Olketa Difren Wei for Preachim Gud Nius

JESUS showim gud example for olketa follower blo hem taem hem strong for talemaot gud nius. Hem nao go lo pipol lo haos and lo olketa pablik ples for story and teachim olketa. (Matt. 9:35; 13:36; Luke 8:1) Jesus story witim each wan, teachim olketa disaepol blo hem taem olketa stap seleva, and story lo staka pipol. (Mark 4:10-13; 6:35-44; John 3:2-21) Hem iusim evri chance wea hem garem for givim encouragement and hope lo pipol. (Luke 4:16-19) Nomata hem taed and hangere, hem no laek missim chance for preach. (Mark 6:30-34; John 4:4-34) Taem iumi readim story abaotem ministry blo Jesus, hao, iumi laek for followim example blo hem? Yes, iumi laek for olsem olketa aposol tu.​—Matt. 4:19, 20; Luke 5:27, 28; John 1:43-45.

² Iumi bae storyim olketa difren wei wea olketa Christian distaem savve share lo disfala waka wea Jesus Christ talem olketa for duim klosap 2,000 years ago.

PREACH FROM HAOS TU HAOS

³ Olketa Jehovah’s Witness luksavve hem important for preachim gud nius abaotem Kingdom from haos tu haos. Iumi iusim disfala wei for preach lo staka ples wea datwan mekem pipol luksavve iumi olketa Jehovah’s Witness. Taem iumi lukim staka pipol kam insaed truth lo short taem nomoa datwan showim hem wise for iusim disfala wei for preach. (Matt. 11:19; 24:14) Taem iumi duim disfala waka, datwan showim iumi lovem Jehovah and olketa narawan.​—Matt. 22:34-40.

⁴ For preach from haos tu haos hem no samting wea olketa Jehovah’s Witness startim. Aposol Paul story abaotem wei wea hem preach lo haos blo pipol. Hem storyim hao hem duim ministry blo hem lo olketa elder lo Ephesus, hem sei: “Start long taem wea mi kam stap witim iufala long Asia, . . . mi evritaem talem iufala olketa samting for helpem iufala and mi teachim iufala . . . long haos tu haos.” Paul iusim disfala wei for preach and olketa nara wei moa for “story gud long olketa Jew and olketa pipol bilong Greece for olketa mas repent, worshipim God, and garem faith long Lord bilong iumi Jesus.” (Acts 20:18, 20, 21) Lo datfala taem, olketa bigman blo Rome encouragem pipol for worshipim idol and staka “savve lotu gud tumas.” Hem barava important for pipol wea lukaotem “God wea wakem world and evri samting insaed,” and wea “talem olketa man lo evri ples for olketa mas repent.”​—Acts 17:22-31.

⁵ Distaem, hem barava important for talem gud nius lo pipol. End blo disfala nogud system hem klosap tumas. Diswan mekem iumi strong go moa for duim haos tu haos ministry. No eni wei moa hem gud winim for faendem pipol from haos tu haos wea laek for lanem truth. Olsem lo taem blo Jesus and olketa aposol, disfala wei for preach hem fitim distaem tu.​—Mark 13:10

⁶ Hao, iu fit for duim moa samting lo haos tu haos ministry? If olsem, iu sure Jehovah hem hapi lo iu. (Ezek. 9:11; Acts 20:35) For duim haos tu haos ministry maet no isi for iu. Maet iu sik, or maet iu preach lo territory wea staka pipol no laek for lisin. Maet gavman stopem waka blo iumi. Maet from iu shame, iu faendem hem hard for startim story witim pipol wea iu no savve. Dastawe, each taem iu joinim haos tu haos ministry iu savve fraet tumas. No discourage. (Ex. 4:10-12) Samting wea kasem iu hem happen tu lo olketa brata and sista lo olketa difren ples.

⁷ Jesus promisim olketa disaepol blo hem: “Bae mi stap witim iufala go kasem taem wea world hem finis.” (Matt. 28:20) Datfala promis strongim iumi for duim disfala waka for mek disaepol. Iumi olsem aposol Paul wea sei: “Nomata wanem samting hem kasem mi, paoa wea mi kasem from God nao hem strongim mi for gohed.” (Phil. 4:13) Evritaem joinim kongregeson arrangement for duim haos tu haos witnessing. Taem iu waka witim olketa narawan, bae olketa encouragem and helpem iu. Prea for Jehovah helpem iu for winim eni challenge wea iu maet kasem and gohed strong for talemaot gud nius.​—1 John 5:14.

⁸ Taem iu storyim gud nius lo olketa narawan, bae iu garem chance for “ansarem eniwan wea askem kwestin abaotem hope bilong [iu].”(1 Pet. 3:15) Bae iu barava luksavve hao olketa wea garem hope lo Kingdom, difren from olketa wea no garem hope. (Isa. 65:13, 14) Bae iu hapi from iu obeyim komand blo Jesus for “letem olketa man lukim laet bilong iufala,” and iu maet garem privilege for helpem olketa narawan savve lo Jehovah and truth wea mekem man kasem laef olowe.​—Matt. 5:16; John 17:3; 1 Tim. 4:16.

⁹ Olketa mekem arrangement for duim haos tu haos witnessing lo olketa weekend and lo midol week. Lo olketa ples wea hard for faendem pipol lo haos lo daytaem, samfala kongregeson arrange for duim evening witnessing. Maet pipol bae willing for lisin lo olketa aftanun or evening winim lo morning.

LUKAOTEM OLKETA WEA LAEK FOR LANEM TRUTH

¹⁰ Jesus talem olketa disaepol blo hem for “lukaotem” olketa wea laek for lanem truth. (Matt. 10:11) Hem lukaotem pipol wea laek for lanem truth no lo haos tu haos ministry nomoa bat lo olketa difren wei tu. Hem mekius lo evri chance for preach, lo haos tu haos and enitaem witnessing. (Luke 8:1; John 4:7-15) Olketa aposol tu preach lo olketa difren ples.​—Acts 17:17; 28:16, 23, 30, 31.

¹¹ Distaem tu, goal blo iumi hem for preachim disfala Kingdom message lo evriwan. Diswan minim iumi mas followim example blo Jesus and olketa aposol blo hem lo hao for duim disfala waka for mek disaepol and tu for change fitim taem and situation blo pipol lo territory. (1 Cor. 7:31) For example, olketa pablisa kasem gud samting taem olketa go preach lo pipol lo waka ples. Lo staka kantri olketa duim street witnessing lo olketa park, car park, or eni ples wea pipol stap. Samfala kongregeson putim tebol or trolley lo territory blo olketa. And tu, branch office savve organizem spesol metropolitan pablik witnessing lo samfala area lo city wea staka pipol savve go pas. From datwan, olketa wea no stap lo haos taem olketa pablisa duim preaching maet herem gud nius lo nara ples.

¹² Taem iumi meetim pipol lo olketa pablik ples wea interest lo Bible message, iumi savve givim eni pablikeson. For mekem man gohed interest, iu savve givim hem contact information blo iu and arrange for duim return visit, talem hem for go lo jw.org, or givim hem address blo eni Kingdom Hall klosap lo ples wea hem stap. Iu bae hapi taem iu duim moa samting lo ministry lo wei for preach lo pipol lo olketa pablik ples.

¹³ Bat, waka blo olketa Christian distaem hem no for talemaot gud nius nomoa. If iu laek for helpem olketa narawan for kasem truth wea lead go for laef, iu bae laek for go bak staka taem for helpem olketa wea interest for kamap mature Christian.

DUIM RETURN VISIT

¹⁴ Jesus sei lo olketa follower blo hem: “Iufala bae talem pipol abaotem mi . . . long evri farawe ples long earth.”(Acts 1:8) Bat hem sei lo olketa follower blo hem tu: “Go and teachim pipol long evri kantri for kamap disaepol bilong mi . . . teachim olketa for followim evri samting wea mi laekem iufala for duim.” (Matt. 28:19, 20) For duim return visit savve mekem iu hapi lo waka blo Jehovah. Pipol wea interest lo gud nius taem iu preach lo olketa, bae hapi for lukim iu kam bak moa. Taem iu storyim samfala information moa from Bible witim olketa, datwan strongim faith blo olketa lo God and helpem olketa for luksavve wat olketa need for duim lo spiritual saed blo olketa. (Matt. 5:3) If iu prepare gud and arrange for duim return visit lo taem wea fitim olketa, iu savve startim Bible Study. Datwan nao goal blo iumi taem iumi duim olketa return visit. Iumi no plantim seed blo truth nomoa bat watarem tu.​—1 Cor. 3:6.

¹⁵ For duim return visit hem wanfala challenge for samfala pablisa. Maet iu savve gud hao for duim short presentation lo haos tu haos ministry, and iu enjoyim datwan. Bat taem iu ting for go bak moa lo haosholder for storyim wanfala point from Bible, iu fraet nao for duim datwan. For prepare gud bae helpem iu for no fraet. Iusim olketa idea wea iumi kasem lo midol week meeting. Maet hem gud tu for invaetem eni pablisa wea garem experience for go witim iu.

CONDUCTIM BIBLE STUDY

¹⁶ Taem Philip wea hem man for preach, story witim wanfala man blo Ethiopia wea gohed readim toktok blo God, Philip askem hem: “Hao, iu minim samting wea iu readim?” Datfala man sei: “Hao nao bae mi savve sapos no eniwan minim kam long mi?” Story hia lo Bible lo Acts chapter 8 talem iumi hao Philip start for story abaotem profesi wea man hia readim and hem “gohed for talem gud nius abaotem Jesus.”(Acts 8:26-36) Iumi no savve haomas hour nao Philip story witim datfala man, bat Philip explainim gud datfala gud nius and datwan mekem datfala man biliv and laek for baptaes. Hem kamap disaepol blo Jesus Christ.

¹⁷ Staka distaem no savve gud lo Bible so maet iumi need for duim samfala return visit and bihaen studyim Bible witim olketa, maet for samfala week, month, or year or winim datwan bifor olketa garem faith and qualify for baptaes. Bat wei wea iu patient and willing for helpem olketa wea garem honest heart for kamap disaepol bae mekem iu kasem reward, olsem Jesus talem: “Man wea givim samting hem barava hapi winim man wea kasem samting.”​—Acts 20:35.

¹⁸ For sure iu bae laek for iusim wanfala pablikeson wea organization designim for study, for conductim wanfala Bible Study. Taem iu followim instruction lo midol week meeting and waka witim olketa pablisa wea garem experience lo kongregeson, iu bae conductim wanfala Bible study wea gohed gud and helpem olketa narawan for kamap disaepol blo Jesus Christ.

¹⁹ If iu needim help for startim and conductim wanfala Bible study, feel free for story lo wanfala elder or eni pablisa wea savve gud hao for conductim Bible study. Olketa idea lo Laef and Ministry Meeting buk wea olketa pablisa demonstratim lo meeting bae helpem iu tu. Depend lo Jehovah, and prea abaotem datwan. (1 John 3:22) So sapos fitim, garem aim for conductim Bible study no witim olketa lo famili blo iu nomoa bat witim olketa narawan tu. Taem iu garem olketa Bible study, bae iu enjoyim ministry.

HELPEM OLKETA WEA INTEREST FOR KAM LO ORGANIZATION BLO JEHOVAH

²⁰ Taem iumi helpem pipol for savve lo Jehovah God and kamap disaepol blo Jesus Christ, olketa part lo kongregeson. Olketa Bible student bae gohed gud lo spiritual wei and mature if olketa luksavve lo organization blo Jehovah and waka tugeta witim. Teachim olketa for savve why hem important for duim datwan. Olketa wakem olketa video and datfala brochure Hu Nao Duim Wanem Jehovah Laekem Distaem? for helpem olketa savve lo datwan. Samfala information lo Chapter 4 blo disfala buk savve helpem olketa tu.

²¹ Taem iutufala start for studyim Bible, helpem student for luksavve hao Jehovah iusim wanfala organization for duim preaching waka lo earth distaem. Storyim hao olketa buk hia for studyim Bible savve helpem man, and explainim hao olketa volunteer wea dedicate lo God nao producem and distributim olketa buk hia evriwea lo world. Invaetem Bible student for kam witim iu lo olketa meeting lo Kingdom Hall. Explainim hao iumi conductim olketa meeting, and introducem hem lo olketa brata and sista. Iu bae laek for helpem hem tu for savve gud lo olketa nara witness lo olketa assembly and convention. Lo olketa taem and ples olsem, letem olketa niu wan lukim seleva hao pipol blo Jehovah showim love wea hem mark blo olketa tru Christian. (John 13:35) Taem datfala interest wan tinghae lo organization blo Jehovah, bae hem fren gud witim Jehovah.

IUSIM BIBLE PABLIKESON

²² Olketa Christian bifor strong for iusim toktok blo God. Olketa mekem copy blo olketa scripture for olketa seleva iusim and for studyim lo kongregeson. Olketa encouragem narawan for iusim toktok blo God. Olketa tinghae lo tu-thri copy blo olketa scripture wea olketa garem. (Col. 4:16; 2 Tim. 2:15; 3:14-17; 4:13; 1 Pet. 1:1) Distaem, Olketa Jehovah’s Witness iusim printing machine for pablisim staka million Bible and olketa buk for studyim. Diswan includim tract, brochure, buk, and olketa magasin lo staka handred languis.

²³ Taem iu sharem gud nius witim olketa narawan, mek sure for iusim olketa Bible study tul wea organization blo Jehovah provaedem. Taem iu kasem gud samting from wei for readim and studyim olketa buk wea Olketa Jehovah’s Witness givim, datwan bae mekem iu for laek storyim lo olketa narawan.​—Heb. 13:15, 16.

²⁴ Main ples wea staka pipol kasem information hem lo Internet. So, iumi garem tu official website blo iumi, jw.org wea hem best tul for spredim datfala gud nius. Pipol evriwea lo world savve iusim computer for readim or lisin lo audio recording blo Bible and olketa Bible literature lo staka handred languis. Olketa wea no laek for story witim iumi or olketa wea stap lo ples wea olketa no garem staka chance for story lo Olketa Jehovah’s Witness, savve lane abaotem biliv blo iumi taem olketa go lo jw.org lo ples wea olketa stap.

²⁵ Dastawe, iumi advertisem jw.org lo evri chance iumi garem. If haosholder askem kwestin abaotem biliv blo iumi, iumi savve iusim mobile or tablet for showim hem ansa semtaem. If iumi meetim samwan wea story lo nara languis includim saen languis, iumi savve talem hem for go lo website blo iumi for faendem Bible and Bible literature lo languis blo hem. Staka pablisa iusim wanfala video lo website for startim story.

ENITAEM WITNESSING

²⁶ Jesus talem olketa wea lisin lo toktok blo hem: “Iufala nao laet bilong world. . . . letem olketa man lukim laet bilong iufala, olketa bae lukim olketa gudfala samting wea iufala duim. Diswan bae mekem olketa for praisem Dadi bilong iufala long heven.” (Matt. 5:14-16) Olketa disaepol hia showim wei blo God taem olketa followim example blo Jesus wea sei: “Mi nao laet for pipol long disfala world.” Jesus showim example for olketa Christian for letem “laet wea mekem man laef” saen for olketa wea lisin for kasem gud samting.​—John 8:12.

²⁷ Aposol Paul tu hem wanfala gud example for iumi followim. (1 Cor. 4:16; 11:1) Taem Paul lo Athens, hem preach evriday lo market ples lo olketa wea hem meetim. (Acts 17:17) Olketa Christian lo Philippi followim example blo hem. From datwan, Paul raet lo olketa dat olketa stap “midolwan long olketa nogud pipol wea sin” and olketa “shaen olsem laet insaed long disfala world.” (Phil. 2:15) Distaem tu iumi savve letem Kingdom truth saen thru lo toktok and wat iumi duim for talemaot gud nius lo olketa narawan lo eni chance wea iumi garem. Yes, gud example blo iumi for honest and duim stret samting savve helpem olketa narawan luksavve iumi difren from pipol lo world. Bat if iumi story lo olketa abaotem datfala gud nius, olketa bae savve why iumi difren.

²⁸ Staka Jehovah’s witness storyim gud nius lo waka ples, lo skul, lo pablik transport or eni ples wea olketa go and meetim pipol. Taem iumi go for eni ples, iumi savve story witim pipol wea iumi go tugeta. Each wan lo iumi mas redi evritaem for changem story for givim witness lo samwan. Iumi mas redi evritaem for story lo olketa narawan lo enitaem wea fitim.

²⁹ If iumi tingim hao iumi praisem Creator blo iumi and mekhae lo nem blo hem, datwan bae encouragem iumi for iusim evri chance for sharem gud nius witim narawan. And tu, iumi bae fit for helpem olketa wea garem honest heart for savve lo Jehovah mekem olketa tu savve worshipim hem, and garem hope for laef olowe thru lo faith wea olketa showim lo Jesus Christ. Evri samting hia hem holy service and mekem Jehovah hapi.​—Heb. 12:28; Rev. 7:9, 10.

TERRITORY

³⁰ Jehovah laekem iumi for preachim disfala Kingdom message evriwea lo world, lo olketa city and rural area tu. For duim diswan, olketa kongregeson and olketa wea isolate kasem territory for duim from branch office. (1 Cor. 14:40) Diswan semsem tu witim arrangement blo God lo first century. (2 Cor. 10:13; Gal. 2:9) From Kingdom waka hem gohed for grow lo olketa last day, waka bae gohed gud taem olketa organizem gud territory blo kongregeson.

³¹ Service overseer nao lukaftarem disfala arrangement. Wanfala ministerial servant savve help for assignim territory. Iumi garem tufala type territory, grup territory and personal territory. If territory no staka, olketa grup overseer bae garem territory for olketa pablisa insaed grup savve preach lo hem. Bat if territory hem staka, each pablisa savve garem territory for preach lo hem.

³² Pablisa wea garem personal territory bae preach lo taem wea no eni meeting for field service or taem hem no fit for joinim grup. For example, samfala pablisa garem territory klosap waka ples blo olketa and olketa savve preach lo hem lo lunch or afta waka. Samfala famili garem territory klosap ples olketa stap, and olketa savve preach lo hem lo samfala evening. Taem pablisa garem territory wea fitim hem, datwan bae helpem hem for iusim gud taem wea hem garem for share lo field service. Pablisa wea garem personal territory savve invaetem olketa nara pablisa for olketa go duim datfala territory, maet afta olketa meet for field service. If iu laek for garem personal territory, iu savve story witim territory servant.

³³ Nomata hem grup territory wea grup overseer nao lukaftarem, or personal territory wea pablisa seleva lukaftarem, pablisa wea lukaftarem datfala territory mas traem best for kasem evriwan lo datfala territory. Arrangement for kavarem territory shud followim tu law wea protectim personal information abaotem man. Eni grup overseer or pablisa wea lukaftarem wanfala territory shud traem best for kavarem insaed fo month. If hem completim datfala territory, hem shud letem territory servant for savve. Depend lo situation, grup overseer or pablisa maet laek for gohed duim datfala territory or givim bak lo territory servant.

³⁴ Taem evri pablisa lo kongregeson waka tugeta, olketa savve kavarem full territory. And tu iumi bae no mekem haosholder kros and feel nogud from olketa pablisa preach lo sem area lo sem taem. Datwan showim iumi tingim olketa brata and sista and pipol lo territory.

WAKA TUGETA FOR PREACH LO PIPOL WEA STORY LO DIFREN LANGUIS

³⁵ Evriwan need for lane abaotem Jehovah God, Son blo hem, and datfala Kingdom. (Rev. 14:6, 7) Iumi hapi for helpem pipol wea story lo olketa difren languis for prea lo nem blo Jehovah for sev and for garem wei blo olketa Christian. (Rome 10:12, 13; Col. 3:10, 11) Wat nao samfala challenge wea iumi savve kasem taem iumi preachim gud nius lo ples wea pipol story lo olketa difren languis? Wat nao iumi savve duim mekem iumi fit for sharem Kingdom message lo staka pipol lo languis wea olketa minim?​—Rome 10:14.

³⁶ Territory wea olketa assignim for each kongregeson hem followim languis. So lo olketa territory wea pipol story lo olketa difren languis, pablisa from olketa difren kongregeson savve preach lo hem. Lo situation olsem, hem gud for olketa pablisa from each kongregeson preach nomoa lo pipol wea story lo languis blo olketa. Diswan apply tu for olketa campaign for givimaot invitation evri year. Bat taem iumi duim pablik and enitaem witnessing, iumi savve story witim eniwan and givim literature lo eni languis.

³⁷ Samfala taem olketa kongregeson wea story lo nara languis no evritaem duim farawe territory blo olketa. Lo situation olsem, service overseer blo olketa kongregeson hia shud story tugeta abaotem hao for duim datfala territory. Diswan bae givim evriwan chance for herem message abaotem Kingdom and bae olketa pablisa no duim bak moa territory wea olketa nara pablisa duim finis.​—Prov. 15:22.

³⁸ Wat nao iumi shud duim if haosholder wea iumi meetim hem story lo difren languis? Iumi shud no tingse pablisa wea story lo languis blo hem nao bae go story lo hem. Samfala pablisa lanem simpol presentation lo wanfala languis wea olketa lo territory savve story lo hem. Iumi savve showim lo haosholder hao hem savve readim or daonlodim literature lo languis blo hem from website blo iumi, jw.org, or iumi savve givim literature wea stap lo languis blo hem.

³⁹ If haosholder showim hem barava interest, iumi shud faendem samwan wea qualify for helpem hem lo languis wea hem minim. Iumi savve talem hem tu abaotem wanfala ples for meeting wea stap klosap, wea kamap lo languis blo hem. If hem laekem samwan wea story lo languis blo hem for contactim hem, iumi savve showim hem hao for enterim contact information blo hem lo jw.org. Then branch office bae traem best for faendem wanfala pablisa, grup, or kongregeson wea stap klosap for helpem hem.

⁴⁰ Iumi shud gohed contactim hem go kasem taem samwan wea story lo languis blo hem contactim hem. Samfala taem, branch office bae letem olketa elder savve dat olketa no faendem samwan wea story lo languis blo datfala haosholder. Sapos olsem, iumi shud duim best blo iumi for gohed mekem haosholder interest. Sapos fitim, iumi savve studyim Bible witim hem, maet lo wanfala pablikeson wea stap lo languis blo hem. If iumi iusim gud olketa piksa, and letem hem readim olketa scripture, hem bae savve lo samfala main Bible teaching. Samwan lo famili blo hem wea savve lo languis blo hem and languis lo datfala ples maet willing for interpret for hem.

⁴¹ For mekem datfala man wea interest kam lo organization blo God, iumi shud invaetem hem lo olketa meeting blo iumi nomata hem no barava minim datfala program. Taem speaker readim olketa scripture, iumi savve helpem hem for faendem lo Bible lo languis blo hem if hem stap. Taem hem associate witim olketa narawan lo kongregeson, datwan savve encouragem and helpem hem for gohed gud lo spiritual wei.

⁴² Pregrup: Wanfala pregrup garem samfala pablisa wea preach lo wanfala languis wea difren from languis blo datfala kongregeson, nomata olketa no garem wanfala elder or ministerial servant wea qualify for conductim meeting evri week lo datfala languis. Branch office bae appruvim wanfala kongregeson for hostim wanfala pregrup if kongregeson kasem olketa requirement hia:

1. (1) Staka pipol lo datfala area story lo languis wea difren from languis blo kongregeson.

2. (2) At least samfala pablisa savve lo languis hia or willing for lanem datfala languis.

3. (3) Body of elders willing for organizem preaching lo datfala languis.

If body of elders laek for garem wanfala pregrup, olketa elder bae story witim circuit overseer. Maet hem savve abaotem olketa nara kongregeson wea laek for preach lo pipol lo datfala languis and storyim important information wea bae helpem olketa luksavve which kongregeson nao fit for garem pregrup. Sapos olketa luksavve which kongregeson nao fitim, olketa elder bae sendem wanfala leta lo branch office for kasem approval then kongregeson savve hostim wanfala pregrup.

⁴³ Grup: Branch office savve appruvim wanfala kongregeson for hostim wanfala grup if hem kasem olketa requirement hia:

1. (1) Staka pipol lo datfala languis interest and datfala grup fit for grow.

2. (2) Samfala pablisa savve story lo datfala languis or lanem languis hia .

3. (3) Wanfala elder or ministerial servant wea qualify stap for leadim and conductim wanfala meeting lo week​—or wanfala part lo meeting, olsem pablik tok or Wastaoa Study​—lo datfala languis.

Taem kongregeson kasem olketa requirement hia, body of elders bae sendem wanfala leta abaotem datwan lo branch office for kasem appruval for kongregeson hostim wanfala grup. Elder or ministerial servant wea leadim datfala grup bae hem“grup overseer” or “grup servant” for lukaftarem datfala grup.

⁴⁴ Taem grup hem start, body of elders lo datfala kongregeson wea host bae disaedem which part lo meeting moa bae olketa duim and hao many taem lo month nao bae olketa duim meeting. Olketa bae arrangem tu meeting for field service for datfala grup. Evriwan lo grup waka followim direction blo body of elders wea hostim datfala grup. Olketa elder bae givim direction and showim olketa willing for lukaftarem datfala grup. Taem circuit overseer visitim datfala kongregeson wea host and waka witim datfala grup, hem bae givim report lo branch office abaotem hao datfala grup gohed and storyim eni need wea olketa garem. Gogo datfala grup savve kamap wanfala kongregeson. If evriwan followim theocratic direction, datwan bae mekem Jehovah hapi.​—1 Cor. 1:10; 3:5, 6.

GRUP WITNESSING

⁴⁵ Evri Christian wea dedicate finis garem responsibility for storyim gud nius lo olketa narawan. Bat staka lo iumi hapi for joinim field service witim olketa narawan. (Luke 10:1) From datwan, kongregeson garem field service lo weekend and lo midol week tu. Olketa holiday tu hem chance for duim grup witnessing, from staka brata and sista no waka lo datfala taem. Kongregeson Service Komiti arrangem meeting for field service lo taem and ples wea fitim datfala day and lo olketa evening.

⁴⁶ Grup witnessing mekem olketa pablisa for waka tugeta and “evriwan strongim narawan.” (Rome 1:12) Olketa niu pablisa savve waka witim olketa pablisa wea garem experience and kasem training. Lo samfala area hem gud for tufala pablisa or winim datwan for waka tugeta for safety blo olketa. Nomata iu plan for waka seleva lo territory, wei for meet witim grup savve encouragem evriwan. Taem iu savve olketa narawan tu duim ministry lo sem area, datwan mekem iu for no fraet. Pioneer and olketa narawan shud no ting dat olketa shud sapotim evri meeting for field service wea kongregeson arrangem, especially if field service arrangement hem evriday. Bat, hem gud for olketa sapotim samfala meeting for field service evri week.

⁴⁷ Iumi evriwan laek for followim example blo Jesus and olketa aposol blo hem! Iumi sure iumi bae kasem blessing from Jehovah taem iumi traem best and waka hard for share lo disfala important waka for preachim gud nius abaotem Kingdom.​—Luke 9:57-62.