Gabriel Go Visitim Mary

Elizabeth garem wanfala relative wea nem blo hem Mary, wea stap lo taon blo Nazareth lo Galilee. Mary engage witim Joseph, wanfala carpenter. Taem Elizabeth six month babule, angel Gabriel appear lo Mary. Hem sei: ‘Hello, Mary. Jehovah hem hapi lo iu.’ Hem no minim wat Gabriel talem. So angel hia sei lo hem: ‘Bae iu babule and bornem wanfala son, and iu mas nemim hem Jesus. Hem bae wanfala King. And Kingdom blo hem bae stap for olowe.’

Mary sei: ‘Bat mi no sleep witim eni man. Hao nao bae mi garem baby?’ Gabriel sei: ‘No eni samting hem hard lo Jehovah. Holy spirit bae kam lo iu and bae iu garem wanfala son. Relative blo iu Elizabeth tu hem babule.’ Then Mary sei: ‘Mi slave gele blo Jehovah. Samting wea iu talem lo mi mas olsem nao.’

Mary go lo wanfala taon lo olketa maunten for visitim Elizabeth. Taem Mary greetim hem, Elizabeth feelim baby insaed bele blo hem jamp nao. And holy spirit stap lo hem and hem sei: ‘Mary, Jehovah blessim iu. Hem spesol privilege for mi for mami blo Lord blo mi kam lo mi.’ Mary sei: ‘Mi praisem Jehovah witim full heart blo mi.’ Mary stap witim Elizabeth for thri months, and then hem go bak lo Nazareth.

Taem Joseph savve Mary hem babule, hem laek for finisim engagement blo tufala. Bat wanfala angel appear lo Joseph insaed wanfala dream and sei: ‘No fraet for maritim Mary. Hem no duim eni rong samting.’ So Joseph tekem waef blo hem Mary and go lo haos blo hem.