Protectim Famili Bilong Iu From Badfela Samting

1-3. (a) Wea nao olketa badfela samting wea savvy spoelem famili they kam from? (b) Wanem kaen way for balance nao dadi and mami needim for protectim famili bilong them?

SMALL boy bilong iu hem ready for go long skul, and aotsaed hem rain big. Wanem nao bae iu duim? Waswe, bae iu letem hem go aot and no givim hem eni umbrella? Or waswe, bae iu mekem hem wearim staka kaleko for protectim hem from rain wea mekem hem hard for hem wakabaot? No moa, bae iu no duim tufela samting hia. Iu bae givim hem nomoa samting wea hem needim for hem no tuwet.

² Long sem way olsem, dadi and mami mas faendem wanfela balance way for protectim famili from olketa badfela samting wea savvy kasem them from planti different samting—bisnis bilong hapitaem, radio, TV, and magasin olketa wea sem age withim them, and samfela taem olketa skul tu. Samfela dadi and mami maet duim lelebet samting or no eni samting for protectim famili bilong them. Otherfela, wea ting evri samting aotsaed long famili they badfela, they stopem tumas olketa pikinini bilong them and diswan hem hard tumas for olketa pikinini. Waswe, man savvy balance long diswan?

³ Yes, hem savvy balance. For ova tumas hem no gud and savvy mekem problem kamap. (Ecclesiastes 7:16, 17) Hao nao Kristian dadi and mami savvy balance-im way for protectim famili bilong them? Tingim threefela part long living: education, olketa fren, and hapitaem.

HU NAO BAE TEACHIM PIKININI BILONG IU?

4. Hao nao Kristian dadi and mami mas ting long education?

⁴ Olketa Kristian dadi and mami ting hae long education. They savvy way for go long skul hem helpem olketa pikinini for read, raet, and story tugeta, and for deal withim olketa problem tu. Skul fit for teachim them hao for learn tu. Olketa samting wea olketa pikinini learnim long skul savvy helpem them for win nomata they face-im olketa challenge long world distaem. And tu, gudfela education maet helpem them for duim gudfela work.—Proverbs 22:29.

5, 6. Hao nao olketa pikinini savvy kasem rongfela information abaotem sex long skul?

⁵ But, skul hem ples wea olketa pikinini stap withim otherfela pikinini tu—wea planti long olketa garem rongfela tingting. For example, tingting bilong them abaotem sex and fasin. Long wanfela secondary skul long Nigeria, wanfela girl wea savvy olabaot tumas for duim dirty fasin hem givim advice abaot sex long otherfela student wea hem skul withim. They listen long hem, nomata hem talem olketa kranky idea wea hem readim from olketa dirty buk. Samfela girl traem samting wea hem talem. From diswan, wanfela hem babule nating and hem dae taem hem trae for killim dae pikinini insaed bele bilong hem.

⁶ Sorry tumas, samfela rongfela tingting abaotem sex wea kamap long skul hem no kam from olketa pikinini, but from olketa teacher. Planti dadi and mami they feel no gud taem olketa skul teachim olketa pikinini abaotem sex but no talemaot information abaotem olketa mark bilong fasin and responsibility bilong them. Mami bilong wanfela 12-year-old girl say olsem: “Mifela stap long wanfela area wea pipol strong long saed bilong religion and kastom, but insaed long secondary skul long hia, they givim olketa condom long olketa pikinini!” Hem and hasband bilong hem start for worry taem they herem hao olketa boy wea sem age withim dota bilong them askim girl bilong them for duim sex. Hao nao olketa dadi and mami savvy protectim famili bilong them from olketa badfela samting olsem?

7. Wanem nao best samting for duim for stopem way for kasem rongfela information abaotem sex?

⁷ Waswe, best samting for duim hem for no storyim eni samting abaotem sex long olketa pikinini? No moa. Hem moabeta for iuseleva teachim olketa pikinini bilong iu abaotem sex. (Proverbs 5:1) Hem tru, long samfela part long Europe and North America, planti dadi and mami no savvy story abaotem diswan. Long samfela kantri long Africa tu, dadi and mami no savvy story withim olketa pikinini abaotem sex. “Hem no kastom bilong pipol long Africa for duim diswan,” wanfela dadi long Sierra Leone hem talem. Samfela dadi and mami say for teachim olketa pikinini abaotem sex hem savvy givim them olketa idea wea bae mekem them duim dirty fasin! But hao nao God ting long diswan?

TINGTING BILONG GOD ABAOTEM SEX

8, 9. Wanem gudfela information long saed bilong sex nao hem stap insaed long Bible?

⁸ Bible showim aot klia hao man no need for shame for story long proper way abaotem sex. Long Israel, pipol bilong God kasem komand for hipap tugeta, withim olketa “pikinini,” for listen taem they readim aot Law Bilong Moses. (Deuteronomy 31:10-12; Joshua 8:35) Law tok stret abaotem samfela samting long saed bilong sex, and tu abaotem sik bilong woman, samting wea kasem man, fornication, adultery, homosexual fasin, way for duim sex withim klos relative, and duim sex withim animal. (Leviticus 15:16, 19; 18:6, 22, 23; Deuteronomy 22:22) Bihaen they herem olketa samting hia, iumi sure olketa dadi and mami mas explainim planti samting long olketa young wan bilong them wea askim enikaen kwestin.

⁹ Samfela verse long mek-faev, mek-six, and mek-seven chapter bilong Proverbs story abaotem loving kaonsel abaotem olketa danger bilong dirty fasin. Olketa verse hia showim aot hao dirty fasin hem samting wea savvy sweetim man. (Proverbs 5:3; 6:24, 25; 7:14-21) But they teachim hao diswan hem rong and savvy bringim bigfela problem, and they talem samting for helpem olketa young pipol for stap klia long dirty fasin. (Proverbs 5:1-14, 21-23; 6:27-35; 7:22-27) And tu, long way wea different evribit from dirty fasin, they story abaotem way for satisfy long saed bilong sex wea man savvy kasem long stretfela ples, insaed long marit. (Proverbs 5:15-20) Diswan hem gudfela example bilong way for teach wea dadi and mami savvy followim!

10. Why nao way for givim savvy bilong God abaotem sex bae no leadim olketa pikinini for duim dirty fasin?

¹⁰ Waswe, diskaen way for teach hem leadim olketa pikinini for duim dirty fasin? No moa nao, from Bible hem say: “Savvy hem sevem olketa wea raeteous.” (Proverbs 11:9) Waswe, iu want for sevem olketa pikinini bilong iu from olketa samting bilong disfela world? Wanfela dadi hem say: “Start long taem olketa pikinini they small yet, mifela trae for tok stret withim them abaotem sex. Then taem they herem otherfela pikinini toktok abaotem sex, hem no samting wea mekem them sapraes. Diswan no olsem wanfela niu samting long them.”

11. Hao nao iumi savvy teachim pikinini long saed bilong sex?

¹¹ Olsem olketa other chapter firstaem talem, way for teachim them abaotem sex mas start taem they small yet. Taem iu teachim olketa small pikinini for talem nem bilong olketa part long body, no misstim private part bilong them olsem hem samting for they feel shame long hem. Teachim them olketa stretfela nem bilong olketa part hia. Taem they big lelebet moa, hem important for teachim them hao samfela samting hem for olketa seleva nomoa and garem samfela tambu. Hem gud tumas sapos dadi and mami nao teachim olketa pikinini abaotem hao olketa part hia they spesel, and no eniwan fit for touchim or lukim, and mas no story abaotem olketa part hia long no gud way. Taem olketa pikinini kamap moa big, mas talem them hao man and woman they join tugeta for garem pikinini. Taem body bilong olketa seleva start for change for kamap full grown, they mas savvy finis wanem kaen change nao bae kasem them. Olsem Chapter 5 story abaot, diskaen way for teachim olketa pikinini savvy help tu for protectim them from way for spoelem them long saed bilong sex.—Proverbs 2:10-14.

HOMWORK BILONG DADI AND MAMI

12. Wanem nao samfela rongfela tingting wea they teachim olketa pikinini long skul?

¹² Dadi and mami need for ready for aotem eni giaman idea wea olketa pikinini kasem from skul—teaching olsem evolution, way for putim kantri firstaem, or idea for say no eni really truth hem stap. (1 Corinthians 3:19; lukim Genesis 1:27; Leviticus 26:1; John 4:24; 17:17.) Planti teacher mek hae tumas long bigfela education. Nomata way for havem extra education hem samting wea man seleva mas choosim, samfela teacher say hem nao only way for man savvy win.a—Psalm 146:3-6.

13. Hao nao iumi savvy protectim olketa pikinini bilong iumi wea go long skul for no followim olketa rongfela idea?

¹³ For olketa dadi and mami aotem olketa rongfela teaching, they mas savvy wanem samting nao olketa pikinini they go ahed for learnim. So dadi and mami, remember, iu garem homwork tu! Showim aot really interest long skul work bilong olketa pikinini bilong iu. Story withim them bihaen long skul. Askim wanem samting nao they learnim, wanem samting they laekem, and wanem nao hem olsem bigfela challenge long them. Lukluk long olketa homwork assignment, samting wea they raetem, and result bilong olketa test bilong them. Trae for savvy long olketa teacher bilong them. Talem olketa teacher hao iu ting hae long work bilong them and iu want for help long eni way wea iu fit for duim.

OLKETA FREN BILONG PIKININI BILONG IU

14. Why nao hem important for olketa pikinini wea love-im God for choosim olketa gudfela fren?

¹⁴ “Wea nao iu learnim datwan?” Haomas dadi and mami nao askim datfela kwestin, from they sek tumas long samting wea pikinini talem or duim wea different evribit? And haomas taem nao ansa wea they herem hem join withim wanfela niu fren long skul or neibor? Yes, olketa fren savvy affectim iumi long bigfela way, nomata iumi young or olo. Aposol Paul givim disfela warning: “No giamanim iuseleva. Way for kampani withim badfela pipol bae spoelem gudfela fasin.” (1 Corinthians 15:33; Proverbs 13:20) Olketa young wan nao they main wan wea savvy followim otherfela wea sem age withim them. They garem fasin for no sure long seleva and samfela taem they maet garem strongfela feeling for mekem olketa fren bilong them hapi. So, hem barava important for olketa for choosim gudfela fren!

15. Hao nao dadi and mami savvy guide-im olketa pikinini bilong them long way for choosim olketa fren?

¹⁵ Olsem evri dadi and mami savvy, olketa pikinini bae no evritaem choose long gudfela way; they needim help. Diswan no meanim iu choosim olketa fren bilong them. But, taem they grow ap, teachim them for luksavvy and for savvy long olketa fasin wea they should lukaotem long olketa fren. Main fasin hem for love-im Jehovah and for duim samting wea stret long eye bilong hem. (Mark 12:28-30) Teachim them for love-im and respectim olketa wea garem honest fasin, kaen fasin, and fasin for work hard. Long famili study, helpem olketa pikinini for luksavvy long olketa fasin hia wea olketa different wan insaed Bible they garem and then faendem samfela insaed kongregeson wea garem tu olketa fasin hia. Showim aot example taem iuseleva followim diswan taem iu choosim olketa fren bilong iu.

16.Hao nao olketa dadi and mami savvy lukluk long olketa fren wea olketa pikinini bilong them choosim?

¹⁶ Waswe, iu savvy hu nao olketa fren bilong pikinini bilong iu? Waswe, iu savvy askim pikinini bilong iu for bringim them kam long haos mekem iu savvy meetim them? Maet iu savvy askim tu pikinini bilong iu long tingting bilong otherfela pikinini abaotem olketa fren hia. Waswe, olketa showim aot gudfela fasin or olketa garem double laef? Sapos olketa garem double laef, helpem olketa pikinini bilong iu for tingting raonem hao way for kampani olsem savvy spoelem them. (Psalm 26:4, 5, 9-12) Sapos iu lukim fasin, kaleko, tingting, or toktok bilong pikinini bilong iu hem change and kamap no gud, maet iu need for story withim hem abaotem olketa fren bilong hem. Maet pikinini bilong iu kampani withim wanfela fren wea no garem gudfela fasin and diswan affectim hem long no gud way.—Lukim Genesis 34:1, 2.

17, 18. For join withim warning for no kampani withim olketa badfela fren, wanem gudfela help nao olketa dadi and mami savvy givim?

¹⁷ But hem no inaf for teachim nomoa olketa pikinini for no kampani withim olketa badfela fren. Helpem them for faendem olketa gudfela fren. Wanfela dadi hem say: “Evritaem mifela trae for faendem samting for change-im. So taem skul wantim son bilong mifela for play long soccer team, mi and waef sidaon withim hem and story abaotem why datwan hem no mas gud—bikos long olketa niufela fren wea hem bae garem. But then mifela talemaot idea for tekem samfela pikinini long kongregeson and go long field for play soccer. And datwan hem stretem nao datfela problem.”

¹⁸ Olketa wisefela dadi and mami helpem olketa pikinini bilong them for faendem gudfela fren and then joinim them for gudfela hapitaem. But, for planti dadi and mami, hapitaem hem olsem wanfela challenge for them.

WANEM KAEN HAPITAEM?

19. Wanem nao olketa Bible example wea show aot hao hem no wanfela sin for olketa famili havem gudfela taem?

¹⁹ Waswe, Bible tok againstim way for havem hapitaem? No moa nao! Bible say “taem for laf . . . and taem for jumpjump” hem stap.b (Ecclesiastes 3:4) Pipol bilong God long Israel bifor they enjoyim music and dance, playim olketa game, and riddle. Jesus Kraest attendim wanfela wedding feast and “wanfela bigfela kaikai” wea Matthew Levi mekem for hem. (Luke 5:29; John 2:1, 2) Yes, Jesus hem no man wea no laek for havem hapitaem. No letem famili bilong iu ting long way for laflaf and havem gudfela taem olsem wanfela sin!

20. Wanem nao dadi and mami mas tingim taem they provide-im hapitaem for famili?

²⁰ Jehovah hem wanfela “hapi God.” (1 Timothy 1:11) So way for worshipim Jehovah hem samting wea mas givim hapi, no samting wea mekem living bilong man no hapi . (Lukim Deuteronomy 16:15.) Hem fasin bilong olketa pikinini for hapi and garem strong and they showim aot diswan long play and hapitaem. Gudfela hapitaem hem givim moa samting winim hapi. Hem wanfela way for pikinini learnim samting and kamap mature. Hed bilong famili hem garem work for provide-im evri samting wea famili bilong hem needim, insaed diswan hem hapitaem. But, hem need for balance.

21. Wanem nao olketa trap wea insaed long hapitaem distaem?

²¹ Long olketa “last day” distaem wea fulap withim trabel, pipol they “love-im hapitaem winim way for love-im God,” olsem profesi insaed Bible hem talem. (2 Timothy 3:1-5) For planti pipol, hapitaem hem main samting long laef. Staka different taem for hapitaem stap wea savvy aotem olketa samting wea moa important. And tu, hapitaem bilong distaem hem mek hae long dirty fasin, raf fasin, way for iusim drug, and otherfela badfela samting wea savvy spoelem man. (Proverbs 3:31) Wanem nao iumi savvy duim for protectim olketa young wan from no gud hapitaem?

22. Hao nao dadi and mami savvy trainim olketa pikinini for decide long wisefela way long saed bilong hapitaem?

²² Olketa dadi and mami mas putim olketa mark and olketa rul. But winim datwan, they need for teachim olketa pikinini bilong them for luksavvy wanem kaen hapitaem hem no gud and for no ova tumas long hapitaem. Training olsem needim taem and hard work. Tingim wanfela example. Wanfela dadi wea garem tufela boy hem lukim hao firstborn son bilong hem listen evritaem long wanfela niufela radio station. So wan day, taem hem draevem truck bilong hem go long work, datfela dadi hem onem radio go long datfela sem radio station. Hem stop samfela taem and raetem daon olketa word bilong samfela singsing. Bihaen, hem story withim tufela son bilong hem abaotem samting wea hem herem. Hem askim them olketa kwestin for kasem tingting bilong them, taem hem say “Wanem nao tingting bilong iu?” and hem listen long patient way long ansa bilong them. Bihaen hem story abaotem tingting bilong Bible long diswan, tufela boy agree for no listen moa long datfela radio station.

23. Hao nao olketa dadi and mami savvy protectim pikinini bilong them from hapitaem wea no gud?

²³ Kristian dadi and mami wea wise mas checkim music, TV program, video, buk, video game, and movie wea olketa pikinini interest long them. They lukluk long piksa and raeting long kava, olketa word, and they readim samting wea niuspepa talem and lukluk long advertisement. Planti they sek tumas long samfela “hapitaem” for olketa pikinini distaem. Olketa wea want for protectim pikinini from badfela samting they story withim famili bilong them abaotem olketa danger hia, taem they iusim Bible and olketa Bible buk, olsem Questions Young People Ask—Answers That Work and samfela article insaed long Wastaoa and Awake! magasin.c Taem dadi and mami putim olketa strongfela mark and followim datwan evritaem, planti taem they kasem gudfela samting.—Matthew 5:37; Philippians 4:5.

24, 25. Wanem nao samfela gudfela hapitaem wea famili savvy enjoyim tugeta?

²⁴ But, way for stopem no gud hapitaem hem smallfela part nomoa long diswan. Iu mas iusim gudfela samting for againstim badfela samting, sapos no moa, olketa pikinini bae easyeasy followim rongfela way. Planti Kristian famili garem planti hapi memory bilong way for enjoyim hapitaem tugeta—go picnic, wakabaot, playim game, visitim olketa relative or fren. Samfela faendem way for read big tugeta hem samting wea mekem them relax and feel hapi. Otherfela enjoyim way for talem olketa funny or interesting story. Otherfela moa duim samting tugeta, for example, carpenter work and for workim otherfela samting, and tu for playim music, painting, or studyim olketa samting wea God create-im. Olketa pikinini wea learn for enjoyim olketa samting olsem kasem protection from dirty hapitaem, and learnim hao way for kasem hapitaem hem no for sidaon nomoa and lukluk. Planti taem way for tek part hem mekem iu moa hapi.

²⁵ Way for hipap for hapitaem savvy givim gudfela samting tu. Taem no staka tumas they hipap and samwan hem luk aftarem evri samting, diswan savvy givim moa samting long pikinini bilong iu winim hapi nomoa. Diswan savvy help for mekem love insaed long kongregeson kamap moa big.—Lukim Luke 14:13, 14; Jude 12.

FAMILI BILONG IU SAVVY WINIM WORLD

26. Long saed bilong way for protectim famili from no gud samting, wanem nao barava important fasin?

²⁶ Tru tumas, for protectim famili bilong iu from olketa badfela samting bilong world hem needim hard work. But wanfela samting hem stap, wea winim eni other samting, wea bae mekem iu win. Hem nao love! Sapos iu garem loving famili wea klos long each other, diswan bae mekem haos bilong iu wanfela safe ples and bae encouragim way for story tugeta, wea hem bigfela way for givim protection from olketa badfela samting. And tu, hem moa important for mekem grow narafela love—love for Jehovah. Taem love hia hem fulap insaed long famili, olketa pikinini bae grow ap withim way for hate-im eni badfela samting wea mekem Jehovah no hapi. And olketa dadi and mami wea love-im Jehovah from heart bae trae for followim loving fasin bilong hem wea gudfela and balance. (Ephesians 5:1; James 3:17) Sapos dadi and mami duim datwan, olketa pikinini bilong them bae nating ting long way for worshipim Jehovah olsem wanfela list bilong olketa samting wea tambu for duim or olsem living wea no garem eni hapitaem, wea they want for ranawe from kwiktaem. But, they bae lukim hao way for worshipim God nao hem best living wea mekem man hapi and satisfy.

27. Hao nao wanfela famili savvy winim world?

²⁷ Olketa famili wea garem wan mind and hapi for servim God long balance way, and duim best for stap “klin evribit and no garem mark” from olketa badfela samting bilong disfela world, they mekem Jehovah hapi tumas. (2 Peter 3:14; Proverbs 27:11) Olketa famili olsem followim Jesus Kraest, wea againstim evri samting wea world bilong Satan duim for mekem hem kamap dirty. Taem hem klosap for dae long earth, Jesus fit for say: “Mi winim world finis.” (John 16:33) Letem famili bilong iu tu winim world and enjoyim laef olawe!