Chapter Twenti-wan
Purpose Bilong Jehovah Hem Win Evribit
1, 2. (a) Wanem nao purpose bilong Jehovah saed long creation bilong hem wea garem tingting? (b) Hu nao insaed long famili bilong God wea wan mind long worship?
LOVING purpose bilong Jehovah hem for evri creation wea garem tingting for worshipim only tru God witim wan mind and hapi for garem nambawan freedom olsem olketa pikinini bilong God. Hem tu wanem olketa wea lovem raeteous fasin barava wantem.
2 Jehovah start for fulfillim nambawan purpose bilong hem taem hem startim olketa waka bilong hem long creation. First creation bilong hem hem wanfala Son, wea bihaen hem resurrect hem “showimaot glory bilong [God] and garem evribit olketa fasin bilong hem.” (Hebrews 1:1-3) Disfala Son hem spesol bikos hem only wan wea God seleva nomoa creatim hem. And tu, thru long disfala Son nao evri narawan laef: firstaem olketa angel long heven, then olketa man long earth. (Job 38:7; Luke 3:38) Evriwan hia part long wanfala famili long full universe. Long evriwan hia, Jehovah hem God, Sovereign Bilong Universe, and loving Dadi bilong olketa.
3. (a) Wanem nao iumi evriwan kasem from first dadi and mami bilong iumi? (b) Wanem loving samting nao Jehovah provaedem for olketa pikinini bilong Adam?
3 Taem first dadi and mami bilong iumi kasem judgment for dae from olketa min for duim sin, God aotem tufala from Eden and rejectim tufala. Tufala finis for part long famili bilong hem long universe. (Genesis 3:22-24; Deuteronomy 32:4, 5) Iumi evriwan kam from tufala, so iumi born witim feeling for duim sin. Bat Jehovah savve samfala long olketa pikinini bilong Adam and Eve bae lovem raeteous fasin. So long loving wei Hem provaedem wei for olketa hia kasem “nambawan freedom olsem olketa pikinini bilong God.”—Romans 8:20, 21.
Israel Lusim Spesol Position
4. Wanem privilege nao Jehovah givim long Israel wea stap bifor?
4 Samting olsem 2,500 year bihaen hem creatim Adam, Jehovah givim long samfala man privilege for garem spesol wei for fren witim Hem. Hem chusim Israel long bifor for kamap pipol bilong hem and givim olketa Law bilong hem. (Genesis 12:1, 2) Hem mekem olketa for kamap wanfala nation and iusim olketa insaed long purpose bilong hem. (Deuteronomy 14:1, 2; Isaiah 43:1) Nomata olsem, olketa still stap olsem slave long sin and dae, so olketa no enjoyim nambawan freedom wea Adam and Eve bin kasem bifor.
5. Hao nao olketa Israelite lusim spesol wei wea olketa fren witim God?
5 Nomata olsem, God acceptim olketa Israelite. Olketa garem responsibility tu for respectim Jehovah olsem Dadi bilong olketa and for followim laef wea fitim purpose bilong hem. Jesus mekhae long wei wea hem important for olketa fulfillim datfala responsibility. (Matthew 5:43-48) Nomata olsem, datfala nation bilong Israel fail for duim diswan. Nomata olketa Jew sei “mifala garem wanfala Dadi, hem nao God,” Jesus sei akson bilong olketa and spirit wea olketa showim hem denyim toktok hia. (John 8:41, 44, 47) Long 33 C.E., God hem finisim Law, and spesol wei wea Israel fren witim hem finis tu. Bat waswe, diswan minim pipol bae no savve fren witim God moa?
Hipimap “Olketa Samting Long Heven”
6. Wanem nao purpose bilong datfala “administration” wea Paul storyim long Ephesians 1:9, 10?
6 Aposol Paul showimaot hao samfala midolwan long olketa man savve garem spesol wei for fren witim God. Olsem example, saed long arrangement bilong Jehovah for olketa wea showimaot faith savve kamap member bilong famili bilong Hem, Paul hem raet olsem: “[God] hem talemaot long iumi disfala holy secret bilong will bilong hem. Hem hapi for duim purpose bilong hem for garem wanfala administration long barava taem wea hem markem finis, for hipimap moa evri samting tugeta insaed long Christ, olketa samting long heven and olketa samting long earth.” (Ephesians 1:9, 10) Disfala “administration” iusim Jesus Christ long bigfala wei. Thru long hem, olketa man savve kamap gud front long God. Samfala long olketa garem hope for stap long heven. Staka bae laef olowe long earth.
7. Hu nao “olketa samting long heven”?
7 First samting, start long Pentecost 33 C.E., hem redyim “olketa samting long heven,” hem nao, olketa wea bae rul witim Christ long Kingdom long heven. Long faondeson bilong faith wea olketa garem long paoa bilong sakrifaes bilong Jesus, God sei hem acceptim olketa olsem olketa raeteous. (Romans 5:1, 2) Gogo, olketa Jew and Gentile tu join kam, and “olketa samting long heven” bae kasem 144,000. (Galatians 3:26-29; Revelation 14:1) Wanfala remnant bilong olketa nomoa stap yet long earth.
Hipimap “Olketa Samting Long Earth”
8. Hu nao “olketa samting long earth,” and hao nao olketa fren witim Jehovah?
8 Datfala sem administration hem hipimap tu “olketa samting long earth.” Planti million pipol distaem wea hipap kam garem hope for laef olowe long earth. Olketa wan mind witim datfala remnant wea bae rul insaed Kingdom, and olketa mekhae long nem bilong Jehovah and apim worship bilong hem. (Isaiah 2:2, 3; Zephaniah 3:9) Olketa kolem Jehovah “Dadi” tu bikos olketa luksavve long hem olsem start bilong laef. And olketa hapi for garem wei for standap gud front long hem long faondeson bilong faith wea olketa garem long blood wea Jesus kapsaetem. (Revelation 7:9, 14) Bat from olketa still no perfect, wei wea God acceptim olketa long full wei olsem olketa pikinini bilong hem bae happen long future.
9. Wanem promis nao Romans 8:21 givim for olketa man?
9 Olketa wea garem hope for stap long earth weitim taem wea olketa man bae “kamap free from wei for slave bilong sin.” (Romans 8:21) Datfala wei for kamap free bae start bihaen Christ and army bilong hem long heven endim datfala big trabol long Armageddon. Diswan minim full wicked system bilong Satan bae distroe, and bihaen olketa blessing bilong datfala Thousand Year Rul bilong Christ long Kingdom paoa bae kamap.—Revelation 19:17-21; 20:6.
10. Olketa servant bilong Jehovah bae singim wanem song bilong praise?
10 Hem bae gud tumas taem olketa servant bilong Jehovah long earth join tugeta witim olketa servant bilong hem long heven for talemaot disfala hapi toktok: “Jehovah God, Olmaeti Wan, olketa waka bilong iu big tumas and nambawan. Olketa wei bilong iu raeteous and tru, King bilong olowe. Hu nao bae no fraet long iu, Jehovah, and givim glory long nem bilong iu, from iu nomoa iu loyal? Evri nation bae kam and worshipim iu, from olketa raeteous rul bilong iu olketa showaot klia.” (Revelation 15:3, 4) Tru nao, evri servant bilong Jehovah bae wan mind long worship for datfala only tru God. Olketa wea dae finis tu bae resurrect and kasem chance for praisem Jehovah.—Acts 24:15.
Nambawan Freedom Stap Long Future
11. Wanem nambawan freedom nao olketa wea winim datfala big trabol bae garem?
11 Bihaen datfala big trabol, wea kasem end bilong hem long Armageddon, hem aotem wicked fasin from disfala earth, no eni Devil olsem Satan bae stap olsem “god bilong disfala system.” No eniwan wea worshipim Jehovah need for faet againstim olketa nogud samting wea kam from Satan. (2 Corinthians 4:4; Revelation 20:1, 2) No eni giaman religion bae talemaot giaman samting abaotem Jehovah and divaedem olketa man. No eni servant bilong tru God bae kasem wei wea no followim justice and wei wea spoelem olketa from olketa gavman bilong man. Pipol bae garem nambawan freedom!
12. Hao nao evriwan bae kamap free from sin and olketa samting wea kamaot from sin?
12 From hem “Lamb bilong God wea tekem awe sin bilong world,” Jesus bae iusim paoa bilong sakrifaes bilong hem for aotem sin bilong olketa man. (John 1:29) Taem Jesus stap long earth and forgivim sin bilong pipol, hem givim pruv long datwan taem hem healim sik bilong datwan wea hem forgivim. (Matthew 9:1-7; 15:30, 31) Long sem wei, Christ Jesus, olsem King insaed Kingdom bilong God long heven, bae iusim mirakol for healim olketa wea blind, no savve toktok, earpas, body nogud, sik long mind, and olketa wea garem enikaen narafala sik. (Revelation 21:3, 4) Evriwan wea obey bae free from wei for stap anda long “law bilong sin” so tingting and akson bilong olketa bae mekem olketa seleva and God hapi. (Romans 7:21-23) Long end bilong datfala Thousand Year Rul, olketa bae kamap perfect olsem man and fitim “image” bilong datfala only tru God.—Genesis 1:26.
13. Long end bilong datfala Thousand Year Rul, wanem nao Christ bae duim, and wanem nao bae kamaot from datwan?
13 Taem Christ mekem olketa man kamap perfect evribit, then hem bae givim bak long Father datfala position wea hem bin kasem for duim disfala waka: “Hem givim go kingdom long God and Father bilong hem, taem hem mekem kamap olsem samting nating evri gavman and evri rul and paoa. From hem mas rul olsem king go kasem taem wea God putim olketa enemy anda long leg bilong hem.” (1 Corinthians 15:24, 25) Datfala Thousand Year Rul bilong Kingdom bae duim evribit purpose bilong hem; so no eni need bae stap moa for disfala mek-tu gavman for stap midolwan Jehovah and olketa man. And bikos sin and dae bae finis evribit and man kamap free, need for Jesus olsem Man for Baem Bak man hem finis nao. Bible explainim olsem: “Then Son bae putim hemseleva anda long Datwan wea putim evri samting anda long hem, for mekem God mas kamap evri samting long evriwan.”—1 Corinthians 15:28.
14. Evri man wea perfect bae kasem wanem, and why nao olsem?
14 Bihaen diswan, olketa perfect man bae garem chance for showimaot olketa chus for servem datfala only tru God for olowe. So, bifor hem adoptim olketa olsem pikinini bilong hem, Jehovah bae letem olketa perfect man for kasem wanfala lastfala test. Satan and olketa demon bilong hem bae kamaot from datfala hol wea deep tumas. Diswan bae no spoelem olketa wea really lovem Jehovah. Bat eniwan wea no loyal and no obeyim Jehovah bae distroe for olowe, and Satan and olketa demon bilong hem tu.—Revelation 20:7-10.
15. Wanem living nao bae kamap moa for evri creation bilong Jehovah wea garem tingting?
15 Then Jehovah bae adoptim evri man wea perfect for kamap olketa pikinini bilong hem from olketa saportim sovereign rul bilong God long datfala lastfala test. Start long datfala taem, olketa bae kasem evribit nambawan freedom bilong olketa pikinini bilong God olsem part long famili bilong God long universe. Evri creation wea garem tingting long heven and earth bae join tugeta moa for wan mind for worshipim hem olsem datfala only tru God. Purpose bilong Jehovah hem win nao long nambawan wei! Waswe, iu want for kamap part long datfala hapi famili bilong universe wea bae stap for olowe? Sapos olsem, mifala encouragem iu for barava followim samting wea Bible talem long 1 John 2:17: “World hem redy for finis and evri samting wea hem wantem tu, bat man wea duim will bilong God bae stap olowe.”
Review
• Bifor bighed fasin kamap long Eden, wanem wei for fren nao evriwan wea worshipim Jehovah garem witim hem?
• Wanem responsibility nao stap for olketa servant bilong God?
• Hu nao bae kamap olketa pikinini bilong God long future, and hao nao diswan join witim purpose bilong Jehovah saed long wan mind long worship?
[Piksa long page 190]
Olketa man wea obey bae enjoyim living insaed wanfala paradaes evriwea long earth