Why Nao Iumi Dae?
“On top long evri maunten kwaet hem stap, insaed long olketa tree iu hard for herem wind; olketa bird sleep long olketa tree: wait firstaem; klosap nao bae iu rest olsem olketa.”—JOHANN WOLFGANG VON GOETHE, MAN BILONG GERMANY FOR RAETEM POETRY.
1, 2. (a) God create-im olketa man withim wanem kaen feeling? (b) Wanem kaen laef nao firstfala man and woman garem?
GOD create-im olketa man withim feeling for barava want for laef olowe. Tru nao, Bible say hem putim “feeling for stap olowe insaed long heart bilong olketa.” (Ecclesiastes 3:11, Beck) But God duim moa samting winim way for givim olketa man feeling for laef olowe. Hem givim olketa chance for laef olowe tu.
2 Firstfala dadi and mami bilong iumi, Adam and Eve, tufala perfect, withim no eni weak point long mind or body. (Deuteronomy 32:4) Tingim—no eni pain long body, no eni samting for fraetem or worry abaot! And tu, God putim tufala insaed naesfala paradaes hom. Purpose bilong God for man hem for laef olowe and go-go earth bae fulap withim olketa perfect pikinini from hem. (Genesis 1:31; 2:15) So, why nao iumi dae?
Way for No Obey Bringim Dae
3. Laef olowe for Adam and Eve depend long wanem samting?
3 God komandim Adam: “From evri tree bilong gaden iu savvy kaikai. But long datfala tree bilong savvy long gud samting and bad samting iu mas no kaikai from hem, from long day wea iu kaikai from hem iu mas dae.” (Genesis 2:16, 17) So laef olowe for Adam and Eve hem depend long samting; hem depend long way wea tufala obeyim God.
4. Taem Adam and Eve sin, why nao tufala lusim hope for laef olowe insaed Paradaes?
4 But, sorry tumas, Adam and Eve no obeyim law bilong God. (Genesis 3:1-6) From datwan, tufala kamap sinner, bikos “sin hem fasin for brekem law.” (1 John 3:4) Samting wea kamaot from diswan, Adam and Eve no garem moa hope for laef olowe. Why? Bikos “pei bilong sin hem dae.” (Romans 6:23) Dastawe, taem hem judgim Adam and Eve, God say: “Iu dust nomoa and iu bae go back long dust.” Hem raosem firstfala dadi and mami bilong iumi from Paradaes hom bilong tufala. Long datfala day wea tufala sin, Adam and Eve easyeasy startim datfala go-go for dae.—Genesis 3:19, 23, 24.
“Dae Hem Kasem Evri Man”
5. Hao nao dae hem go kasem evri man?
5 Long datfala taem Adam and Eve garem sin wea stap deep insaed long tufala. Dastawe, tufala no savvy bornim olketa perfect pikinini, olsem wanfala bred tin wea bend, no savvy workim bred wea stret. (Job 14:4) Tru nao, evri baby wea born pruvim hao firstfala dadi and mami bilong iumi lusim perfect health and laef olowe for olketa seleva and olketa pikinini bilong tufala. Kristian aposol Paul raet olsem: “Thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan sin.”—Romans 5:12; markem Psalm 51:5.
6. Why nao iumi dae?
6 Distaem olketa scientist no savvy why nao olketa man kamap olo and dae. But, Bible say iumi dae bikos iumi born long sin, iumi kasem diswan from firstfala dadi and mami bilong iumi. But wanem nao happen long iumi taem iumi dae?