Jehovah Stap Witim Joseph

Taem Joseph stap lo prison, Pharaoh wea king lo Egypt garem olketa dream wea no eniwan savve talem mining blo olketa. Wanfala lo olketa servant blo Pharaoh talem hem dat Joseph savve talem mining blo olketa dream blo hem. Semtaem nomoa, Pharaoh talem olketa for go kolem kam Joseph.

Pharaoh askem hem: ‘Hao, iu savve talem mining blo olketa dream blo mi?’ Joseph talem Pharaoh: ‘Egypt bae garem staka kaikai for sevenfala year, bat for nara sevenfala year, bae hem taem blo bigfala hangere. Chusim samwan wea wise for stoarem gud olketa kaikai mekem pipol blo iu bae no hangere.’ Pharaoh sei: ‘Mi chusim iu! Iu nao bae mek-tu man lo Egypt wea garem big paoa!’ Hao nao Joseph savve lo mining blo olketa dream blo Pharaoh? Jehovah nao helpem Joseph.

For seven years, Joseph stoarem olketa kaikai. Then bigfala hangere happen lo full earth, barava olsem hao Joseph talem. Pipol lo evri ples kam for baem kaikai lo Joseph. Dadi blo hem Jacob herem dat olketa lo Egypt garem kaikai, so hem sendem tenfala son blo hem for go baem kaikai lo there.

Olketa son blo Jacob go lo Joseph, and semtaem nomoa hem luksavve lo olketa. Bat olketa brata blo hem no luksavve lo Joseph. Olketa baodaon lo hem, olsem hao hem dream abaotem taem hem young. Joseph laek for savve if olketa brata blo hem still garem wei for heit. So hem sei lo olketa: ‘Iufala olketa spae. Iufala kam for faendaot which area lo land blo mifala nao mifala no protectim.’ Olketa sei: ‘Nomoa ia! Mifala 12-fala brata wea stap lo land lo Canaan. Wanfala brata blo mifala hem dae, and lastborn hem stap witim dadi blo mifala.’ Then Joseph sei: ‘Mi bae bilivim iufala, sapos iufala tekem kam brata blo iufala.’ So olketa go bak lo dadi blo olketa.

Taem famili blo olketa no garem kaikai, Jacob sendem olketa son blo hem go bak moa lo Egypt. Distaem olketa tekem lastborn brata blo olketa Benjamin witim olketa. For testim olketa brata blo hem, Joseph haedem silver kap blo hem insaed bag blo Benjamin and then hem accusim olketa brata blo hem and sei olketa stealim datfala kap. Taem olketa servant blo Joseph faendem datfala kap lo bag blo Benjamin, olketa brata blo hem seke fogud. Olketa begim Joseph for panisim olketa, and no Benjamin.

So Joseph savve nao olketa brata blo hem change. Joseph no savve kontrolem feeling blo hem nao. Hem krae big and sei: ‘Mi Joseph, brata blo iufala. Hao, dadi blo mi laef yet?’ Olketa brata blo hem sapraes fogud. Then hem talem olketa: ‘Iufala no feel nogud bikos lo wat iufala duim. God nao sendem mi kam lo hia for sevem laef blo iufala. Iufala kwiktaem go bak and tekem kam dadi blo mi.’

Olketa go bak for storyim datfala gud nius lo dadi blo olketa and for tekem hem kam lo Egypt. Afta staka year, Joseph and dadi blo hem stap tugeta moa.