Chapter 18
Mekem Goal Bilong Yu for Servim God for Olawe
1, 2. Wanem nao man needim withim way for garem savvy bilong God?
TINGIM sapos yu stand ap front long wanfela door wea lock wea lead go long wanfela room wea garem staka samting wea garem hae price. Maet wanfela man wea garem paoa hem givim yu key bilong datfela room and hem talem yu for tekem any samting wea yu laekem. Datfela key bae no helpem yu sapos yu no use-im. Long sem way tu yu mas use-im savvy firstaem then hem bae helpem yu.
2 Diswan hem barava tru withim savvy bilong God. Tru nao, stretfela savvy bilong Jehovah God and Jesus Kraest hem meanim laef olawe. (John 17:3) But, yu kanduit for kasem datfela promis sapos yu garem savvy nomoa. Olsem way wea yu use-im wanfela important key, yu need for followim savvy bilong God insaed long laef bilong yu. Jesus hem say olketa wea duim will bilong God bae “go insaed long kingdom.” Olketa pipol olsem bae garem privilege for servim God for olawe!—Matthew 7:21; 1 John 2:17.
3. Wanem nao will bilong God for yumi?
3 Bihaen yu learnim wanem nao will bilong God, hem important for yu duim. Wanem nao yu ting hem will bilong God for yu? Olketa toktok hia barava talem stret: Followim Jesus. Wan Peter 2:21 say olsem long yumi: “Long disfela way, hem kolem yufela, from Kraest hem suffer for yufela, and leavim yufela wanfela example for followim gud olketa step bilong hem.” So, for duim will bilong God, yumi need for barava followim example bilong Jesus. Datwan nao way for use-im savvy bilong God.
WAY WEA JESUS USE-IM SAVVY BILONG GOD
4. Why nao Jesus savvy long planti samting abaotem Jehovah, and hao nao hem use-im datfela savvy?
4 Jesus Kraest barava garem savvy bilong God winim any otherfela man. Hem stap and work withim Jehovah God long heven for staka million year bifor hem kam long earth. (Colossians 1:15, 16) And wanem nao Jesus duim withim every savvy wea hem garem? Hem no satisfy long way for garem nomoa. Jesus live followim datfela savvy. Dastawe hem kaen tumas, patient, and deal withim olketa man long loving way. So Jesus hem followim Father bilong hem long heven and duim samting followim savvy wea hem garem abaotem olketa way and fashion bilong Jehovah.—John 8:23, 28, 29, 38; 1 John 4:8.
5. Why nao Jesus baptaes, and hao nao hem live followim meaning bilong baptism bilong hem?
5 Savvy wea Jesus garem hem muvim hem tu for duim wanfela barava important samting. From Galilee, hem go kasem Jordan River, wea John baptaesim hem. (Matthew 3:13-15) Wanem nao baptism bilong Jesus hem piksarem? From hem wanfela Jew, hem born long wanfela nation wea dedicate finis long God. So, start from taem wea hem born, hem dedicate finis. (Exodus 19:5, 6) Taem hem givim hemseleva for baptaes, Jesus givim hemseleva long Jehovah, for duim will bilong God for hem long datfela taem. (Hebrews 10:5, 7) And Jesus hem live followim meaning bilong baptism bilong hem. Hem work hard insaed long service bilong Jehovah, share-im savvy bilong God withim pipol long every chance. Jesus hem hapi tumas taem hem duim will bilong God, and hem say diswan hem olsem kaikai bilong hem.—John 4:34.
6. Long wanem way nao Jesus lusim will bilong hemseleva?
6 Jesus barava savvy hao way for duim will bilong Jehovah bae meanim bigfela samting—bae hem mas dae. Nomata olsem, hem lusim will bilong hemseleva, and putim olketa samting wea hemseleva needim for kamap mek-tu samting. Way for duim will bilong God nao firstfela samting everytaem. Hao nao yumi savvy followim perfect example bilong Jesus long disfela way?
OLKETA STEP WEA LEAD GO LONG LAEF OLAWE
7. Wanem nao samfela step wea man mas duim bifor hem fit for baptaes?
7 From yumi no olsem Jesus, yumi wea no perfect savvy baptaes only bihaen yumi duim samfela important samting. Diswan hem start taem yumi mekem stretfela savvy bilong Jehovah God and Jesus Kraest hem go insaed long heart bilong yumi. Taem yumi duim diswan hem muvim yumi for showim aot faith and garem bigfela love for God. (Matthew 22:37-40; Romans 10:17; Hebrews 11:6) Way for followim olketa law, principle, and mark bilong God bae muvim yumi for repent, and show aot yumi sorry long olketa sin wea yumi duim bifor. Diswan lead go long way for change, for tan raon and lusim rongfela way wea yumi followim taem yumi no garem savvy bilong God. (Acts 3:19) But, sapos long way wea haed yumi still duim wanfela sin and no duim raeteous samting, datwan meanim yumi no really tan raon, and yumi kanduit for giamanim God. Jehovah luksavvy long every kaen hypocrite fashion.—Luke 12:2, 3.
8. Wanem nao yu mas duim sapos yu laek for share insaed long Kingdom-preaching work?
8 From yu go ahed for kasem savvy bilong God distaem, waswe, hem fitim for yuseleva tingim olketa spiritual samting? Maet yu barava laek for talem samting wea yu learnim long olketa relative, fren, and otherfela pipol. Yes, maet yu duim diswan finis, olsem Jesus hem share-im gud nius withim otherfela pipol long anyway taem. (Luke 10:38, 39; John 4:6-15) Distaem yu maet want for duim moa samting. Olketa Kristian elder bae hapi for story withim yu for luksavvy sapos yu fit for share long Kingdom-preaching work bilong olketa Jehovah’s Witness. Sapos yu kamap fit, olketa elder bae arrange for yu go long ministry withim wanfela Witness. Olketa disaepol bilong Jesus followim olketa samting wea hem talem them for duim mekem them savvy duim ministry bilong them long way wea followim order. (Mark 6:7, 30; Luke 10:1) Yu bae kasem gudfela samting from help olsem taem yu share for talemaot message bilong Kingdom from haos tu haos and long otherfela way.—Acts 20:20, 21.
9. Hao nao man hem dedicate long God, and hao nao dedication hem affectim laef bilong man?
9 Way for preachim gud nius long every different kaen pipol long territory bilong kongregeson hem wanfela way for faendem olketa wea laekem raeteous fashion, and hem wanfela long olketa nambawan work wea prove-im faith bilong yu. (Acts 10:34, 35; James 2:17, 18, 26) Way for attendim olketa Kristian meeting and share long preaching work long gudfela way show aot yu repent finis and yu tan raon and barava decide for live followim savvy bilong God. Wanem nao nextfela samting? Hem nao for dedicate long Jehovah God. Diswan meanim for pray wea barava kam from heart for talem God hao yu willing for givim laef bilong yu for duim will bilong hem withim whole heart. Diswan nao way for dedicate-im yuseleva long Jehovah and acceptim kaenfela yoke bilong Jesus Kraest.—Matthew 11:29, 30.
BAPTISM—WANEM HEM MEANIM FOR YU
10. Why nao yu mas baptaes bihaen yu dedicate-im yuseleva long Jehovah?
10 Olsem Jesus talem, everywan wea kamap disaepol bilong hem mas baptaes. (Matthew 28:19, 20) Why nao yu need for duim diswan bihaen yu dedicate long God? From yu dedicate-im yuseleva long Jehovah, hem savvy yu love-im hem. But bae yu want for duim moa samting for mekem otherfela pipol savvy long love wea yu garem for God. Well, baptism hem givim yu chance for showim aot long pablik hao yu dedicate long Jehovah God.—Romans 10:9, 10.
11. Wanem nao meaning bilong baptism?
11 Baptism hem garem bigfela meaning. Taem yu go daon, or wata hem “buryim” yu, hem olsem yu dae long laef wea yu garem bifor. Taem yu kamaot from wata, hem olsem yu startim niufela laef, wanfela laef wea will bilong God nao rulim and no will bilong yuseleva. But, datwan no meanim yu bae no mekem any moa mistek, from yumi everywan no perfect so yumi sin everyday. But, olsem wanfela servant bilong Jehovah wea baptaes finis, yu bae garem spesel way for fren withim Jehovah. From yu repent and humble for baptaes, Jehovah willing for forgivim olketa sin bilong yu long faondeson bilong ransom sakrifaes bilong Jesus. So baptism hem lead go long way for garem klinfela conscience front long God.—1 Peter 3:21.
12. Wanem nao hem meanim for baptaes (a) “long nem bilong Father”? (b) ‘long nem bilong Son’? (c) ‘long nem bilong holy spirit’?
12 Jesus komandim olketa follower bilong hem for baptaesim olketa niufela disaepol “long nem bilong Father and bilong Son and bilong holy spirit.” (Matthew 28:19) Wanem nao Jesus hem meanim? Baptaes “long nem bilong Father” showim aot man wea baptaes hem acceptim every bit hao Jehovah God hem Creator and hem fit for Sovereign bilong universe. (Psalm 36:9; 83:18; Ecclesiastes 12:1) For baptaes ‘long nem bilong Son’ hem meanim datfela man luksavvy long Jesus Kraest—and main samting nao ransom sakrifaes bilong Hem—olsem only way for kasem laef from God. (Acts 4:12) Baptaes ‘long nem bilong holy spirit’ hem meanim man wea ready for baptaes luksavvy long holy spirit, or paoa bilong Jehovah, olsem samting wea God use-im for fulfillim olketa purpose bilong Hem. And tu, for givim paoa long olketa servant bilong Hem for duim raeteous will bilong Hem taem they stap withim organization bilong Hem wea spirit leadim.—Genesis 1:2; Psalm 104:30; John 14:26; 2 Peter 1:21.
WASWE, YU READY FOR BAPTISM?
13, 14. Why nao yumi mas no fraet for choose for servim Jehovah God?
13 From baptism hem garem bigfela meaning and hem nao barava important samting long laef bilong man, waswe, hem wanfela samting wea yu fraet for duim? No moa nao! Nomata way for decide for baptaes hem no samting wea yu ting nating long hem, hem nao barava wisefela samting wea yu savvy decide-im.
14 Way for baptaes hem prove-im hao yu choose for servim Jehovah God. Tingim samfela pipol wea yu savvy long them. Waswe, each wan long them no servim wanfela master? Samfela they kamap slave for olketa richfela samting. (Matthew 6:24) Otherfela they work hard long work bilong them for shilling or long way for tingim themseleva taem they duim samting wea olketa seleva barava wantim long laef. And otherfela servim olketa giaman god. But yu choose for servim trufela God, Jehovah. No any otherfela man hem kaen tumas, garem mercy, and love. God hem mekem olketa man kasem honor taem hem givim them gudfela work wea leadim them for laef. Hem givim laef olawe olsem reward for olketa servant bilong hem. For followim example bilong Jesus and givim laef bilong yu long Jehovah hem no samting for fraetem. Tru nao, hem nao only way wea yu mekem God hapi and hem fitim gudfela tingting.—1 Kings 18:21.
15. Wanem nao samfela samting wea planti taem mekem man hold back for baptaes?
15 But, baptism hem no samting for duim from otherfela pipol pullim yu for duim. Hem samting midlwan long yuseleva and Jehovah. (Galatians 6:4) Taem yu muv ahed long spiritual way, maet yu ting: “Wanem samting nao stopem mi for baptaes?” (Acts 8:35, 36) Maet yu askim yuseleva, ‘Waswe, way wea famili againstim mi hem mekem mi hold back? Waswe, mi still duim samfela samting wea no fitim scripture or wanfela no gud fashion? Waswe, maet mi fraet for pipol long ples bilong mi start for no laekem mi?’ Olketa hia they samfela samting for tingim, but tingting gud raonem them.
16. Hao nao yu bae kasem gudfela samting taem yu servim Jehovah?
16 Hem no gud for tingting long olketa samting hia nomoa but no tingim olketa gudfela samting wea kamaot from way for servim Jehovah. For example, tingim way wea famili againstim yu. Jesus promis and say nomata olketa disaepol bilong hem lusim olketa relative bilong them bikos they followim hem, they bae kasem wanfela spiritual famili wea moa big. (Mark 10:29, 30) Olketa brata hia bae showim aot love long yu, helpem yu for stand strong long persecution, and supportim yu long road for laef. (1 Peter 5:9) Olketa elder long kongregeson savvy barava helpem yu for deal withim olketa problem and winim otherfela challenge. (James 5:14-16) And taem world hem no laekem yu, hem gud for askim yuseleva olsem, ‘Any samting hem winim way wea Creator bilong universe hem approve-im mi, wea mekem hem hapi long laef wea mi choosim?’—Proverbs 27:11.
LIVE FOLLOWIM DEDICATION AND BAPTISM BILONG YU
17. Why nao yu mas ting long baptism olsem start and no end bilong wanfela samting?
17 Hem important for remember hao baptism hem no end bilong way wea yu grow long spiritual way. Hem start bilong service for full laef bilong yu long God olsem minister and wanfela Jehovah’s Witness. Nomata baptism hem barava important, hem no promis wea meanim yu bae kasem laef. Jesus hem no say: ‘Everywan wea baptaes bae kasem laef.’ But, hem say: “Man wea stand strong go kasem end nao bae kasem laef.” (Matthew 24:13) Dastawe, hem important for yu lukaotem Kingdom bilong God firstaem long way for mekem diswan kamap nambawan samting long laef bilong yu.—Matthew 6:25-34.
18. Bihaen long baptism, wanem nao samfela goal wea yu savvy trae for kasem?
18 For stand strong long service bilong yu for Jehovah, yu bae want for markem olketa spiritual goal for yuseleva. Wanfela gudfela goal hem for mekem grow savvy bilong God thru long way for studyim seleva Word bilong hem everytaem. Plan for readim Bible everyday. (Psalm 1:1, 2) Attendim olketa Kristian meeting everytaem, from way for kampani tugeta long there bae helpem yu for strong long spiritual way. Mekem goal for yu givim ansa long olketa kongregeson meeting and praisim Jehovah and trae for buildim ap otherfela pipol. (Romans 1:11, 12) Maet narafela goal hem for mekem olketa prayer bilong yu kamap moabeta.—Luke 11:2-4.
19. Wanem nao olketa fashion wea holy spirit savvy helpem yu for showim aot?
19 Sapos yu want for live followim meaning bilong baptism bilong yu, yu need for lukluk gud long samting wea yu duim, letem holy spirit bilong God mekem yu garem olketa fashion olsem love, hapi, peace, long-suffering, kaenfela fashion, gudfela fashion, faith, kwaet fashion, and fashion for bossim seleva. (Galatians 5:22, 23; 2 Peter 3:11) Remember, Jehovah givim holy spirit bilong hem long everywan wea pray for diswan and wea obeyim hem olsem olketa faithful servant bilong hem. (Luke 11:13; Acts 5:32) So pray long God for spirit bilong hem and askim hem for helpem yu for showim aot olketa fashion wea mekem hem hapi. Olketa fashion olsem bae show aot long toktok and fashion bilong yu taem spirit bilong God affectim yu. Hem tru, each wan insaed long Kristian kongregeson trae hard for mekem grow “niufela fashion” mekem hem savvy kamap olsem Kraest. (Colossians 3:9-14) Each wan long yumi face-im olketa different challenge taem yumi duim diswan bikos yumi different long way for muv ahed long spiritual saed. From yu no perfect, yu mas work hard for garem fashion olsem Kraest. But no givap long diswan, from yu savvy duim withim help bilong God.
20. Wanem nao olketa way wea yu savvy followim Jesus insaed long ministry?
20 For join withim olketa spiritual goal bilong yu hem way for followim hapi example bilong Jesus. (Hebrews 12:1-3) Hem love-im ministry. Sapos yu garem privilege for share insaed long work for preach abaotem Kingdom, then, no letem diswan kamap olsem samting nating nomoa. Trae for kasem way for satisfy for teachim otherfela pipol abaotem Kingdom bilong God olsem Jesus hem duim. Use-im olketa samting wea kongregeson provide-im for helpem yu for kamap moabeta olsem wanfela teacher. Yu savvy barava sure hao Jehovah bae givim yu strong for duim ministry bilong yu.—1 Corinthians 9:19-23.
21. (a) Hao nao yumi savvy Jehovah hem ting hae long olketa wea baptaes wea faithful? (b) Wanem nao show aot baptism hem important for yumi winim judgment bilong God long disfela badfela system?
21 Man wea dedicate and baptaes, wea hem faithful for trae hard for followim Jesus hem spesel long God. Jehovah lukluk long planti billion heart bilong olketa man and hem savvy hao olketa wea spesel they no staka. Hem ting long them olsem samting wea garem hae price, “olketa nicefela samting.” (Haggai 2:7) Olketa Bible profesi show aot hao God ting long olketa olsem pipol wea garem mark for winim judgment bilong hem wea klosap for kasem disfela badfela system. (Ezekiel 9:1-6; Malachi 3:16, 18) Waswe, yu “garem stretfela feeling for duim samting for kasem laef olawe”? (Acts 13:48) Waswe, yu barava want for kasem mark olsem man wea servim God? Dedication and baptism they part bilong datfela mark, and they important samting for kasem laef.
22. Olketa bilong “great crowd” savvy luk forward long wanem hope?
22 Bihaen long bigfela Flood, Noah and famili bilong hem they kamaot from ark long wanfela klinfela earth. Long sem way distaem, “wanfela great crowd” wea followim savvy bilong God insaed long laef bilong them and wea Jehovah hem approve-im them, they garem hope for winim end bilong disfela badfela system and enjoyim laef olawe long wanfela earth wea bae klin for olawe. (Revelation 7:9, 14) Living long datfela taem bae waswe?
TESTIM SAVVY BILONG YU
Hao nao Jehovah wantim yu for use-im savvy bilong yu abaotem hem?
Wanem nao samfela step wea lead go long baptism?
Why nao baptism hem no end but hem start bilong wanfela samting?
Hao nao yumi savvy live followim dedication and baptism bilong yumi?
[Piksa long page 172]
Waswe, yu dedicate finis long God long prayer?
[Piksa long page 174]
Wanem samting nao stopem yu for baptaes?