Gohed Keepim Peace and Wei for Klin lo Kongregeson

EACH year staka thousand pipol joinim pure worship, wea datwan fulfillim Bible profesi. (Mic. 4:1, 2) Iumi hapi tumas olketa kam insaed lo “kongregeson blo God”! (Acts 20:28) Olketa tinghae lo privilege for worshipim Jehovah witim iumi and for enjoyim spiritual paradaes wea klin and garem peace. Holy spirit blo God and wise kaonsel blo hem wea stap lo Bible helpem iumi for gohed garem peace and keepim kongregeson klin.​—Ps. 119:105; Zech. 4:6.

² Wei for followim olketa Bible principle helpem iumi for garem olketa “niufala wei.” (Col. 3:10) Iumi no letem olketa smol raoa and wik point blo iumi for affectim iumi. Taem iumi garem tingting blo Jehovah abaotem samting, bae iumi no letem olketa samting lo disfala world wea divaed for affectim iumi. Bat wan mind for waka tugeta witim olketa brata and sista evriwea lo world.​—Acts 10:34, 35.

³ Samfala taem, maet problem kamap wea affectim peace and wan mind lo kongregeson. Why nao olsem? Staka taem, hem from iumi no followim olketa Bible principle. Iumi still need for deal witim olketa mistek blo iumiseleva from iumi no perfect. Iumi evriwan sin. (1 John 1:10) Maet samwan start for duim wanfala samting wea mekem kongregeson no klin lo spiritual wei. Maet iumi mekem samwan feel nogud lo toktok or akson blo iumi, or maet iumi stambol bikos lo wat samwan talem or duim. (Rome 3:23) Taem olketa situation olsem kamap, wat nao iumi savve duim for stretem?

⁴ Jehovah savve finis samting olsem savve happen. Toktok blo hem garem olketa kaonsel wea savve helpem iumi taem olketa problem olsem kamap. Each wan lo iumi savve kasem help from olketa spiritual shepherd wea lovem iumi wea hem nao olketa elder. Taem iumi followim kaonsel wea olketa givim from Bible, iumi savve fren gud go moa witim olketa narawan and gohed fren gud witim Jehovah. If iumi kasem discipline or repruv bikos lo olketa sin wea iumi duim, tingim, datwan showim dadi blo iumi lo heven hem lovem iumi.​—Prov. 3:11, 12; Heb. 12:6.

STRETEM OLKETA SMOL PROBLEM

⁵ Samfala taem olketa smol problem savve happen between olketa brata and sista lo kongregeson. Iumi mas kwiktaem stretem lo wei wea showim love. (Eph. 4:26; Phil. 2:2-4; Col. 3:12-14) Staka taem, iumi savve stretem olketa problem olsem taem iumi followim kaonsel blo aposol Peter for “mas barava lovem narawan bikos man wea garem love hem evritaem willing for forgivim narawan.” (1 Pet. 4:8) Bible sei: “Iumi evriwan savve sin staka taem.” (Jas 3:2) Taem iumi followim disfala Golden Rul for duim sem samting wea iumi laekem narawan for duim for iumi, staka taem iumi savve stretem olketa smol problem lo wei for forgive and forgetim datwan.​—Matt. 6:14, 15; 7:12.

⁶ If iu luksavve samwan hem feel nogud lo wat iu talem or duim, iu shud kwiktaem for go mek peace witim hem. Tingim, datwan savve affectim tu wei wea iu fren witim Jehovah. Jesus talem olketa disaepol blo hem: “Tingim sapos iu tekem sakrifaes bilong iu go long altar. Waswe sapos taem iu kasem long there iu tingim hao brata bilong iu hem feel nogud long iu? Firstaem, leavim sakrifaes bilong iu long there and go stretem datfala problem witim brata bilong iu. Bihaen, go bak moa long altar and givim datfala sakrifaes.” (Matt. 5:23, 24) Maet hem no minim wat iu talem or duim. If olsem, no hol bak for go story witim hem. Wei for story gud witim evriwan lo kongregeson, savve helpem iumi for stretem eni problem from wei for no minim gud each other bikos iumi no perfect.

GIVIM KAONSEL FROM BIBLE

⁷ Samfala taem olketa elder need for givim kaonsel for stretem tingting blo samwan. Diswan no evritaem isi. Aposol Paul sei olsem lo olketa Christian lo Galatia: “Olketa brata, maet wanfala man start for go rong bat hem no luksavve long datwan. Sapos olsem, iufala wea mature mas trae for stretem hem. Taem iufala duim datwan iufala mas kaen long hem.”​—Gal. 6:1.

⁸ Taem olketa elder lukaftarem gud olketa sheepsheep, datwan savve protectim kongregeson from staka spiritual danger and stopem tu olketa big problem for kamap. Olketa elder traem best for duim waka blo olketa lo kongregeson for fitim wat Jehovah promisim thru lo Isaiah: “Each wan bae hem olsem wanfala ples for haed from wind, Wanfala ples for haed from bigfala rain, Olsem olketa stream blo wata lo land wea no garem wata, Olsem shadow blo bigfala ston lo land wea drae fogud.”​—Isa. 32:2.

LUKSAVVE LO OLKETA WEA NO FOLLOWIM LAW BLO JEHOVAH

⁹ Aposol Paul givim warning abaotem samfala wea savve spoelem kongregeson. Paul sei: “Mifala talem iufala . . . for stap klia long eni brata wea laef bilong hem olobaot and wea no followim olketa samting wea mifala talem long iufala.” Hem storyim klia moa datwan taem hem sei: “Sapos eniwan hem no obeyim wanem mifala talem long disfala leta, iufala mas lukluk gud long hem and stap klia long hem, for mekem hem savve feel shame. No ting long hem olsem wanfala enemy bat gohed for helpem hem bikos hem brata bilong iufala.”​—2 Thess. 3:6, 14, 15.

¹⁰ Samfala taem samwan wea no duim eni big sin wea mekem hem fit for disfellowship, duim samting wea showim hem no respectim standard blo God wea olketa Christian shud followim. Insaed diswan hem wei for lesy tumas, bighed or for no klin. Maet hem “poke nose long samting wea hem no bisnis bilong [hem].” (2 Thess. 3:11) Or maet hem min for ravem olketa narawan for kasem gud samting for hemseleva or joinim entertainment wea hem savve nomoa hem no stret. Olketa nogud wei olsem savve barava spoelem kongregeson, and hem isi for affectim olketa nara Christian.

¹¹ Firstaem, olketa elder bae givim kaonsel from Bible for trae helpem brata or sista wea garem olketa wei olsem. Bat if hem no laek for followim olketa Bible principle nomata olketa helpem hem staka taem, olketa elder maet disaed for givim wanfala warning tok lo kongregeson. Olketa elder bae garem wei for luksavve taem olketa disaed sapos wanfala situation hem barava serious and fitim wanfala warning tok bikos hem bae affectim olketa narawan. Speaker bae storyim olketa Bible kaonsel wea fitim olketa nogud wei olsem, bat hem bae no talem nem blo man wea duim datwan. So olketa wea savve lo datfala situation bae careful for no associate witim kaen brata or sista olsem, bat olketa bae gohed for duim olketa spiritual samting witim hem, “bikos hem brata blo [iumi].”

¹² Iumi sure wei wea olketa faithful Christian strong for stap klia from datfala brata or sista wea duim nogud samting, bae mekem hem luksavve lo nogud samting wea hem duim and helpem hem for change. Taem iumi lukim klia hao datfala man hem lusim olketa nogud wei blo hem, bae iumi no ting lo hem moa olsem samwan wea iumi mas stap klia lo hem.

STRETEM OLKETA SERIOUS SIN

¹³ Taem iumi willing for forgive datwan no minim nogud samting wea narawan duim hem olraet nomoa. No evri rong samting wea iumi duim hem bikos lo sin wea iumi kasem, and hem no stret for haedem bigfala sin wea samwan duim. (Lev. 19:17; Ps. 141:5) Datfala Law covenant storyim hao samfala sin hem serious winim olketa nara sin. Datwan semsem tu for olketa Christian.​—1 John 5:16, 17.

¹⁴ Jesus storyim hao for stretem olketa big problem wea maet kamap between olketa nara Christian. Lukim olketa wei hia: “Sapos brata bilong iu hem sin againstim iu, [1] iuseleva nao go story witim hem, mekem hem savve samting hem duim hem no stret. Sapos hem acceptim wanem iu talem, iu helpem hem nao for duim stret samting moa. Bat sapos hem no acceptim wanem iu talem, [2] go bak long hem narataem moa. Tekem wan or tufala man for herem samting wea iutufala story abaotem. From iu duim datwan, tu or thrifala witness bae stap wea savve long evri samting abaotem datfala problem. Sapos hem no acceptim samting wea olketa hia talem, then, [3] talem kongregeson. Sapos hem no acceptim wanem kongregeson talem, then iu mas ting long hem olsem wanfala man long world and wanfala man for tekem tax.”​—Matt. 18:15-17.

¹⁵ For fitim illustration wea Jesus storyim lo Matthew 18:23-35, hem showim hao wanfala lo olketa sin wea hem storyim lo Matthew 18:15-17 hem saed lo selen or property, olsem for no changem bak loan or for ravem narawan. Or maet for talem laea story abaotem narawan wea barava spoelem reputation blo hem.

¹⁶ If iu garem pruv hao samwan lo kongregeson duim eni sin olsem againstim iu, no kwiktaem for go lo olketa elder and askem olketa for stretem datwan for iu. Olsem Jesus talem, story firstaem witim datfala man. Trae for stretem datfala problem between iutufala nomoa instead for askem narawan for help. Tingim, Jesus no sei for ‘go wantaem nomoa and storyim samting wea hem duim.’ Bat if datfala man no acceptim dat hem rong and no ask for forgiveness, hem gud for go bak lo hem narataem moa. If iu stretem datfala problem lo wei olsem, datwan wea sin againstim iu bae tinghae lo wei wea iu no storyim sin blo hem lo olketa narawan or spoelem gud nem blo hem lo kongregeson. “Iu helpem hem nao for duim stret samting moa.”

¹⁷ If man wea duim sin luksavve hem rong, askem forgiveness, and duim samting for stretem datwan, tufala bae no need for duim eni samting moa. Nomata hem wanfala serious sin, olketa wea involve lo datwan savve stretem between olketa seleva.

¹⁸ If “iuseleva nao go story witim [brata or sista]” blo iu bat hem no talem dat hem nao rong, then iu savve duim wat Jesus talem for, “tekem wan or tufala man,” for go story witim brata blo iu lo narataem moa. Olketa wea iu tekem witim iu shud garem sem goal for helpem hem duim stret samting moa. Hem gud sapos olketa wea go witim iu lukim samting wea happen. Bat sapos no eni eye witness, iu savve askem wan or tufala brata for kam witnessim story blo iutufala. Maet olketa tu deal witim datwan bifor and maet fit for luksavve if wat happen hem barava no stret. Olketa elder wea iu chusim for witnessim story blo iutufala no representim kongregeson, bikos ino body of elders nao assignim olketa for duim datwan.

¹⁹ If iutufala no savve stretem datfala problem nomata iu traem best for go story lo hemseleva, tekem wan or tufala brata witim iu, bat iu feel dat iutufala no fren gud yet, then iu shud reportim datfala problem lo olketa elder lo kongregeson. Tingim dat goal blo olketa hem for mekem kongregeson gohed klin and garem peace. Taem iu storyim datfala problem lo olketa elder, leavim datwan lo hand blo olketa and trustim Jehovah. Iu mas no letem wei blo narawan for mekem iu stambol or spoelem hapi blo iu lo waka blo Jehovah.​—Ps. 119:165.

²⁰ Olketa elder bae investigatem datfala problem. If olketa faendaot datfala brata or sista hem duim serious sin againstim iu, no repent and no willing for stretem datwan, maet wanfala komiti blo olketa elder bae aotem datfala man wea duim disfala rong from kongregeson. Datwan bae protectim olketa sheepsheep and keepim kongregeson klin.​—Matt. 18:17.

HAO FOR DEAL WITIM OLKETA SERIOUS SIN

²¹ Samfala serious sin olsem wei for durong, adultery, homosexual, for barava tok spoelem man, apostate, worshipim idol, and samfala big sin moa olsem, iumi bae no just forgive nomoa. (1 Cor. 6:9, 10; Gal. 5:19-21) Bikos datwan hem spoelem spiritual saed and wei wea kongregeson hem klin, iumi mas reportim kaen sin olsem lo olketa elder and olketa bae deal witim. (1 Cor. 5:6; Jas. 5:14, 15) Samfala brata or sista maet go lo olketa elder for talemaot sin blo olketa or reportim wat olketa savve abaotem rong wea narawan duim. (Lev. 5:1; Jas. 5:16) Nomata lo wanem wei nao olketa elder herem report abaotem bigfala rong wea wanfala baptaes witness hem duim, tufala elder bae duim wanfala investigation. Sapos pruv hem stap wea showim datfala report hem tru and man hia duim wanfala serious sin, body of elders bae assignim wanfala judicial komiti wea garem thrifala elder for deal witim datwan.

²² Olketa elder barava lukaftarem gud olketa sheepsheep for protectim olketa from eni samting wea bae spoelem spiritual saed blo olketa. Olketa traem best tu for savve hao for iusim toktok blo God for stretem eniwan wea duim sin and helpem olketa for gohed gud moa lo spiritual wei. (Jude 21-23) Diswan hem fitim samting wea aposol Paul talem lo Timothy, hem sei: “Christ Jesus bae judgem olketa wea laef and olketa wea dae, . . . front long hem and front long God mi talem iu for . . . stretem olketa brata, warnim olketa, and encouragem olketa. Taem iu duim diswan, iu mas barava patient and teach long gudfala wei.” (2 Tim. 4:1, 2) For duim diswan hem tek taem, bat hem part lo hard waka blo olketa elder. Kongregeson tinghae lo hard waka blo olketa elder and “hem fitim for olketa kasem bigfala respect.”​—1 Tim. 5:17.

²³ Lo evri situation wea samwan hem guilty, main goal blo olketa elder hem for helpem hem kamap gud moa lo spiritual wei. If hem barava repent and olketa fit for helpem hem, repruv wea hem kasem, nomata taem hemseleva or front lo olketa wea witnessim sin wea hem duim lo taem blo judicial hearing, datwan bae olsem discipline for hem and warning tu for evriwan wea lukim datwan. (2 Sam. 12:13; 1 Tim. 5:20) Lo evri case blo judicial repruv, olketa bae putim samfala restriction. Datwan bae helpem man wea duim sin for wakabaot moa followim “stretfala road.” (Heb. 12:13) Gogo if olketa lukim datfala brata or sista hem kamap gud moa lo spiritual wei, olketa bae aotem olketa restriction.

ANNOUNCEMENT FOR REPRUV

²⁴ If judicial komiti lukim hao datfala man hem repent bat luk olsem evriwan lo kongregeson or lo community savve abaotem rong wea hem duim, or if kongregeson mas careful lo datfala man wea duim sin wea repent, olketa bae talem wanfala short announcement lo Laef and Ministry Meeting. Hem shud olsem: “[Nem blo datfala man] hem kasem repruv.”

DECISION FOR DISFELLOWSHIP

²⁵ Samfala taem man wea duim sin, no willing for changem nogud wei blo hem and no laek for acceptim evri help wea olketa givim lo hem. Taem judicial komiti meet witim datfala man, maet olketa lukim hem no duim samting wea “showimaot [hem] repent”. (Acts 26:20) Hao nao bae olketa deal witim? Lo taem olsem, olketa fit for aotem man wea duim sin wea no repent from kongregeson, and bae hem no duim eni spiritual samting witim pipol blo Jehovah wea klin. Taem olketa aotem man wea duim sin, datwan bae mekem hem for no influencim kongregeson and protectim gudfala wei, spiritual saed, and gud nem blo kongregeson. (Deut. 21:20, 21; 22:23, 24) Taem aposol Paul savve lo nogud samting wea samwan lo kongregeson lo Corinth duim, aposol Paul talem olketa elder for “givim disfala man go lo Satan . . . , for protectim tingting bilong olketa long kongregeson.” (1 Cor. 5:5, 11-13) Paul storyim tu olketa narawan lo first century wea againstim truth and mas disfellowship.​—1 Tim. 1:20.

²⁶ Taem olketa disaed for disfellowshipim samwan wea duim sin and no repent, judicial komiti shud letem datfala man savve lo datfala disison, and talem klia olketa reason from Bible why hem disfellowship. Taem olketa talem disison hia lo datfala man wea duim sin, judicial komiti bae talem hem if hem ting dat olketa mekem wanfala big mistek taem olketa judgem hem and hem laek for appeal, hem shud raetem wanfala leta and talem klia reason why hem appeal. Olketa bae givim hem 7-fala day for duim diswan from taem wea komiti talem hem abaotem datfala disison. If body of elders kasem appeal leta, olketa bae contactim circuit overseer and hem bae chusim olketa elder wea qualify for stap lo wanfala appeal komiti for herem moa datfala case. Olketa bae traem best for conductim datfala appeal insaed wan week afta olketa kasem appeal leta. If wanfala appeal kamap, olketa bae no announcem yet dat man hia hem disfellowship. Taem datfala man weit for herem eni disison, hem bae no givim koment, prea lo olketa meeting or kasem eni spesol privilege.

²⁷ For appeal hem showim wei for kaen lo man wea duim sin and letem hem for storyim moa tingting blo hem. If datfala man wea duim rong samting no laek for kam lo taem blo appeal hearing nomata olketa traem best for contactim hem, olketa bae announcem nao dat hem disfellowship.

²⁸ If man wea duim rong samting no laek for appeal, judicial komiti bae explainim why hem important for hem repent and wat nao hem savve duim for reinstate moa. Olketa shud duim diswan lo kaenfala wei and helpem hem from olketa hope bae hem changem olketa wei blo hem and fit for kam bak moa lo organization blo Jehovah.​—2 Cor. 2:6, 7.

ANNOUNCEMENT FOR DISFELLOWSHIP

²⁹ Taem olketa need for disfellowshipim samwan wea duim sin wea no repent from kongregeson, olketa bae mekem wanfala short announcement olsem: “[Nem blo datfala man] hem no wanfala Jehovah’s Witness distaem.” Diswan bae mekem olketa faithful wan lo kongregeson for no associate witim datfala man.​—1 Cor. 5:11.

DISASSOCIATE

³⁰ Disfala toktok “disassociate” hem minim samwan wea baptaes finis bat no laek for followim wei blo olketa Christian and talem hao hem no laek for wanfala Jehovah’s Witness. Or hem maet duim samting wea showim hem no laek for stap insaed lo Christian kongregeson, olsem for joinim wanfala organization wea againstim olketa Bible teaching and from datwan hem kasem judgment from Jehovah God.​—Isa. 2:4; Rev. 19:17-21.

³¹ Lo taem blo Aposol John, hem raet olsem abaotem olketa wea lusim Christian faith blo olketa: “Olketa stap witim iumi firstaem bat then olketa lusim iumi bikos olketa no olsem iumi. Sapos olketa olsem iumi bae hard for olketa lusim iumi.”​—1 John 2:19.

³² Taem samwan hem disassociate, lo eye blo Jehovah, hem barava difren from wanfala Christian wea inactive wea no joinim nao field ministry. Samwan maet kamap inactive bikos hem no studyim toktok blo God evritaem. Or maet hem no strong for worshipim Jehovah bikos hem kasem samfala problem or persecution. Olketa elder and olketa narawan lo kongregeson bae hapi for gohed givim spiritual help lo wanfala Christian wea inactive.​—Rome 15:1; 1 Thess. 5:14; Heb. 12:12.

³³ Bat if wanfala Christian chus for disassociate, olketa bae letem kongregeson savve lo wanfala short announcement wea sei: “[Nem blo datfala man] hem no wanfala Jehovah’s Witness distaem.” Olketa bae treatim hem olsem samwan wea disfellowship.

REINSTATE

³⁴ Samwan wea disfellowship or disassociate from kongregeson savve reinstate taem hem showimaot klia hem repent and for lelebet longtaem nao hem stop for duim olketa nogud samting wea hem bin. Hem showim hem barava laek for fren gud witim Jehovah. Olketa elder careful for givim inaf taem, maet staka month, wanfala year or winim datwan, depend lo situation blo datfala man for pruvim dat hem really repent. Taem body of elders kasem wanfala leta from samwan wea request for reinstate, reinstatement komiti bae story witim datfala man. Datfala komiti bae lukluk gud lo olketa pruv wea showim hem repent and disaed sapos datfala man fit for reinstate or nomoa.​—Acts 26:20.

³⁵ If man wea laek reinstate hem disfellowship from nara kongregeson, reinstatement komiti lo kongregeson wea hem stap lo hem distaem bae meet witim datfala man and lukluk lo diswan. If olketa member lo datfala reinstatement komiti lukim hem fit for reinstate, olketa bae forwardim recommendation blo olketa for body of elders lo kongregeson wea deal witim datfala case. Olketa komiti hia bae waka tugeta for mek sure olketa kasem evri tru information for mekem stret disison. Bat disison for reinstate bae kam from reinstatement komiti blo kongregeson wea deal witim datfala case.

ANNOUNCEMENT FOR REINSTATE

³⁶ Taem reinstatement komiti barava sure man wea disfellowship or disassociate hem barava repent and hem shud reinstate, olketa bae mekem wanfala announcement for reinstate lo kongregeson wea deal witim datfala case. Sapos datfala man stap nao lo nara kongregeson, olketa bae talem wanfala announcement lo there tu. Announcement hia shud olsem: “[Nem blo datfala man] hem reinstate olsem wanfala Jehovah’s Witness.”

CASE BLO OLKETA PIKININI WEA BAPTAES FINIS

³⁷ If wanfala pikinini wea baptaes finis duim wanfala serious sin, olketa shud reportim lo olketa elder. Taem olketa deal witim case blo wanfala pikinini wea duim serious sin, hem gud for parents blo hem wea baptaes finis for stap tu. Olketa bae laek for waka tugeta witim judicial komiti, and no trae for protectim pikinini from discipline wea hem needim. Olsem taem olketa deal witim adult wea duim sin, judicial komiti traem best for givim kaonsel and helpem hem. Bat if datfala young wan hem no repent, hem bae disfellowship.

TAEM ANBAPTAES PABLISHA DUIM SIN

³⁸ Wat nao for duim taem olketa anbaptaes pablisa duim serious sin? From olketa no baptaes yet, olketa no savve disfellowship. Bat maet olketa no minim gud olketa standard lo Bible, so kaenfala kaonsel savve helpem olketa for followim “stretfala road”.​—Heb. 12:13.

³⁹ If wanfala anbaptaes pablisa wea duim sin hem no repent afta tufala elder story witim hem and trae for helpem hem, then olketa need for letem kongregeson savve. Olketa bae talem wanfala short announcement olsem: “[Nem blo datfala man] hem no wanfala anbaptaes pablisa distaem.” Kongregeson bae ting lo hem olsem man lo world. Nomata datfala man wea duim sin hem no disfellowship, olketa Christian mas careful taem olketa associate witim hem. (1 Cor. 15:33) Olketa bae no acceptim eni field service report from hem.

⁴⁰ Gogo, samwan wea anbaptaes pablisa bifor maet laek for pablisa moa. Lo taem olsem, tufala elder bae story witim hem for savve lo hao hem progress lo spiritual wei. If hem qualify, olketa bae talem wanfala short announcement olsem: “[Nem blo datfala man] hem anbaptaes pablisa moa distaem.”

JEHOVAH BLESSIM WORSHIP WEA KLIN AND GAREM WAN MIND

⁴¹ Evriwan wea stap lo kongregeson blo God distaem savve hapi lo spiritual paradaes wea Jehovah givim lo pipol blo hem. Iumi kasem staka kaikai from spiritual land blo iumi and iumi garem staka fresh wata blo truth. Iumi kasem tu protection from Jehovah thru lo theocratic arrangement blo hem anda lo hedship blo Christ. (Ps. 23; Isa. 32:1, 2) Lo olketa last day wea garem staka problem, iumi feel sef taem iumi insaed lo spiritual paradaes.

⁴² Taem iumi gohed for mekem kongregeson klin and garem wan mind, iumi gohed for mekem laet blo Kingdom truth hem saen. (Matt. 5:16; Jas. 3:18) Witim blessing blo God, iumi bae hapi for lukim staka pipol moa kasem savve abaotem Jehovah and worship tugeta witim iumi for duim will blo hem.