Hao Nao Laef Long Paradaes Bifor?

Jehovah givim staka gud samting long Adam and Eve. Genesis 1:28

Jehovah wakem firstfala woman, wea hem nao Eve, and givim long Adam for kamap waef bilong hem.—Genesis 2:21, 22.

Jehovah wakem tufala and tufala garem mind and body wea perfect.

Hom bilong tufala hem datfala Paradaes long garden long Eden. Hem ples wea barava luk naes. Hem garem wanfala river, olketa tree wea garem frut, and olketa animal.

Jehovah story witim tufala and hem teachim tufala. Sapos olketa lisin long hem, olketa bae laef olowe long Paradaes long earth.

God stopem Adam and Eve for no kaikaim frut bilong wanfala tree. Genesis 2:16, 17

Wanfala angel hem bighed for againstim God. Datfala nogud angel nao hem Satan.

Jehovah showim Adam and Eve wanfala tree insaed long garden and talem tufala, sapos tufala kaikaim frut bilong hem, bae tufala dae.

Satan no laekem Adam and Eve for obeyim Jehovah. So hem iusim wanfala snek for talem Eve sapos hem kaikaim frut bilong datfala tree, hem bae no dae, bat bae hem olsem God. Bat hem laea nomoa.—Genesis 3:1-5.