Wanfala Tabernacle for Worship

Taem Moses lo Maunt Sinai, Jehovah talem hem for wakem wanfala spesol tent wea olketa kolem lo tabernacle, hem ples for olketa Israelite savve worshipim Jehovah. Olketa savve karem datfala tabernacle witim olketa taem olketa muv lo olketa difren ples.

Jehovah sei: ‘Talem pipol for givim wat olketa fit for givim for wakem datfala tabernacle.’ Olketa Israelite givim gold, silver, copper, olketa spesol ston, and olketa jewelry. Olketa givim tu wool, linen, skin blo olketa animal, and staka nara samting. Olketa willing tumas for givim samting, gogo Moses mas talem olketa: ‘Iumi garem inaf! No tekem kam moa eni samting.’

Staka man and woman wea garem skill olketa help for wakem datfala tabernacle. Jehovah givim olketa wisdom for duim datfala waka. Samfala spinim wool, weavim kaleko, or stitchim design lo hem. Olketa narawan karvem olketa ston, wakem olketa samting from gold, or karvem wood.

Pipol hia wakem datfala tabernacle barava olsem hao Jehovah talem olketa. Olketa wakem wanfala naes curtain for divaedem datfala tabernacle lo tufala haf, Holy Rum and Most Holy Rum. Lo datfala Most Holy Rum hem garem ark blo covenant, wea olketa wakem from acacia wood and gold. Lo datfala Holy Rum hem garem golden lampstand, wanfala tebol, and altar for bonem incense. Lo datfala courtyard hem garem wanfala copper basin and wanfala big altar. Datfala ark blo covenant remindim olketa Israelite lo promis blo olketa for obeyim Jehovah. Iu savve wat nao wanfala covenant? Hem wanfala spesol promis.

Jehovah chusim Aaron and olketa son blo hem for olketa priest lo tabernacle. Olketa mas lukaftarem tabernacle and mekem offering lo there for Jehovah. Aaron wea hem hae priest, hem nomoa savve go insaed datfala Most Holy Rum. Hem go insaed Most Holy Rum wantaem lo year, for offerim sakrifaes for sin blo hemseleva, sin blo famili blo hem, and sin blo full nation blo Israel.

Olketa Israelite finis for wakem datfala tabernacle wan year bihaen olketa lusim Egypt. So olketa garem ples for worshipim Jehovah nao.

Glory blo Jehovah fulap insaed datfala tabernacle and wanfala cloud stap ontop lo hem. Sapos cloud ontop lo tabernacle no muv, olketa Israelite bae no muv tu. Bat taem datfala cloud hem muv, olketa savve hem taem for muv. Olketa bae aotem evri part blo datfala tabernacle and followim datfala cloud.