LESON 7

Wanfala Warning From Bifor

Jehovah bae no letem nogud pipol for spoelem Paradaes. Olketa fren bilong hem nomoa bae stap long there. Wanem nao bae kasem olketa nogud pipol? For faendem ansa, tingim trufala story bilong Noah. Noah stap samfala thousand year go finis. Hem wanfala gud man wea evritaem trae hard for followim will bilong Jehovah. Bat olketa nara pipol long earth duim nogud samting. So Jehovah talem Noah hao Hem bae mekem wanfala flood for distroem evri wicked man hia. Hem talem Noah for buildim wanfala ark mekem hem and famili bilong hem bae no dae taem datfala Flood hem kam.—Genesis 6:9-18.

Nomata taem Noah and famili bilong hem gohed for leadim olketa animal insaed long ark, olketa wicked pipol no laek herem warning message

Noah and famili bilong hem buildim datfala ark. Noah warnim pipol hao datfala Flood bae kakam nao, bat olketa no lisin long hem. Olketa go ahed for duim nogud samting. Bihaen ark hem finis, Noah tekem olketa animal go insaed long ark, and hem and famili bilong hem tu go insaed. Then Jehovah mekem bigfala rain. Rain hem foldaon for 40 day and 40 naet. Wata barava kavarem full earth.—Genesis 7:7-12.

Olketa wicked pipol lusim laef bilong olketa, bat Noah and famili bilong hem stap sef. Jehovah keepim olketa sef thru long Flood go kasem wanfala earth wea no garem wicked fasin. (Genesis 7:22, 23) Bible hem talem hao taem bae kam moa for Jehovah distroem olketa wea no laek for duim samting wea stret. Olketa gud pipol bae no finis. Olketa bae laef olowe insaed datfala Paradaes earth.—2 Peter 2:5, 6, 9.

Tuday, planti pipol duim nogud samting. World hem fulap long trabol. Planti taem Jehovah sendem olketa Witness bilong hem for warnim pipol, bat staka no laek for lisin long olketa toktok bilong Jehovah. Olketa no laek for changem wei bilong olketa. Olketa no laek for acceptim wanem God hem talem olsem raet and rong. Wanem nao bae kasem pipol olsem? Bae enitaem olketa change? Planti bae no change. Klosap nao olketa wicked pipol bae finis and no laef moa.—Psalm 92:7.

Disfala earth bae no finis; bae hem kamap wanfala paradaes. Olketa wea kamap fren bilong God bae laef olowe insaed long datfala Paradaes long earth.—Psalm 37:29.