Wanfala Niu Leader and Tufala Woman wea No Fraet

Joshua leadim pipol blo Jehovah for staka year, and hem dae taem hem 110 years old. Full taem wea Joshua hem laef, olketa Israelite worshipim Jehovah. Bat bihaen hem dae, olketa start for worshipim olketa idol, olsem olketa Canaanite. From olketa Israelite no gohed obeyim Jehovah, Jehovah letem wanfala king lo Canaan wea nem blo hem Jabin for mekem laef blo olketa hard. Olketa Israelite begim Jehovah for helpem olketa. So Jehovah givim wanfala niu leader for olketa, wea nem blo hem Barak. Hem bae helpem olketa Israelite for kam bak lo Jehovah.

Deborah wanfala woman profet, sendem toktok go lo Barak. Hem garem wanfala message for hem from Jehovah wea sei: ‘Tekem 10,000 man, and go meetim army blo Jabin lo stream lo Kishon. Lo there, iu bae winim Sisera, bigman lo army blo Jabin.’ Barak talem Deborah: ‘Bae mi go sapos iu kam witim mi.’ Deborah sei: ‘Bae mi go witim iu. Bat iu mas savve ino iu nao bae killim dae Sisera. Jehovah sei wanfala woman nao bae killim hem dae.’

Deborah go witim Barak and army blo hem lo Maunt Tabor and redi for faet. Semtaem Sisera herem datwan, hem hipimap olketa war chariot blo hem and olketa soldia lo valley. Deborah sei lo Barak: ‘Tuday nao hem day wea Jehovah bae helpem iu for win.’ Barak and 10,000 man blo hem go daon followim maunten for meetim strongfala army blo Sisera.

Then Jehovah mekem stream lo Kishon for flood. So olketa war chariot blo Sisera pas insaed mud. Sisera go daon from chariot blo hem and hem ranawe. Barak and olketa soldia blo hem killim dae army blo Sisera, bat Sisera hem ranawe! Hem ranawe and haed insaed tent blo wanfala woman wea nem blo hem Jael. Jael givim milk lo Sisera and then kavarem hem lo blanket. From Sisera taed tumas hem deepim sleep nao. Then Jael wakabaot isisi go and hamarem tent pin lo hed blo hem, and hem dae nao.

Barak aftarem kam Sisera and kasem tent blo Jael, hem kam aot from tent blo hem and sei: ‘Kam insaed. Bae mi showim iu datfala man wea iu lukaotem.’ Barak go insaed and lukim Sisera leidaon and dae finis. Barak and Deborah singsing for praisem Jehovah from hem helpem olketa Israelite for winim olketa enemy. Bihaen datwan, Israel garem peace for 40 years.