Luksavve lo Waka blo Christ lo Arrangement blo God

“LO START, God creatim skae and earth,” and evri samting wea hem wakem “hem gud tumas.” (Gen. 1:1, 31) Jehovah wakem iumi olketa man for garem gud future. Bat samting wea happen lo garden blo Eden hem spoelem hapi wea olketa man shud garem. Nomata olsem, plan blo Jehovah for earth and olketa man hem no change. God storyim hao hem bae sevem olketa pikinini blo Adam wea obey. Bae tru worship kamap moa, and God bae distroem olketa wicked pipol and evri nogud samting wea olketa duim. (Gen. 3:15) Bae evri samting hem gud bak moa. Jehovah bae duim diswan thru lo Son blo hem, Jesus Christ. (1 John 3:8) So hem barava important for iumi luksavve lo waka blo Christ lo arrangement blo God.​—Acts 4:12; Phil. 2:9, 11.

WAKA BLO CHRIST

² Taem iumi ting abaotem waka blo Christ lo arrangement blo God, iumi luksavve hem garem staka samting for duim. Jesus duim samting for sevem olketa man, waka olsem Hae Priest, Hed blo Christian kongregeson, and distaem hem King lo Kingdom blo God. Taem iumi ting raonem olketa samting wea Christ duim, datwan mekem iumi tinghae lo arrangement blo God and strongim go moa love blo iumi for Christ Jesus. Bible storyim samfala difren waka wea hem duim.

³ Taem Christ duim ministry blo hem lo earth, hem klia dat thru lo hem nomoa olketa man wea obey savve fren bak witim God. (John 14:6) Hem sevem iumi olketa man taem hem givim laef blo hem olsem ransom for staka pipol kasem laef. (Matt. 20:28) So Jesus showim wei blo God and hem nao main wan insaed plan blo Jehovah for olketa man. Thru lo hem nomoa man savve fren moa witim God. (Acts 5:31; 2 Cor. 5:18, 19) From Jesus dae and resurrect, datwan openem wei for pipol wea obey kasem olketa blessing for olowe, anda lo Kingdom blo God lo heven.

⁴ From Jesus Hae Priest, hem “minim olketa wik point bilong iumi” and askem God for forgivim sin blo olketa faithful follower blo hem lo earth. Aposol Paul sei: “Hae priest bilong iumi savve minim olketa wik point bilong iumi, bikos evri samting wea traem iumi hem traem hem tu, bat hem no sin.” Paul encouragem olketa wea showim faith lo Jesus Christ for tinghae lo disfala arrangement for fren bak moa witim God. Hem sei: “So no hol bak for kam long throne bilong God wea hem kaen tumas and prea long hem, mekem hem showimaot mercy long iumi and kaen long iumi taem iumi needim help.”​—Heb. 4:14-16; 1 John 2:2.

⁵ Jesus hem Hed blo Christian kongregeson tu. Olsem olketa follower blo hem lo first century, distaem iumi no needim eni man lo earth for leadim iumi. Jesus givim direction thru lo holy spirit and olketa shepherd wea qualify, wea bae givim ansa lo hem and Dadi blo hem lo heven for hao olketa lukaftarem olketa sheepsheep blo God. (Heb. 13:17; 1 Pet. 5:2, 3) Jehovah profesi olsem abaotem Jesus: “Lukim! Mi mekem hem for hem wanfala witness for olketa nation, Wanfala leader and komanda for olketa nation.” (Isa. 55:4) Jesus fulfillim disfala profesi taem hem talem olketa disaepol blo hem: “No letem eniwan kolem iufala Leader, bikos wanfala Leader nomoa iufala garem, and hem nao Christ.”​—Matt. 23:10.

⁶ Jesus showim hem tingim and willing for helpem iumi taem hem givim disfala invitation: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:28-30) From Jesus hambol for lukaftarem Christian kongregeson and duim lo wei wea mekem iumi hapi, datwan pruvim hem “nambawan man for lukaftarem olketa sheepsheep” followim example blo Dadi blo hem lo heven, Jehovah God.​—John 10:11; Isa. 40:11.

⁷ Lo first leta wea Paul raetem for olketa lo Corinth, hem storyim nara waka wea Jesus duim, hem sei: “Hem mas rul olsem king go kasem taem wea God hem winim evri enemy bilong hem. Bat bihaen God hem putim evri samting anda long paoa bilong Son bilong hem, then Son hia bae putim hemseleva anda long paoa bilong God, wea hem nao putim evri samting anda long paoa bilong Son. Diswan hem for God nomoa rul ovarem evriwan.” (1 Cor. 15:25, 28) Bifor Jesus kam daon lo earth, hem nao main wakaman blo God, and hem nao first samting wea God creatim. (Prov. 8:22-31) Taem God sendem Jesus kam lo earth, hem evritaem duim wat God laekem. Hem winim barava hard taem wea hem kasem and faithful lo Dadi blo hem go kasem taem hem dae. (John 4:34; 15:10) From Son blo hem loyal kasem taem hem dae, God resurrectim hem for go ap lo heven and givim raet for hem King lo Kingdom blo Hem lo heven. (Acts 2:32-36) From Christ Jesus hem King lo datfala Kingdom, hem bae kasem spesol assignment from God for leadim staka strongfala angel for finisim rul blo olketa man and evri nogud samting from disfala earth. (Prov. 2:21, 22; 2 Thess. 1:6-9; Rev. 19:11-21; 20:1-3) Then Kingdom blo God lo heven wea Christ nao rulim, hem nomoa only gavman wea bae rul ovarem full earth.​—Rev. 11:15.

SHOWIM IUMI LUKSAVVE LO WAKA BLO CHRIST

⁸ Jesus Christ, wea showim best example for iumi, hem perfect. God markem hem for lukaftarem iumi. For kasem gud samting from wei wea Jesus lukaftarem iumi gud, iumi mas gohed loyal lo Jehovah and gohed followim organization blo hem.

⁹ Olketa follower blo Jesus lo first century barava luksavve lo waka wea Christ duim lo arrangement blo God. Olketa duim datwan taem olketa wan mind for waka tugeta anda lo Christ wea hem hed, followim direction blo hem wea kam thru lo holy spirit. (Acts 15:12-21) Aposol Paul storyim wan mind wea kongregeson blo olketa anointed Christian garem taem hem sei: “Bat iumi mas talem tru samting, and showimaot love, mekem iumi kamap mature long evri samting and wan mind witim Christ wea hem nao hed. Bikos long Christ, datfala full body waka gud tugeta. Olketa join duim gud waka bilong olketa for mekem evri part long body join gud tugeta, and taem evri part long body duim gud waka bilong olketa tu, datfala body hem grow and love strongim hem.”​—Eph. 4:15, 16.

¹⁰ Taem each wan lo kongregeson waka tugeta witim olketa narawan and stap anda lo Christ wea hem hed, kongregeson bae gohed gud and garem love wea hem nao mekem pipol for “wan mind.”​—John 10:16; Col. 3:14; 1 Cor. 12:14-26.

¹¹ Olketa samting wea happen lo world distaem wea fulfillim Bible profesi pruvim Jesus Christ kasem paoa lo Kingdom blo God lo 1914. Distaem hem rul taem olketa enemy blo hem gohed rul. (Ps. 2:1-12; 110:1, 2) Wat nao datwan minim for evriwan wea stap lo disfala earth? Klosap nao Jesus bae duim waka blo hem olsem King blo olketa king and Lord blo olketa lord taem hem judgem olketa enemy blo hem. (Rev. 11:15; 12:10; 19:16) Then, promis wea Jehovah talem for sevem olketa man taem first man and woman againstim hem bae fulfill lo olketa wea obey wea stap lo raet saed blo Christ. (Matt. 25:34) Iumi hapi tumas for savve lo waka blo Christ lo arrangement blo God! So iumi laek for gohed wan mind for duim ministry evriwea lo world anda lo lead blo Christ lo olketa last day distaem.