Waswe, Wanfela Bighed Pikinini Stap Long Famili?

1, 2. (a) Wanem tok piksa nao Jesus talem for showim aot way wea olketa bigman bilong Jew religion they no faithful? (b) Wanem nao tok piksa bilong Jesus showim iumi abaotem olketa young wan?

FEWFELA day bifor hem dae, Jesus askim samfela bigman bilong Jew religion wanfela kwestin wea mekem them tingting. Hem say: “Wanem nao tingting bilong iufela? Wanfela man garem tufela pikinini. Hem go long first wan and say, ‘Pikinini, iu go work long grape plantation tuday.’ Dis wan ansa olsem, ‘Bae mi go, masta,’ but hem nating go. Then datfela man go long mek-tu pikinini and talem sem samting. Then pikinini hem say, ‘Bae mi no go.’ Bihaen, hem feel sorry and hem go. Hu long tufela nao duim will bilong father bilong hem?” Olketa bigman bilong Jew say: “Mek-tu pikinini.”—Matthew 21:28-31.

² Long hia, Jesus tok abaotem way wea olketa bigman bilong Jew they no faithful. They olsem firstfela son, wea promis for duim will bilong God but then they no keepim promis bilong them. But planti dadi and mami bae luksavvy hao Jesus givim disfela tok piksa from hem savvy gud long famili laef. Olsem hem showim aot, planti taem hem hard for savvy wanem nao tingting bilong young pipol or wanem nao they bae duim. Wanfela young wan maet bringim planti problem taem hem teenager but then hem kamap wanfela full-grown person wea balance and planti pipol respectim. Iumi mas tingim diswan taem iumi story abaotem problem bilong teenager wea garem bighed fasin.

WANEM NAO WANFELA WEA BIGHED?

3. Why nao dadi and mami mas no kwiktaem for ting say pikinini bilong them hem wanfela wea bighed?

³ Samfela taem, maet iu herem story abaotem samfela teenager wea go againstim dadi and mami bilong them. Maet iu savvy long wanfela famili wea garem wanfela teenager wea nating savvy obey. But, hem no easy evritaem for luksavvy sapos wanfela pikinini hem really bighed pikinini. And tu, hem hard for meanim why nao samfela pikinini they bighed and otherfela—wea insaed long sem famili—they no bighed. Sapos dadi and mami ting say wanfela pikinini bilong them hem go-go for kamap wanfela barava bighed pikinini, wanem nao they mas duim? For ansarem diswan, firstaem iumi mas story abaotem wanem nao wanfela wea bighed.

4-6. (a) Wanem nao wanfela wea bighed? (b) Wanem nao dadi and mami mas tingim sapos teenager bilong them hem no obey samfela taem?

⁴ For tok stret, wanfela wea bighed hem man wea mean for no obey evritaem or hem againstim and no want for followim eniwan wea lead. Hem tru, ‘kranky fasin stap insaed long heart bilong wanfela pikinini.’ (Proverbs 22:15) So evri pikinini bae no want for obeyim dadi and mami or otherfela pipol samfela taem. Diswan hem barava tru taem body and feeling hem change taem they kamap teenager. Eni change wea kamap insaed living bilong man savvy mekem hevi kamap, and olketa teenage year nao they taem bilong planti change. Teenage son or dota bilong iu hem lusim way bilong small pikinini and hem go-go for kamap full-grown man or woman. Dastawe long olketa teenage year, samfela dadi and mami and pikinini faendem hem hard for stap gud tugeta. Planti taem, dadi and mami trae for holem back way for grow ap, but olketa teenager want for grow ap kwiktaem.

⁵ Teenager wea bighed hem rejectim samting wea dadi and mami talem. But remember, fewfela taem wea pikinini no obey hem no meanim hem wanfela wea bighed. And long saed bilong olketa spiritual samting, maet firstaem samfela pikinini no interest long truth bilong Bible, but maet they no bighed pikinini. Olsem dadi or mami, no kwiktaem for say pikinini bilong iu hem wanfela wea bighed.

⁶ Waswe, olketa teenage year bilong evri young pipol fulap withim bighed fasin againstim dadi and mami? No moa. Tru nao, proof hem show aot smallfela sekson bilong olketa teenager nomoa they barava bighed tumas. But, waswe sapos wanfela pikinini hem bighed olawe? Wanem nao maet mekem hem for bighed olsem?

SAMTING WEA MEKEM BIGHED FASIN KAMAP

7. Hao nao system bilong Satan savvy mekem pikinini for bighed?

⁷ Wanfela big samting wea mekem bighed fasin kamap hem world bilong Satan wea stap raonem iumi. “Whole world hem stap long paoa bilong badfela man.” (1 John 5:19) World wea stap long paoa bilong Satan hem garem badfela system wea savvy spoelem man, wea olketa Kristian mas deal withim. (John 17:15) Planti samting bilong disfela system hem kamap moa raf, moa danger, and fulap withim moa bad samting winim bifor. (2 Timothy 3:1-5, 13) Sapos dadi and mami no teachim, warnim and protectim olketa pikinini bilong them, hem easy for “disfela spirit wea stap long olketa son wea no obey” for spoelem them. (Ephesians 2:2) Narafela samting wea join withim diswan hem otherfela young wan wea sem age olsem them. Bible hem say: “Man wea kampani withim olketa stupid pipol bae kasem trabel.” (Proverbs 13:20) Olsem tu, sapos man hem kampani withim olketa wea fulap withim spirit bilong disfela world, bae spirit hia affectim hem tu. Olketa young wan needim help evritaem for mekem olketa meanim hao way for obeyim olketa principle bilong God hem faondeson bilong gudfela living.—Isaiah 48:17, 18.

8. Wanem nao olketa samting wea maet mekem pikinini for garem bighed fasin?

⁸ Narafela samting wea mekem bighed fasin kamap maet hem living bilong famili. For example, sapos dadi or mami depend long alcohol, iusim drug, or raf tumas long partner bilong hem, diswan savvy spoelem tingting bilong teenager abaotem living. Nomata insaed olketa famili wea no raf, bighed fasin savvy kamap taem pikinini ting dadi and mami bilong hem no interest long hem. But way wea teenager garem bighed fasin hem no evritaem samting wea kamap from olketa samting wea happen raonem hem. Samfela pikinini no want for listen long dadi and mami bilong them nomata tufela followim olketa principle bilong God and barava protectim them from world wea stap raonem them. Why nao olsem? Maet from narafela samting wea startim evri problem bilong iumi—way wea man no perfect. Paul say: “Thru long wanfela man [Adam] sin hem kam insaed long world and dae hem kam from sin, dastawe dae hem kasem evri man bikos evriwan they sin.” (Romans 5:12) Adam hem wanfela selfish man wea bighed, and hem passim no gud samting long evri pikinini bilong hem. Samfela young wan they choose for bighed, olsem laen dadi bilong them bifor hem duim.

ELI WEA EASY TUMAS AND REHOBOAM WEA HARD TUMAS

9. Wanem way for ova tumas for teachim pikinini maet mekem pikinini hem bighed?

⁹ Narafela samting wea mekem olketa teenager for bighed hem tingting wea no balance bilong olketa dadi and mami abaotem way for teachim pikinini. (Colossians 3:21) Samfela dadi and mami they hard tumas and givim strongfela discipline long olketa pikinini bilong them. Otherfela they easy tumas long pikinini, no provide-im olketa mark wea bae protectim olketa young wan bilong them wea no garem savvy. Hem no easy evritaem for balance long tufela way hia. And different pikinini garem different need. Wanfela maet needim moa discipline winim narawan. But, tufela Bible example bae help for showim aot olketa danger wea kamap long way for easy tumas or hard tumas.

10. Why nao Eli, nomata maet hem wanfela hae priest wea faithful, hem no wanfela gudfela dadi?

¹⁰ Hae priest bilong Israel, Eli, hem wanfela dadi. Hem serve for 40 year, and hem savvy gud long Law bilong God. Maet Eli hem faithful for duim olketa work bilong hem olsem priest and maet hem teachim gud tu Law bilong God long olketa son bilong hem, Hophni and Phinehas. But, Eli hem easy tumas long olketa son bilong hem. Hophni and Phinehas serve olsem priest, but they “iusles man” wea interest nomoa long samting wea they wantim and dirty fasin. But, taem they duim olketa barava no gud samting long holy graon, Eli fraet for aotem them from work bilong them. Hem tok lelebet nomoa long them. From way wea hem easy tumas, Eli honorim olketa son bilong hem winim God. From diswan, olketa son bilong hem go againstim klinfela worship bilong Jehovah and full famili bilong Eli kasem trabel.—1 Samuel 2:12-17, 22-25, 29; 3:13, 14; 4:11-22.

11. Wanem nao dadi and mami savvy learnim from rongfela example bilong Eli?

¹¹ Olketa pikinini bilong Eli they full-grown man finis taem olketa samting hia happen, but disfela story showim aot danger for hold back for givim discipline. (Lukim Proverbs 29:21.) Samfela dadi and mami maet konfius long way for easy tumas withim love, taem they no markem olketa klia and stretfela rul for pikinini followim evritaem. They fail for followim loving discipline, nomata taem pikinini bilong them brekem olketa principle bilong God. From disfela way for easy tumas, olketa pikinini bilong them maet no listen long dadi and mami or eni otherfela pipol wea garem paoa.—Lukim Ecclesiastes 8:11.

12. Wanem mistek nao Rehoboam duim long way for iusim paoa?

¹² Rehoboam showim aot narakaen way for iusim paoa, hem nao for ova tumas. Hem nao lastfela king bilong full kingdom bilong Israel, but hem no gudfela king. Taem Rehoboam start for rul, olketa pipol no hapi from olketa hevi wea dadi bilong hem, Solomon, givim long them. Waswe, Rehoboam show aot hem feel sorry long olketa? No moa. Taem samfela man wea olketa pipol sendem for story withim hem they askim hem for aotem samfela hevi hia, hem no followim gudfela advice bilong olketa olo man for givim kaonsel, but hem komandim way for mekem hevi bilong olketa pipol kamap moa hevi. Praod fasin bilong hem mekem olketa pipol bilong tenfela tribe long north for againstim hem, and diswan mekem datfela kingdom hem divaed long tufela sekson.—1 Kings 12:1-21; 2 Chronicles 10:19.

13. Hao nao dadi and mami savvy misstim mistek wea Rehoboam duim?

¹³ Olketa dadi and mami savvy learnim samfela important samting from story bilong Bible abaotem Rehoboam. They need for “lukaotem Jehovah” long prea and lukluk gud long olketa way bilong them for teachim pikinini wea join withim olketa Bible principle. (Psalm 105:4) “Way for hard tumas savvy mekem wise wan duim kranky samting,” Ecclesiastes 7:7 hem say. Olketa rul wea fitim savvy givim freedom long olketa teenager for grow and long semtaem protectim them. But hem no fitim olketa pikinini for garem tumas rul wea bae stopem them for mekem grow way for duim samting seleva and respectim seleva long balance way. Taem dadi and mami trae for balance-im way wea pikinini free for duim samting withim way for markem klia olketa gudfela rul, planti taem olketa teenager bae no bighed.

WAY FOR PROVIDE–IM OLKETA IMPORTANT NEED SAVVY STOPEM BIGHED FASIN

14, 15. Hao nao dadi and mami mas ting long way wea pikinini bilong them hem grow?

¹⁴ Nomata olketa dadi and mami hapi for lukim olketa young wan bilong them grow from baby for kamap full-grown man, maet they worry taem teenage pikinini bilong them start for depend long hemseleva and no long tufela. Long disfela taem bilong change, no sapraes sapos teenager bilong iu hem bighed samfela taem and no willing for followim toktok. Tingim hao goal bilong Kristian dadi and mami hem for bringim ap wanfela for kamap mature Kristian wea steady and balance.—Lukim 1 Corinthians 13:11; Ephesians 4:13, 14.

¹⁵ Nomata hem hard, dadi and mami mas no evritaem say no, taem teenager bilong them ask for moa freedom. Long gudfela way, pikinini hem need for grow ap and garem fasin bilong hemseleva. Tru nao, taem they young yet, samfela teenager start for garem tingting bilong full-grown man. For example, Bible say olsem abaotem young King Josiah: “Taem hem wanfela boy yet [hem samting olsem 15 year], hem start for lukaotem God bilong David.” Diswan hem wanfela teenager wea mature.—2 Chronicles 34:1-3.

16. Taem olketa pikinini kasem moa freedom, wanem nao they mas luksavvy long hem?

¹⁶ But, for garem freedom hem meanim man mas givim ansa tu. So, letem teenager wea go-go for full-grown man kasem samting wea kamaot from wanem hem decide-im and duim. Disfela principle, “samting wea man plantim, hem bae kasem tu,” hem fitim olketa teenager and olketa full-grown man tu. (Galatians 6:7) Iu kanduit for protectim olketa pikinini olawe. But, waswe sapos pikinini want for duim samting wea barava no fitim? Olsem dadi or mami wea balance, iu mas say, “No.” And, nomata iu maet explainim why nao ansa bilong iu hem olsem, no eni samting mas mekem iu change-im no bilong iu for kamap yes. (Lukim Matthew 5:37.) But, trae for say “No” long kwaet and gudfela way, from “kwaetfela ansa hem stopem kros.”—Proverbs 15:1.

17. Wanem nao samfela trufela samting abaotem olketa teenager wea savvy encouragim dadi and mami?

¹⁷ Young pipol need for feel safe long discipline wea no olabaot nomata sapos they no kwiktaem for agree withim olketa mark and rul wea they mas followim. They savvy feel kros sapos olketa rul change evritaem, from way wea diswan depend long feeling bilong dadi or mami taem samting hem happen. And tu, sapos olketa teenager kasem encouragement and help, taem they needim, for deal withim way for no sure long seleva, and fasin for feel shame, planti taem bae they grow ap for kamap mature. Olketa teenager ting hae tu long way wea they kasem trust bilong dadi and mami wea they fit for kasem.—Lukim Isaiah 35:3, 4; Luke 16:10; 19:17.

18. Wanem nao samfela samting wea teenager needim wea dadi or mami mas givim?

¹⁸ Olketa dadi and mami bae kasem comfort for savvy hao, taem peace, way for steady, and love stap insaed famili, planti taem olketa pikinini grow ap gud. (Ephesians 4:31, 32; James 3:17, 18) Tru nao, planti young wan they winim no gud famili living, nomata they kam from famili wea garem fasin for drink olawe, raf fasin, or otherfela no gud samting, they grow ap and kamap gudfela full-grown man. So, sapos iu garem famili wea olketa teenager bilong iu feel safe, wea savvy they bae kasem love, feeling, and samwan wea tingim them—nomata sapos diswan hem garem samfela rul and discipline wea fitim olketa principle bilong Scripture—planti taem they bae grow ap for kamap full-grown man wea bae mekem iu hapi tumas.—Lukim Proverbs 27:11.

TAEM OLKETA PIKININI INSAED TRABEL

19. Nomata dadi and mami mas trainim boy long way wea hem stret, wanem responsibility nao datfela pikinini garem?

¹⁹ Sapos dadi and mami duim gud work bilong them, bae they kasem gudfela samting. Proverbs 22:6 say: “Trainim wanfela boy long way wea hem stret; nomata taem hem kamap olo, hem bae no lusim datwan.” But, waswe long olketa pikinini wea garem bigfela problem nomata they garem gudfela dadi and mami. Waswe, diswan savvy happen? Yes. For meanim gud toktok bilong disfela proverb, iumi mas lukluk long olketa otherfela verse wea mek hae long responsibility bilong pikinini for “listen” and obeyim dadi and mami. (Proverbs 1:8) Dadi or mami and pikinini mas work tugeta for followim olketa Bible principle for kasem wan mind insaed long famili. Sapos dadi and mami and olketa pikinini no work tugeta, olketa problem bae kamap.

20. Taem olketa pikinini duim mistek from they no tingting gud, wanem nao wisefela samting for dadi and mami duim?

²⁰ Wanem nao dadi and mami mas duim taem wanfela teenager hem duim mistek and kasem trabel? Long taem olsem nao young wan hia needim help. Sapos dadi and mami remember they deal withim wanfela wea no garem planti savvy, diswan bae helpem them for no ova tumas long kros. Paul givim kaonsel hia long olketa mature wan insaed kongregeson: “Nomata wanfela man hem go rong lelebet taem hem no meanim yet, iufela wea kasem mark long spiritual way mas trae for stretem datfela man withim kwaet fasin.” (Galatians 6:1) Dadi and mami savvy followim disfela sem samting taem they deal withim young wan wea duim mistek from hem no tingting gud. Taem they explainim why disfela samting hem rong and hao hem savvy no duim moa, dadi and mami mas talemaot klia hao samting wea no gud hem nao datfela fasin and no datfela young wan.—Lukim Jude 22, 23.

21. Long way wea followim example bilong Kristian kongregeson, wanem nao dadi and mami savvy duim sapos pikinini bilong them duim wanfela bigfela rong?

²¹ Waswe sapos rong wea young wan duim hem big tumas? Sapos olsem, pikinini hia needim spesel help from olketa wea garem savvy. Taem wanfela member bilong kongregeson hem duim wanfela big sin, hem kasem encouragement for repent and askim olketa elder for helpem hem. (James 5:14-16) Taem hem repent, olketa elder bae helpem hem for buildim ap spiritual saed bilong hem. Insaed long famili, dadi and mami nao garem responsibility for helpem teenager wea duim mistek, and tu, they maet need for story abaotem diswan withim olketa elder. They mas no trae for haedem from body of elders eni bigfela rong wea wanfela pikinini bilong them hem duim.

22. For followim Jehovah, wanem tingting nao dadi and mami bae trae for garem sapos pikinini duim wanfela bigfela rong?

²² Taem pikinini bilong iu insaed bigfela problem, diswan hem barava hardfela samting. From they maet feel no gud tumas, dadi and mami maet want for tok no gud long datfela pikinini; but diswan maet mekem hem kamap moa kros. Remember hao future bilong disfela young wan maet depend long hao iu deal withim hem long disfela hardfela taem. Tingim tu hao Jehovah hem ready for forgivim pipol bilong hem wea lusim way for duim stretfela samting—sapos they repent. Listen long olketa loving toktok bilong hem: “‘Kam, nao, iufela pipol, and letem iumi stretem evri samting midlwan long iumi,’ Jehovah hem say. ‘Nomata olketa sin bilong iufela hem barava red, they bae kamap white olsem snow; nomata they olsem redfela kaleko, they bae kamap olsem wool.’” (Isaiah 1:18) Hem showim aot nambawan example for olketa dadi and mami!

23. Taem wanfela pikinini bilong them hem duim bigfela rong, wanem nao dadi and mami mas duim, and wanem nao they mas no duim?

²³ So, trae for encouragim dat wan wea bighed for change-im way bilong hem. Askim gudfela advice from olketa dadi and mami wea garem experience long diswan and olketa elder bilong kongregeson. (Proverbs 11:14) No trae for duim samting wea iu no tingting gud abaotem firstaem and talem or duim samting wea bae mekem hem hard for pikinini bilong iu for kam back long iu. Stap klia long fasin for barava kros. (Colossians 3:8) No givap kwiktaem. (1 Corinthians 13:4, 7) Taem iu hate-im badfela samting, stap klia long way for kamap hard and barava kros long pikinini bilong iu. Samting wea barava important, dadi and mami mas trae hard for showim aot gudfela example and for keepim faith bilong them long God hem strong.

DEAL WITHIM BIGHED PIKININI WEA GAREM STRONG TINGTING

24. Wanem samting wea mekem iumi sorry hem kamap samfela taem insaed long Kristian famili, and wanem nao dadi or mami mas duim?

²⁴ Samfela taem hem klia tumas hao wanfela young wan hem decide strong for bighed and barava rejectim olketa Kristian mark. Sapos olsem, dadi and mami mas trae for keepim and buildim ap famili laef bilong olketa otherfela pikinini. Iu mas careful for no iusim evri strong bilong iu long dat wan wea bighed, and no tingim nao otherfela pikinini bilong iu. Winim way for trae for haedem datfela problem from otherfela member bilong famili, story abaotem diswan withim olketa long way wea fitim and long way wea bae comfortim them.—Lukim Proverbs 20:18.

25. (a) For followim Kristian kongregeson, wanem nao dadi and mami maet need for duim sapos wanfela pikinini hem bighed and no want for change? (b) Wanem nao dadi and mami mas tingim evritaem sapos wanfela pikinini bilong them hem bighed?

²⁵ Aposol John say olsem abaotem wanfela wea kamap bighed wea no savvy change insaed long kongregeson: “No invitim hem insaed long haos bilong iufela or say hello long hem.” (2 John 10) Dadi and mami maet ting they need for duim sem kaen samting long pikinini bilong themseleva wea kasem age wea gavman markem and wea barava bighed and no savvy change. Nomata diswan hem barava hardfela samting for duim, samfela taem, iu mas duim olsem for protectim otherfela member bilong famili. Famili bilong iu needim protection and care bilong iu evritaem. So, go ahed for keepim way for followim olketa mark bilong fasin wea balance. Story tugeta withim olketa otherfela pikinini. Show aot interest long hao they go ahed long skul and insaed kongregeson. And tu, talem them hao nomata iu no hapi long samting wea datfela bighed pikinini hem duim, iu no hate-im hem. Iu againstim badfela samting wea hem duim, and no datfela pikinini. Taem tufela son bilong Jacob bringim trabel long famili bikos long no gud samting wea they duim, Jacob hem tok againstim raf-fela fasin bilong them, and no tufela son hia.—Genesis 34:1-31; 49:5-7.

26. Wanem samting nao savvy givim comfort long dadi and mami wea duim best bilong them sapos wanfela pikinini bilong them hem bighed?

²⁶ Maet iu feel iu nao karem blame for samting wea happen long famili bilong iu. But sapos iu duim evri samting wea iu fit for duim, followim kaonsel bilong Jehovah long way wea fitim, iu no need for judge-im iuseleva long way wea no balance. Kasem comfort from way for tingim hao no eni dadi or mami hem perfect, but iu trae for olsem wanfela gudfela dadi or mami. (Lukim Acts 20:26.) For garem wanfela barava bighed pikinini insaed long famili hem samting wea savvy mekem man sorry tumas, but sapos diswan happen long iu, remember hao God hem meanim and bae hem nating savvy lusim olketa servant bilong hem wea faithful. (Psalm 27:10) So decide strong for keepim haos bilong iu wanfela safe and spiritual ples for olketa otherfela pikinini bilong iu.

27. Taem they rememberim tok piksa abaotem son wea spoelem shilling, wanem hope nao dadi and mami bilong bighed pikinini savvy garem evritaem?

²⁷ And tu, iu mas nating givap. Way wea iu trae for trainim hem long proper way taem hem small maet affectim heart bilong datfela bighed pikinini and mekem hem tingting gud moa. (Ecclesiastes 11:6) Samfela Kristian famili kasem sem samting olsem iu, and samfela they lukim bighed pikinini bilong them hem kam back, olsem dadi insaed long tok piksa bilong Jesus abaotem son wea spoelem shilling. (Luke 15:11-32) Sem samting maet happen long iu.