“Tingim Olketa wea Leadim Iufala”

DATFALA toktok blo aposol Paul stap lo Hebrew 13:7. Start lo Pentecost 33 C.E., olketa faithful aposol blo Lord Jesus Christ waka olsem governing body wea lead for provaedem direction for Christian kongregeson wea just start. (Acts 6:2-4) Lo samting olsem 49 C.E., samfala moa olketa joinim governing body witim olketa aposol blo Jesus. Taem olketa mekem disison abaotem wei for circumcise, governing body hem “olketa aposol and olketa elder long Jerusalem.” (Acts 15:1, 2) Hem responsibility blo olketa for storyim olketa samting wea affectim olketa Christian evriwea. Olketa sendem olketa leta and direction, evri samting hia strongim olketa kongregeson and helpem olketa disaepol for gohed wan mind lo wat olketa talem and duim. Olketa kongregeson obey and stap anda lo direction from governing body, and from datwan, olketa kasem blessing from Jehovah and kongregeson hem grow.​—Acts 8:1, 14, 15; 15:22-31; 16:4, 5; Heb. 13:17.

² Afta olketa aposol dae, wei for apostate kamap big. (2 Thess. 2:3-12) Lo tokpiksa blo Jesus abaotem wheat and rabis grass hem sei wanfala enemy bae plantim rabis grass (olketa laea Christian) midolwan olketa wheat (olketa anointed Christian). For staka century olketa wheat and rabis grass bae grow tugeta go kasem taem blo harvest, wea hem nao “taem wea world hem gogo for finis.” (Matt. 13:24-30, 36-43) Lo datfala taem, each anointed Christian gohed for duim samting wea Jesus hapi lo hem bat no eni governing body stap, and Jesus no iusim eniwan lo earth for givim direction lo olketa follower blo hem. (Matt. 28:20) Bat hem talem wanfala change bae kamap lo taem blo harvest.

³ “Hu nao datfala wakaman wea faithful and wise?” Jesus iusim datfala kwestin for storyim wanfala tokpiksa wea part lo datfala “saen” abaotem taem wea “world hem gogo for finis.” (Matt. 24:3, 42-47) Jesus storyim hao disfala faithful wakaman bae busy for provaedem olketa spiritual kaikai for pipol blo God “long barava taem.” Lo first century, Jesus iusim grup blo olketa man for lead, no wanfala man. Lo taem wea world hem gogo for finis, datfala faithful wakaman wea Jesus iusim hem grup blo olketa man tu.

LUKSAVVE HU NAO “DATFALA WAKAMAN WEA FAITHFUL AND WISE”

⁴ Hu nao Jesus markem for givim kaikai lo olketa follower blo hem? Hem fit for Jesus iusim nomoa olketa anointed Christian lo earth. Bible storyim olketa hia olsem “olketa priest wea rul olsem king” wea kasem komand for “‘talemaot lo evri ples olketa nambawan wei’ bilong hem. Hem nao kolem olketa kamaot from darkness and tekem olketa go insaed long nambawan laet bilong hem.” (1 Pet. 2:9; Mal. 2:7; Rev. 12:17) Hao, evri anointed Christian lo earth nao wakaman wea faithful and wise? Nomoa. Taem Jesus duim mirakol for provaedem kaikai for samting olsem 5,000 man, witim olketa woman and olketa pikinini, hem givim lo olketa disaepol, then olketa disaepol hia nao givim lo olketa pipol. (Matt. 14:19) Hem iusim wanfala smol grup for feedim staka pipol. Distaem hem provaedem spiritual kaikai lo sem wei tu.

⁵ So “datfala wakaman wea faithful and wise” hem wanfala smol grup blo olketa anointed brata wea redyim and givimaot spiritual kaikai lo taem wea Christ hem stap. (Luke 12:42) Lo olketa last day, olketa anointed brata wea hem nao “datfala wakaman wea faithful and wise” waka tugeta lo world hedquarter. Distaem olketa anointed brata hia nao Governing Body blo Olketa Jehovah’s Witness.

⁶ Christ iusim disfala grup for pablisim information abaotem olketa Bible profesi wea fulfill and for givim direction lo barava taem abaotem hao for applyim olketa Bible principle lo laef blo iumi evriday. Olketa givimaot olketa spiritual kaikai hia thru lo olketa Kongregeson blo Olketa Jehovah’s Witness. (Isa. 43:10; Gal. 6:16) Lo taem blo Bible, wanfala wakaman wea olketa trustim, or steward, hem samwan wea lukaftarem evriting lo haos. Olsem tu, datfala wakaman wea faithful and wise garem responsibility for lukaftarem pipol blo God. So datfala faithful wakaman lukaftarem tu selen blo organization, preaching waka, olketa assembly and convention program, for appointim olketa overseer for duim olketa difren waka lo organization, and for wakem olketa Bible pablikeson, evri samting hia hem helpem olketa “nara wakaman.”​—Matt. 24:45.

⁷ Hu nao olketa “nara wakaman”? Hem nao olketa wea kasem spiritual kaikai. Firstaem, olketa anointed Christian nao olketa nara wakaman. Then gogo, datfala big crowd blo olketa “nara sheepsheep” tu. (John 10:16) Tufala grup hia evriwan kasem spiritual kaikai from datfala faithful wakaman.

⁸ Lo big trabol, taem Jesus kam for judgem disfala wicked system, hem bae markem datfala faithful wakaman for “lukaftarem evri samting bilong hem.” (Matt. 24:46, 47) Olketa faithful wakaman hia bae kasem reward blo olketa for go lo heven. Olketa witim evriwan lo datfala 144,000 bae kasem paoa for rul witim Christ lo heven. Nomata gogo datfala wakaman wea faithful and wise bae no stap lo earth, Jehovah and Jesus bae givim direction lo olketa wea stap anda lo datfala Kingdom thru lo olketa wea hem markem for waka olsem “olketa prince.”​—Ps. 45:16.

WHY HEM IMPORTANT FOR “TINGIM OLKETA WEA LEADIM IUFALA”?

⁹ Staka reason stap for why iumi mas tingim olketa wea lead and for trustim olketa. Why nao hem important for tingim olketa? Aposol Paul sei: “Olketa wea leadim iufala and lukaftarem iufala mas givim ansa for hao olketa duim diswan, so obeyim and stap anda long olketa mekem olketa hapi for lukaftarem iufala, bikos sapos nomoa datwan bae spoelem iufala.” (Heb. 13:17) Hem important for iumi obeyim and followim direction wea iumi kasem from olketa wea lead bikos olketa lukaftarem iumi for protectim iumi lo spiritual wei mekem iumi hapi.

¹⁰ Lo 1 Corinth 16:14, Paul sei: “Long evri samting wea iufala duim, iufala mas showimaot love.” Olketa disison wea olketa mekem for pipol blo God followim hem base lo love wea hem nao main wei. 1 Corinth 13:4-8 story olsem abaotem love: “Man wea garem love hem patient and kaen. Hem no savve jealous, or tok praod, and hem no savve tinghae tumas long hemseleva. Hem evritaem showimaot respect, no tingim hemseleva nomoa, no kwiktaem for kros. Hem no tingim olowe nogud samting wea narawan duim long hem. Man wea garem love hem no hapi long olketa nogud samting, bat hem hapi long samting wea tru. Nomata wanem hem happen, man wea garem love hem hapi nomoa. Hem gohed for biliv, hem evritaem garem hope, and no eni samting savve mekem hem givap. Love no savve finis.” From evri disison wea olketa mekem for helpem olketa wakaman blo Jehovah hem base lo love, iumi barava fit for trustim olketa direction wea iumi kasem. Olketa direction hia hem showim love blo Jehovah.

¹¹ Olsem lo first century, olketa wea Jehovah iusim for lukaftarem pipol blo hem distaem no perfect. Yes, lo bifor Jehovah iusim olketa man wea no perfect for duim wat hem laekem. Noah buildim wanfala ark and preach abaotem wei wea God bae finisim nogud pipol lo taem blo hem. (Gen. 6:13, 14, 22; 2 Pet. 2:5) Jehovah appointim Moses for leadim pipol blo hem go aot from Egypt. (Ex. 3:10) Hem iusim olketa man wea no perfect for raetem Bible. (2 Tim. 3:16; 2 Pet. 1:21) Wei wea Jehovah iusim olketa man wea no perfect distaem for lead lo waka for preach and mek disaepol, shud no mekem iumi for no trustim organization blo God. Bat diswan strongim iumi bikos iumi savve evri samting wea organization duim, Jehovah nao helpem olketa. Nomata datfala faithful wakaman kasem staka hard taem, olketa gohed for duim samting wea showim spirit blo God nao leadim olketa. Jehovah barava blessim organization blo hem lo earth distaem. So iumi laek for sapotim and trustim witim full heart.

HAO IUMI SHOWIM IUMI TRUSTIM OLKETA WEA LEAD

¹² Olketa wea kasem appointment for duim waka lo kongregeson showim olketa trustim Jehovah and arrangement blo hem, taem olketa hapi for acceptim and faithful for duim waka wea olketa kasem appointment for duim. (Acts 20:28) From iumi pipol wea preach abaotem Kingdom, iumi strong for duim haos-tu-haos waka, duim olketa return visit, and conductim olketa Bible study. (Matt. 24:14; 28:19, 20) For iumi barava kasem gud samting from staka spiritual kaikai wea datfala faithful wakaman provaedem, iumi mas prepare and attendim olketa meeting, and olketa assembly and convention tu. Iumi kasem olketa encouragement taem iumi associate witim olketa brata and sista lo olketa meeting hia.​—Heb. 10:24, 25.

¹³ Taem iumi sapotim organization witim olketa material samting wea iumi garem, datwan showim iumi trustim organization hia. (Prov. 3:9, 10) Taem iumi lukim olketa brata and sista blo iumi needim samting, iumi kwiktaem for help. (Gal. 6:10; 1 Tim. 6:18) Iumi duim diswan from iumi lovem olketa and iumi redi evritaem for eni chance, for showim iumi tinghae lo olketa gud samting wea Jehovah and organization blo hem duim for iumi.​—John 13:35.

¹⁴ Nara samting wea showim iumi trustim organization hem taem iumi sapotim olketa disison blo hem. Diswan includim wei for hambol for followim direction wea kam from olketa wea lukaftarem iumi, olsem olketa circuit overseer and olketa elder lo kongregeson. Iumi shud obeyim and stap anda lo olketa bikos olketa tu leadim iumi. (Heb. 13:7, 17) Nomata iumi no barava minim why olketa mekem samfala disison, iumi savve bae iumi kasem gud samting if iumi followim. From datwan, Jehovah blessim iumi from iumi obeyim toktok blo hem and organization blo hem. And hem showim iumi stap anda lo Masta blo iumi, Jesus Christ.

¹⁵ Yes, iumi garem staka reason for trustim datfala wakaman wea faithful and wise. Satan, god blo disfala world hem traem best for spoelem nem blo Jehovah and organization blo hem. (2 Cor. 4:4) No letem hem trikim iu! (2 Cor. 2:11) Hem savve dat hem garem “lelebet taem nomoa” bifor olketa torowem hem insaed datfala hol wea deep tumas, and hem laekem tumas for mekem staka pipol for lusim Jehovah. (Rev. 12:12) Nomata Satan traem best blo hem, iumi laek for fren gud go moa witim Jehovah. Iumi laek for trustim Jehovah and channel wea hem iusim for leadim pipol blo hem distaem. Wei for duim olsem bae mekem iumi and olketa brata and sista evriwea raonem world for wan mind.