Jesus Go bak lo Heven

Jesus meet witim olketa follower blo hem lo Galilee. Hem givim wanfala barava important komand lo olketa: ‘Iufala go and teachim pipol lo evri kantri. Teachim olketa lo evri samting wea mi teachim lo iufala, and baptaesim olketa.’ Then hem promisim olketa: ‘Tingim diswan, bae mi stap evritaem witim iufala.’

Lo 40-fala day afta Jesus resurrect, hem appear lo staka handred disaepol blo hem lo Galilee and Jerusalem. Hem teachim olketa important leson lo olketa and duim staka mirakol. Then last taem wea Jesus hipap witim olketa aposol blo hem lo Maunt Olive. Hem sei: ‘Iufala no lusim Jerusalem. Gohed weitim samting wea Dadi promisim.’

Olketa aposol blo hem no minim wat hem talem. So olketa askem hem olsem: ‘Hao Lord, bae iu mekem Kingdom kamap moa lo Israel distaem?’ Jesus sei: ‘Hem no taem yet for Jehovah mekem mi for King. Klosap nao bae iufala kasem paoa from holy spirit and iufala bae witness abaotem mi. Go preach lo Jerusalem, Judea, Samaria and lo evri farawe ples lo earth.’

Then Jesus go ap lo skae and wanfala cloud kavarem hem. Olketa disaepol blo hem gohed for lukluk, bat hem lus nao.

Then olketa disaepol lusim Maunt Olive and go lo Jerusalem. Evritaem olketa savve hipap and prea lo wanfala rum ontop lo haos wea olketa stap. And olketa gohed for weitim samfala instruction moa from Jesus.