting.” (James 4:8) Olketa wea duim rongfela samting savvy fren gud withim Jehovah sapos they repent and lusim oldfela fashion bilong them. (Proverbs 28:13) Yumi kanduit for kam front long Jehovah sapos yumi just say yumi mekem yumi seleva kamap klin long spiritual way. Word bilong God hem say: “Eye bilong Jehovah hem lukluk long olketa raeteous wan, and ear bilong hem listen long prayer bilong them; but face bilong Jehovah hem againstim olketa wea duim badfela samting.”—1 Peter 3:12.
9. Thru long hu nao yumi mas story withim Jehovah, and why nao olsem?
9 Bible hem say: “No any man wea raeteous hem stap long earth wea go ahed for duim gudfela samting and no sin.” (Ecclesiastes 7:20) So yu maet ask olsem: ‘Sapos olsem, hao nao yumi savvy story withim Jehovah God?’ Bible hem ansa olsem: “Sapos anywan duim wanfela sin, yumi garem wanfela for helpem yumi withim Father, Jesus Kraest, dat wan wea raeteous.” (1 John 2:1) Nomata yumi olketa sinner, yumi savvy go front long God withim free way for toktok thru long Jesus Kraest, wea dae olsem wanfela ransom for yumi. (Matthew 20:28) Hem nomoa way wea yumi savvy story withim Jehovah God. (John 14:6) Yumi mas no ting nating long ransom sakrifaes bilong Jesus and meanim for duim sin. (Hebrews 10:26) Sapos yumi really duim best bilong yumi for no duim badfela samting but yumi duim rong samting samfela taem, yumi savvy repent and askim God for forgivim yumi. Taem yumi story long hem withim humble heart, hem bae herem yumi.—Luke 11:4.
OLKETA CHANCE FOR STORY LONG GOD
10. Long saed bilong prayer, hao nao yumi savvy followim Jesus, and wanem nao samfela taem wea yumi savvy pray seleva?
10 Jesus Kraest hem barava ting hae long way wea hem fren withim Jehovah. Dastawe, Jesus markem taem for story withim God seleva long prayer. (Mark 1:35; Luke 22:40-46) Yumi bae kasem gudfela samting sapos yumi followim example bilong Jesus for pray long God everytaem. (Romans 12:12) Hem gud for startim each day withim prayer, and bifor yumi sleep, yumi savvy say thankyu long Jehovah for samting wea yumi duim long datfela day. Insaed long day, trae hard for story withim God “everytaem.” (Ephesians 6:18) Yumi savvy pray kwaet insaed long heart bilong yumi, from yumi savvy Jehovah hem herem. Way for story seleva withim God bae helpem yumi for barava mekem strong way wea yumi fren withim hem and way for pray long Jehovah everyday bae helpem yumi for kam moa klosap long hem.
11. (a) Why nao olketa famili mas pray tugeta? (b) Wanem nao hem meanim taem yu say “Amen” long end bilong prayer?
11 Jehovah hem listen tu long prayer wea man talem for wanfela sekson. (1 Kings 8:22-53) Yumi savvy kam klosap long God olsem wanfela famili, taem hed bilong famili hem leadim prayer. Diswan strongim famili, and Jehovah hem kamap really person long olketa young wan taem they herem dadi and mami bilong them pray long God long humble way. Waswe sapos samwan hem pray for wanfela sekson, maet long wanfela meeting bilong olketa Jehovah’s Witness? Sapos yumi insaed long audience, yumi mas listen gud so long end bilong datfela prayer, yumi savvy say withim whole heart “Amen,” wea meanim “Mi agree.”—1 Corinthians 14:16.
OLKETA PRAYER WEA JEHOVAH HEREM
12. (a) Why nao God no savvy ansarem samfela prayer? (b) Why nao yumi mas no askim nomoa olketa samting wea yumi seleva needim taem yumi pray?
12 Samfela maet ting say God no savvy ansarem olketa prayer bilong them nomata they pray long hem thru long Kraest. But, aposol John hem say: “Nomata wanem samting yumi askim wea fitim will bilong [God], hem savvy herem yumi.” (1 John 5:14) So, yumi need for askim samting wea fitim will bilong God. From hem interest long spiritual living bilong yumi, any samting wea affectim yumi long spiritual way hem samting wea yumi fit for pray abaotem. Yumi mas no fall daon long test for askim nomoa olketa samting wea body needim. For example, nomata hem stret for pray for savvy and strong for deal withim sik, way for worry tumas abaotem health mas no winim olketa spiritual samting. (Psalm 41:1-3) From hem luksavvy hem worry tumas long health bilong hem, wanfela Kristian woman askim Jehovah for helpem hem for garem stretfela tingting abaotem sik bilong hem. From diswan, olketa problem bilong hem long saed bilong health hem luk olsem smallfela problem, and hem feelim olsem hem kasem ‘strongfela paoa bilong God.’ (2 Corinthians 4:7) Feeling bilong hem for helpem otherfela pipol long spiritual way hem kamap moa big, and hem kamap wanfela full-taem Kingdom pablisa.
13. Olsem Matthew 6:9-13 hem showim aot, wanem nao samfela samting wea yumi savvy talem long olketa prayer bilong yumi?
13 Wanem nao yumi savvy talem long olketa prayer bilong yumi mekem Jehovah bae hapi for herem them? Jesus Kraest teachim olketa disaepol bilong hem for pray. Long model prayer wea stap long Matthew 6:9-13, hem talem olketa point wea fitim yumi for pray abaotem. Wanem nao mas main samting insaed long olketa prayer bilong yumi? Nem bilong Jehovah God and Kingdom nao mas first samting. Hem stret tu for askim olketa material samting wea yumi needim. Hem important tu for askim hem for forgivim olketa sin bilong yumi and for sevem yumi from olketa test bilong badfela man, Satan. Jesus no wantim yumi for talem disfela sem prayer everytaem, for talem and no tingim meaning bilong hem. (Matthew 6:7) Waswe, wanfela dadi and pikinini savvy fren gud sapos pikinini hem use-im sem toktok everytaem, taem hem story withim dadi bilong hem?
14. Withim way for askim samting, wanem kaen prayer moa yumi mas offerim?
14 Withim way for askim samting, yumi mas offerim olketa prayer bilong praise and way for say thankyu. (Psalm 34:1; 92:1; 1 Thessalonians 5:18) Yumi savvy pray for other pipol tu. Olketa prayer bilong yumi for olketa spiritual brata and sista wea kasem trabel or persecution showim aot yumi interest long them, and Jehovah hem hapi for herem hao yumi ting long them. (Luke 22:32; John 17:20; 1 Thessalonians 5:25) Tru nao, aposol Paul hem raet olsem: “No worry long any samting, but long every samting thru long prayer and fashion for askim God and fashion for say thankyu, talem every samting long God; and peace bilong God wea winim every tingting bilong man bae guardim heart and tingting bilong yufela thru long Kraest Jesus.”—Philippians 4:6, 7.
GO AHED LONG PRAYER
15. Wanem nao yumi mas rememberim sapos hem luk olsem olketa prayer bilong yumi no kasem ansa?
15 Nomata yu kasem savvy abaotem God, yu maet feel olsem God no ansarem olketa prayer bilong yu. Diswan maet bikos taem bilong God for ansarem datfela samting wea yu askim hem no kam yet. (Ecclesiastes 3:1-9) Jehovah maet letem wanfela samting for go ahed for lelebet taem, but hem savvy ansarem olketa prayer and hem savvy long best taem for duim datwan.—2 Corinthians 12:7-9.
16. Why nao yumi mas go ahed long prayer, and hao nao way for duim diswan hem affectim way wea yumi fren withim God?
16 Way wea yumi go ahed long prayer showim aot way wea yumi barava interest long samting wea yumi talem long God. (Luke 18:1-8) For example, maet yumi askim Jehovah for helpem yumi for winim wanfela weak point. Taem yumi go ahed long prayer and duim samting wea fitim wanem yumi askim, yumi show aot yumi barava meanim samting wea yumi talem. Yumi mas tok stret and honest long samting wea yumi askim. Hem barava important for yumi mas pray strong taem yumi kasem wanfela test. (Matthew 6:13) Sapos yumi go ahed for pray taem yumi trae for bossim olketa feeling bilong yumi for duim sin, yumi bae lukim hao Jehovah hem helpem yumi. Diswan bae buildim ap faith bilong yumi and strongim way wea yumi fren withim hem.—1 Corinthians 10:13; Philippians 4:13.
17. Hao nao yumi bae kasem gudfela samting from way for pray taem yumi servim God?
17 Taem yumi mekem grow way for pray taem yumi duim holy service long Jehovah God, yumi bae luksavvy hao yumi no servim hem withim strong bilong yumi seleva. Jehovah nao givim yumi strong for servim hem. (1 Corinthians 4:7) Way for luksavvy long diswan bae helpem yumi for humble and hem bae mekem way wea yumi fren withim hem kamap moa strong. (1 Peter 5:5, 6) Yes, yumi garem olketa strongfela reason for go ahed long prayer. Olketa strongfela prayer bilong yumi and way for savvy hao for kam klosap long loving Father bilong yumi long heven bae mekem laef bilong yumi barava hapi.
WAY FOR STORY WITHIM JEHOVAH HEM NO WAN-SAED NOMOA
18. Hao nao yumi savvy listen long God?
18 Sapos yumi wantim God for herem olketa prayer bilong yumi, yumi mas listen long samting wea hem talem. (Zechariah 7:13) Distaem hem no sendem olketa message bilong hem thru long olketa profet and hem nating use-im spiritism for duim diswan. (Deuteronomy 18:10-12) But yumi savvy listen long God taem yumi studyim Word bilong hem, Bible. (Romans 15:4; 2 Timothy 3:16, 17) Olsem yumi maet need for mekem grow way for laekem kaikai wea gud for yumi, yumi mas “barava wantim klinfela milk bilong datfela word.” Mekem grow way for wantim spiritual kaikai long way for readim Word bilong God everyday.—1 Peter 2:2, 3; Acts 17:11.
19. Why nao way for ting raonem samting wea yu readim insaed long Bible savvy helpem yu?
19 Ting raonem samting wea yu readim insaed long Bible. (Psalm 1:1-3; 77:11, 12) Datwan meanim for studyim gud datfela material. Yu savvy ting long diswan olsem way for kasem strong from kaikai. Yu savvy kasem strong from spiritual kaikai taem yu joinim samting wea yu readim withim samting wea yu savvy finis. Tingim hao datfela material hem affectim laef bilong yu, or tingim samting wea hem showim aot abaotem olketa fashion bilong Jehovah and samting wea hem duim. So thru long way for study seleva, yu savvy kasem spiritual kaikai wea Jehovah provide-im. Diswan bae mekem yu kam klosap long God and bae helpem yu for deal withim olketa problem wea kamap everyday.
20. Hao nao way for attendim olketa Kristian meeting helpem yumi for kam klosap long God?
20 Yu savvy kam klosap long God taem yu listen long Word bilong hem long olketa Kristian meeting, olsem olketa Israelite listen gud taem they hipap tugeta for herem taem they readim Law bilong God long pablik. Olketa teacher long datfela taem they talemaot meaning bilong samting wea they readim long Law, and so they helpem olketa wea listen for meanim and diswan muvim them for followim samting wea they herem. Diswan mekem bigfela hapi kamap. (Nehemiah 8:8, 12) So mekem way for attendim olketa meeting bilong olketa Jehovah’s Witness olsem kastom bilong yu. (Hebrews 10:24, 25) Diswan bae helpem yu for meanim and then followim savvy bilong God insaed long laef bilong yu and hem bae givim yu hapi. Way for kamap part bilong olketa Kristian brata everywea long world bae helpem yu for stap klosap long Jehovah. Olsem yumi bae lukim, yu savvy faendem trufela safe ples midlwan long pipol bilong God.
TESTIM SAVVY BILONG YU
Why nao yumi mas kam klosap long Jehovah?
Wanem nao samfela samting wea man needim for kam klosap long God?
Wanem nao yumi savvy talem long olketa prayer bilong yumi?
Why nao yu mas go ahed long prayer?
Hao nao yu savvy listen long Jehovah distaem?
[Full piksa long page 157]