Olketa Angel Talemaot Jesus Hem Born

Caesar Augustus wea hem ruler blo Rome, mekem wanfala law for evri Jew go bak lo hom blo olketa for register. So Joseph and Mary go lo Bethlehem bikos hem hom blo Joseph. Lo datfala taem Mary babule big nao.

Taem olketa arrive lo Bethlehem, evri resthaos fulap finis so olketa stap lo haos blo olketa animal. Lo there nao Mary bornem Jesus. Hem pasolem hem lo olketa soft kaleko and leim hem insaed wanfala manger.

Klosap lo Bethlehem, samfala shepherd stap aotsaed lo naet for lukaftarem sheepsheep blo olketa. Seknomoa, wanfala angel standap front lo olketa and laet from Jehovah shaen raonem olketa. Olketa shepherd fraet fogud, bat datfala angel sei: ‘Iufala no fraet. Mi garem wanfala gud nius. Tuday Messiah hem born lo Bethlehem.’ Semtaem nomoa, staka angel appear lo skae and sei: ‘Praisem God wea stap lo heven, and peace lo earth.’ Then olketa angel hia disappear. Wat nao olketa shepherd hia duim?

Olketa shepherd sei lo each other: ‘Iumi mas go lo Bethlehem distaem.’ Olketa kwiktaem go nao and olketa lukim Joseph and Mary witim datfala baby wea leidaon insaed datfala manger.

Evriwan wea herem samting wea datfala angel talem lo olketa shepherd, olketa sapraes fogud. Mary ting raonem olketa toktok blo angel hia and hem no forgetim. Then olketa shepherd hia go bak for lukaftarem olketa sheepsheep, olketa gohed for mekhae lo Jehovah for evri samting wea olketa lukim and herem.