Chapter Seventin
Showimaot Fasin for Lovem God Insaed Famili
1. Hao nao wei for followim kaonsel from Word bilong God affectim olketa marit?
JEHOVAH nao Startim marit, and Word bilong hem givim best instruction for olketa famili. From olketa followim instruction hia, planti pipol garem marit wea win. Gud samting tu, samfala wea bifor olketa stap tugeta nomoa registerim marit bilong olketa saed long law. Olketa narawan finisim wei for stap witim narawan wea no marit partner bilong olketa. Olketa raf man wea spoelem waef and pikinini bilong olketa lane for showimaot kaenfala fasin and love.
2. Wanem nao insaed long Christian famili living?
2 Staka samting insaed long Christian famili living, olsem hao iumi ting long wei wea marit hem for olowe, wanem iumi duim for fulfillim olketa responsibility insaed famili, and hao iumi deal witim olketa famili member. (Ephesians 5:33–6:4) Nomata iumi maet savve wanem Bible talem abaotem famili laef, wei for followim kaonsel bilong Bible hem nara story. No eniwan long iumi laek for olsem olketa wea Jesus judgem from olketa no obeyim olketa komandment bilong God. Olketa garem rong tingting for sei wei for strong long lotu hem inaf nao. (Matthew 15:4-9) Iumi no want for duim samting wea luk olsem iumi lovem God bat iumi fail for followim long famili bilong iumiseleva. Nomoa, iumi want for showimaot trufala fasin for lovem God wea hem “wei for kasem nambawan samting.”—1 Timothy 5:4; 6:6; 2 Timothy 3:5.
Hao Long Nao Marit Bae Go Ahed?
3. (a) Wanem nao happen long planti marit, bat wanem nao iumi shud disaed strong for duim? (b) Iusim Bible bilong iu for ansarem olketa kwestin long end bilong paragraf.
3 Staka marit isi for brekdaon. Samfala hasband and waef wea marit for planti year disaed for divorce and maritim narawan. And tu, hem normal samting for herem hao young hasband and waef separate bihaen tufala marit for lelebet taem nomoa. Nomata wanem nara pipol duim, iumi shud want for mekem Jehovah hapi. So iumi bae lukluk long olketa kwestin and scripture long daon for lukim wanem Word bilong God talem abaotem wei wea marit hem for olowe.
Taem wanfala man and woman marit, tufala shud ting for stap tugeta for hao long? (Mark 10:6-9; Romans 7:2, 3)
Wanem nao only reason wea God letem tufala wea marit for divorce and savve marit moa? (Matthew 5:31, 32; 19:3-9)
Hao nao Jehovah ting long kaen divorce wea Word bilong hem tambuim? (Malachi 2:13-16)
Waswe, Bible saportim wei for separate olsem wei for stretem olketa problem insaed marit? (1 Corinthians 7:10-13)
Wanem samting wea go ahed nao maet mekem tufala fit for separate? (Psalm 11:5; Luke 4:8; 1 Timothy 5:8)
4. Why nao samfala marit go ahed strong?
4 Samfala marit win and tufala stap tugeta. Why nao olsem? Wei for weit go kasem taem wea tufala evriwan mature hem wanfala important samting, bat for faendem partner wea garem sem interest and savve tok long open and gud wei tugeta hem important tu. Samting wea moa important hem for faendem partner wea lovem Jehovah and respectim Word bilong hem olsem faondeson for stretem olketa problem. (Psalm 119:97, 104; 2 Timothy 3:16, 17) Man wea olsem no garem tingting for sei sapos evriting no go ahed gud, hem savve separate or divorce. Hem bae no iusim olketa wik point bilong partner olsem excuse for no duim olketa responsibility bilong hem. Bat, hem bae feisim olketa problem and faendem gudfala ansa for olketa.
5. (a) Hao nao wei for loyal long Jehovah hem join witim marit? (b) Nomata wei for againstim iu hem kamap, wanem gud samting nao kamaot from wei for hol strong long olketa standard bilong Jehovah?
5 Satan sei taem iumi safa, bae iumi lusim olketa wei bilong Jehovah. (Job 2:4, 5; Proverbs 27:11) Bat staka long Olketa Jehovah’s Witness wea safa from olketa garem partner wea againstim olketa no rejectim marit promis bilong olketa. Olketa go ahed for loyal long Jehovah and olketa komandment bilong hem. (Matthew 5:37) Samfala wea go ahed strong kasem hapi taem partner bilong olketa tu start for servem Jehovah—diswan savve happen nomata partner againstim olketa for planti year! (1 Peter 3:1, 2) For olketa Christian wea partner bilong olketa no showim eni saen for change or wea lusim partner bikos hem servem Jehovah, olketa hia tu sure for kasem blessing bikos olketa showaot olketa lovem God insaed famili.—Psalm 55:22; 145:16.
Each Wan Duim Part Bilong Hem
6. For marit hem win, wanem arrangement nao tufala mas respectim?
6 Tru, wei for win long marit hem needim moa samting winim wei for stap tugeta nomoa. Wanfala main samting wea tufala needim nao hem for respectim arrangement bilong Jehovah saed long hedship. Diswan lead go long wei for garem order and sef feeling insaed long famili. Long 1 Corinthians 11:3, iumi read olsem: “Hed bilong evri man hem Christ; hed bilong woman hem man; hed bilong Christ hem God.”
7. Hao nao hasband shud showimaot hedship insaed long famili?
7 Waswe, iu lukim wanem nao first samting wea datfala verse talem? Yes, evri man garem wanfala Hed, Christ, wea hem mas stap anda long hem. Diswan minim hasband shud showimaot hedship long wei wea showim olketa fasin bilong Jesus. Christ stap anda long Jehovah, hem lovem tumas kongregeson, and lukaftarem. (1 Timothy 3:15) Hem “givim laef bilong hem for kongregeson.” Jesus hem no praod and fail for tingim feeling bilong narawan, bat hem “garem kwaet fasin and . . . hambol long heart.” Olketa wea stap anda long hedship bilong hem “faendem samting for strongim soul bilong [olketa].” Taem hasband deal witim famili bilong hem long wei olsem, hem showaot hem stap anda long Christ. Sapos olsem, Christian waef bae kasem gud samting and strong sapos hem waka tugeta witim hasband bilong hem and stap anda long hedship bilong hem.—Ephesians 5:25-33; Matthew 11:28, 29; Proverbs 31:10, 28.
8. (a) Why nao maet hem luk olsem wei for followim Christian fasin hem no mekem gud samting kamap insaed samfala famili? (b) Wanem nao iumi shud duim sapos iumi feisim kaen problem olsem?
8 Nomata olsem, olketa problem bae kamap. Bifor samwan long famili lane for followim olketa Bible principle, maet feeling for no laekem narawan for directim laef bilong hem stap deep insaed long hem. Maet wei for ask long kaen or loving wei no kasem gudfala ansa. Iumi savve hao Bible sei for aotem “kros and fasin for singaot and tok spoelem narawan.” (Ephesians 4:31) Bat sapos wei for kros and strongfala toktok nomoa hem wanem samfala insaed famili iusim evritaem, wanem nao iumi shud duim? Well, Jesus no followim example bilong olketa wea tok spoelem hem or mekem hem safa, bat hem depend long Dadi bilong hem. (1 Peter 2:22, 23) So taem olketa hard samting kamap insaed famili, showimaot fasin for lovem God long wei for prea long Jehovah for help bilong hem and no followim olketa wei bilong world.—Proverbs 3:5-7.
9. Winim wei for pointim rong bilong narawan evritaem, wanem nao planti Christian hasband lane for duim?
9 Change no savve kamap kwiktaem, bat kaonsel bilong Bible hem barava help taem man patient and waka hard for followim. Planti hasband faendem hao marit bilong olketa start for kamap moabeta taem olketa start for tinghae long wei wea Christ deal witim kongregeson. Olketa insaed kongregeson no perfect. Nomata olsem, Jesus lovem, showimaot stretfala example for olketa, and iusim Bible for helpem olketa for kamap moabeta. Hem givim laef bilong hem for kongregeson. (1 Peter 2:21) Example bilong hem encouragem planti Christian hasband for showimaot gudfala hedship and givim loving help for mekem marit bilong olketa kamap moabeta. Samting wea kamaot from diswan hem winim wei for pointim rong bilong narawan evritaem or wei for no want for toktok.
10. (a) Wanem nao olketa wei wea hasband and waef—nomata wanfala wea sei hem Christian—savve mekem living hem hard for olketa narawan insaed famili? (b) Wanem nao iumi savve duim for help?
10 Waswe sapos hasband hem no luksavve long olketa samting wea famili needim saed long feeling or hem no duim eniting for arrangem famili Bible study and olketa nara samting? Or waswe sapos wanfala waef no waka tugeta and showim wei for stap anda? Samfala kasem gud samting taem evriwan insaed famili story gud tugeta abaotem olketa problem. (Genesis 21:10-12; Proverbs 15:22) Bat nomata sapos iumi no kasem wanem iumi hope for kasem, each wan long iumi savve help for mekem living long famili kamap moabeta taem iumi showimaot frut bilong spirit bilong God long laef bilong iumi, showimaot loving kea for olketa nara famili member. (Galatians 5:22, 23) Bae iumi kasem gud samting, no long wei for weitim narawan for duim samting, bat long wei for iumiseleva nao duim samting, and diswan bae showaot iumi garem fasin for lovem God insaed famili.—Colossians 3:18-21.
Wea for Kasem Olketa Ansa
11, 12. Wanem nao Jehovah givim for helpem iumi win long famili laef?
11 Pipol savve luk long planti ples for kasem kaonsel long famili living. Bat iumi savve Word bilong God nao garem best advaes, and iumi tinghae tumas long wei wea God helpem iumi for followim datwan, thru long organization bilong hem long earth. Waswe, iu go ahed for iusim evribit datfala help?—Psalm 119:129, 130; Micah 4:2.
12 For join witim wei for attendim olketa meeting bilong kongregeson, waswe, iu markem taem for duim famili Bible study? Olketa famili wea duim olsem waka tugeta for kasem wan mind long worship. Famili living bilong olketa hem kamap moabeta taem olketa letem Word bilong God for changem living bilong olketa.—Deuteronomy 11:18-21.
13. (a) Sapos iumi garem olketa kwestin long famili living, wea nao iumi savve faendem help planti taem? (b) Wanem nao shud showaot long evri samting wea iumi disaedem?
13 Maet iu garem olketa kwestin abaotem famili laef. Olsem example, waswe long famili planning? Waswe, enitaem wei for killim dae pikinini insaed long bele hem fitim? Sapos wanfala pikinini hem nating interest long olketa spiritual samting, hem mas join insaed long famili worship long olketa wanem wei? Olketa pablikeson wea Olketa Jehovah’s Witness pablisim ansarem olketa kwestin olsem. Lane for iusim olketa buk for helpem iu studyim Bible, tugeta witim olketa index, for faendem olketa ansa. Sapos iu no garem olketa buk wea index talem, go long library long Kingdom Hall. Or maet iu garem olketa pablikeson hia long computer bilong iu. Iu savve storyim tu olketa kwestin bilong iu witim olketa mature Christian man and woman. Bat no expectim yes or no ansa long evri kwestin evritaem. Planti taem iu nao mas disaed, wanwan or olsem hasband and waef. Then disaedem samting wea showaot iu garem fasin for lovem God no long pablik nomoa bat insaed famili tu.—Romans 14:19; Ephesians 5:10.
Review
• Hao nao wei for loyal long Jehovah join witim wei for faithful long marit partner?
• Taem iumi kasem hevi bikos long famili problem, wanem nao bae helpem iumi for duim samting wea mekem God hapi?
• Nomata sapos olketa narafala member bilong famili no duim gud samting, wanem nao iumi savve duim for help?
[Piksa long page 155]
Hedship bilong hasband shud showimaot olketa fasin bilong Jesus
[Piksa long page 157]
Wei for duim Bible study evritaem witim famili help for mekem wan mind kamap