Jesus Resurrectim Lazarus

Jesus garem thrifala gud fren wea stap lo Bethany. Thrifala hia nao Lazarus and tufala sista blo hem, Mary and Martha. Wanday taem Jesus stap narasaed lo Jordan, Mary and Martha sendem go wanfala urgent message lo Jesus. Tufala sei: ‘Lazarus hem sik fogud. Plis kam kwiktaem!’ Bat Jesus no go kwiktaem. Hem weit for tufala day moa, then hem sei lo olketa disaepol blo hem: ‘Iumi go lo Bethany. Lazarus hem sleep and bae mi go for wekapem hem.’ Then olketa aposol sei: ‘If Lazarus hem sleep, datwan bae helpem hem for gud bak.’ So Jesus talem stret lo olketa olsem: ‘Lazarus hem dae nao.’

Taem Jesus arrive lo Bethany, hem fofala day finis bihaen olketa berem Lazarus. Staka pipol nao kam for comfortim Martha and Mary. Taem Martha herem Jesus kam, hem ran go for meetim hem. Hem sei: ‘Lord, sapos iu lo hia, bae brata blo mi no dae.’ Jesus sei lo Martha: ‘Brata blo iu bae laef bak. Hao, iu bilivim diswan?’ Hem sei: ‘Mi savve bae hem laef bak lo datfala resurrection.’ Jesus sei lo hem: ‘Mi nao resurrectim pipol and givim laef.’

Then Martha go lo Mary and sei lo hem: ‘Jesus hem kam nao.’ Mary ran go lo Jesus and datfala crowd followim hem. Hem nildaon front lo feet blo Jesus and gohed for krae. Hem sei: ‘Lord, if iu lo hia, hard for brata blo mi dae!’ Jesus lukim Mary krae fogud and hem tu start for krae. Taem olketa pipol hia lukim Jesus krae, olketa sei: ‘Lukim, Jesus lovem Lazarus tumas.’ Bat samfala ting olsem: ‘Why nao hem no sevem fren blo hem?’ Wat nao bae Jesus duim?

Jesus go lo datfala tomb, wea wanfala big ston nao satem. Hem talem olketa: ‘Aotem datfala ston.’ Martha sei: ‘Bat hem fofala day finis! Body blo hem bae smel nao ia.’ Nomata olsem, olketa aotem datfala ston and Jesus prea olsem: ‘Dadi, mi thankiu lo iu bikos iu herem mi. Mi savve iu evritaem herem mi, bat mi talem diswan bikos lo pipol wea standap lo hia mekem olketa bilivim dat iu nao sendem mi kam.’ Then hem singaot big olsem: “Lazarus, iu kamaot!” Wanfala sapraesing samting happen: Lazarus kamaot from datfala tomb and kaleko wea olketa pasolem lo hem still stap. Jesus sei: “Aotem kaleko hia mekem hem savve wakabaot.”

Staka wea lukim datwan garem faith lo Jesus. Bat samfala go and storyim lo olketa Pharisee. Start from datfala taem, olketa Pharisee laek for killim dae Lazarus and Jesus. Judas Iscariot wea hem wanfala lo 12-fala aposol go story haed lo olketa Pharisee and askem olketa olsem: ‘Haomas nao bae iufala peim mi if mi helpem iufala for faendem Jesus?’ Olketa agree for peim hem lo 30 silver shekel, and Judas start for lukaotem chance for givim Jesus go lo olketa Pharisee.