Leson 13
Hao Nao Iu Savvy Faendem Tru Religion?
Waswe, God hapi long evri religion, or long wanfala nomoa? (1)
Why nao planti religion stap wea say olketa Kristian? (2)
Hao nao iu fit for luksavvy long olketa trufala Kristian? (3-7)
1. Jesus startim wanfala tru Kristian religion. So distaem wanfala sekson bilong olketa trufala worshiper bilong Jehovah God mas stap tu. (John 4:23, 24; Ephesians 4:4, 5) Bible teachim hao fewfala pipol nomoa stap long smallfala road wea lead go long laef.—Matthew 7:13, 14.
2. Bible talem profesi hao bihaen olketa aposol dae, olketa giaman teaching and fasin wea no followim Kristian way bae easyeasy for kam insaed long Kristian kongregeson. Olketa man bae pullim pipol wea believe for followim olketa man and no followim Kraest. (Matthew 7:15, 21-23; Acts 20:29, 30) Dastawe iumi lukim planti different religion stap wea say they Kristian. Hao nao iumi fit for luksavvy long olketa trufala Kristian?
3. Mark wea winim evri otherfala mark bilong olketa trufala Kristian hem way wea olketa garem trufala love midlwan long olketa seleva. (John 13:34, 35) Tru religion no teachim olketa for ting say olketa moabeta winim pipol bilong different color skin. And hem no teachim olketa tu for hate-im pipol from different kantri. (Acts 10:34, 35) So olketa no faet insaed long war. Olketa trufala Kristian deal withim each other olsem brata and sista.—1 John 4:20, 21.
4. Narafala mark bilong tru religion hem way wea olketa member bilong hem garem bigfala respect for Bible. Olketa acceptim diswan olsem Word bilong God and believim samting wea hem talem. (John 17:17; 2 Timothy 3:16, 17) Olketa tingim Word bilong God hem moa important winim eni tingting or kastom bilong man. (Matthew 15:1-3, 7-9) Olketa trae for live followim Bible evriday. So olketa no talemaot wanfala samting and then duim different samting.—Titus 1:15, 16.
5. Tru religion mas honorim nem bilong God tu. (Matthew 6:9) Jesus talemaot nem bilong God, Jehovah, long pipol. Olketa trufala Kristian mas duim sem samting tu. (John 17:6, 26; Romans 10:13, 14) Hu nao pipol long ples bilong iu wea talem narafala pipol abaotem nem bilong God?
6. Olketa trufala Kristian mas preach abaotem Kingdom bilong God. Jesus duim diswan. Evritaem hem tok abaotem Kingdom. (Luke 8:1) Hem talem olketa disaepol bilong hem for preachim disfala sem message evriwea long earth. (Matthew 24:14; 28:19, 20) Olketa trufala Kristian believim hao Kingdom bilong God nomoa bae bringim trufala peace and sef living long earth.—Psalm 146:3-5.
7. Olketa disaepol bilong Jesus mas no kamap part bilong disfala no gud world. (John 17:16) Olketa no join insaed long politik and raoa wea kamap midlwan long pipol bilong disfala world. Olketa stap klia long olketa no gud fasin, way, and tingting wea big tumas long world. (James 1:27; 4:4) Waswe, iu luksavvy long wanfala religion long ples bilong iu wea garem olketa mark hia bilong trufala Kristian way?
[Olketa Piksa long page 26, 27]
Olketa trufala Kristian love-im each other, respectim Bible, and preach abaotem Kingdom bilong God