Lord’s Supper

Olketa Jew mekem Pasova evri year lo mek-14 day lo month blo Nisan. Diswan hem for remindim olketa lo hao Jehovah mekem olketa free from wei for slave lo Egypt and leadim olketa go insaed Promis Land. Lo year 33 C.E., Jesus and olketa disaepol blo hem duim Pasova lo Jerusalem insaed wanfala rum ontop. Taem olketa kaikai finis, Jesus sei: ‘Wanfala lo iufala bae hem betrayim mi.’ Olketa aposol seke fogud, and olketa askem Jesus: ‘Hu nao ia?’ Jesus sei: ‘Hem nao man wea mi bae givim bred lo hem.’ Then hem givim wanfala pis bred lo Judas Iscariot. Semtaem nomoa, Judas getap and lusim datfala rum.

Then Jesus hem prea, brekem samfala bred, and givim lo olketa aposol wea stap witim hem. Hem sei: ‘Kaikaim disfala bred. Diswan hem stand for body blo mi, wea bae mi givim for iufala.’ Then bihaen, hem prea for wine and givim lo olketa aposol blo hem. Hem sei: ‘Drinkim disfala wine. Diswan hem stand for blood blo mi, wea bae mi givim mekem iufala kasem forgiveness for sin blo iufala. Mi promisim iufala dat iufala bae rul witim mi lo heven. Duim diswan evri year for rememberim mi.’ So olketa follower blo Jesus hipap tugeta lo datfala semtaem evri year for duim datwan. Datfala hipap olketa kolem lo Evening Kaikai blo Lord.

Afta datwan, olketa aposol argue abaotem hu lo olketa nao hem important. Bat Jesus sei lo olketa: ‘Man wea important lo iufala mas olsem hem nao lastborn, wea no important tumas.

‘Iufala nao olketa fren blo mi. Mi talem iufala evri samting wea Dadi blo mi laekem mi for talem lo iufala. Klosap nao bae mi go bak lo Dadi blo mi lo heven. Iufala bae stap, and pipol bae savve iufala nao olketa disaepol blo mi taem iufala showim love lo each other. Iufala mas lovem each other olsem hao mi lovem iufala.’

Then, Jesus prea and askem Jehovah for protectim evri disaepol blo hem. Hem askem Jehovah for helpem olketa for waka tugeta and stap gud. Hem prea for nem blo Jehovah holy. Then Jesus and olketa aposol blo hem singsing for praisem Jehovah and olketa go nao. Hem klosap taem nao for olketa arrestim Jesus.