Leson 3

Hu Nao Jesus Kraest?

Why nao Bible kolem Jesus “firstborn” Son bilong God? (1)

Why nao hem garem disfala nem “Word”? (1)

Why nao Jesus kam long earth olsem man? (2-4)

Why nao hem duim olketa mirakol? (5)

Wanem nao bae Jesus klosap for duim long future? (6)

1. Jesus stap long heven olsem wanfala spirit bifor hem kam long earth. Hem nao first samting wea God workim, and dastawe Bible kolem hem “firstborn” Son bilong God. (Colossians 1:15; Revelation 3:14) Jesus nomoa only Son wea God seleva workim. Jehovah iusim Jesus bifor hem kam long earth olsem “nambawan workman” bilong hem for workim evri otherfala samting long heven and earth. (Proverbs 8:​22-31; Colossians 1:​16, 17) God iusim hem tu olsem main wan for toktok for Hem. Dastawe Jesus garem disfala nem “Word.”​—⁠John 1:​1-3; Revelation 19:13.

2. God sendem Son bilong Hem long earth taem hem putim laef bilong hem insaed long bele bilong Mary. So Jesus no garem really dadi long earth. Dastawe hem no garem sin or way for no perfect. God sendem Jesus kam long earth for threefala reason: (1) For teachim iumi truth abaotem God (John 18:37), (2) for stap faithful evribit, wea givim example for iumi followim (1 Peter 2:21), and (3) for sakrifaesim laef bilong hem for mekem iumi kamap free from sin and dae. Why nao hem need for duim diswan?​—⁠Matthew 20:⁠28.

3. From hem no obeyim komand bilong God, firstfala man Adam duim samting wea Bible kolem “sin.” So God judge-im hem for dae. (Genesis 3:​17-19) Hem no kasem moa olketa mark bilong God, so hem no perfect nao. Easyeasy hem kamap olo and hem dae. Adam givim sin long evri pikinini bilong hem. Dastawe iumi tu kamap olo, kasem sik, and dae. Wanem nao bae sevem olketa man?​—⁠Romans 3:23; 5:⁠12.

4. Jesus hem wanfala perfect man olsem Adam. But hem no olsem Adam, from Jesus obeyim God evribit nomata taem hem kasem barava hardfala test. Dastawe hem fit for sakrifaesim perfect laef bilong hem olsem man for peim sin bilong Adam. Bible hem kolem diswan “ransom.” Dastawe olketa pikinini bilong Adam savvy kamap free from panis for dae. Evriwan wea putim faith long Jesus savvy kasem forgiveness for sin bilong them and kasem laef olowe.​—⁠1 Timothy 2:​5, 6; John 3:⁠16; Romans 5:​18, 19.

5. Taem Jesus stap long earth hem healim olketa wea sik, feedim olketa wea hangre, and mekem big wind for stap kwaet. Hem resurrectim tu samfala wea dae finis. Why nao hem duim olketa mirakol? (1) Hem feel sorry for pipol wea suffer, and hem want for helpem olketa. (2) Olketa mirakol bilong hem prove-im hem nao Son bilong God. (3) Olketa mirakol showim aot samting wea hem bae duim for olketa man wea obey taem hem rul olsem King ovarem earth.​—⁠Matthew 14:14; Mark 2:​10-​12; John 5:​28, 29.

6. Jesus hem dae and God resurrectim hem olsem wanfala spirit, and hem go back long heven. (1 Peter 3:18) Bihaen, God mekem hem kamap wanfala King. Klosap nao Jesus bae finisim evri badfala fasin and way for suffer long disfala earth.​—⁠Psalm 37:​9-11; Proverbs 2:​21, 22.

[Piksa long page 7]

Long ministry bilong Jesus, hem teach, duim mirakol, and givim laef bilong hem tu for iumi