Jesus Appear lo Olketa Fisherman

No longtaem bihaen Jesus appear lo olketa aposol blo hem, Peter disaed for go fishing lo Sea blo Galilee. Thomas, James, John and samfala nara disaepol tu go witim hem. Olketa fishing for full naet bat olketa nating kasem eni fish.

Lo early morning, olketa lukim wanfala man standap lo shore. Hem singaot go lo olketa: ‘Hao, iufala kasem eni fish?’ Olketa sei lo hem: ‘Nomoa!’ Datfala man sei: ‘Torowem net blo iufala lo raet saed lo boat.’ Taem olketa duim datwan, net blo olketa hem fulap lo staka fish, gogo olketa no savve pullim go insaed lo boat. John kwiktaem luksavve datfala man hem Jesus and hem sei: ‘Hem Lord blo iumi!’ Semtaem nomoa, Peter jamp go insaed lo sea and swim go lo shore. Olketa nara disaepol kam bihaen insaed lo boat.

Taem olketa arrive lo sandbis, olketa lukim bred and fish ontop lo hot chakol. Jesus talem olketa for tekem kam samfala fish moa for bonem. Then hem sei lo olketa: ‘Iufala kam and kaikai.’

Taem olketa kaikai finis, Jesus askem Peter: ‘Hao, iu lovem mi winim fishing?’ Peter sei: ‘Ia, Lord, iu savve mi lovem iu.’ Jesus sei: ‘Then feedim olketa young sheepsheep blo mi.’ Jesus askem hem moa: ‘Peter, hao, iu lovem mi?’ Peter sei: ‘Lord, iu savve mi lovem iu.’ Jesus sei: ‘Lukaftarem olketa smol sheepsheep blo mi.’ Jesus askem hem mek-thri taem moa. Peter hem sorre tumas. Hem sei: ‘Lord, iu savve lo evri samting. Iu savve mi lovem iu.’ Jesus sei: ‘Feedim olketa smol sheepsheep blo mi.’ Then hem talem Peter: “Iu gohed followim mi.”