Talem Klia Olketa Word

FOR pipol minim samting iu talem, iu mas story long kliafala wei. Samting wea iu laek for talem maet interesting, or maet important tu, bat man bae no heresavve long planti samting iu talem sapos iu no talem klia.

Iu bae hard for muvim pipol sapos olketa no minim samting iu talem. Nomata wanfala man garem strongfala voice and pipol savve herem gud, sapos toktok bilong hem no klia, bae hem no muvim olketa for followim samting hem talem. Hem bae olsem hem tok long difren languis and man wea herem bae nating minim. (Jer. 5:15) Bible talem iumi moa: “Tru nao, sapos krae bilong trumpet hem no klia tumas, hu nao bae redy for faet? Long sem wei tu, sapos iufala thru long tongue talem toktok wea no isi for minim, hao nao pipol bae savve long wanem iufala talem? Tru nao, bae iufala toktok long air nomoa.”—1 Cor. 14:8, 9.

Wanem Nao Mekem Toktok No Klia? Hem maet from man no openem mouth bilong hem gud. Wei wea olketa masol long jaw taet, and mouth no muv tumas savve mekem toktok hem no mas klia.

For tok fast tumas savve mekem narawan missim samting iu talem. Hem olsem iu pleim fast tumas wanfala kaset wea garem toktok insaed. Olketa word insaed, bat iu bae no kasem tumas samting from datwan.

Samfala pipol no savve toktok klia from samting hem miss long olketa part bilong body wea mekem man savve toktok. Bat nomata olsem, olketa wea mas deal witim kaen problem olsem savve duim planti samting for kamap moabeta sapos olketa followim olketa idea insaed long disfala study.

Nomata olsem, planti taem toktok bae no klia tumas sapos man no stop lelebet midolwan long each word taem hem toktok—joinim olketa word tugeta long wei wea hard for narawan minim. Maet disfala problem kamap from wei for missim olketa syllable or important leta or for katem end bilong word. Taem man hem joinim olketa word tugeta, olketa wea lisin maet kasem samfala idea and toktok, bat then olketa mas trae for joinim evri samting tugeta. Wei for no toktok klia savve spoelem wei wea man savve teach gud.

Hao for Toktok Klia. Wanfala key for talem klia olketa word hem for minim olketa part bilong olketa word long languis bilong iu. Long klosap evri languis, olketa word garem olketa syllable. Olketa syllable nao garem wan or winim wanfala leta wea man talem olsem part bilong wanfala word. Long olketa languis olsem, iu bae talem each syllable taem iu story, bat iu bae no talem evriwan witim sem strong. Sapos iu laekem toktok bilong iu for moa klia, slow daon and duim best bilong iu for talem each syllable. Maet firstaem diswan hem saond ova tumas, bat from iu practice, iu bae isisi toktok long smooth wei moa. Maet iu joinim olketa word tugeta for mekem toktok bilong iu hem here smooth, bat iu shud stap klia long wea for toktok olsem sapos narawan bae no kasem mining bilong olketa word wea iu talem.

Samting for careful long hem: For mekem grow wei wea iu read klia, maet iu practicem wei for toktok and read long wei wea ova tumas. Bat no letem datwan for kamap wei bilong iu for toktok evritaem. Bae hem here nogud.

Sapos toktok bilong iu hem here kwaet tumas, lane for apim hed bilong iu. Taem iu read from Bible, holem buk hae lelebet mekem iu no need for muvim hed tumas taem iu lukim audience and then lukim Bible. Diswan bae mekem no eni samting savve blokem toktok bilong iu.

For lane hao for relax tu savve helpem toktok bilong iu kamap moabeta. Taem man hem fraet, olketa masol long feis and olketa masol wea kontrolem wind bilong man savve barava affectim toktok bilong hem. Wei for fraet olsem savve affectim wei wea brain, wind, and mouth bilong iu waka gud tugeta—wea olketa shud waka gud tugeta and smooth olsem iu duim evritaem.

Iu mas slakem olketa masol bilong jaw, mekem olketa savve muv gud followim brain. Lips mas relax gud tu. Olketa mas redy for open and sat kwiktaem mekem iu savve talem klia olketa difren saond. Sapos jaw and lips no relax, mouth bae no open gud, and saond mas go thru long teeth firstaem. Diswan bae mekem toktok bilong iu no klia. Bat, wei for mekem tufala lip and jaw relax, no minim for lesy long wei wea iu toktok. Iu need for balancem diswan witim wei for talem olketa saond long kliafala wei.

Taem iu tingim iuseleva, maet iu faendem hem help for read big. Lukluk and lisin gud long hao nao iu iusim olketa part long body bilong iu for toktok. Waswe, iu openem mouth bilong iu big fitim olketa saond wea iu talem mekem iu savve talem klia? Iu mas remember hao tongue, hem no only part bilong body wea iumi iusim for toktok, nomata hem part wea busy winim evri nara part. Nek, jaw, lips, and olketa masol long feis, and olketa masol long throat duim part bilong olketa. Waswe, feis bilong iu no muv tumas taem iu story? Sapos olsem, maet toktok bilong iu no klia tumas.

Sapos iu garem wanfala tape player, recordim voice bilong iu taem iu story olsem wei wea iu story evritaem, olsem wei wea iu story long man iu meetim long field ministry. Recordim for maet tu-thri minute. Disfala recording savve helpem iu for luksavve long eni problem wea iu maet garem for talem klia samfala word. Trae for herem sapos enitaem iu joinim olketa word, no story klia, katem olketa word, and trae for minim wanem nao mekem iu duim olsem. Iu shud fit for stretem olketa problem taem iu waka long olketa point wea iumi storyim finis.

Waswe, iu garem problem long toktok bilong iu? Practicem wei for openem mouth moa waed, and trae for moa careful taem iu talem olketa word. Breathe big, and toktok slow. Diswan helpem planti wea garem problem long toktok for story long wei wea moa klia. Sapos iu faendem hard for talem s and z insaed olketa word, taem iu talem trae for pullim tongue awe from front teeth bilong iu. Nomata maet problem bilong iu bae no finis evribit, no wikdaon. Remember hao Jehovah chusim Moses, wanfala man wea maet garem problem long toktok, for talemaot olketa important message long pipol bilong Israel and Pharaoh bilong Egypt. (Ex. 4:10-12) Sapos iu willing, bae hem iusim iu tu, and hem bae blessim ministry bilong iu.