Waswe, Iu Garem Spirit wea No Savve Dae?

ENI laef stap bihaen long dae? Datfala kwestin konfiusim olketa man for planti thousand year finis. Insaed planti year wea go pas, pipol long evri ples ting raonem kwestin hia and startim olketa difren kaen biliv.

Evriwea long world witim Pacific area bilong Polynesia, Melanesia, and Micronesia, planti pipol bilivim hao wanfala “spirit” hem go ahed for stap taem man hem dae. Waswe, eni samting insaed long man savve lusim body taem man hem dae and go ahed for stap laef? Wanem nao spirit insaed man wea laef? Wanem nao happen long hem taem iumi dae? Word bilong God, Bible, givim iumi ansa wea tru and mekem man satisfae.

Wanem Nao Spirit?

Long Bible, olketa word wea olketa transleitim “spirit” hem minim “wind.” Bat hem minim moa samting winim wei for tekwind nomoa. Olsem example, man wea raetem Bible James hem sei: “Body wea no garem spirit hem dae finis.” (James 2:26) So, spirit nao mekem body laef.

Disfala paoa wea givim laef long body hem no datfala wind, or air nomoa, wea savve go thru lung. Why nao olsem? Bikos bihaen wei for tekwind hem stop, laef hem still stap insaed olketa cell bilong body for lelebet taem—“for tu-thri minute,” olsem The World Book Encyclopedia talem. From diswan man savve mekem man wea haf-dead laef bak, and olketa savve aotem olketa part bilong body from wanfala man and putim go long narawan. Bat taem datfala paoa bilong laef hem go aot from olketa cell bilong body, eni wei for trae for mekem man laef bak hem iusles nao. Nomata haomas wind man givim, hem no savve mekem wanfala cell laef bak. So, spirit hem laef-paoa wea man no savve lukim—datfala paoa bilong laef—wea keepim olketa cell laef. Disfala laef-paoa go ahed thru long wei for tekwind.—Job 34:14, 15.

Waswe, datfala spirit hem duim samting insaed olketa man nomoa? Bible helpem iumi for kasem stretfala ansa long diswan. Wise King Solomon hem raet olsem: “Hu nao stap wea savve long spirit bilong olketa son bilong olketa man, sapos hem go ap; and spirit bilong animal, sapos hem go daon long earth?” (Ecclesiastes 3:21) So Bible talem hao olketa man and animal garem spirit. Hao nao hem olsem?

Iumi savve markem datfala spirit, or laef-paoa witim electric paoa wea go thru long wanfala machine or eni electric tul. Man savve iusim electric paoa for duim difren kaen samting, wea depend long wanem kaen tul nao hem givim paoa long hem. Olsem example, paoa nao savve mekem wanfala stove hot, computer for givim information and duim calculation, and television givim olketa piksa and saond. Nomata olsem, datfala electric paoa no savve kamap datfala samting wea hem mekem for waka. Hem wanfala paoa nomoa. Long sem wei, datfala laef-paoa no garem olketa fasin bilong man or animal wea hem mekem laef. Hem no garem eni fasin, hem no savve tingting. Olketa man and animal “garem wanfala spirit” nomoa. (Ecclesiastes 3:19) Dastawe, taem man hem dae, spirit bilong hem no go ahed for stap long nara ples olsem wanfala spirit creature.

So, hao nao olketa wea dae finis? And wanem nao happen long datfala spirit taem wanfala man hem dae?

“Iu Bae Go Bak Long Dust”

Taem datfala first man, Adam, hem min for no obeyim komand bilong God, Jehovah sei long hem: “Long swet bilong feis bilong iu, iu bae kaikaim bred go kasem taem iu go bak long graon, bikos iu kamaot from hem. Iu dust nomoa and iu bae go bak long dust.” (Genesis 3:19) Wea nao Adam bifor Jehovah creatim hem from dust? Hem no stap eniwea! Hem no stap long eni ples. So taem Jehovah God sei Adam bae “go bak long graon,” hem minim Adam bae dae. Adam bae no go long ples bilong olketa spirit. Taem hem dae hem bae olsem bifor, hem no garem laef, no stap long eni ples. Panis bilong hem nao dae—wei for no laef—hem no wei for go long nara ples.—Romans 6:23.

Waswe long olketa narawan wea dae finis? Ecclesiastes 9:5, 10 talem klia hao nao olketa wea dae finis, wea iumi read olsem: “Olketa wea dae finis no savve long eni samting . . . No eni waka, no eni plan, no eni savve or kleva tingting, stap long grev.” (Moffatt) So, dae hem wei for no stap. Man wea raetem psalm raetem hao taem wanfala man hem dae, “spirit bilong hem go aot, hem go bak long graon; long datfala day tingting bilong hem finis evribit.”—Psalm 146:4.

Hem klia, olketa wea dae finis no savve long eni samting. Olketa no savve duim eni samting. Olketa no savve lukim iu, herem iu, or tok long iu. Olketa no savve helpem iu or spoelem iu. Iu no need for fraetem olketa wea dae finis. Bat hao nao datfala spirit hem “go aot” from man taem hem dae?

Spirit Hem “Go Bak Long Trufala God”

Bible sei taem man hem dae, “spirit seleva go bak long trufala God wea givim.” (Ecclesiastes 12:7) Waswe, diswan minim spirit seleva hem go thru long spes for go long ples wea God hem stap? Nomoa nao! Wei wea Bible iusim datfala word “go bak” hem no evritaem minim wei for muv from wanfala ples go long narawan. Olsem example, God talem olketa Israelite wea no faithful: “‘Kam bak long mi, and mi bae kam bak long iufala,’ Jehovah bilong olketa army hem talem.” (Malachi 3:7) Wei wea Israel “kam bak” long Jehovah hem minim wei for tan raon from rong wei and followim raeteous wei bilong God moa. And for Jehovah “kam bak” long Israel hem minim for tingim pipol bilong hem moa. Long tufala example hia, wei for “kam bak” hem saed long tingting and no minim wei for muv from wanfala ples go long nara ples.

Long sem wei, taem man hem dae, no eni really wei for muv from earth for go long eni ples long heven savve happen taem spirit “go bak” long God. Remember, datfala spirit hem laef-paoa. Taem datfala paoa hem go aot from man, God nomoa fit for givim bak long hem. So datfala spirit “go bak long trufala God” long wei wea eni hope for future laef for datfala man hem depend evribit long God.

Olsem example, tingim wanem nao Bible talem abaotem dae bilong Jesus. Man wea raetem gospel Luke hem sei: “Jesus hem singaot witim bigfala voice and sei: ‘Father, mi putim spirit bilong mi long hand bilong iu.’ Taem hem talem diswan, then hem dae.” (Luke 23:46) Taem spirit bilong Jesus go aot from hem, hem no gogo long heven long really wei nao. Jesus no resurrect from dae go kasem mek-thri day. And hem 40-fala day moa bifor hem go ap long heven. (Acts 1:3, 9) Bat, taem hem dae, Jesus lusim spirit bilong hem long hand bilong Father bilong hem, from hem trustim evribit wei wea Jehovah fit for mekem hem laef bak.

Tru nao, God nomoa savve mekem man laef bak moa. (Psalm 104:30) Diswan openem wei for nambawan hope!

Wanfala Tru Hope

Bible hem sei: “Hour bae kam wea evriwan wea stap long olketa memory grev bae herem voice bilong [Jesus] and kamaot.” (John 5:28, 29) Tru nao, Jesus Christ promisim hao olketa wea insaed memory bilong Jehovah bae resurrect, or laef bak. Winim wei for herem olketa sorre nius hao pipol dae, bae iumi herem olketa hapi report abaotem olketa wea laef bak moa. Hem bae wanfala bigfala hapi for welkamim from grev olketa wea iumi lovem!

Waswe, iu laek for savve moa abaotem hao iu savve kasem gud samting from disfala hope wea God givim? Mifala invaetem iu for raet go long wanfala address long daon for wanfala copy bilong disfala brochure All’gether Spirit Belong People Where Die Finish—All’gether Savvy Helpim You or Spoilim You? Which Way, All’gether Really Stop?

Sapos mi no markem difren, evri scripture hia kam from New World Translation of the Holy Scriptures.