Jesus Dae lo Golgotha

Olketa chief priest tekem Jesus go lo palace blo Pilate. Hem askem olketa: ‘Wanem rong samting nao man hia duim?’ Olketa sei: ‘Hem sei hem wanfala king!’ Then Pilate askem Jesus: ‘Hao, iu nao King blo olketa Jew?’ Jesus sei: ‘Kingdom blo mi hem no part lo disfala world.’

Then Pilate sendem Jesus go lo Herod, ruler blo Galilee, for lukim if hem savve faendem eniting againstim hem. Herod no faendem eni rong samting wea Jesus duim so hem sendem hem go bak lo Pilate. Then Pilate sei olsem lo pipol hia: ‘Mi and Herod no faendem man hia guilty lo eni samting. Bae mi letem hem go free.’ Olketa pipol hia singaot olsem: ‘Killim hem dae! Killim hem dae!’ Olketa soldia whipim Jesus, spit lo hem and hitim hem. Olketa putim wanfala kraon lo hed blo hem wea garem olketa nila and mekfani lo hem olsem: ‘Hello, King blo olketa Jew.’ Pilate sei moa lo pipol hia: ‘Mi no faendem disfala man hem duim eni rong samting.’ Bat olketa singaot olsem: ‘Nilam hem lo post!’ So Pilate givim Jesus go lo olketa for olketa killim hem dae.

Olketa tekem Jesus go lo wanfala ples wea olketa kolem lo Golgotha, olketa nilam hem lo wanfala post and standimap. Then Jesus prea olsem: ‘Dadi, forgivim olketa bikos olketa no savve lo wat olketa duim.’ Pipol mekfani lo Jesus olsem: ‘If iu Son blo God, kam daon from datfala post! And sevem iuseleva.’

Wanfala lo olketa criminal wea hange saed lo Jesus sei lo hem: ‘Tingim mi taem iu king lo Kingdom blo iu.’ So Jesus promisim hem: ‘Iu bae stap witim mi lo Paradaes.’ Then lo datfala aftanun, evri ples hem dark fogud for thrifala hour. Samfala lo olketa disaepol blo hem standap klosap lo datfala post, includim Mary, wea hem mami blo Jesus. Jesus talem John for tekem Mary and lukaftarem olsem mami blo hem.

Bihaen, Jesus sei: “Mi duim finis evri samting wea iu askem mi for duim!” Then hem bendim daon hed blo hem and dae nao. Semtaem nomoa, wanfala big earthquake hem happen and datfala big curtain insaed lo temple wea separatem Holy rum and Most Holy rum hem brek start from ontop kasem botom. Wanfala army officer sei: ‘Tru nao, disfala man hem Son blo God.’