God Askem Iu for Kamap Fren Bilong Hem

God laekem iu for fren witim hem. Waswe, enitaem iu tingim hao iu savve kamap fren bilong barava nambawan Man long universe? Olketa kolem Abraham, wea stap laef bifor kam, fren bilong God. (James 2:​23) Samfala narawan tu wea Bible story abaotem olketa hapi for fren witim God and olketa kasem blessing. Tuday, pipol from evri part long world kamap fren bilong God finis. Iu tu savve kamap fren bilong God.

For kamap fren bilong God hem gud winim for kamap fren bilong eni man. No enitaem God hem mekem olketa loyal fren bilong hem feel nogud. (Psalm 18:25) For kamap fren bilong God hem winim olketa rich samting. Taem wanfala rich man hem dae, selen bilong hem go long olketa narawan. Bat, olketa wea fren gud witim God garem samting wea no eniwan savve tekem.—⁠Matthew 6:​19.

Samfala pipol maet trae for stopem iu for lane abaotem God. Maet samfala fren bilong iu and famili member nao bae duim diswan. (Matthew 10:​36, 37) Sapos nara pipol laf long iu or tok strong long iu, askem iuseleva, ‘Hu nao mi laek for mekem hapi​​—⁠man or God?’ Tingim diswan: Sapos samwan talem iu for no kaikai nao, bae iu obeyim hem? Nomoa nao! Iu needim kaikai for laef. Bat God savve mekem iu laef olowe! So no letem eniwan stopem iu for lane hao for kamap fren bilong God.—⁠John 17:⁠3.